लूका 21
21
गरीब बिधबा बेटल़ीओ दान
(मार्कुस 12:41-44)
1ईशू भाल़ै भबने भढारै पाअ बडै-बडै सेठ मणछै आपणैं साबै खास्सअ दान। 2अर ईशू भाल़ी एक गरीब बिधबा बी तेथ दूई चाम्बे सिक्कै पांदी।
3तेखअ बोलअ ईशू आपणैं च़ेल्लै का, “हुंह खोज़ा तम्हां का सत्त कि ऐहा गरीब बिधबा बेटल़ी दैनअ होरी सोभी सेठ लोगा का खास्सअ दान। 4किल्हैकि सोभी दैनअ आपणीं खास्सी ज़ैदाता मांझ़ै धख-धख। पर ऐहा का थिअ धख ज़िहअ अर ऐहा दैनी आपणीं सह सारी कमाई इधी दान।”
परमेशरे भबनो बनाश
(मोत्ती 14:1,2; मार्कुस 13:1,2)
5तेऊए च़ेल्लै मांझ़ै बोलअ कई इहअ, “अह भबन भाल़ किहै बडै-बडै शोभलै पात्थरा करै आसा बणाअं द अर शोभली च़िज़ा करै सज़ाऊअ द।” ईशू बोलअ, 6“इहै धैल़ै बी एछणैं, ज़ेभै ईंयां ज़ुंण बी तम्हैं इधी भाल़ा, ज़ै इधी पात्थर प्रैंदै पात्थर बी होए टेक्कअ द सह बी पाणअ एकी धैल़ै ढोल़ी।”
दुख-सांगट
(मोत्ती 24:3-14; मार्कुस 13:3-13)
7तिन्नैं पुछ़अ ईशू का, ओ “गूरू, इहअ कधू हणअ? ज़ांऊं ईंयां गल्ला पूरी हणीं, तैहा बेलो कै नछ़ैण हणअ?” 8ईशू बोलअ तिन्नां लै,#1 जोह. 4:1; मार्क. 13:21-23 “चतैन रहै, कसरै ज़ाणैं निं लागी, कई बोल़णअ मेरै नाओंऐं एछी कि हुंह आसा सह ई, अह बगत आसा गअ द नेल़ एछी, तम्हैं तिन्नां पिछ़ू निं डेऊई।
9 “ज़ेभै तम्हां का देशै जुध हणें अर जुधे गल्ला शुणें, तम्हैं निं डरी। किल्हैकि ईंयां गल्ला हणीं आसा पैहलै ज़रूरी, पर तैहा बेला बी निं अंत हणअ।”
10तेखअ बोलअ ईशू तिन्नां लै, “किल्हैकि एकी ज़ाती करनअ दुजी ज़ाती संघै जुध अर एकी मुल्खा करनअ दुजै मुल्खा संघै जुध। #2 इति. 15:5-6; ईशा. 19:2 11ज़ैगै-ज़ैगै हणीं ज़ाज़री अर देशै-देशै पल़णै नकाल़। देशै एछणी माहा मरी हणीं अर सरगै हणीं बडी डरैऊंणी गल्ला अर बडै-बडै नछ़ैण हणैं प्रगट।
12 “पर इना सोभी गल्ला का आजी ढाकणैं तम्हैं मेरै नाओंऐं। तम्हां लै दैणीं बडी दुख तकलिफ तम्हैं करनै पांच़ी-पज़ैती लै सभागृहा खल़ै। तम्हैं करनै कैद संघा निंणै राज़ै अर पांच़ा सेटा लै घिशी। 13पर अह हणअ तम्हां लै शाजत दैणैंओ मोक्कअ। 14तैही डाहा आपणैं मन्नैं एही पाक्की कि पैहलै ई का इहअ फिकर निं करी कि हाम्हां किज़ै बोल़णअ।
15 “किल्हैकि मुंह दैणैं तम्हां लै इहै बोल अर अक्ल कि थारै सोभ बरोधी निं थारअ सम्हनअ करी सकदै अर नां रोक्की सकदै। 16ऐहा गल्ला डाहै आद कि थारै ईज-बाब अर भाई, टबरा अर थारै साथी बी ढाकणैं तम्हैं, इधी तैणीं कि तम्हां मांझ़ै कई पाणै मारी। 17मेरै नाओंआं पिछ़ू हणैं खास्सै मणछ थारै दुशमण। 18पर थारै मुंडो निं बाल़ बी बरैबाद हणअ।#मोत्त. 10:30; लूक. 12:7 19खिरी तैणीं मुंह दी विश्वास डाही करै सबर करी सका तम्हैं आपणैं प्राण बच़ाऊई डाही।
एरुशलेम नगरीए बनाश हणें बारै खोज़णअ
(मोत्ती 24:15-21; मार्कुस 13:14-19)
20 “ज़ेभै तम्हैं एरुशलेम नगरी दुशमण सैना करै घेरै दै भाल़े, तेभै जाणैं तम्हैं कि एरुशलेम नगरीए बरैबादी आसा नेल़। 21तेभै ज़ुंण यहूदा दी होए, तिंयां ठुर्है उझै धारा लै, अर ज़ुंण एरुशलेम नगरी भितरी होए, तिंयां निखल़ै बागा लै अर ज़ुंण गराऊंऐं होए, तिंयां निं तेथ डेऊई। 22किल्हैकि ईंयां हणैं बदल़ै लणें इहै धैल़ै, ज़हा दी लिखी दी सारी गल्ला पूरी हणीं।#बधा. 32:35; जेर. 46:10
23 “तिन्नां धैल़ी ज़ुंण सुंदी बेटल़ी अर आपणैं शोहरू लै दुधा पणैंऊंदी होए तैहा लै हणअ ठुहर्नअ बडी आफ़त! किल्हैकि पृथूई हणअ बेघै बूरअ सांगट अर इना लोगा लै एछणी बडी खरी। 24तिन्नां मांझ़ै मरनै कई दुशमणे तलबारा करै अर कई देशे लोगा जैंदरी डेऊणैं गलाम हई। तेखअ ज़ेभै तैणीं होरी ज़ातीओ बगत पूरअ निं होए, तेभै तैणीं हणअ एरुशलेम होरी ज़ातीए हाथै बरैबाद।#एज्रा 9:7; भज. 79:1; ईशा. 63:18; जेर. 21:7; दान. 9:26
मुंह मणछे पूतो भिई एछणअ
(मोत्ती 24:29-31; मार्कुस 13:24-27)
25 “सुरज़, ज़ोथ अर तारै दी शुझणैं नछ़ैण, अर पृथूई दी हणअ देशा-देशे हर ज़ातीए लोगा लै सांगट। किल्हैकि तिन्नां लागणीं समुंदरे बडै शणकारा डरै ओर्ही-पोर्ही ठुर्हा अर छ़ाल्लीए क्रुंगा करै पल़णअ हैल़अ। #
भज. 46:2,3; 65:7; ईशा. 13:10; 24:19; एज. 32:7; जोए. 2:30
26 “तेखअ डेऊणैं संसारै आजू हणैं आल़ी गल्ला न्हैल़दी, भाल़दी-भाल़दी डरै मारै लोगे शाह-प्राण किल्हैकि सरगे सारी शगती बी सिक्कणी आजू-पिछ़ू। #
लेब. 26:36; हगा. 2:6,21
27 “तेभै भाल़णअ तिन्नां हुंह मणछो पूत शगती अर प्रतप्पा संघै बादल़ा दी एछदअ। #
प्रका. 1:7; दान. 7:13 28ज़ेभै ईंयां गल्ला हंदी लागे, सिधै हई आपणैं मूंड करै खल़ै किल्हैकि तेभै हणअ थारअ छ़ुटकारअ नेल़।”
फेडूए बूटे कथ्या
(मोत्ती 24:32-35; मार्कुस 13:28-31)
29ईशू खोज़ी तिन्नां का एक कथ्या, “फेडूए बूटा अर सोभी बूटा भाल़ा, 30ज़ांऊं तेथ प्लीर एछा, तेभै हेरा तम्हैं ज़ाणीं कि बसंते ऋत आसा नेल़। 31ठीक इहअ ई ज़ांऊं तम्हैं इना गल्ला हंदी भाल़े, तेभै समझ़ै कि परमेशरो राज़ आसा नेल़। 32हुंह खोज़ा तम्हां का सत्त कि ज़ेभै तैणीं ईंयां गल्ला निभी निं जाए, तेभै तैणीं निं ऐहा पोस्तीए लोग मरनै आथी। 33सरग अर पृथूई टल़णीं पर मंऐं ज़ुंण गल्ला बोली ईंयां हणीं सोभ पूरी।
बिऊंतै रहा
(मोत्ती 24:36-44; मार्कुस 13:32-37)
34 “एता लै रहै चतैन, इहअ निं हआ कि थारै मन्न पेठे कबाता अर राल़ै-मताल़ै हई ऐहा संसारे ज़िन्दगीओ फिकर करी ढिलै होए, अर सह धैल़ी एछा तम्हां लै नभैऊशै ज़िऊआ लै ज़ज़ाल़ ज़िहअ। 35किल्हैकि सह एछणी सारी पृथूई दी सोभी लै बराबर।#प्रका. 3:3; लूक. 12:40
36 “बिऊंतै रहै अर हर बगत रहै प्राथणां करदै लागी कि तम्हैं एछणैं आल़ी सारी खरी का बच़े, मुंह मणछे पूते सम्हनै खल़ै हणैं जोगी हई सके।”
37ईशू दैआ त धैल़ी भबनै शिक्षा अर राची डेओआ त बागै जैतून नाओंए धारा लै 38तेखअ एछा त दोत्ती-दोत्थी भबनै अर खास्सै मणछ एछा तै ईशूए गल्ला शुणदै भबना लै।
נבחרו כעת:
लूका 21: OSJ
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
This work is licensed under Creative Commons Attribution-ShareAlike 4.0 License.
