मार्कुस 2
2
दरंगे बमारी आल़अ ठीक करनअ
(मोत्ती 9:1-8; लूका 5:17-26)
1खास्सै धैल़ै बाद आअ ईशू भिई कफरनहूम नगरी लै अर लोगै शूणअ कि सह आसा एऊ घअरै। 2तेखअ हुऐ तिधी एतरै लोग कठा कि दुआरा आजू निं सिऊंणी सहरनै जोगी ज़ैगा बी रही अर ईशू त तिन्नां का परमेशरे बैणा खोज़दअ लागअ द।
3तिधी आणअ लोगै एक मणछ च़ऊ ज़ण्हैं ईशू सेटा लै च़की, तेऊ मणछा त दरंग हुअ द। 4तिधी दुआरा सेटा तै खास्सै मणछ झाल़्हुऐ दै। तिहअ करै निं तिंयां ईशू सेटा पुजी सकै। तिन्नैं पेच़अ तेऊ घअरो छ़ाप्पर तैहा सिधा ज़ेथ हेठै ईशू त बेठअ द। ज़ेथ सह दरंगो रोगी थिअ सताऊअ द, सह बछ़ाऊणअ छ़ड़ाऊअ तिन्नैं छ़ाप्परा बाती च़ऊ कूणैं राश्शी बान्हीं उंधै ईशूए मुंहां सेटा लै।
5ईशू बोलअ तिन्नों विश्वास भाल़ी तेऊ दरंगे मरीज़ा लै,
“शोहरूआ, तेरै पाप हुऐ माफ।”
6तेखअ कई शास्त्री ज़ुंण तिधी सभा दी थिऐ बेठै दै तिंयां लागै सोठदै, 7“अह मणछ इहअ किल्है बोला? अह ता परमेशरे कदर बी निं करदअ, परमेशरा छ़ाडी होर कुंण सका पाप माफ करी?”#ईशा. 43:25
8ईशू हेरी तिन्नें मन्नें गल्ला भुझ़ी कि ईंयां किज़ै सोठा, तेखअ बोलअ तिन्नां लै,
“तम्हैं आपणैं मन्नैं इहअ किल्है आसा लागै दै सोठदै?
9 “सान किज़ै आसा? एऊ दरंगे मरीज़ा लै इहअ बोल़णअ कि तेरै पाप हुऐ माफ या इहअ बोल़णअ उझ़ू आपणैं बछ़ाऊणैं च़क अर हांढदअ-फिरदअ लाग? 10ज़िहअ करै तम्हां का थोघ लागे कि मुंह मणछे पूता लै आसा पृथूई दी पाप माफ करनैओ हक।”
तेखअ बोलअ ईशू तेऊ दरंगे मरीज़ा लै, 11“हुंह बोला ताल्है, उझ़ू आपणैं एऊ बछ़ाऊणैं च़क संघा डेऊ आपणैं घअरा लै।”
12सह मरीज़ उझ़ुअ तेभी सोभी नदरी खल़अ अर आपणैं बछ़ाऊणैं च़की डेऊअ सह आपणीं ज़ांघा हांढी घअरा लै। ऐहा गल्ला भाल़ी हुऐ सोभ लोग रहैन अर तिंयां लागै परमेशरे बड़ैई करदै कि हाम्हैं निं इहअ च़मत्कार आझ़ तैणीं कधि हेरअ।
कारै गराहणै आल़अ लेबी शादणअ
(मोत्ती 9:9-13; लूका 5:27-32)
13ईशू बी तिधा का उझ़ुअ अर सह डेऊअ समुंदरे बाढै, तिधी आऐ खास्सै मणछ तेऊ सेटा अर सह लागअ तिन्नां लै शिक्षा दैंदअ।
14तिधा का डेऊंदी बारी भाल़अ ईशू हलफीओ शोहरू लेबी नाओं मणछ कारै गराहणे च़ौकी दी बेठअ द, ईशू बोलअ तेऊ लै, “मुंह संघै एछ।” सह उझ़ुअ तेभी खल़अ संघा डेऊअ ईशू संघै।
15बादा का ज़ांऊं ईशू तेऊए घअरै रोटी खांदअ बेठअ, तिधी बेठै कई कारै गराहणै आल़ै अर पापी मणछ ईशू अर तेऊए च़ेल्लै संघै रोटी खांदै किल्हैकि तिधी थिऐ इहै खास्सै मणछ ज़ुंण ईशू संघा हआ तै।
16बधाना सखाऊंणै आल़ै शास्त्री ज़ुंण फरीसी मांझ़ा का थिऐ, तिन्नैं बोलअ एता भाल़ी कि अह आसा कारै गराहणै आल़ै अर पापी मणछा संघै रोटी खांदअ बेठअ द! तेखअ बोलअ तिन्नैं ईशूए च़ेल्लै लै,
“अह कारै गराहणै आल़ै अर पापी मणछा संघै किल्है हआ खांदअ-पिंदअ बेठअ द?” 17इना गल्ला शूणीं बोलअ ईशू तिन्नां लै, “बैईद निं नरोगै मणछा सेटा एछदअ, पर रोगी मणछा सेटा लागा तेऊ ज़रूरी पुजणअ, हुंह निं धर्मीं लै आथी आअ द, पर हुंह आसा पापी शधाणूं आअ द।”
ब्रत करनैओ सुआल
(मोत्ती 9:14-17; लूका 5:33-39)
18जोहन्ना डुबकी दैणैं आल़ेए च़ेल्लै अर फरीसी मणछ करा तै ब्रत। कई लोग आऐ ईशू सेटा लै संघा लागै इहअ बोल्दै, “जोहन्ने च़ेल्लै अर फरीसी मणछे च़ेल्लै करा ब्रत, पर तेरै च़ेल्लै निं ब्रत करदै?”
19ईशू दैनअ तिन्नां लै ज़बाब, “ज़ेभै तैणीं लाल़अ बरातू संघै रहा, तेभै निं तिंयां ब्रत करदै। 20एक बगत एछणअ इहअ बी कि लाल़अ करनअ तिन्नां का ज़ुदअ अर तेभै करनअ तिन्नां ब्रत।”
21 “नऊंऐं झिकल़े शाट्टी निं पराणैं झिकल़ै दी कोहै लांदअ, ज़ै इहअ करे, झिकल़ै धोंदी बारी धेल़ा सह नऊंईं शाट्टी तेऊ पराणैं झिकल़ै होर बी खास्सअ।
22 “इहअ ई निं कोह मणछ नऊंअ दाखो रस पराणैं खाल्हल़ै दी डाहंदै। किल्हैकि इहअ करी फुटा तिंयां खाल्हल़ै, संघा हआ दाखो रस अर तिंयां खाल्हल़ै दुहै च़िज़ा ज़ांऐं। पर नऊंअ दाखो रस भरा नऊंऐं खाल्हल़ै दी ज़िहअ करै तिन्नां दुही गल्लो बच़ाअ हआ।”
बशैघे धैल़ीओ बी प्रभू
(मोत्ती 12:1-8; लूका 6:1-5)
23एकी धैल़ै त ईशू बशैघे धैल़ी खेचा बाती लागअ द डेऊंदअ, अर तेऊए च़ेल्लै लागै बाता हांढदी खाणां लै कणके सीला चोल़दै।#बधा. 23:25
24फरीसी मणछै बोलअ ईशू लै, “हेर, ईंयां बशैघे धैल़ी तेऊ कामां किल्है करा ज़ुंण तैहा धैल़ी करनअ मोसा गूरे बधाने साबै ठीक निं आथी?”
25ईशू दैनअ तिन्नां लै ज़बाब, “तम्हैं कै कधू इहअ निं पहल़अ कि ज़धू दाबेद राज़ै ज़रुरत पल़ी अर ज़ांऊं सह अर तेऊए साथी भुखै तै तेभै तेऊ किज़ै किअ? 26तेऊ किहअ करै खाई अबतार माहा प्रोहते ज़मानैं परमेशरे खिम्भा भितरी डेऊई भैंट दैनी दी रोटी। ज़ेता मोसा गूरे बधाने साबै प्रोहता छ़ाडी होर कोहै निं खाई सकदअ त, अर तेऊ दैनी तिंयां आपणैं साथी लै बी?”
27तेखअ बोलअ ईशू तिन्नां लै, “बशैघो धैल़अ आसा मणछा लै बणाअं द, मणछ निं बशैघे धैल़ै लै आथी। 28तैही आसा हुंह मणछो पूत बशैघे धैल़ीओ बी मालक।”
נבחרו כעת:
मार्कुस 2: OSJ
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
This work is licensed under Creative Commons Attribution-ShareAlike 4.0 License.
