റോമക്കാറാര് 12
12
സാമിന പിര്യപഡ്‌സ്‌റ പെ്ളേപ്പ്
1അദ്‌ണാലെ ഏസുക്കാറാരെ, സാമിക്ക് ണമ്മോഡിര്‌ക്ക ഗവണ ബെത്ത് ണോഡി ണാന് ണിമാക്ക് ബുദ്ദി സൊല്ലി പഡ്‌സ്‌റാദ് എന്തായെന്റ് സൊന്ന: സാമിക്ക് മെച്ച്‌പ്‌ഡിത്താദ്‌മ് സാമിക്ക് ബേ്ണ്ടി അലാക്ക പ്‌റ്‌ത്ത് ബെത്തിര്‌ക്കാദ്‌മാന ഉജുറുള്ള പലിയായി ണിമാണ താനെ സാമിക്ക് ഒപ്പഡിത്ത് കൊഡിരി. ഇദ്‌ത്തെ ണേര്‌മാന സാമി കുമ്മുഡ. 2ബേ്റെ ആള്‌ഗ പെ്ളേക്ക പാസെ പെ്ളേക്കാദെ സാമി ആസെപഡ്‌റ ണല്ലാദ്‌മ് ണേര് ആനാദ്‌മ് സാമിക്ക് മെച്ച്‌പ്‌ഡിത്താദ്‌മാന കാര്യഗ എന്തായെന്റ് ണിമ്മ തെര്യ ബേ്ണ്ടി ണിമ്മ് മനേസ്സ്‌ണ മാറ്റ്യ സാമി കയ്യിക്ക് ഒപ്പഡിത്ത് കൊഡിരി.
ഒത്തിമോഡെ പെ്ളേക്കുഡൊ
3ണിമ്മ എച്ച്‌ളവാരെന്ത് ണിമാക്ക് തെര്യു. ആന അദ്‌ണ ബ്‌ഡ ബെല്ല്യവാരെന്ത് ണെനേക്കാദെ സാമി ഒരൊരു ആള്‌ക്ക് തന്തിര്‌ക്ക ണമ്പിക്കേക്ക് തഗ്‌ന്ത പാസെ ബുദ്ദ്യുള്ളവാരായി ണെനേക്കുഡൊ എന്ത് സാമി എനാക്ക് സെയ്‌ദ പ്‌ണ്ണ്യണ ബെത്ത് ണിമാക്ക് സൊല്ലുറെ. 4ഒരു സരിഗലാത്തിലി പല മൂട്ടുമുറിഗ ഇര്‌ക്ക്‌ദല്ല. എല്ല മൂട്ടുമുറിഗാമ് ഒരേ ബേലെഗല്ല സെയ്‌രാദ്. 5അദേപാസെ പല ആള്‌ഗ ആയിര്‌ക്ക ണമ്മ ക്‌റ്‌സ്‌ത്ത്‌ക്ക് എജേന്താദ്‌ണാലെ ണമ്മ ഒരേ സരിഗല ആയിര്‌ക്കവാര്‌മ് ആങ്കീങ്ക് സരിഗലാത്തില്യ ഒരൊരു മൂട്ടുമുറിഗാമ്‌ത്തെ. 6അദ്‌ണാലെ സാമി ണമാക്ക് സെയ്‌ദ പ്‌ണ്ണ്യാക്ക് തഗ്‌ന്ത പാസെ പല ദിന്‌സ് ബരഗ ണമാക്ക് കെ്ഡേത്തിര്‌ക്ക്‌ദ്. അദ്‌ണാലെ സാമിക്ക് മന്‌സാരോഡെ സൊല്ല്യ ഇര്‌ക്ക കാര്യഗണ സൊല്ല്യ ഒരുത്താന്‌ക്ക് ബര കെ്ഡേത്തവാ് അയാള്‌ക്ക് ഇര്‌ക്ക ണമ്പിക്കേക്ക് തഗ്‌ന്ത പാസെ അയാള് അയ്യി കാര്യ സെയ്‌ഡൊ. 7ഉദാവി സെയ്യ ബര കെ്ഡേസിനവാ് ഉദാവി സെയ്‌ഡൊ. ബേദ പഡിസ്യ ബര കെ്ഡേസിനവാ് ബേദ പഡ്‌സുഡൊ. 8ബുദ്ദി സൊല്ല്യ ബര കെ്ഡേസിനവാ് ബുദ്ദി സൊല്ലുഡൊ. ദാന സെയ്യ ബര കെ്ഡേസിനവാ് മനേസ്സാറ ദാന സെയ്‌ഡൊ. തലെവാ് ആയ ബര കെ്ഡേസിനവാ് ണല്ല ബെ്ഡ്‌ബെ്ഡ്‌ത്ത് അയ്യി കാര്യഗ സെയ്‌ഡൊ. ഗവപഡ്‌റ ബര കെ്ഡേസിനവാ് അഡ്‌ത്തവാര്‌ക്ക് സെയ്‌ര കാര്യഗണ പിര്യപിര്യാത്ത് സെയ്‌ഡൊ.
സീവാ് ഉള്ളവാര് ആയിര്‌ക്കുഡൊ
9ണിമ്മ മനേസ്സാറ സീവാ് ബ്‌ഡ്‌റവാരായിര്‌ക്കുഡൊ. കെ്ട്ട കാര്യഗണ ആഗ എന്ത് തള്ളി ണല്ല കാര്യഗാക്ക് കെ്ട്ട്‌പട്ട് ണഡാന്ത് കൊള്ളിരി. 10ക്‌റ്‌സ്‌ത്ത്‌ണ ണമ്പിര്‌ക്ക ണിമ്മ ഒരേ പെറ്റ്‌പ്‌റാപ്പ്‌ഗണ പാസെ ആങ്കീങ്ക് സീവാ് ബ്‌ട്ട് ണഡായി. ആങ്കീങ്ക് മദ്‌സി ണഡാക്ക കാര്യാത്തിലി ണിമ്മ മുന്തിനവാര് ആയിരിരി. 11ണിമ്മ കള്ള ബീ്ഗാദെ ബെ്ഡ്‌ബെ്ഡ്‌ത്തിര്‌ന്ത് ആണ്ടവാ് സൊല്ലുറ കാര്യഗണ ബക്‌ദ്യോഡേമ് മനേസ്സാറാമ് സെയ്‌രി. 12ണിമ്മ ബെത്തിര്‌ക്ക ണെഞ്ചഡേലി ണിമ്മ പിര്യപൊങ്കിരി. ണിമാക്ക് ബര കജട്ടഗണ പൊറിമോഡെ താങ്കിരി. എപ്പ്‌മുള്ള പരേസാത്തിലി സോറ്റു പോഗാദെ ഇരിരി. 13സാമിക്ക് പട്ടവാര്‌ക്ക് ബേ്ഡുമാന കാര്യഗാക്ക് ഉദാവി സെയ്‌രി. ണിമ്മ് പട്ട്‌ക്ക് ബന്ത് പോരവാര്‌ണ ണലമായി ണോഡിമാഡി ബ്‌ഡിരി.
14ണിമാണ കൊഡിമെപഡ്‌സ്‌റവാര്‌ക്ക് ണല്ലാദ് ബരുഡൊ എന്ത് സൊല്ലിരി. സാപ ഇക്കാദെ അവാര്‌ക്ക് ണല്ലാദ് ബരുഡൊ എന്ത് സൊല്ലിരി. 15പിര്യപൊങ്ക്‌റവാര്‌ദൊപ്പ ണിമ്മാമ് പിര്യപൊങ്കിരി. അഗ്‌റവാര്‌ദ് ഒപ്പ ണിമ്മാമ് അഗിരി. 16ണിമ്മ ആങ്കീങ്ക് ഒത്തിമ്യോഡെ ഇരിരി. ണിമ്മ ബെല്ല്യവാരെന്ത് മേനാമ്പ് കാട്ടാദി, ഏ്ളെഗാക്കെ എ്ണേന്ത് ണഡായിരി, ണിമ്മ ണിമാണ ബുദ്ദിക്കാറാര് എന്ത് ണെനേക്കാദി.
17ആരാറ്റ് ണിമാണ കെ്ട്ടാദ് സെയ്‌ദ കെ്ട്ടാദ്‌ക്ക് ബദ്‌ള് കെ്ട്ടാദ് സെയ്യാദി. എല്ല ആള്‌ഗ കണ്ണ്‌ക്ക് പ്‌ഡിക്ക കാര്യ സെയ്യ ഓരാഡിരി. 18മുഡിന്ത അളാവുക്ക് എല്ല ആള്‌ഗോഡേമ് ഏനതാനത്തോഡെ ഇര്‌ന്ത്‌കൊള്ളിരി. 19എനാക്ക് മെച്ച്‌പ്‌ഡിത്തവാരെ, ണമ്മ പളിക്ക് പളി എ്ഡ്‌ക്കാദെ അദ്‌ക്കുള്ള പളി സാമിന എ്ഡ്‌ക്ക്യ ബ്‌ഡിരി. ബെല്ല്യവാനാന ആണ്ടവാ് ഇച്ചെ സൊല്ലുറാ്: <<ണാന് അവാര്‌ണ പളി എ്ഡ്‌ക്കുവെ, അവാര് സെയ്‌ദ പാവഗാക്ക് ണാന് അവാര്‌ണ ദണ്ടിക്കുവെ.>>#മറ്‌ദെ സൊല്ലുറ സട്ട 32:35 20ആന
<<ണിന്ന് പോട്ടിക്കാറാര്‌ക്ക് പജി പ്‌ഡിത്ത അവാന്‌ക്ക് തിന്ന്യ തീനി കൊഡ്,
തണ്ണിബേ്ക്കെ എ്ഡ്‌ത്ത കുഡിക്ക്യ തണ്ണി കൊഡു,
എന്ത്‌ക്കെന്റ ണീ അച്ചെ സെയ്‌ദാക്കി അയാള്‌ക്ക് ണാണ പ്‌ഡിക്കു>>#പള്യ സൊല്ലു 25:21,22
എന്ത് സാമി സൊല്ലുസുലാക്കാത്തിലി എ്ള്‌ദിര്‌ക്ക്‌ദല്ല. 21ണിമാക്ക് ആരാറ്റ് കെ്ട്ട കാര്യഗ സെയ്‌ദ ണിമ്മ അവാര്‌ക്ക് കെ്ട്ട കാര്യഗ സെയ്യ പാങ്കില്ലെ, ണല്ല കാര്യഗ സെയ്‌ദ് കൊഡുക്കാദ്‌ത്തെ ണിമ്മ്‌ദ് പെ്ളേപ്പായിര്‌ക്കുഡൊ.
נבחרו כעת:
റോമക്കാറാര് 12: സാമിദ് സേദി
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Life Literature