Acts 28
28
Ne Malta Nónwe
1Nónen kwáh skénnonk tiahakwará꞉rho, wahonkwateriéntarane nètho kawenó꞉the tsi Malta konwahnathónkwa. 2Neh thóh rathinákere kwáh íken tsi wahonkhiʼiatheroserónnien. Thontásawen wahokénʼnore tánon wahkawísthote, sók kíʼ wahontʼtsenhónni ó꞉ni wationkiʼiaróton. 3Kór wahensthokónni kánias tánon otsiráke iahotiéseron sók ó꞉niare onthotáshion sóhtsi iotaríhen tánon ratsianáke ontʼwátase. 4Ne thóh rathinákere wakonwáken nóniare iohiaténton ne Kór ratsianáke wathontaténhase, “Kí꞉ken rónkwe kwáh ónhte thó꞉ka tsi sohʼteriwatewáthon, nók Natesénna iáh tahoríʼon narónnheke, iawerohátsien tsi shoniakén꞉en ne kaniatarakekówane.” 5Nók ne Kór otsiráke iahahiatónti nóniare kwáh ó꞉ni iáh thènen tehotʼkarewáton. 6Rohthirárekwe nahatenéntʼtso thó꞉ka ó꞉ni tahontaiawénstsi ahahiatiénenʼne ahrénheie. Nók nónen kwáh ken náhe shihothirárekwe neh thènen óiah nahiothónhake tsi nahohiátawen, thonsahonateriwathénien tánon wahonníron, “Rawenni꞉io íken!”
7Iáh ínon theʼkènʼne tkahetaiéntakwe nehne Publius rahohétha íken, neh rakowanenkówa neh nónwe kawenó꞉the. Kwáh íken tsi watesonkwaróhton tánon áhsen niwenniseráke rahonónskon iakwenteróntakwe. 8Ne Publius roʼníha kanákʼtake rahiatiónnikwe rothonkwároskwe. Kór thóh niaháre tsi tanonwénstha, wahaterénnaien, wathonʼnisnonsahérase, tánon sahótsienthe. 9Nètho saháwenne, kwáh rathikwékon neh thoʼnónwe kawènothe nontáien tánon sahiontaté꞉tsienthe. 10Iawethowánen wahonkhihiawíʼon, tánon neh shonsaiakwatʼtsiróten, wahonʼnetárion kahónwakon tsi nahóten tahionkwathonwentió꞉nike.
Ne Malta Tsi Nióre Ne Rome
11Shontóhetste náhsen niwennítake Alexandria non tontaiakwaténti tánon saiakwatʼtsiróten neh kahonweiaʼkówa ne konwanathónkwa ne “Tekaniʼioserásere tenikʼken,” thóh tsi kawenó꞉the nónwe naʼhatioseríʼiake. 12Iahákwawe tsi tkanátaien ne Syracuse tánon thóh nónwe nahakwá꞉tsien náhsen niwenniseráke. 13Thóh hionsahiakwaténti saiakwatʼtsiróten iahákwaʼwe tsi tkanátaien ne Rhegium. Nóia sahiórenʼne tontásawen watʼkawerákwe entiéne nontakawerénhawe, tánon tsi nióre ne tewenniseráke iahákwaʼwe tsi tkanátaien ne Puteoli. 14Thóh nónwe thó꞉ka niháti wahakhihiatatʼtsénri ne thonetákwen neh wahonkhiriwanónthonse ne thóh nonnaiakwéseke tsiaʼiák꞉sera. Tánon káti Rome wahákwaʼwe. 15Ne thonetákwens sahonkhisennáronke, thóh nióre nontahonné꞉seron neh Tiontʼkerontákwas ne Appius ó꞉ni Náhsen Niʼioswenkarentónnions ne tahiakwatátʼken. Nónen ne Kór sahsakóken, wathononwerá꞉ton ne Rawenni꞉io ó꞉ni kwáh íken tsi kowánen wahonikonrahníraʼne.
Ne Rome Nónwe
16Sahákwaʼwe ne Rome, wahonwaríʼon ne Kór rahonwáʼakhok ahenteróntake kíʼ raterí꞉ios enhotennikonráren.
17Shontóhetste náhsen nónta Kór iasakónonke ne thonónwe nihatinákere Sitaeró꞉nons nahontʼkennísa. Sahonʼnitiokwaróhroke, wahsakawénhase, “Tewatatékens Israerʼró꞉nons, iawerohátsien tsi iáh thènen tekheiérase nontionkwétas ó꞉ni tsi nikaianerenseróten tionʼkiʼiáwi nonkwasotʼtseraokonkén꞉en, wakatenó꞉thonkwe ne Jerusalem nónwe tánon iahonkatiakwarísi rononháke ne Romeʼró꞉nons. 18Sahonkeriwanonthonniónhase, ne Romeʼró꞉nons wahónnere nahonsahionkátʼkawe, tsioríhwa tsi iáh thènen tehotitʼtsénrion ne tahonkaterientawenriéʼon ne tahonkaténʼtion nakíʼeie. 19Ne Sitaeró꞉nons wahonkeriwáiakʼse, wahʼkatátʼreke ne Rakora airiwanóntonse, iawerohátsien tsi iáh thènen tewátsien nakheriwáro nakonkwetaʼsónhas. 20Neh aoríhwa wakeriwanónton ne akwáken ó꞉ni taitewatháren. Neh iorihonníʼon, kíʼ ní꞉ioht tsi keronkwasáneren, neh rarihónnis tsi nikáien ne Israerʼró꞉nons thonwetákwen.”
21Wahonwénhase, “Iáh thènen tetionkhihiatónni ne Judea nahontáwe ne sariwá꞉ke, iáh ó꞉ni ónhka nontionkwetaʼsónha ne thóh nónwe nahontahonénon ne thènen ahatiriwenháwi nahonhetʼkéntake ne sariwá꞉ke. 22Nók ahiakwanónwe꞉ne nahionkwatókense onhnisanikonrótens, tsoríhwa ionkwateriéntare kwáh tsik nonwésons nonkwesónhas iakóthare iáh teiehtiokwanónwes tsi nónwe nishátare.”
23Sók kíʼ wahonwenniserahrákwase ne Kór, tánon iakotsokowánen táien neh siwenniseráte tsi nónwe nihotawehiáthonne ne Kór. Oronkéne tsi nióre nokarasnéha wahsakonikonraientáten ne rahoteriwanothátsera ne Rawenni꞉io rahonakerásera, tánon wahateniénten niasakonikonrénhawe tsi nòkwa ne Ié꞉sos tsi nahatárakwe ne Mahís raoianerénsera tánon tsi nihothihiatónnions ne roʼnatiatatkonʼkwe. 24Ótiakes tahonnétakwe ne rahowennahókons, nók ótiakes iáh tethoʼnetákwen. 25Sók kíʼ sahonténti, tehothiriwatíronte tsi natehóntere, Nónen ne kíʼ tsoríhwa sahénron ne Kór: “Tsi nitkaiéri tsi niháwen ne Ronikonratokénti sahoróri ne roʼtiatat꞉tonkwe Isaiah rononháke ne ietʼtsiʼsotʼthonkonkén꞉en! 26Tsi niháwen,
‘Wáhs tánon seróri kí꞉ken nonkwesónha:
kwáh ensatahónsatate, nók iáh taisanikonraiéntaʼne;
enséhsake ó꞉ni nók iáh tasatʼkátho,
27Tsoríwa nónkwe akonikónras tsi ioníron,
tánon ronatahontorókʼkons
tánon tehonakʼkaraséhtons.
Neh iáh thotahióton, ahatikénhake,
enhonatʼthónteke,
enhothinikonraientásehke,
tánon i꞉i nòkwati nentʼthón꞉ne, ráton ne Ni꞉io,
tánon ensekhétsiente.’”
28Tánon ne Kór iahása: “Ahisateriéntarake, káti, nètho Rawenni꞉io rahoteriwanothátsera ne kahiatakeʼnhátsera tsi iehonwanathenieténni ne iáh tehathisitaerónons. Enhontahónsatate!”#28.28 Otsakes ne kahiatonhnions waton: 29Nó꞉nen ne Kór sahenron kiʼken, ne Sitaeró꞉nons etren sahonnete kwahiken tsi teotiriwakenenhatse.
30Teioseráke nikaríwes ne Kór thonónwe nihenteróntakwe ne ronwanonsaníhen꞉ne, tánon thoʼnónwe kwáh washakohonkaro tsi nihiákon tahonwatʼkénsera. 31Wahateriwanó꞉ten ne Rawenni꞉io rahonakerásera ó꞉ni wasakorihónnien rahonháke ne Roiá꞉ner Ié꞉sos Kerístos, tsi róhtare kwáh ronikonraníron ó꞉ni rathatewenní꞉io.
נבחרו כעת:
Acts 28: MHK
הדגשה
שתפו
השווה
העתק
רוצים לשמור את ההדגשות שלכם בכל המכשירים שלכם? הירשמו או היכנסו
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.