Yakobo 4
4
Obwĩra bwʼekihugo
1Erinegena nʼamalwa omo katĩkatĩ kenyũ bĩkalũa hahi kwehĩ? Bĩkalũa oko syongumbu syenyũ esĩkalũa omo mibiri yenyũ. 2Mukasonda ebindu byo kutsibu, nĩkwa simuwitebyo, neryo mukasonda erĩĩta abandi. Mukatsura nĩkwa simwetoka eribanabyo; kikaleka imwalwa nʼerinegena. Simuwite ebyo mwanzĩre kusangwa sĩmwebũlaya Nyamuhanga. 3Mũkabũlaya neryo simwebanabyo, kusangwa mũkabũlaya nabi, muti mũkakolesayabyo omo syongumbu syenyũ. 4Ĩnywe basĩngĩrĩ, sĩmwasĩ ko bwĩra bwʼekihugo nĩ bũyĩgũ uku Nyamuhanga kwehĩ? Neryo Oyukasonda eribya mwĩra wʼekihugo akayiyira mo nzĩgũ ya Nyamuhanga. 5Kutse mũkaganĩraya muti Amasako akabũga buyira kwehĩ, ati, Ekĩrĩmũ ekyo Nyamuhanga abĩrĩhĩra omwisi syetu, kyoswĩre nʼerisonda litsibu. 6Nĩkwa olukogo olo Nyamuhanga akaha lũlengĩre. Neryo Amasako ati, Nyamuhanga akalwa nʼabakayiheka, nĩkwa akakangaya olukogo ukwʼabo bakayĩkehaya. 7Neryo mwolobe embere sya Nyamuhanga. Mulwe nʼeSatanĩ, nayo ikandisyabasaga. 8Mũyĩtũnde hakũhĩ na Nyamuhanga, naye akandĩyĩtũnda hakũhĩ nenyũ. Mũnabaye ebyala byenyũ, ĩnywe bakola-nabi! Mweraye emitima yenyũ ĩnywe mũkayĩtendereraya. 9Mũkwe obũlĩge, mũsũsũmane, mulire: eriseka lyenyũ libinduke mwʼĩsũsũmana, nʼobutseme bwenyũ bubinduke mo ngitsi. 10Mũyĩkehaye embere syʼOmukama, naye akandĩbahamya.
Omwatsi wʼeritswera mũlĩkyetu
11Balĩkyetu, simuhandikirirane. Oyukahandikirira mũlĩkyabo, kutse erimutswera, akahandikirira Emigambo nʼeritswerayo. Nĩkwa Wamatswera Emigambo, sukiri oyukakenga Emigambo, nĩkwa uli mũtswerĩ wayo. 12Nyamuhanga ĩyowene akayira Emigambo nʼeribya mũtswerĩ. Iye ĩyowene akatoka erĩlamya nʼerĩherya, nĩkwa uwe uwendi uti ukatswera mũlĩkyenyũ kwehĩ?
Omwatsi wʼeriyihalamba
13Muhulikirire, ĩnywe mũkabũga muti, Mũnabwĩre kutse engyakya, twasyaya oko mũyĩ mulebe, aho twasyasiba Omwaka muguma. Aho twasyatũndya, nʼeribana endũndĩ. 14Kwesĩ sĩmwasĩ nga mwasyabya muti omo ngyakya. Kusangwa engebe yenyũ iri ngʼoluhohe, olukahuluka katambĩ kake, neryo ilwabulirayo. 15Neryo ekitolere ĩwabũga uti, Omukama amabya anzĩre, twasyabyaho itwakola ekĩ kutse ekindi. 16Nĩkwa lino, mukayihalamba omo miyiheko yenyũ. Emiyihalambo yosĩ eyo ni kibi. 17Neryo, omundu oyo wasĩ ekibuya ekyo angakola, nĩkwa sialikolakyo, omundu oyũ ali mʼomusango wʼebibi.
נבחרו כעת:
Yakobo 4: KB80
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
Bible in Kinandi © Bible Society of the Democratic Republic of Congo, and Bible Society of Uganda, 1980.