Luca 1
1
1Multsã oaminji s-apucarã s-arãdãpseascã aspunearea a faptilor tsi s-adrarã namisa di noi, 2ashã cum nã li alãsarã atselji tsi li vidzurã cu ocljilji a lor di tu apãrnjitã shi s-featsir huzmichearlji a zborlui. 3Nji pãru bunã sh-a-njia, dupã tsi li cãftai tuti lucrili cu arãvdari di tu ahurhita a lor, s-lã-tsi scriu cu aradã multu tinjisite Theofile, 4tsi tini s-cunoshti alihea a lucrilor tsi ti au nvitsatã.
Amintarea Prispus al Ioan Pãtidzãtorlu
5Tu dzãlili a Herodului, amirãlu a Iudeiljei, eara un preftu cu numa Zaharia, dit clasa al Abia. Muljearea a lui eara dupãyinitoara a Aaronlui shi s-acljima Elisabeta. 6Di doilji eara ndreptsã nãintea a Dumnidzãlui, imnãnda fãrã cusuri tu tuti dimãndãrili sh-legeli a Domnului. 7Ma nu avea cilimenji, cã Elisabeta eara stearpã sh-doilji eara tricuts di anji.
8Cãndu Zaharia ma fãtsea lucrul a lui ca preftu nãintea a Dumnidzãlui dupã arada a clasãljei a lui, 9dupã adetea a huzmitipsiriljei prifteascã, lj-cãdzu sortul s-intrã tu templul a Domnului tsi s-ardã timeamã. 10Multsãmea a popului stãtea nafoarã shi s-ruga tu oara a timeamãljei. 11Un anghil a Domnului tsi stãtea tu nandreapta a altarlui a timeamãljei, lji si fãnirusi al Zaharia. 12Zaharia cãndu lu vidzu, s-cutremburã sh-lu acãtsã frica. 13Anghilu lj-dzãsi: “Nu ti aspari, Zaharia, cã rugãciunea a ta s-avdzã sh-muljearea a ta Elisabeta va s-facã un ficior, sh-tini va lji-u badz numa Ioan. 14Sh-elu va hibã ti tini harauã sh-arsiri, sh-multsã va s-hãrseascã di amintarea a lui. 15Elu va hibã mari nãintea a Dumnidzãlui, nu va s-bea nitsi yin, nitsi biuturi vãrtoasi. Nãinti tsi s-amintã, va s-umplã cu Duhlu Sãmtu. 16Sh-elu va lji toarnã multsã di hiljilji al Israel la Domnul, Dumnidzãlu a lor. 17Sh-va neagã nãintea a Domnului cu duh sh-putearea al Elia, tra s-lji toarnã ininjli a pãrintsãlor la hiljilji, sh-rebiljilji la mintimeniljea a ndreptsãlor, tra s-lji etimãseascã a Domnului un popul etimu.” 18Zaharia ntribã anghilu: “Cum va u cunoscu aestã? Cã mini escu aush sh-muljearea a mea easti tricutã di anji.” 19Sh-anghilu lj-apãndisi: “Mini escu Gabrielu, tsi sta ningã Dumnidzãlu sh-escu pitricut tsi si zburãscu cu tini shi s-tsã dau aestã hãbari bunã. 20Sh-ia tini va armãnj mut sh-nu va pots s-greshti pãnã cãndu si mplineascã aesti, cã nu ai pistipsitã la zboarili a meali, tsi va si s-mplineascã tu chirolu a lor.” 21Populu ma ashtipta Zaharia shi s-ciudisea cã elu ma s-amãna ahãntu multu nãuntru tu templu. 22Cãndu ishi, elu nu putea s-lã grea a lor, atumtsea elji achicãsirã cã elu avea vidzut un viziuni tu templu. Elu lã fãtsea seamni a lor sh-armasi mut. 23Cãndu si mplinirã dzãlili a huzmitipsiriljei a lui prifteascã, elu s-nchisi cãtrã casa a lui. 24Dupã atseali dzãli Elisabeta, muljearea a lui armasi greauã shi s-ascumsi tsintsi meshi, dzãcãnda: 25“Ashãtsi featsi Domnul cu mini, tu atseali dzãli cãndu arcã mutrita a lui durutã cãtrã mini tra s-nji mutã arushinea nãintea a oaminjlor.”
Amintarea Prispus al Isus
26Tu meslu a shasea tsi Elisabeta eara greauã, anghilu Gabriel s-pitricu di la Dumnidzãlu tu un cãsãbã a Galileiljei, tsi s-acljima Nazaret, 27la unã virghinã, tsi eara susita a unui bãrbat cu numa Iosif, di casa al David. Numa a virghinãljei eara Maria. 28Anghilu s-dusi la ea sh-lji dzãsi: “Ghini ti aflai, tini mplinã di har, Domnul easti cu tini.” 29Ea s-tulburã di zboarili a lui, sh-minduia cã tsi soi di salutari eara aestã. 30Sh-anghilu lj-dzãsi: “S-nu ai fricã Marii, cã ai aflatã har nãintea a Dumnidzãlui. 31Ia, tini va armãnji greauã sh-va amintsã un ficior, sh-numa va lji-u badz Isus. 32Elu va hibã mari sh-va si s-acljeamã Hiljilu a Multu-Analtului. Domnul Dumnidzãlu va lji da thronlu al David, tatãl a lui. 33Elu va amirãreascã pisti casa al Iacov trã totãna sh-amirãriljea a lui nu va aibã pute bitisiri.” 34Maria ntribã anghilu: “Cum va s-fãcã aestã, cã mini ninga escu virghinã?” 35Anghilu lj-apãndisi: “Duhlu Sãmtu va dipunã pristi tini sh-putearea a Multu-Analtului va ti anvãleascã cu aumbra a lui. Trã atsea sãmtul tsi va s-amintã di la tini va s-acljeamã Hiljilu al Dumnidzãu. 36Elisabeta, cusurina a ta, sh-ea tu aushaticlu a ljei armasi greauã cu un ficior, sh-aestu easti meslu a shasea ti nãsã, tsi s-acljima stearpã. 37Trã Dumnidzãlu tsiva nu easti niputut.” 38Atumtsea Maria dzãsi: “Ia, mini escu huzmicheara a Domnului, s-nji undzeascã dupã zborlu a tãu.” Sh-anghilu s-dipãrtã di la ea.
Maria s-Dutsi la Elisabeta
39Tu dzãlili atseali Maria si sculã sh-neasi trãoarã cãtrã un loc dzinos la un cãsãbã di Iudea. 40Ea intrã tu casa al Zaharia sh-salutã Elisabeta. 41Macãt Elisabeta avdzã salutarea ali Marii, cilimeanlu ansãrã tu pãntic, sh-Elisabeta s-umplu cu Duhlu Sãmtu, 42sh-grãi cu boatsi analtã, dzãcãnda: “Tini eshti ghinicuvintat namisa di muljerili sh-ghinicuvintat easti frutlu a pãnticlui a tãu! 43Di iu nji yini aestã doarã, tsi muma a Domnului a meu s-yinã la mini? 44Cã ia, macãt agiumsi la urecljili a meali boatsea a salutariljei, cilimeanlu di harauã ansãrã tu pinticlu a meu. 45Cahara di atsea tsi pistipsi, cã atsiljei va lji si mplineascã tsi easti aspusã di la Domnul!”
Cãnticlu ali Marii
46Sh-Maria dzãsi:
“Suflitlu a meu l-mãreashti Domnul,
47sh-duhlu a meu s-hãrseashti tu Dumnidzãlu, Ascãpãtorlu a meu,
48cã elu vidzu cu arsiri aplicarea a huzmicheariljei a lui.
Di tora sh-nclo tuti gheneratsili va nj-dzãcã cahara,
49cã Puterniclu nj-featsi lucri mãri
sh-Sãmtu easti numa a lui!
50Sh-njila a lui va hibã di la bãrnu tu bãrnu
trã atselji tsi au fricã.
51Elu adrã fapti vãrtoasi cu bratslu a lui,
sh-dispãrtsã fudulji cu minduirili a ininjilor a lor.
52Arãsturnã vãrtoshlji dit thronurili a lor
sh-anãltsã aplicatsilji,
53lji umplu cu bunetsi agiunjilji
sh-lji scoasi nafoarã cu mãnjili goali avutslji.
54Elu agiutã Israelul, huzmichearlu a lui,
aducãnda aminti njila a lui,
55ashãtsi cum lj-avea tãxitã a pãrintsãlor a noshtri, a Abrahamului
sh-a urmashilor a lui di totãna.”
56Sh-Maria armasi cu Elisabeta vãrã trei meshi, deapoea s-turnã la casa a ljei.
Amintarea al Ioan Pãtidzãtorlu
57Shi ali Elisabeti lj-vini chirolu s-amintã, sh-featsi un ficior. 58Vitsinjlji sh-soia a ljei avdzãrã cã Domnul avea aspusã njilã mari cãtrã nãsã shi s-hãrsirã cu ea. 59Tu dzua a opta vinirã tsi s-fãtsea avãrliga-tãljearea a ficiorlui sh-vrurã s-lji bãga numa Zaharia, ca numa a tatã-sui. 60Ma muma a lui dzãsi: “Nu, va s-acljeamã Ioan.” 61Elji lji dzãsirã: “Nu easti vãrã tu soia a ta cu aestã numã.” 62Atumtsea ntribarã tatãl a lui cu seamni cã tsi numã vrea s-lji bãga. 63Elu cãftã un tablã shi scrie: “Numa a lui easti Ioan.” Sh-tuts s-ciudisirã. 64Sh-dinãoarã gura a lui s-discljisi, sh-limba s-dizligã sh-grãi, ghinicuvãntãnda Dumnidzãlu. 65Tuts vitsinjlji atsia aproapi lji acãtsã frica sh-tuti aesti tsi undzirã s-arãspãndirã tu tut loclu dzinos a Iudeiljei. 66Tuts atselji, tsi li avdzãrã aesti, li tsãnurã tu ininjli a lor dzãcãnda: “Tsi va si s-facã vahi aestu cilimean?” Sh-mãna a Domnului eara cu nãsu.
Cãnticlu al Zaharia
67Zaharia, tatãl a lui, s-umplu cu Duhlu Sãmtu sh-prufitipsi:
68“Ghinicuvintat s-hibã Domnul, Dumnidzãlu al Israel,
cã vini sh-ari faptã arãscumpãrarea a popului a lui.
69Elu anãltsã trã noi cornu a ascãpariljei,#1:69 Dumnidzãlu nã pitricu Isusul s-nã ascapã cu puteari.
tu casa al David, huzmichearlu a lui,
70ashã cum avea dzãsã cu gura a prufitsilor a lui sãmtsã
di cu chirolu atsel vecljiul,
71tsi noi s-ascãpãm di neamitsilji a noshtri
sh-di mãna a tutulor atsilor tsi nã aurãscu.
72Atumtsea aspusi njilã la pãrintsãlji a noshtri
sh-trã adutseari aminti trã pisti-ligãturea a lui atsea sãmta,
73trã spigiurarea tsi lji featsi al Abraham, tatãl a nostru,
74tsi noi dupã ascãparea di mãnjili a neamitsilor a noshtri,
s-nã axiseascã s-lji huzmitipsim fãrã fricã,
75tu sãmtãsiri sh-ndriptati nãintea a lui,
trã tuti dzãlili a banãljei a noastrã.
76Sh-tini, hilje, va ti acljenji prufitlu al Multu-Analtu,
cã tini va s-nedzi nãintea a Domnului trã etimãsiri cãljurili a lui,
77tra s-lji dai a popului a lui cunushtearea a ascãpariljei
prit ljirtarea a amãrtiilor a lor.
78Trã itia a njiluiriljei atsea ahãndoasa a Dumnidzãlui a nostru
arãsãritul a soarilui nã yini dit tser,
79tra s-lunjineadzã atselji tsi suntu tu scutidi
sh-tu aumbra a moartiljei,
shi s-cãlãuzeascã cicioarili a noastri tu calea a paciljei.”
80Cilimeanlu crishtea shi s-nvãrtushea tu duh, shi armasi tu irnjii pãnã tu dzua a aspuneariljei a lui nãintea al Israel.
נבחרו כעת:
Luca 1: BLRR
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
