റോമക്കാറാര് 11
11
സാമി എഗുദാര്‌ണ ഒരേപെ്ട്ട് തള്ളമാട്ടാ്
1ആന ണാന് ഒന്റു കേ്ക്കെ, അച്ചാനാക്കി സാമി തന്ന്‌ദ് സൊന്ത ആള്‌ഗണ തള്ള്യെക്കിനാ് എന്ത? ഇല്ലേഗെ ഇല്ലെ, ണാന്‌മ് ഒരു ഇസ്‌റേല്‌ക്കാറാ്ത്തെ, അവുറഗാമ്‌ദ് കാല്‌ക്ക് പട്ടവാന്‌മ് ബെന്ന്യാമീന് കുലാക്ക് പ്‌റാന്തവാന്‌മ്‌ത്തെ. 2സാമി ണേരാത്ത്യെ തെരിന്തിര്‌ന്ത തന്ന് ആള്‌ഗണ തള്ളി എക്കാഗെ ഇല്ലെ. സാമി സൊല്ലുസുലാക്കാത്തിലി ഏല്യാവുണ പറ്റി സൊല്ലിര്‌ക്ക പട്ടിലി എ്ള്‌ദി ബെത്തിര്‌ക്കാദ് ണിമാക്ക് തെരിരാദില്ലേഗ? ഏല്യാവു ഇസ്‌റേല്‌ക്കാറാര്‌ക്ക് ണേരെ സാമിക്കെ സൊന്നാദ്: 3<<ആണ്ടവാനെ, അവാര് ണിന്ന് ദാസ്‌ഗണ കൊന്റാര്, അവാര് ണിനാക്ക് പലി കൊഡുക്ക മദ്‌ള്‌ണ പിദാരിന്താര്, ണാന് മാട്ട്‌ത്തെ മിഞ്ചിര്‌ക്കാദ്, അവാര് എനാണാമ് കൊല്ല്യ ണോഡിനാര്>>#1 റാജാവുഗ 19:10,14 എന്ത് സാമ്യോഡെ ബാദാഡ്‌ഗാട്ടി, 4സാമി ഏല്യാവുക്ക് കൊഡുത്ത ബദ്‌ള് എന്ത? <<ബാല് എങ്ക സെലേന കുമ്മുഡാത്ത ഏ്ളായിര ആള്‌ഗണ എനാക്ക് ബേ്ണ്ടി പേ്ണ്‌സി ബെത്തിര്‌ക്കെ>>#1 റാജാവുഗ 19:18 എന്ത്‌ത്തെ. 5അദേപാസെത്തെ ഈ കാലാത്തിലിമ് തന്ന് പ്‌ണ്ണ്യാത്തിലി സാമി തെരിന്തെ്ഡ്‌ത്ത ലേസ ആള്‌ഗ മിഞ്ചിര്‌ക്കാര്. 6ആന അവാര് സെയ്‌ദ കാര്യാത്തിലി അല്ല സാമി തന്ന് പ്‌ണ്ണ്യാത്തിലാക്കു അവാര്‌ണ തെരിന്തെ്ഡ്‌ത്തിര്‌ക്കാദ്. അവാര്‌ണ തെരിന്തെ്ഡ്‌ത്താദ് അവാര് സെയ്‌ദ കാര്യാത്തിലി ആയിര്‌ന്ത സാമിദ് പ്‌ണ്ണ്യ പ്‌ണ്ണ്യ അല്ല.
7അദ്‌ണാലെ എന്ത ണഡാന്ത്‌ദ്? ഇസ്‌റേല്‌ക്കാറാര് ണേര്‌മെക്കാറാര് ആയ ബേ്ണ്ടി ണോഡിനാര്. ആന അവാര്‌ക്ക് അദ് മുഡ്യാലെ. സാമി തെരിന്തെ്ഡ്‌ത്തവാര്‌ക്ക് അദ് കെ്ഡേത്ത്‌ദ്. ആന മിച്ച ഇര്‌ക്ക ആള്‌ഗ കല്ല് ണെഞ്ച്‌ക്കാറാര് ആനാര്. 8അദ്‌ണ പറ്റി സാമി സൊല്ലുസുലാക്കാത്തിലി ഇച്ചെ എ്ള്‌ദിര്‌ക്ക്‌ദ്:
<<ഇന്നാരമാട്ട്‌ക്ക്‌മ് സാമി,
അവാര് ണെഞ്ച്‌ണ ഉണാവു ഇല്ലാത്ത ണെഞ്ച്‌മ്,
കണ്ടാല്‌മ് അദ് എന്തായെന്റ് തെര്യാത്ത കണ്ണ്‌മ്,
കേ്ട്ടാല്‌മ് അദ് എന്തായെന്റ് ണെപ്പ്‌കെ്ഡേക്കാത്ത കാദ്‌മാക്കി ബെത്തിര്‌ക്കാ്.>>#മറ്‌ദെ സൊല്ലുറ സട്ട 29:4; എസയ്യാ് 29:10
9ദാവീദ് ഇച്ചെ സൊല്ലിര്‌ക്കാ്:
<<അവാര് അഡ്‌റ ബിര്‌ന്ത് അവാര്‌ണ താനെ സദിക്കെ സിക്ക്‌സ്‌റാദ്‌മ്,
കണ്ണിക്കെ പഡ്‌സ്‌റാദ്‌മ് ആഡൊ.
അവാര് അദ്‌ക്കെ പട്ട്
അദ്‌ക്കുള്ള ദണ്ടണെ അവാര്‌ക്ക് താനെ കെ്ഡേക്കുഡൊ.
10അവാര്‌ദ് കണ്ണ് ഇ്റ്‌ട്ടൂറി കണ്ണ് കെ്ട്ടെക്കുഡൊ,
കജട്ടപഡ്‌റാദ്‌ണാലെ അവാര്‌ദ് ഇ്ഡ്‌പ്പ് മുറുന്തെക്കുഡൊ.>>#സാമി പാട്ട് ബുക്ക് 69:22,23
11അദ്‌ണാലെ ണാന് ഒന്റു കേ്ക്കെ, അവാര്‌ദ് കാല് തട്ടിനാദ് ഒരേപെ്ട്ട് ബ്‌ന്തെക്ക്യാഗ? ഇല്ലേഗെ ഇല്ലെ. അവാര് തപ്പി പോനാദ്‌ണാലെ എഗുദാര് അല്ലാത്ത ജാദിഗണ സാമി ദെങ്ക്‌സിനാ് എന്ത് മാട്ട്‌ത്തെ. അവാര്‌ക്ക് കണ്ണ്‌കഡി ബര്‌സ്യ ബേ്ണ്ടിത്തെ സാമി അച്ചെ സെയ്‌ദാദ്. 12അവാര് തപ്പി പോനാദ്‌മ് അവാര്‌ക്ക് ബന്ത ണജട്ടാമ് ഉലഗാത്തില്യ ആള്‌ഗാക്ക്‌മ് എഗുദാര് അല്ലാത്ത ജാദിഗാക്ക്‌മ് ണല്ലാദ് ബര്യ ബെത്ത്‌ദ്. ഇസ്‌റേല്‌ക്കാറാര് മുച്ചുഡ സാമിക്ക് ബേ്ണ്ടി ണിന്റിര്‌ന്തിര്‌ന്ത ഉലഗാക്ക് എത്തറാഗൊ ണല്ലാദ് ബന്തിര്‌ക്കു?
13ആന എഗുദാരല്ലാത്ത ജാദിഗാക്ക് ണാന് ഇച്ചെ സൊല്ലുറെ. ണാന് ണിമാക്ക് അപ്പൊസലനായി ബേലെ സെയ്‌രാദ്‌ണ പറ്റി ണാന് പെര്‌മെപഡ്‌റെ. 14എന്ത്‌ക്കെന്റ ഇച്ചെ സെയ്‌രാദ്‌ണാലെ എഗുദാര്‌ക്ക് എര്‌സ ബര്‌സി അവാര്‌ദിലി ലേസ ആള്‌ഗണ ദെങ്ക്‌സുഡൊ എന്ത് ണാന് ണെനേക്കെ. 15അവാര്‌ണ തള്ള്യെക്കിനാദ്‌ണാലെ ഉലഗാത്തില്യ മന്‌സാര്‌ക്ക്‌മ് സാമിക്ക്‌മ് റാജി കൂഡ്യ മുഡിന്ത്‌ദ്. അച്ചെ ആനാക്കി സാമി ഇസ്‌റേല്‌ക്കാറാര്‌ണ ഇനി സേത്തി ബെക്കാദാനാക്കി അദ് സത്തവാര് ഉജുറെ്റാദ്‌ക്ക് സമ എന്ത് അല്ലാദെ ബേ്റെ എന്തായെന്റ് സൊല്ല്യ മുഡ്യു? 16തലേപ്പ്‌സാരി സാമിക്കുള്ളാദ് ആയിര്‌ന്താക്കി മിച്ച ഇര്‌ക്കാദൊട്ടുക്ക്‌മ് സാമിക്കുള്ളാദ്‌ത്തെ. ഒരു മരാദ് ബേര് സാമിക്കുള്ളാദായിര്‌ന്ത അദ്‌ദ് താറ് തലേപ്പ്‌മ് സാമിക്കുള്ളാദായിര്‌ക്കു.
17എഗുദാര് ഊര് ഒലിവ് മരാക്ക് സമ. എഗുദാര് അല്ലാത്ത ണിമ്മ സോലെ ഒലിവ് മരാക്ക് സമ. അച്ചെ ഇര്‌ക്കാട്ടി ഊര് ഒലിവ് മരാദ് ലേസ താറ്‌ണ ബെ്ട്ടി എക്കി സോലെ ഒലിവ് മര താറായിര്‌ന്ത ണിനാണ ഊര് ഒലിവ് മര സത്ത്‌ക്ക് പങ്ക്‌ക്കാറാ് ആയ ബേ്ണ്ടി ണിനാണ അദ്‌ക്കെ ഒട്ടിസിനാ്. 18അയ്യി ബെ്ട്ടി തള്ളിന താറ്‌ഗാക്കെ ണിനാണ എ്ണേത്ത് ണോഡി ണീ ണിനാണ താനെ പെര്‌മെപഡാദെ. അച്ചെ പെര്‌മെപഡ്‌റദാനാക്കി ണീ ഒരു കാര്യ ണെനേക്കുഡൊ ണീ അല്ല ബേര്‌ണ സുമാക്കാദ്, ബേര്‌ത്തെ ണിനാണ സുമാക്കാദ്. 19ആന <<അയ്യി താറ്‌ഗണ ബെ്ട്ട്യെക്കിനാദ് എനാണ അദ്‌ക്കെ സേത്തി ഒട്ടിസ്യാത്തെ>> എന്തേങ്ക് ണീ സൊന്നാലൊ. 20അദെല്ല സെരിത്തെ, ആന അവാര് ണമ്പാത്താദ്‌ണാലെത്തെ അവാര്‌ണ ബെ്ട്ടി എക്കിനാദ്. ണീ ണമ്പിനാദ്‌ണാലെത്തെ അയ്യി മരാദ് താറ്‌ഗായി ഇപ്പ്‌മ് ഇര്‌ക്കാദ്. അദ്‌ണാലെ മേനാമ്പ് കാട്ടാദെ അഞ്ച്യറ്‌ന്ത് പെ്ളെ. 21ഊര് ഒലിവ് മരാദ് താറ്‌ഗണാഗെ ബെ്റ്‌ദെ ബ്‌ഡാത്ത സാമി ണിനാണാമ് ബെ്റ്‌ദെ ബ്‌ഡുവാ് എന്ത് ണെനേക്കാദെ.
22അദ്‌ണാലെ സാമി എത്തറ ഗവക്കാറാ് എന്ത്‌മ് എത്തറ കഡ്‌പ്പുള്ളവാ് എന്ത്‌മ് ഇദ്‌ണ ബെത്ത് കാണില. തപ്പി പോനവാര്‌ക്ക് സാമി എത്തറാഗൊ കഡ്‌പ്പുള്ളവാത്തെ. ആന സാമി ഗവാത്തിലി ണീ ണമ്പികൊണ്ടിര്‌ന്ത ണിന്നോഡെ സാമി ഗവ കാട്ടു‌വാ്. ഇല്ലാദെ പോന സാമി ണിനാണാമ് ബെ്ട്ടി എ്ഡ്‌ത്തെക്കുവാ്. 23അവാര് ണമ്പിക്കില്ലാത്ത മനേസ്സ്‌ണ ബ്‌ട്ട് മറ്‌ദേമ് സാമിന ണമ്പിന അവാര്‌ണ സാമി പിന്നേമ് ഒട്ടുസുവാ്. അവാര്‌ണ മറ്‌ദേമ് ഒട്ടിസ്യ സാമി ബെജെ ഉള്ളവാ്ത്തെ. 24സോലേലി കൊഡിത്ത് ബളാന്ത ഒലിവ് മരാത്തിലിര്‌ന്ത് ണിനാണ ബെ്ട്ടി എ്ഡ്‌ത്ത് ഊര് ഒലിവ് മരാക്ക് ഒട്ടിസിര്‌ക്കദാനാക്കി ഊര് ഒലിവ് മരാത്തില്യ താറ്‌ഗ ആനവാര്‌ണ അദേ ഒലിവ് മരാക്ക് ഒട്ടുസ്യ എത്തറാഗൊ മനേസ്സുള്ളവാ്ത്തെ.
25ഏസുക്കാറാരെ, ണിമ്മ ണല്ല ബുദ്ദിക്കാറാര് എന്ത് ണിമ്മ ണിമാണ താനെ ണെനേക്കാദിര്‌ക്ക്യ ഈ കാര്യ ണിമ്മ തെര്യാദെ ഇര്‌ക്കാദി എന്ത് ണാന് ആസെപഡ്‌റെ. എഗുദാര് അല്ലാത്ത ജാദിഗളിലിര്‌ന്ത് സാമി സാരി ബര ആള്‌ഗാദ് കണാക്ക് തെഗേഗ മാട്ട് ലേസ ഇസ്‌റേല്‌ക്കാറാര് കല്ല് ണെഞ്ച്‌ക്കാറാര് ആയിര്‌ക്കാര്. 26അച്ചെ കണാക്ക് തെഗേന്ത എല്ല ഇസ്‌റേല്‌ക്കാറാര്‌മ് ദെങ്കുവാര്.
<<ദെങ്ക്‌സ്‌റവാ് സീയോനിലിര്‌ന്ത് ബരുവാ്.
ആക്കോവുദ് കാല്‌കെ്ളേലി സാമിദ് ആസെപഡി ണഡാക്കാദെ പെ്ളേക്ക പെ്ളേപ്പ്‌ണ ഇല്ലാദാക്കി
സാമിദ് ആസെപഡി ണഡാക്ക പെ്ളേപ്പ് പെ്ളേക്കവാര് ആക്കുവാ്.
27ഇദ്‌ത്തെ ണാന് അവാര്‌ദ് പാവഗണ ഇല്ലാദാക്ക്‌ഗാട്ടി
ണാന് അവാരോഡെ ബെത്ത ഒപ്പ്‌കെ്ട്ട്>>#എസയ്യാ് 59:20,21; എസയ്യാ് 27:9; ഇരെമ്യാ് 31:31,34
എന്ത് സാമി സൊല്ലുസുലാക്കാത്തിലി എ്ള്‌ദിര്‌ക്ക്‌ദല്ല.
28എഗുദാര് ണല്ല സേദിന ണമ്പാദെ ബേ്ഡ എന്ത് ബെത്താര്. ആന അദ് ണിമാക്ക് ഉവഗാരപട്ട്‌ദ്. അച്ചെ ണിമ്മ അയ്യി സേദിന ണമ്പിനേര്. അച്ചെ അവാര് സാമിക്ക് പോട്ടിക്കാറാര് ആനാര്. ആന സാമി അവാര് പാട്ടലണാമ് അവാര്‌ണാമ് തെരിന്തെ്ഡ്‌ത്താദ്‌ണാലെ അവാര് സാമിക്ക് മെച്ച്‌പ്‌ഡിത്തവാര്‌ത്തെ. 29എന്ത്‌ക്കെന്റ സാമി താന് തെരിന്ത് എ്ഡ്‌ത്തവാര്‌ണാമ് അവാര്‌ക്ക് കൊഡുത്ത ബാക്ക്‌വരഗണാമ് മാറ്റ്യ സാമി മനേസ്സ് ബെക്കാദ്‌മില്ലെ. 30ണേരാത്തിലി ണിമ്മ സാമി സൊല്ലുപഡി ണഡാക്കാദിര്‌ന്തവാര് ആയിര്‌ന്തേര്. ആന എഗുദാര് സാമി സൊല്ലുപഡി ണഡാക്കാത്താദ്‌ണാലെ സാമി ഇപ്പ് ണിമാണ ഗവപട്ടിര്‌ക്കാ്. 31അച്ചെ സാമി ണിമാണ ഗവപട്ട പാസെ അവാര്‌ണാമ് ഗവപഡ്യ ബേ്ണ്ടി അവാര് ഇപ്പ് സാമി സൊല്ലുപഡി ണഡാക്കാത്തവാര് ആയിര്‌ക്കാര്. 32അച്ചെ എഗുദാര്‌ണാമ് എഗുദാരല്ലാത്തവാര്‌ണാമ് സാമി തന്ന് സൊല്ലുപഡി ണഡാക്കാത്തവാര് ആയ ബ്‌ട്ടാ്. എന്ത്‌ക്കെന്റ എല്ല ആള്‌ഗണാമ് സാമി ഗവപഡ്യ ബേ്ണ്ടിത്തെ.
33അവ്വൊ, സാമിക്കിര്‌ക്ക ഗവണാമ് ബുദ്ദിനാമ് അറുവുണാമ് ആര്‌ക്ക് അളാക്ക്യ മുഡ്യു?
സാമി ബിദിക്ക ബിദിന ആര്‌ക്ക് സൊക്കാന സൊല്ല്യ മുഡ്യു?
അയാള് എന്ത സെയ്‌രാനെന്ത്‌മ് എച്ചെ സെയ്‌രാനെന്ത്‌മ് ആര്‌ക്ക് ണെപ്പ്‌കെ്ഡേസ്യ മുഡ്യു?
34സാമി ബുക്കിലി ഇച്ചെ എ്ള്‌ദിര്‌ക്ക്‌ദ്:
<<ആണ്ടവാന്‌ദ് മനേസ്സിലി ഇര്‌ക്കാദ് എന്തായെന്റ് ആര്‌ക്ക്‌മ് തെര്യമാട്ട.
സാമിക്ക് ബുദ്ദി സൊല്ലികൊഡുക്ക്യ ആര്‌ക്ക്‌മ് മുഡ്യമാട്ട.>>#എസയ്യാ് 40:13
35<<തിലിപ്പി ബാങ്ക്യ എന്ത് ണെനേത്ത്
സാമിക്ക് എന്താറ്റ് കൊഡുത്തവാ് ഇര്‌ക്കാന?>>#ഇയോവു 41:11
36എല്ലാദ്‌മെ സാമിലിര്‌ന്ത് ഉണ്ടാറ്റ്.
അദ് സാമിമേലേമ് സാമിക്ക് ബേ്ണ്ടിമ്‌ത്തെ ഉണ്ടാനാദ്.
സാമി എപ്പേക്ക്‌മ് പേര്‌പെര്‌മെ ഉള്ളവാനായിര്‌ക്കുഡൊ. ആമെ.
נבחרו כעת:
റോമക്കാറാര് 11: സാമിദ് സേദി
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Life Literature