1 Petero 5
5
Esyombũlĩ sya Nyamuhanga
1Neryo, ngalemba-lemba abakulu omo katĩkatĩ kenyũ nga mũlĩkyenyũ mukulu. Kandi indi mũlangĩrĩ wʼamagalĩ wa Kristo. Neryo nasyasangira olukengerwa olũkandĩsyabĩsũlwa. 2Mũlĩsaye esyombũlĩ sya Nyamuhanga esiri omo katĩkatĩ kenyũ. Mulemberesyo kusangwa mwanzĩre erikola mutya busana na Nyamuhanga, butsira erihatikanwa. Kandi Simukole mutya busana nʼerihembwa lisa, nĩkwa omo mũhwa wʼerikola. 3Kandi simuyiyire nga mukatabala oko bandu abo mwahabawa erĩteya, nĩkwa mubye ebĩsosekanĩo busana nʼekihangulo. 4Neryo mugulu Omũlĩsya mukulu asyamĩnyĩkalĩbwa, mwasyabana embĩta yʼolukengerwa olutekula.
5Nenyũ nibya ĩnywe balwana, mukenge abakulu benyũ. Kandi ĩnywe bosĩ mũyĩkehaye embere syʼabalĩkyenyũ, kusangwa kĩsakĩre kiti,
Nyamuhanga akalwa nʼabakayiheka,
Nĩkwa akakanyaya olukogo oko bakayĩkehaya.
6Neryo mũyĩkehaye omo byala bya Nyamuhanga byʼobũtokĩ, neryo ĩnĩabahamya oko mugulu atolere. 7Mũhĩre erĩhangahangya lyenyũ lyosĩ uku Nyamuhanga, kusangwa akabategaya.
8Mũlebaye, mũyĩtegaye! Kusangwa enzĩgũ yenyũ Satanĩ, ikagenda-genda ngʼendale, eyikaruruma nʼerisonda-sonda oyo yangalya. 9Mulwe nayo ĩmũnasĩkĩre omwʼĩkĩrĩrya lyenyũ, kusangwa mũnasĩ abalĩkyenyũ abali muna-kihugo ko bakagalawa batya. 10Neryo mwamabiagalwa akatambĩ, Nyamuhanga owʼolukogo losĩ oyo wababirikira erisangira olukengerwa luwe lwʼerikota haguma na Kristo, asyabahĩkanĩa, nʼerĩbasĩkya, nʼeribaha amaka, nʼerĩbahanganĩa ndeke. 11Obũtokĩ bubye buwe kera na kera. Amina.
Erĩkerya abandi
12Nabiribasakira ebĩnywa bike ebĩ. Sĩlvano oyo ngahula ngʼomũlĩkyetu oyuteregula abĩrĩnyĩwatĩkya erisakabyo. Kandi ngasonda erihanda emitima yenyũ nʼerĩtũlago nyiti omwatsi oyũ ni lukogo lwʼekwenene lwa Nyamuhanga. Mũsĩke mulo.
13Ekanĩsa eyiri eBabelĩ, eyayisogawa haguma nenyũ, ĩkabakeraya. Kandi omwana wage ye Marĩko akabakeraya. 14Mũkeranaye nʼeriwanako lyʼolwanzo.
Obuholo bubye nenyũ ĩnywe bosĩ-bosĩ ko muwatene na Kristo.
נבחרו כעת:
1 Petero 5: KB80
הדגשה
העתק
השווה
שתפו
רוצים לשמור את ההדגשות שלכם בכל המכשירים שלכם? הירשמו או היכנסו
Bible in Kinandi © Bible Society of the Democratic Republic of Congo, and Bible Society of Uganda, 1980.