Kwan 15
15
Cik ma mako cowirok
1Rwoth oluwo gi Musa ka waco ni: 2“Luw gi Joisiraili aka iwaci rijo ni, Ka witundo i piny ma wilabed'iye, m'amiyo win, 3t'imiyo mic awaŋa ri Rwoth wok i sidwol kosa i mwendi obedi mic awaŋa kosa cowirok, ma ketho i gike cikirok kosa paka mic ma iwon iyeyo kosa i kalima mewin ma wiyiko ma timo ŋwece kur ma sangala Rwoth. 4Nyaka ŋat'okeli nger mic no ri Rwoth bino bende kelo mic ma kodhi, acel wiy apar ma moko m'onuŋere, m'oruw kodi acel wiy aŋwen ma mo oliv. 5Medo kwoŋ meno, ibino miyo acel wiy aŋwen ma vini paka mic ma vini kodi mic awaŋa kosa cowirok, ri kisi wod rombo. 6Ri wod rombo, ibino miyo mic ma kodhi, acel wiy apar ma moko m'onuŋere m'oruw kodi acel wiy adek ma mo oliv. 7Paka mic ma math ibino miyo acel wiy adek ma vini, maŋwe kur ri Rwoth. 8K'imiyo rwath paka mic awaŋa kosa cowirok, ma ketho i gike cikirok kosa paka mic ma siem ri Rwoth, 9nyaka ibino kelo gi rwath mic ma kodhi, kilo adek ma moko m'onuŋere, m'oruw gi lita ario ma mo oliv. 10Ibino kelo paka mic ma math lita ario ma vini, paka mic awaŋa, ma ŋwece mere sangala Rwoth.”
11“Meno a gim'ibino timo gi kisi thwon kosa wod rombo, kosa gi kisi rombo kosa i dier nyithindhi diegi. 12Cungo kwoŋ welo mar'ogwaŋe m'imiyo, ameno apaka ibino timo gi kisi acel kodi je. 13Kisi Jaisiraili bino timo gigipiny me ka kelo mic awaŋa, ma ŋwece kur mere sangala Rwoth. 14Jakicar ma bedo i dier win, kosa m'onwaŋ kabedo makicutho i dier win, to paro miyo mic awaŋa, ma ŋwece kur mere sangala Rwoth, bende ripo luwo cik me. 15Paka ri kacokirok, bino bedo cik acel ri Jaisiraili kodi jakicar, cik ma cil gi cil ri luse mewin je. Jaisiraili kodi jakicar jobino bedo marom ruwaŋ Rwoth. 16#Jolevi 24:22Jaisiraili kodi jakicar ma bedo i dier win jobino bedo gi cik acel kodi thumo banja acel.”
17Rwoth oluwo gi Musa ka waco ama: 18Luw gi Joisiraili aka iwaci rijo ni, ka witieko tundo i lowo m'akel'iye win, 19hongo je ma wicam'iye cemo moro ma lowo, wibino miyo mic ri Rwoth. 20Wok kwoŋ mugat marapena ma widwanyo, wibino miyo mugat acel gipi paka mic; wibino miyo paka wimiyo mic ma wok i gigipiny ma wipiedho. 21I luse mewin je, wibino miyo Rwoth mic wok i mugat mewin marapena ma widwanyo.
22To ka witimo gimikanyo to wibedo ma wikikuro or me je ma Rwoth otieko luwo gi Musa, 23kisi gimoro ma Rwoth otieko oro win ka luwo bongi Musa, wok i ndelo ma Rwoth omiyo or kadho yuwaŋe, i luse mewin je. 24Onyo ka winotim ma kweth k'oŋeyo, kweth gibe bino miyo rwath acel ri mic awaŋa, ma kur mere sangala Rwoth, kanyacel gi mic mere ma kodhi kodi mic mere ma math, cungo kwoŋ cik mere, wod diel acel ri mic ma cwako reco. 25Jacway ri Were i wi migam bino timo kwer ma ŋuto ri kweth pa Isiraili je, aka ibino cwako jo; jotimo ma jok'oŋeyo, aka onyo jokelo mic pajo, mic awaŋa ri Rwoth, kodi ma ŋuto reco ruwaŋ Rwoth, ro komo pajo. 26Kweth pa Joisiraili gibe ibino cwako, kanyacel gi jopath je ma jobedo i dier jo, kwoŋbedo ji je jotimo gi komo.
27 #
Jolevi 4:27-31
Nyatoro m'otimi reco ma k'oŋeyo bino miyo siwen diel ma jaoro acel paka mic ma ŋuto reco. 28Jacway ri Were i wi migam bino timo kwer ma ŋuto ruwaŋ Rwoth i migam ma lonyo ŋat'otim kibenga, aka ibino cwako rigo. 29Ri janono i dier Joisiraili kodi ri japath ma bedo i dier jo, wibino bedo gi cik acel ri kisi dhano m'otimi gikibenga. 30To ka dhano otim gimikanyo, obedi Jaisiraili kosa japath, meno obwono Rwoth, ibino riemo go woko i dier ji. 31Rupiri go ocayo wac pa Rwoth to turo or pere, nger ŋato ibino riemo go kicutho to bielo banja.
Dhano m'oturo Sabato
32Munyo Joisiraili oyido jonitie i thim, jonwaŋo jal moro ma dimo yen i ndelo ma Sabato. 33Jono ma jonwaŋo go dimo yen jokelo go bongi Musa, Aron, gi bongi kweth je. 34Jobolo go i iye, rupiri oyido jokuya gir'atima gine. 35Kenyo to Rwoth waco ri Musa ni, “Jalo iripo neko; kweth gibe joripo neko go woko ma kambi.” 36Kweth gibe jowodho go woko ma kambi to jogoyo go gi telin cuka otho, paka Rwoth oyido otieko miyo Musa or.
Cik kwoŋ ketho lwodo i nangin
37Rwoth owaco ri Musa ni: 38“Luw gi Joisiraili, aka iwaci rijo timo lwodo i sonda ma nangin pajo i luse pajo je kendo gi ketho thol manyabululu i mugowa i kisi sonda. 39Winitie kodi lwodo ŋey kis ka wineno, wibino poyo or pa Rwoth je gi timo jo, to wibedo ma wikitimo gima cunyin win wanya gi ma waŋ win oneno. 40Onyo wibino poyo kodi kuro or paran je, aka wibino bedo maleŋ ri Were mewin. 41Abedo Rwoth Were mewin, m'owodho win woko ma piny ma Misir, ma bedo Were mewin: Abedo Rwoth Were mewin.”
נבחרו כעת:
Kwan 15: DHOPE
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
Dhopadhola DC Bible © Bible Society of Uganda, 2018.