1 കൊരിന്ത്യക്കാറാര് 2
2
പവുലോസ് ണല്ല സേദി സൊല്ലുറ ദിന്‌സ്
1എന്ന് ഏസുക്കാറാരെ, ണാന് ണിമ്മ് പട്ട്‌ക്ക് സാമി സേദിന സൊല്ല്യ ബന്ത ഗള്യേലി ബെല്ല്യ ണായക്കാറാനായൊ ബെല്ല്യ അറുവുക്കാറനായൊ അല്ല ബന്താദ്. 2എന്ത്‌ക്കെന്റ ഏസു ക്‌റ്‌സ്‌ത്ത്‌ണാമ് മുക്ക്യമായിമ് അവാ് കുരുസിലി സത്താദ്‌ണ പറ്റ്യുള്ള കാര്യണ അല്ലാദെ ബേ്റെ ഒന്റുണാമ് ണിമാക്ക് സൊല്ലമാട്ടെ എന്ത് ണാന് മുഡിവെ്ഡ്‌ത്തെ. 3ണാന് ണിമ്മ് പട്ടിലി അത്തറ ഉക്കിമെ ഇല്ലാത്തവാനായിമ് കോവെപട്ട് സദ്‌റബെ്ട്ടി കൊണ്ട്‌മ്‌ത്തെ ഇര്‌ന്താദ്. 4ണാന് ണിമാണ പഡിസിനാദ്‌മ് എന്ന് സേദിന സൊന്നാദ്‌മ് ആള്‌ഗണ മയാക്ക്‌റ ബുദ്ദിമ് അറുവുമ് ഉള്ള ണായഗണ ബെത്തല്ല. അദ്‌ക്ക് ബദ്‌ള്, സാമിണിഗാല് സെയ്‌ദ് കാട്ടിന അദിസ്യഗണാലേത്തെ. 5അച്ചെ സാമിദ് സക്‌ദിന ണെപ്പ്‌കെ്ഡേസിറ്റ് ബേ്ഡു ണിമ്മ ണമ്പിക്കുള്ളവാര് ആയ, അല്ലാദെ മന്‌സാര്‌ദ് അറുവുണാമ് ബുദ്ദിനാമ് ബെത്തല്ല ണമ്പ്‌റാദ്.
സാമി ണെനേവുഗണ പുരുപ്പാക്കി തര സാമിണിഗാല്
6ആന, ക്‌റ്‌സ്‌ത്ത് ബക്‌ദിലി മ്‌ഗ്‌ന്തവാര് ആയിര്‌ക്കവാരോഡെ എമ്മ അറുവുമ് ബുദ്ദിമ് ഉള്ള ണായ സൊല്ലുറേര്. അയ്യി അറുവുമ് ബുദ്ദിമ് ഉലഗാക്ക് പട്ടാദൊ ഈ ഉലഗണ ആള്‌റ അളിന്ത് പോരവാര്‌ക്ക് പട്ടാദൊ അല്ല. 7ഉലഗണ ദ്‌ട്ട്‌സാത്ത മുദതാനെ ണമ്മ്‌ദ് മദ്‌പ്പ്‌ക്ക് ബേ്ണ്ടി സാമി ബെത്തിര്‌ന്ത അറുവുമ് ബുദ്ദിമ് ഉള്ള ണായണാത്തെ എമ്മ ണിമാക്ക് സൊല്ലുറാദ്. അദ്‌ണ മുന്തുക്കേത്ത കാലാത്തിലി സാമി ആള്‌ഗാക്ക് ബെ്ളിപഡ്‌സാദെ മറേസി ബെത്തിര്‌ന്താ്. 8ഈ ഉലഗണ ആള്‌റവാര്‌ക്ക് ഈ അറുവുമ് ബുദ്ദിമ് ഉള്ള ണായണ ണെപ്പ്‌കെ്ഡേക്കാലെ. അദ്‌ണ അവാര് ണെപ്പ്‌കെ്ഡേസിര്‌ന്താക്കി മദ്‌പ്പുള്ള ആണ്ടവാന അവാര് കുരുസിലി കൊന്റിര്‌ക്കമാട്ടാര്. 9അദ്‌ണാലെത്തെ സാമി സൊല്ലുസുലാക്കാത്തിലി:
<<തനാണ സീവാ് ബ്‌ഡ്‌റവാര്‌ക്ക് ബേ്ണ്ടി സാമി ഒരിക്കി ബെത്തിര്‌ക്കാദ്‌ണ
ആര്‌മ് എപ്പേക്ക്‌മ് കാണാമില്ലെ,
കേ്ക്കാമില്ലെ,
അദ് എന്തായിര്‌ക്കു എന്ത് ആര്‌മ് എപ്പ്‌മ് ണെനേക്കാഗെ ഇല്ലെ>>#എസയ്യാ് 64:4
എന്ത് എ്ള്‌ദിര്‌ക്കാദ്.
10ആന താന് മറേസി ബെത്തിര്‌ന്ത ഈ കാര്യഗണ തന്ന് ണിഗാലാലെ സാമി ണമാക്ക് ബെ്ളിപഡ്‌സി തന്തിര്‌ക്കാ്. എന്ത്‌ക്കെന്റ സാമിണിഗാല്‌ക്ക് എല്ലാദ്‌മ് തെര്യുമല്ല. സാമി മനേസ്സിലി ഇര്‌ക്കാദ്‌മ് ണെപ്പ്‌കെ്ഡേസ്യ ബുദ്ദിമുട്ടുള്ളാദ്‌മാന കാര്യഗണ ഗൂഡി സാമിണിഗാല്‌ക്ക് തെര്യു. 11ഒരു മന്‌സാന്‌ദ് മനേസ്സിലി ഇര്‌ക്കാദ്‌ണ അവാന്‌ദ് ഉജുറുകെ്ളെക്കല്ലാദെ ബേ്റെ ആര്‌ക്ക്‌മ് തെര്യമാട്ട. അദേപാസെ സാമിദ് മനേസ്സിലിര്‌ക്ക ണെനേവുഗ എന്തായെന്റ് സാമിണിഗാല്‌ക്കല്ലാദെ ബേ്റെ ആര്‌ക്ക്‌മ് തെര്യമാട്ട. 12ഈ ഉലഗാത്തില്യ ണെനേവുഗണ തര ണിഗാലല്ല ണമാക്ക് കെ്ഡേത്തിര്‌ക്കാദ്. അദ്‌ക്ക് ബദ്‌ള് സാമി തന്ന് പ്‌ണ്ണ്യാത്തിലി ണമാക്ക് തന്തിര്‌ക്കദ്‌ണൊട്ടുക്ക് ണമാക്ക് തെര്യ സാമിലിര്‌ന്ത് കെ്ഡേത്ത ണിഗാല്‌ത്തെ ണമാക്ക് ഇര്‌ക്കാദ്. 13അദ്‌ണാലെ മന്‌സാന്‌ദ് അറുവുലിമ് ബുദ്ദിലിമ് പഡ്‌സ്‌റ ണായഗണ ബെത്തല്ല എമ്മ ണായ സൊല്ലുറാദ്. സാമിണിഗാല് പഡ്‌സ്‌റ ണായഗണ ബെത്ത്‌ത്തെ എമ്മ ണായ സൊല്ലുറാദ്. അച്ചെ സാമിണിഗാല് ഇര്‌ക്കവാര്‌ക്ക് സാമിണിഗാല് എമാക്ക് സൊന്ന സത്ത്യഗണ എമ്മ പഡ്‌സ്‌റേര്. 14ആന സാമിണിഗാല് ഇല്ലാത്ത മന്‌സാ് സാമിണിഗാല് പഡ്‌സ്‌റ ണായഗണ കാദ്‌ക്ക് ഇക്ക്‌റാദില്ലെ. എന്ത്‌ക്കെന്റ അയ്യി കാര്യഗ ബുദ്ദി കെ്ട്ട കാര്യാത്തെ എന്ത് അയാള് ണെനേക്കാ്. അയ്യി കാര്യഗ അവാന്‌ക്ക് ണെപ്പ്‌കെ്ഡേക്കാദില്ലെ. എന്ത്‌ക്കെന്റ അയ്യി കാര്യഗണ അവാ് സാമിണിഗാല് ഉദാവ്യാലെത്തെ സൊക്കാന പുരുപ്പാക്കി എ്ഡ്‌ക്കാദ്. 15സാമിണിഗാല് ഇര്‌ക്കവാ് സാമി മനേസ്സിലി ആസെപഡ്‌റ ണെനേവുഗണ ഒട്ടുക്ക് ണെപ്പ്‌കെ്ഡേസ്‌റാ്. ആന സാമിണിഗാല് ഇല്ലാത്തവാന്‌ക്ക് സാമിണിഗാല് ഇര്‌ക്കവാന്‌ദ് ണെനേവുഗണ ണെപ്പ്‌കെ്ഡേസ്യ മുഡിരാദില്ലെ. 16എന്ത്‌ക്കെന്റ സാമി സൊല്ലുസുലാക്കാത്തിലി:
<<ആണ്ടവാന്‌ദ് മനേസ്സിലി ഇര്‌ക്കാദ് എന്തായെന്റ് ആര്‌ക്ക്‌മ് തെര്യമാട്ട.
അദ് തെരിന്ത് അയാള്‌ണ പഡിസ്യ ആര്‌ക്ക്‌മ് മുഡ്യമാട്ട>>#എസയ്യാ് 40:13
എന്ത് എ്ള്‌ദിര്‌ക്ക്‌ദല്ല. ആന ണമ്മാഗൊ ക്‌റ്‌സ്‌ത്ത്‌ദ് മനേസ്സിലി ഇര്‌ക്കാദ് എന്തായെന്റ് ണെപ്പ്‌കെ്ഡേസ്‌റാമ്.
נבחרו כעת:
1 കൊരിന്ത്യക്കാറാര് 2: സാമിദ് സേദി
הדגשה
שתפו
העתק
רוצים לשמור את ההדגשות שלכם בכל המכשירים שלכם? הירשמו או היכנסו
New Life Literature