1 കൊരിന്ത്യക്കാറാര് 3
3
ഉലഗാത്തില്യവാര് പെ്ളേക്ക പാസെ പെ്ളേക്ക ഏസുക്കാറാര്
1എന്ന് ഏസുക്കാറാരെ, ണാന് ണിമ്മ് പട്ടിലി ഇര്‌ക്കാട്ടി സാമിണിഗാല് ണഡാത്ത്‌റവാരോഡെ ണായ പേസ്‌റ പാസെ എനാക്ക് ണിമ്മോഡെ ണായ പേസ്യ മുഡ്യാലെ. അദ്‌ക്ക് ബദ്‌ള് അവാനവാന്‌ദ് ആസെപഡി പെ്ളേക്ക ഈ ഉലഗാത്തില്യ ആള്‌ഗോഡെ ണായ പേസ്‌റ പാസെത്തെ ണിമ്മോഡെ ണായ പേസിനാദ്. അദ്‌താനെമല്ല, ക്‌റ്‌സ്‌ത്ത്‌ണ ണമ്പി ണഡാക്ക പെ്ളേപ്പ്‌ണ പറ്റി ഇപ്പ്‌ത്തെ അറുവു ബെത്ത് ബര ആള്‌ഗോഡെ ണായ പേസ്‌റ പാസേമ്‌ത്തെ ണാന് ണായ പേസിനാദ്. 2ണാന് ണിമാക്കെ ക്‌റ്‌സ്‌ത്ത്‌ണ പറ്റി സൊന്ന ബുദ്ദിണായ പച്ചെ പ്‌ള്ളെഗാക്ക് പാല് ഊട്ട്‌സ്‌റാദ്‌ക്ക് സമ ആയിര്‌ന്ത്‌ദ്. ബെല്ല്യവാര് തിങ്ക തീനിക്ക് സമ ആയിര്‌ക്ക ണായഗണ ണാന് ണിമാക്കെ സൊല്ലാലെ. ഇപ്പ്‌മ് ണിമാക്ക് അച്ച്‌ള ണായഗ സൊന്നാക്കി അദ്‌ണ ണെപ്പ്‌കെ്ഡേസ്‌റാദ്‌ക്കുള്ള തഗ്‌ദി ആഗാലെ. 3എന്ത്‌ക്കെന്റ ഇപ്പ്‌മ് ണിമ്മ അവാനവാന്‌ദ് ആസെപഡി പെ്ളേക്ക ഈ ഉലഗാത്തില്യവാര്‌ണ പാസെത്തെ പെ്ളേക്കേര്. ണിമ്മ് പട്ടിലി കണ്ണ്‌കഡിമ് ആങ്കീങ്ക് മല്ല്‌സണ്ടേമ് ഇര്‌ക്കാദ്‌ണാലെ അവാനവാന്‌ദ് ആസെപഡി പെ്ളേക്ക ഈ ഉലഗാത്തില്യവാര്‌ണ പാസേമ് സാമിന തെര്യാത്തവാര്‌ണ പാസേമ്‌ത്തെ ണിമ്മ പെ്ളേക്കേര് എങ്കാദ്‌ണ കാട്ട്‌ദ്. 4ണിമ്മ് കൂട്ടാത്തില്യ ലേസ ആള്‌ഗ: <<എമ്മ പവുലോസ്‌ദ് പച്ച്യക്കാറാര്>> എന്ത്‌മ് ബേ്റെ ലേസ ആള്‌ഗ: <<എമ്മ അപ്പല്ലോസ്‌ദ് പച്ച്യക്കാറാര്>> എന്ത്‌മ് സൊല്ലുറാദ്‌ണാലെ ണിമ്മ സാമിന തെര്യാത്ത ആള്‌ഗ സെയ്‌ര പാസെ അല്ല സെയ്‌രാദ്?
സാമിദ് കാഡ്‌മ് അദില്യ ബേലെക്കാറാര്‌മ്
5അപ്പല്ലോസ് അത്തറ ബെല്ല്യവാന? പവുലോസ് എങ്ക ണാന് അത്തറ ബെല്ല്യവാന? അല്ല. ണിമ്മ ഏസു ക്‌റ്‌സ്‌ത്തോഡെ ബെത്തിര്‌ക്ക ണമ്പിക്കേലി ണിമാണ ഒറേത്തവാര് ആക്ക്യ ബേ്ണ്ടി ണിമാണ കയ്യിതാങ്ക്യ ബെത്തിര്‌ക്ക ബെ്റ് ണോട്ടക്കാറാര്‌ത്തെ എമ്മ. ആണ്ടവാ് തന്ത ബേലെഗണാത്തെ എമ്മ ഒരൊരു ആള്‌ഗാമ് സെയ്‌രേര്. 6ണിമ്മ സാമിദ് കാഡ്‌ക്ക് സമ. അയ്യി കാഡ്‌ക്കെ ബെദെ ബെദേത്തവാന പാസെത്തെ ണാന്, അദ്‌ക്കെ തണ്ണി ഊറ്റുറവാന പാസെത്തെ അപ്പല്ലോസ്, ആന അയ്യി ബെദേന ബളാത്തിനവാ് സാമിത്തെ. 7അദ്‌ണാലെ ണഡ്‌ത്തവാനൊ തണ്ണി ഊറ്റിനവാനൊ അല്ല ബെല്ല്യവാ്. ആന അദ്‌ണ ബളാത്തിന സാമിത്തെ ബെല്ല്യവാ്. 8ണഡ്‌ത്തവാന്‌മ് തണ്ണി ഊറ്റിനവാന്‌മ് ബെല്ല്യവാനെന്തൊ സിന്നവാനെന്തൊ ബരാദില്ലെ അവാര് റണ്ട് ആള്‌മ് ഒരേ സമാത്തെ. ഒരൊരു ആള്‌ഗാക്ക്‌മ് അവാനവാന്‌ദ് ബേലേക്ക് തഗ്‌ന്ത കൂലി കെ്ഡേക്കു. 9ണിമ്മാത്തെ സാമിദ് കാഡ്. എമ്മ അദിലി സാമിക്ക് ബേ്ണ്ടി ബേലെ സെയ്‌ര ബെ്റ് ബേലെക്കാറാര്‌ത്തെ.
സാമികൂരേമ് കെ്ട്ട്‌ക്കാറാര്‌മ്
ണിമ്മാത്തെ സാമിദ് കൂരെ. 10സാമി പ്‌ണ്ണ്യാത്തിലി എനാക്ക് കെ്ഡേത്ത ഉക്കിമേലി ണാന് അറുവുമ് ബുദ്ദിമ് ഉള്ള മുക്ക്യമാന ഒരു കെ്ട്ട് ബേലെക്കാറാനായി ബേസ്‌മട്ട കെ്ട്ട്‌റെ. ബേ്റൊരു ബേലെക്കാറാ് അദ്‌ക്ക് മേല് കെ്ട്ടി പൊന്ത്‌സ്‌റാ്. ആന ഒരൊരു ബേലെക്കാറാന്‌മ് താന് എച്ചെ കെ്ട്ട് ബേലെ സെയ്‌രെ എന്ത് ണോഡി കൊള്ളുഡൊ. 11എന്ത്‌ക്കെന്റ് സൊന്ന ഏസു ക്‌റ്‌സ്‌ത്ത്‌ത്തെ കെ്ട്ടിര്‌ക്ക ഒരേ ഒരു ബേസ്‌മട്ട. അല്ലാദെ ബേ്റൊരു ബേസ്‌മട്ട കെ്ട്ട്യ ആര്‌ക്ക്‌മ് മുഡ്യമാട്ട. 12അയ്യി ബേസ്‌മട്ടാക്കുദാക്ക് ഒരൊരു കെ്ട്ട്‌ക്കാറാര് പൊന്നൊ, ബെ്ള്ള്യൊ, ബെലെ പ്‌ഡിത്ത കല്ലൊ, മരാഗൊ, പുല്ലൊ, ബയികോലൊ ബെത്ത് കെ്ട്ട്‌റാര്. 13ആന ക്‌റ്‌സ്‌ത്ത് ബിദിക്ക്യ ബര ണാളിലി ഒരൊരു ആള്‌ഗ സെയ്‌ദ ബേലെഗ എച്ച്‌ള ദിന്‌സ് എന്ത് ബെ്ള്യെ ബരു. തീ താനെ അദ്‌ണ എദ്‌ക്ക ആക്കു, അദ്‌ണ സോദണെ സെയ്‌ദ് ണോഡി എദ്‌ക്ക ആക്കു. 14ഒരുത്താ് കെ്ട്ടിന കെ്ട്ട് ബെന്ത് പോഗാദെ അച്ചെഗെ ഇര്‌ക്കദാനാക്കി അവാന്‌ക്ക് കൂലി കെ്ഡേക്കു. 15ആന ഒരുത്താ് കെ്ട്ടിന കെ്ട്ട് ബെന്ത് പോന അവാന്‌ക്കുള്ള കൂലി ണജട്ടാവു. ആനാല്‌മ് അവാ് ദെങ്കി കഡാക്കുവാ്, ആന ഒരുത്താ് തീലിര്‌ന്ത് ദെങ്കി കഡാക്ക പാസെത്തെ അവാ് ദെങ്കി കഡാക്കുവാ്.
ണിമ്മ സാമി തങ്ക്‌റ എ്ഡെ
16സാമികൂരെ എങ്കാദ് ണിമ്മാത്തെ എന്ത്‌മ് സാമിണിഗാല് ണിമ്മോഡെ ഇര്‌ക്ക്‌ദ് എന്ത്‌മ് ണിമാക്ക് തെര്യുമല്ല? 17അദ്‌ണാലെ ആരാറ്റ് സാമിദ് കൂരേന കെ്ഡ്‌സിനാക്കി സാമിമ് അവാന കെ്ഡ്‌സുവാ്. എന്ത്‌ക്കെന്റ സാമികൂരെ സാമിക്ക് ബേ്ണ്ടി അലാക്ക പ്‌റ്‌ത്ത് ബെത്തിര്‌ക്ക സുത്താപ്പുള്ള കൂരേത്തെ. അയ്യി കൂരെ എങ്കാദ് ണിമ്മാത്തെ.
മന്‌സാന പറ്റി പെര്‌മെപഡാദി
18ആര്‌മ് അവാനവാന താനെ സദിക്കാക്കില്ലെ. മന്‌സാന്‌ദ് മുന്തുക്ക് <<ണാന് അറുവുമ് ബുദ്ദിമ് ഉള്ളവാ്>> എന്ത് ണിമ്മ ആരാറ്റ് ണെനേത്താക്കി അവാ് ബുദ്ദിഗെ്ട്ടവാ് ആഡൊ. എന്താക്കിത്തെ അവാ് സാമി മുന്തുക്ക് അറുവുമ് ബുദ്ദിമ് ഉള്ളവാ് ആവാ്. 19എന്ത്‌ക്കെന്റ മന്‌സാര് കണ്ണ്‌ക്ക് ബുദ്ദി എന്ത് ണെനേക്കാദ് സാമി മുന്തുക്ക് ബുദ്ദിഗെ്ട്ടാദ്‌ത്തെ. സാമി സൊല്ലുസുലാക്കാത്തിലി:
<<അറുവാളിഗണ അവാര് സെയ്‌ര തന്ത്‌റാത്തിലി താനെ സാമി സിക്ക്‌സ്‌റാ്.>>#ഇയോവു 5:13
20അദ്‌താനെമല്ല,
<<അറുവാളിഗ ണെനേക്ക ണെനേപ്പ് ഉവഗാര ഇല്ലാത്താദ് എന്ത് ആണ്ടവാന്‌ക്ക് തെരിദ്>>#സാമി പാട്ട് ബുക്ക് 94:11
എന്ത്‌മ് എ്ള്‌ദിര്‌ക്ക്‌ദല്ല.
21അദ്‌ണാലെ മന്‌സാര്‌ണ പറ്റി ആര്‌മ് പെര്‌മെപഡാദി, എല്ലാദ്‌മ് ണിമാക്കുള്ളാദ്‌ത്തെ. 22പവുലോസ്‌മ്, അപ്പല്ലോസ്‌മ്, പത്ത്‌റോസ്‌മ്, ഈ ഉലഗാമ്, ഉജുറോഡെ ഇര്‌ക്കാദ്‌മ് സാരാദ്‌മ് ഇപ്പിര്‌ക്കാദ്‌മ്, ഇനി ബര്യ ഇര്‌ക്കാദ്‌മ് എല്ലാമെ ണിമാക്ക് ബേ്ണ്ടിത്തെ. 23ണിമ്മാഗൊ ക്‌റ്‌സ്‌ത്ത്‌ക്ക് ഉള്ളവാര്‌ത്തെ, ക്‌റ്‌സ്‌ത്ത് സാമിക്ക് ഉള്ളവാ്ത്തെ.
נבחרו כעת:
1 കൊരിന്ത്യക്കാറാര് 3: സാമിദ് സേദി
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Life Literature