റോമക്കാറാര് 1
1
പവുലോസ്‌മ് ണല്ല സേദിമ്
1സാമി, തന്ന് മഗാന്‌മ് ണമ്മ് ആണ്ടവാന്‌മാന ഏസു ക്‌റ്‌സ്‌ത്ത്‌ണ പറ്റി മുന്തുക്കേത്ത കാലാത്തിലി ആള്‌ഗാക്ക് ബാക്ക് കൊഡുത്തിര്‌ന്ത ണല്ല സേദിന സാമി സൊല്ലുസുലാക്കാത്തിലി സാമിദാസ്‌ഗ എ്ള്‌ദി ബെത്തിര്‌ക്കാര്.
2ഈ ണല്ല സേദിന സൊല്ല്യ ബേ്ണ്ടി അലാക്ക പ്‌റ്‌ത്ത് ബെത്തിര്‌ക്കവാന്‌മ് അപ്പൊസലനായി ഒളേത്തിര്‌ക്കവാന്‌മ് ക്‌റ്‌സ്‌ത്ത് ഏസുദ് ബേലെക്കാറാന്‌മാന പവുലോസ് എങ്ക ണാന്, 3റോമ പട്ടണാത്തിലി സാമിക്ക് മെച്ച്‌പ്‌ഡിത്തവാര്‌മ് സാമി ഒളേത്തിര്‌ക്കവാര്‌മ്, സാമിക്ക് പട്ടവാര്‌മാന ആള്‌ഗാക്ക് ഒട്ടുക്ക് എ്ള്‌ദ്‌റ എ്ള്‌ത്ത്. 4ണമ്മ്‌ദ് അപ്പനാന സാമിമ് ആണ്ടവനാന ഏസു ക്‌റ്‌സ്‌ത്ത്‌മ് ണിമാക്ക് പ്‌ണ്ണ്യാമ് സെയ്‌ഡൊ ണിമാണ ണിമ്മദ്യോഡേമ് ബെക്കുഡൊ. 5മന്‌സാനായി പ്‌റാന്താദിലി ബെത്ത് ണോഡിന ഏസു ക്‌റ്‌സ്‌ത്ത് ദാവീദ് കാല്‌ക്ക് പട്ടവാനായി പ്‌റാന്താ്. സത്തിര്‌ന്ത് ഉജുറെ്ന്താദ്‌ണാലെ സുത്താപ്പുള്ള ണിഗാല് ഇര്‌ക്കാദ്‌ണ ബെത്ത് ണോഡിന അവാ് സാമിമഗാ് എങ്ക പവുറുണ കാട്ട്‌റാ്. 6എല്ല ജാദിഗാക്ക് പട്ട ആള്‌ഗാമ് അവാന ണമ്പി അവാന്‌ദ് സൊല്ലുപഡി ണഡാക്കവാര് ആഡൊ. അദ്‌ണാലെ എമാണ അയ്യി ക്‌റ്‌സ്‌ത്ത്‌ക്ക് ബേ്ണ്ടി ഈ കാര്യ സെയ്യാത്തെ സാമി പ്‌ണ്ണ്യാത്തി അപ്പൊസലല ആക്കിനാദ്.
7അയ്യി കൂട്ടാത്തിലി സാമി ഏസു ക്‌റ്‌സ്‌ത്ത്‌ക്ക് ബേ്ണ്ടി ഒളേത്തിര്‌ക്ക ണിമ്മാമ് എ്ണേന്തിര്‌ക്കേര്.
8ണിമ്മ്‌ദ് ണമ്പിക്കേന പറ്റി ഉലഗ മുച്ചുഡ കേ്ട്ടിര്‌ക്കാദ്‌ണാലെ ഏസു ക്‌റ്‌സ്‌ത്ത്‌ദ് പേരിലി ണിമ്മ എല്ലാര്‌ക്ക്‌മ് ബേ്ണ്ടി മുദതാനെ എന്ന് സാമിക്ക് ണണ്ണി സൊല്ലുറെ. 9സാമി ആസെപഡ്‌റ ഗള്യേക്ക് ണിമാണ ബന്ത് കാണ്യ ണാന് എപ്പ്‌മ് ണിമാണ ണെനേത്ത് കൊണ്ട് പരേസ്‌റെ. ഈ കാര്യ സാമിമഗാന പറ്റ്യുള്ള ണല്ല സേദിന സൊല്ലികൊണ്ട് ണാന് മനേസ്സാറ കുമ്മുഡി ണഡാക്ക എന്ന് സാമിക്ക് തെര്യു. 10സാമി ആസെപഡ്‌റ ഗള്യേക്ക് ണിമാണ ബന്ത് കാണ്യ ബേ്ണ്ടി ഒപ്പ സാമിന ണാന് ബേ്ണ്ടികൊള്ളുറെ.
11ക്‌റ്‌സ്‌ത്തോഡെ ബെത്തിര്‌ക്ക ണമ്പിക്കേലി ണിമാണ ഒറേത്തവാര് ആക്ക്യ ഏദാറ്റ് ഒരു ബര ണിമാക്ക് തര്യ ബേ്ണ്ടി ണിമാണ കാണ്യ ണാന് ആസെപഡ്‌റെ. 12എന്ത് സൊന്ന എന്ന് ണമ്പിക്ക്യാലെ ണിമാക്ക്‌മ് ണിമ്മ് ണമ്പിക്ക്യാലെ എനാക്ക്‌മ് അച്ചെ ണമ്മ് റണ്ട് കൂട്ടാര്‌ദ് മനേസ്സ്‌മ് ദ്‌ഡ്‌ക്കെന്തായ ബേ്ണ്ടിത്തെ. 13അദ്‌ണാലെ ഏസുക്കാറാരെ, ണാന് സെയ്‌ദ കാര്യണാലെ എഗുദാര് അല്ലാത്ത ജാദിഗളിലി ക്‌റ്‌സ്‌ത്ത്‌ക്ക് ആള്‌ഗണ കെ്ഡേസിന പാസെ ണിമ്മ് പട്ടിലിമ് ലേസ ആള്‌ഗണ കെ്ഡേസ്യ ബേ്ണ്ടി എത്തിന്യൊ ബെജെ ണാന് ണിമ്മ് പട്ട്‌ക്ക് ബര്യ ണെനേത്തെ. ആന ഇന്നാരമാട്ട്‌ക്ക്‌മ് അദ്‌ക്ക് തഡെ ബന്ത്‌ദ് എങ്കാദ്‌ണ ണിമ്മ തെരിന്തിര്‌ക്കുഡൊ എന്ത് ണാന് ആസെപഡ്‌റെ.
14അറുവുള്ള ഗ്‌റീക്ക് ജാദിക്കാറാര്‌ക്ക്‌മ് അറുവില്ലാത്ത ബറ്‌ബറ ജാദിക്കാറാര്‌ക്ക്‌മ് പഡിപ്പിര്‌ക്കവാര്‌ക്ക്‌മ് പഡിപ്പില്ലാത്തവാര്‌ക്ക്‌മ് ണാന് ണല്ല സേദിന സൊല്ല്യ കഡാമെപട്ടവാ്ത്തെ. 15അദ്‌ണാലെ റോമ പട്ടണാത്തിലിര്‌ക്ക ണിമാക്ക്‌മ് എനാക്ക് മുഡിന്ത അളാവുക്ക് ണല്ല സേദിന സൊല്ല്യ ണാന് ഒരുങ്കിര്‌ക്കെ.
16ണല്ല സേദിന പറ്റി എനാക്ക് ണാണ ഇല്ലെ പെര്‌മെത്തെ. എന്ത്‌ക്കെന്റ് സൊന്ന ണല്ല സേദിന ണമ്പ്‌റ ഏവാര്‌ക്ക്‌മ് മുദ എഗുദാന്‌ക്ക്‌മ് പ്‌റ എഗുദാര് അല്ലാത്ത ജാദിഗാക്ക്‌മ് ദെങ്കി കഡാക്ക്യുള്ള സാമി സക്‌ദി അദിലിര്‌ക്ക്‌ദ്. 17ബേ്റെ ഒന്റിലിമ് അല്ല ണമ്പിക്കാലെത്തെ ആള്‌ഗണ സാമി തന്ന് മുന്നുക്ക് ണേര്‌മെക്കാറാ് ആക്ക്‌റാദ് എന്ത് ഈ ണല്ല സേദിലി കാട്ട്‌ദ്. <<സാമി മുന്നുക്ക് ണേര്‌മെക്കാറാ് ആയിര്‌ക്കവാ് ണമ്പിക്കാലെ പെ്ളേക്കുവാ്#1:17സാമി മുന്നുക്ക് ണേര്‌മെക്കാറാ് ആയിര്‌ക്കവാ് ണമ്പിക്കാലെ പെ്ളേക്കുവാ് ണമ്പിക്കാലെ സാമി മുന്നുക്ക് ണേര്‌മെക്കാറാ് ആനവാ് പെ്ളേക്കുവാ് എന്ത്‌മ് എ്ള്‌ദില>>#അബുക്കൂക്കു 2:4 എന്ത് സാമി സൊല്ലുസുലാക്കാത്തിലി എ്ള്‌ദിര്‌ക്ക്‌ദല്ല.
മന്‌സാര്‌ദ് പാവാമ് അദ്‌ക്കുള്ള ദണ്ടണേമ്
18മന്‌സാര് സെയ്‌ര എല്ല കെ്ട്ട കാര്യഗണാമ് എല്ല പാവഗണാമ് സാമി കണ്ട് തനാക്ക് ബര കോവ മേലോഗാത്തിലിര്‌ന്ത് ബെ്ളിപഡ്‌ദ്. എന്ത്‌ക്കെന്റ അവാര് കെ്ട്ട കാര്യഗ സെയ്‌ദ് ആള്‌ഗ സാമിന പറ്റ്യുള്ള സത്ത്യണ തെര്യ ബ്‌ഡാദെ തഡ്‌ക്കാര്. 19എന്ത്‌ക്കെന്റ സാമിന പറ്റി തെര്യ ഉള്ള കാര്യഗെല്ല അവാര്‌ക്ക് ബെ്ളിപട്ടിര്‌ക്ക്‌ദല്ല? അദ് അവാര്‌ക്ക് സാമി താനെത്തെ ബെ്ളിപഡ്‌സിനാദ്. 20ഉലഗണ ദ്‌ട്ടിസിന ണാളിലിര്‌ന്തെ സാമി ഉണ്ടാക്കിനാദ്‌ണ ബെത്ത് ണോഡിന സത്ത്യമാന സാമി ഇര്‌ക്കാ് എന്ത്‌മ് അയ്യി സാമിക്കിര്‌ക്ക സക്‌ദി ഇല്ലാദായെക്കാത്താദ് എന്ത്‌മ് സൊക്കാന ബെ്ളിപട്ടിര്‌ക്ക്‌ദ്. അദ്‌ണാലെ ആര്‌ക്ക്‌മ് തറ്‌ക്ക്യ മുഡ്യമാട്ട.
21അവാര് സാമിന തെരിന്ത് ഗൂഡി സാമിക്ക് സാമി എന്തുള്ള മദ്‌പ്പ് കൊഡുക്കാദേമ് ണണ്ണി സൊല്ലാദേമ് ഇര്‌ന്താര്. അല്ലാദെ താനെ അവാര് ബുദ്ദിബോദ ഇല്ലാത്ത ണെനേപ്പ്‌ക്കാറാര്‌മ് ണല്ലാദ് കെ്ട്ടാദ് തെര്യാത്ത മനേസ്സ്‌ക്കാറാര്‌മ് ആയെക്കിനാര്. 22അവാര് എമ്മ അറുവാളിഗ എന്ത് സൊല്ലി ണഡാക്കാര്, ആന അവാര് ബുദ്ദില്ലാത്തവാര് ആനാര്. 23അളിവില്ലാത്ത സാമിക്ക് മദ്‌പ്പ് കൊഡുക്കാദെ അളിന്ത് പോര മന്‌സാ്, പക്കിപര്‌ന്ത്, ബേ്ണ്ട്‌വ്‌റാവു, ഊരിന്ത് ണഡാക്ക ഉജുറുകെ്ളെഗ ഇദ്‌ഗാദ് സെലെഗാക്ക് മദ്‌പ്പ് കൊഡുത്താര്.
24അദ്‌ണാലെ സാമി അവാര്‌ണ തമ്മ് ണെഞ്ചില്യ കെ്ട്ട ആസെഗണ ബെത്ത് അവാനവാ് സരിഗലണ തമ്മ തമ്മ ണാണഗെ്ഡ്‌സ്യ ബേ്ണ്ടി മാനതാന ഇല്ലാത്ത കാര്യഗ സെയ്യ ഒപ്പഡിത്ത് കൊഡുത്താ്. 25അവാര് സാമിന പറ്റ്യുള്ള സത്ത്യണ ണമ്പാദെ അദ്‌ണ പൊയ്യാക്കിനാര്. ദ്‌ട്ടിസിനവാന കുമ്മുഡ്‌റാദ്‌ണ തള്ളി സാമി ദ്‌ട്ടിസിനാദ്‌ണ പൂസെ മുഡിത്ത്‌കൊണ്ട് അവാര് അദ്‌ണ കുമ്മുഡിനാര്. ആന സാമി എപ്പേക്ക്‌മ് ബെല്ല്യവാ്ത്തെ, ആമെ.
26അവാര് അച്ചെ സെയ്‌ദാദ്‌ണാലെ അവാര്‌ക്കിര്‌ക്ക കാമ ആസെഗാളിലി മാനതാന ഇല്ലാത്ത കാര്യഗ സെയ്യ സാമി അവാര്‌ണ ബ്‌ട്ടാ്. അവാര്‌ദ് പെ്ണ്ണ്‌മക്കഗ ആണ്‌മക്കണ തള്ളി പെ്ണ്ണ്‌മക്ക പെ്ണ്ണ്‌മക്കളോഡെ താനെ ക്‌ഡാക്ക്യ പ്‌ഡിത്താര്. 27അദേപാസെ താനെ ആണ്‌മക്കഗാമ് പെ്ണ്ണ്‌മക്കാളോഡെ ക്‌ഡാക്കാദ്‌ണ തള്ളി ആങ്കീങ്ക് ഗൊഡ്ഡുക്കിക്കി ആണ്‌മക്കളോഡെ താനെ ണാണഗെ്ട്ട കാര്യഗ സെയ്‌ദാര്. ഇച്ചെ അവാര് സെയ്‌ദ കെ്ട്ട കാര്യാക്കുള്ള ദണ്ടണെ തമ്മ താനെ കെ്ഡേസ്‌റാര്.
28സാമിന പറ്റ്യുള്ള അറുവു കെ്ഡേസി ണഡാക്കാദിലി ബെല്ല്യ കാര്യ ഒന്റില്ലെ എന്ത് ണെനേക്കാദ്‌ണാലെ സെയ്യ ബേ്ഡ എങ്ക കാര്യണ സെയ്യ ബേ്ണ്ടി സാമി അവാര്‌ണ ബുദ്ദിഗെ്ട്ടവാരായി പെ്ളേക്ക്യ ബ്‌ട്ടാ്. 29അവാര് എല്ല ദിന്‌സ് ണേര്‌മെഗെ്ട്ട കാര്യഗാമ് കെ്ട്ട കാര്യഗാമ് പേരാസെപട്ട് സെയ്‌ര കാര്യഗാമ് ആങ്കീങ്ക് മോസമാന കാര്യഗാമ് സെയ്‌രവാര്‌ത്തെ. എര്‌സ ബെത്ത് ണഡാക്കവാര്‌മ് കൊലെ സെയ്‌ര ണെനേപ്പോഡെ ണഡാക്കവാര്‌മ് മല്ല്‌സണ്ടെ കെ്ട്ട്‌റവാര്‌മ് ബഞ്ചണെക്കാറാര്‌മ് പഗെ ഇര്‌ക്കവാര്‌മ് ണൊണ്ടു സൊല്ലി ണഡാക്കവാര്‌മ്‌ത്തെ. 30അവാര് ഉറുട്ടു സൊല്ലുറവാര്‌മ്, അവാര് അഡ്‌ത്തവാര്‌ക്കെ കുറ്റ സൊല്ലി ണഡാക്കവാര്‌മ് സാമിന തൊറേന്ത് ണഡാക്കവാര്‌മ് തമ്മാത്തെ ബെല്ല്യവാരെന്ത് ണെനേക്കവാര്‌മ് എമാക്ക് എല്ലാമെ സെയ്യ മുഡ്യു എന്ത് ണെനേക്കവാര്‌മ് കെ്ട്ട ഓസണെക്കാറാര്‌മ് അവ്വപ്പല പേസ് കേ്ക്കാത്തവാര്‌മ്‌ത്തെ. 31ബോദ ഇല്ലാത്തവാര്‌മ് ണമ്പ്യമുഡ്യാത്തവാര്‌മ് സീവാ് ഇല്ലാത്തവാര്‌മ് കറ്‌മ്മ പ്‌ഡിക്കാത്തവാര്‌മ്‌ത്തെ. 32ഇച്ച്‌ള കാര്യഗ സെയ്‌രവാര് സാവുക്ക് തഗ്‌ദ്യുള്ളവാര്‌ത്തെ എങ്ക സാമി സട്ടണ തെരിന്തിര്‌ന്ത് ഗൂഡി അവാര് ഇച്ച്‌ള കാര്യഗണ സെയ്‌രാദ് താനേമല്ല, ഇച്ച്‌ള കാര്യഗണ സെയ്‌രവാര്‌ണ അവാര് പിര്യാമ് പഡ്‌റാര്.
נבחרו כעת:
റോമക്കാറാര് 1: സാമിദ് സേദി
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Life Literature