1 करिन्थी 3
3
विश्वासीए टोली दी गुटबाज़ी
1ए मेरै भाईओ, ज़धू हुंह तम्हां संघै त मंऐं निं तम्हां संघै तधू तेही गल्ला किई ज़ेही आत्मिक लोगा संघै करनी लागा। मंऐं किई तम्हां संघै एऊ संसारे मणछा ज़ेही गल्ला ज़ुंण मसीहे शिक्षा समझ़णा लै लान्हैं ज़िहै नज़ाण आसा। 2तधू दैनी मंऐं तम्हां लै परमेशरे बैणा का मसीहे सादी शिक्षा ज़िहअ कुंण मणछ आपणैं लान्हैं का दुध पणैऊंआं। मंऐं निं तम्हां का ज़ुआन मणछा ज़ेही रोटी दैई परमेशरे डुघै भेद खोज़ी शिक्षा दैनी, किल्हैकि तम्हैं निं तेता अज़ी बी समझ़ी सकदै तै।
3किल्हैकि तम्हैं आसा अज़ी बी थारै पापी सभाबे बशै पल़ै दै। थारै मन्नैं आसा एकी-दुजै लै ज़ल़ण अर एकी-दुजै संघै हआ तम्हैं झ़घल़दै लागै दै। ईंयां सोभै करा ऐहा गल्ला साबत कि तम्हैं आसा थारै पापी सभाबे बशै पल़ै दै अर थारी ज़िन्दगी आसा संसारे मणछा ज़ेही। 4किल्हैकि ज़ेभै तम्हैं इहअ बोला, “हुंह आसा पल़सीओ,” अर दुजअ बोला, “हुंह आसा अपूलोसो,” तै कै तम्हैं तिहै करदै निं आथी लागै दै ज़िहै संसारे मणछ करा?
5अपूलोस किज़ै आसा? अर पल़सी किज़ै आसा? हाम्हैं आसा सिधै परमेशरे दास ज़सरी बज़्हा तम्हैं खुशीए समादा दी विश्वास किअ। हाम्हैं सोभी किअ सह काम ज़ुंण हाम्हां लै प्रभू दैनअ। 6हुंह त पैहलअ मणछ ज़ुंणी तम्हां का परमेशरो समाद खोज़अ, हुंह आसा ज़िम्मीं दी बेज़ै रोही डाहणैं आल़अ। तेखअ अपूलोसै किई थारी विश्वासा दी मज़बूत हणैं दी मज़त सह हुअ दुजअ मणछ तेऊ टिप्परू दी पाणीं दैणैं आल़ै ज़िहअ। पर परमेशरै दैनी तम्हां लै नऊंईं ज़िन्दगी अर सह आसा तम्हां आत्मिक ज़िन्दगी दी बढाऊंदअ लागअ द ज़िहअ सह बूटा लै बझ़ दैआ। 7तैही निं बऊंणैं आल़अ किछ़ आथी, अर नां तेथ टिप्परू दी पाणीं पाणै आल़अ किछ़ आथी, पर सह परमेशर ई आसा सोभ किछ़ ज़ुंण तेता बढाऊंणैं आल़अ आसा।
8ज़ुंणी बऊई डाहअ अर ज़ुंणी तेथ लागै दै टिप्परू दी पाणीं दैनअ तिन्नैं दुही किअ एक मकसद डाही करै काम। तिन्नां दुही भेटणअ तिन्नें कामें साबै फल। 9किल्हैकि हाम्हैं सोभै आसा साझ़ू लागै दै परमेशरा लै कामां करदै अर हाम्हैं दुहै आसा परमेशरे। पर परमेशर आसा तम्हां विश्वासी आपणीं ज़ैगा बढाऊंदअ लागअ द। अह आसा इहअ ज़िहअ कि सह आसा लागअ द तम्हां करै आप्पू लै कोठी बणाऊंदअ।
10ज़ुंण बरदान परमेशरै मुल्है दैनअ मंऐं बणाईं ज़ाणकार कारीगीरा ज़ेही तेऊ भबने आथरी। होर आसा तैहा आथरी प्रैंदै बणाऐं दै भबना ज़िहै, पर सोभी लोगा लागा ऐहा गल्ला दी धैन दैणअ कि तिंयां तेथ किहै आसा च़िणैं दै। 11ज़ुंण अह कोठी बणाईं, ईशू मसीहा आसा एते आथरी ज़िहअ। सह ई आसा एक्कै आथरी। एतो मतलब आसा इहअ कि ईशू मसीहा ई आसा सह बात ज़ेसी बाती हाम्हैं परमेशरा सेटा पुजा।#ईशा. 28:16
12ज़ै कुंण मसीहो दास शुची शिक्षा खोज़े ज़ुंण तिन्नां परमेशरै आसा दैनी दी, तिंयां आसा इहै कारीगीर ज़ुंण सुन्नैं, च़ंदी अर किम्मती पात्थरा ज़ेही बधिया पाक्की च़िज़ा करै घअर बणाआं। पर ज़ै तिंयां झ़ुठी शिक्षा दैए, तिंयां आसा इहै कारीगीर ज़ुंण काठ, भुखलै ज़ेही काच़ी च़िज़ा करै घअर बणाआं। 13पर ज़ेभै मसीहा भिई पृथूई लै बापस फिरी एछणअ तेभै परखणैं आगी हर मणछे काम प्रगट कि किहै आसा। आगी करनी अह गल्ल प्रगट कि तिन्नें कामें किम्मत आसा कि नांईं।
14ज़हा मणछे काम तैहा आगी दी नांईं दझ़े, तेऊ भेटणअ तेतो फल। 15पर ज़ै मसीहा कहा मणछा लै इहअ बोले कि तेऊ निं राम्बल़अ काम किअ, सदा रहणैं आल़ी ज़िन्दगी ता जाए तेऊ भेटी पर तेऊ निं तेऊए कामों मसीहा का किछ़ै फल भेटणअ।
16तम्हां का आसा थोघ कि तम्हैं आसा परमेशरे भबन अर परमेशरे आत्मां बस्सा तम्हां दी। 17ज़ुंण तम्हैं परमेशरे पबित्र भबना ज़िहै आसा, ज़ै तम्हां कुंण मणछ तम्हां मांझ़ै फूट पाए, परमेशरा दैणीं तेऊ लै घोर सज़ा।
18कोहै बी निं आप्पू लै धोखअ दैई। ज़ै तम्हां मांझ़ै कुंण एऊ संसारे मणछे साबै आप्पू लै बडअ भारी ज्ञैनी समझ़े, तै बणै ऐडअ ताकि तम्हैं परमेशरे साबै ज्ञैनी बणी सके। 19किल्हैकि एऊ संसारे मणछो ज्ञैन आसा परमेशरा लै ऐडी गल्ल, ज़िहअ पबित्र शास्त्रा दी आसा लिखअ द,#आयू. 5:13
“सह चैल़ा तिन्नां ज्ञैनी-शास्त्री
तिन्नें ई च़लाकी दी।”
20तेखअ बोला इहअ बी,#भज. 94:11
“प्रभू हेरा भुझ़ी कि ज्ञैनी मणछ किज़ै सोठा!
तेऊ का आसा थोघ कि तिन्नें सोर केही बृथा आसा।”
21-22ऐहा गल्ला पिछ़ू फिकर करने पाआ छ़ाड़ कि कुंणी किज़ै किअ। पल़सी, अपूलोस अर पतरासो नातअ आसा तम्हां संघै। संसार, ज़िन्दगी, मौत, आझ़ अर काल्ला आसा सोभै गल्ला आसा थारी 23अर तम्हैं आसा ईशू मसीहे, अर मसीहा आसा परमेशरो।
נבחרו כעת:
1 करिन्थी 3: OSJ
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
This work is licensed under Creative Commons Attribution-ShareAlike 4.0 License.