Abaebrania 12
12
Nyamuhanga Tata wetu akatusuyira
1Nĩkwa ĩtwe, kusangwa tũtĩmbĩrweko nʼendeko nene yʼabalangĩrĩ, tũyĩlũsaye kwʼebyosĩ ebĩkatũkakĩraya, nʼebibi ebikatuhamba, tutibite nʼerĩyĩyĩnĩa omo matangwa awali embere syetu. 2Neryo tũhĩre ameso wetu uku Yesu oyukatuleta okwʼĩkĩrĩrya nʼoyũkaberererayalyo. Kusangwa Yesu mwayĩyĩnĩa oko musalaba, abya asĩ obutseme obwasyabya buwe, kandi mwatalebya esĩsonĩ syago nga kindu. Lino ĩkere oko luhande lwʼamali lwʼekĩtũmbĩ kyʼobwami kya Nyamuhanga.
3Neryo mũganĩraye Yesu oyo wayĩyĩnaya omo bũyĩgũ bwʼabakola-nabi, neryo simuluhe kutse erioloba omo mitima yenyũ. 4Omo malwa wenyũ nʼebibi, sĩmwetahĩka aho bakũta omusasi wenyũ. 5Mwabiribirirwa ebĩnywa ebyo ebĩkasĩkaya omutima, ebĩkabũgawa nenyũ ngʼabagala biti,
Mugala wage, supone erisuyira lyʼOmwami Mukulu,
Kutse Suleke omutima erioloba omugulu akakukunga.
6Kusangwa Omwami Mukulu akakunga oyo anzĩre,
Kandi akaswĩraya obuli mugala oyũkamũkokaya.
7Neryo mũyĩyĩnaye omwʼikungwa erĩ, kusangwa Nyamuhanga akabakola ngʼabagala buwe. Kusangwa omugala ni wahi oyo tata wuwe sialikunga kwehĩ? 8Nĩkwa mwamabya butsira erikungwa haguma nʼabandi bosĩ, kwesĩ isimuli bagala, imuli basa-na-nyĩnya. 9Kandi twabya nʼabotata wetu bʼekihugo ibakatukunga, netu motwakengabo. Sĩtwangowa kwilaba aho Tata wʼebĩrĩmũ byetu, itwabyaho kwehĩ? 10Kusangwa abotata wetu mobatukunga akatambĩ kake ngoko baganĩraya bati litolere. Nĩkwa Nyamuhanga akatukunga eritukola ndeke, itwatoka erisangira obũbũyĩrĩre buwe. 11Erikunga lyosĩ riri nga bũlĩge oko katambĩ kake, butsira obutseme. Nĩkwa enyũma likaleta emĩbĩrĩ yʼobuholo nʼeritunganene omo mitima yabo, ukwʼabo babĩrĩkangĩrĩrĩbwa mulyo.
Erĩkangĩrĩrya nʼerihana
12Neryo mũsĩkaye ebyala byolobyolo nʼamarwĩ awakatitimana! 13Mubye mukakwama enzira eyitunganene, ekirema sĩkĩkwe, nĩkwa kĩlamĩbawe.
14Mukwamirire nʼomũhwa eribya nʼobuholo nʼabandu bosĩ, kandi mukwamirire eribya nʼengebe ĩbũyĩrĩre. Oyũtabũyĩrĩre siendisyalola oko Mukama. 15Mũlebaye Sihabye omundu oyukabula oko lukogo lwa Nyamuhanga. Kandi mũlebaye Sihabye omundu oyũkalĩre omo mutima, oyukaleta obũlĩge, neryo abangi bakatsanda. 16Kandi Sihabye mundu mũsĩngĩrĩ, kutse oyutekenga Nyamuhanga nga Esaũ, oyo wagũlaya omwandu wuwe wʼobukulu busana nʼekisa kiguma. 17Kusangwa mũnasĩ ngoko enyũma wʼaho, mwasonda eribana omũyĩsa wa tata wuwe nĩkwa mwatalĩgĩrwa. Kusangwa mwatabana enzira yʼeribindula omwatsi akola, nomo anasondayago omwʼirira lyʼemĩsonĩa.
18Kusangwa sĩmwetahĩka oko kitwa ekyangatũlwako, nʼoko muliro owakagulumira, nʼoko mwĩrĩmya nʼekĩtũ kĩkĩnĩre, nʼoko kanyabungu, 19nʼomulenge wʼengubi, nʼomulenge wʼoyũkabũga. Omugulu abandu bowa omulenge oyo mobalemba-lemba bati, omulenge oyo syasyeswabwirabo ekindi kĩnywa. 20Kusangwa mobataluka erĩowa eritegeka eryo lyabũga liti, Enyama yamatũla oko kitwa ekyo, ĩyĩtwa omo mabwe. 21Omwatsi oyo abya akũbahya abandu bo kutsibu. Kyaleka Musa ĩnĩabũga ati, Namubaha kutsibu nʼerititimana.
22Nĩkwa ĩnywe mwabĩrĩhĩka oko kitwa kyʼeSĩonĩ, nʼomũyĩ wa Nyamuhanga oyuliho, nʼoko Yerũsalema yʼelubula, nʼoko bamalaĩka abateganzika. 23Kandi mwabĩrĩhĩka okwʼĩhĩndana lyʼehimbere hya Nyamuhanga, ehĩsakĩre elubula, kandi mwabĩrĩhĩka uku Nyamuhanga Omũtswerĩ wʼabandu bosĩ, nʼoko bĩrĩmũ byʼabandu batunganene abahĩkene. 24Kandi mwabĩrĩhĩka uku Yesu omũsanganĩa wʼerilagana lihya-lihya, nʼoko musasi owʼerĩlagalĩrya, owakakanganaya omwatsi owene kwilaba erĩtũlago lyʼomwatsi gʼomusasi wa Abele.
25Mũlebaye simugane oyũkabũga. Abagana erĩowa oyo wabũga ekĩnywa kya Nyamuhanga oko kihugo, mobatabala. Kwilaba aho netu sitwendisyabala twamagana erĩowa omulenge wʼoyo wʼelubula. 26Oko mugulu oyo, omulenge wa Nyamuhanga mwasũka-sũkanĩa ekihugo, nĩkwa lino abirilaga ati, Nasyasũka-sũkya kandi, butsira ekihugo ĩkyokyene, nĩkwa nʼolubula nibya. 27Omugulu akabũga ati, Akandi, akakangaya ndeke ngoko ebyahangikawa ebĩkasũka-sũkanĩbawa byasyalũsĩbwaho, neryo ebindu ebyo ebitetoka erĩsũka-sũkanĩbwa ĩbyasĩgalaho. 28Neryo tubye nʼewasĩngya, kusangwa tukabana obwami obutetoka erĩsũka-sũkanĩbwa. Tukolere Nyamuhanga nʼerĩmũtsemesya, tumukenge nʼerĩmũsĩkya. 29Kusangwa Nyamuhanga wetu ni muliro owakatogotaya.
נבחרו כעת:
Abaebrania 12: KB80
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
Bible in Kinandi © Bible Society of the Democratic Republic of Congo, and Bible Society of Uganda, 1980.