ማቲዎሴ 3
3
ማስካ ዮሓኒሴ ዬሱሴ ዛሎ'' ዼ'ጊዲ ኬኤዜሢ
(ማር. 1፥1-8፤ ሉቃ. 3፥1-18፤ ዮሓ. 1፥19-28)
1ዬኖ ዎዶ''ና ማስካ ዮሓኒሴ ዪሁዳ ዓጫ'' ዓሲ ናንጉዋ ዳውሎ''ይዳ ዓሶም ኮዦ ሃይሶ ኬኤዚ ኬኤዚ ሙኬኔ። 2ዒዚ ኬኤዜሢ፦ «ፆኦሲ ካኣቱማ ዑኬኔ፤ ጎሞ ቡኡፁዋቴ» ሂዚ ጌዒኬ። #ማቲ. 4፥17፤ ማር. 1፥15።
3« ‹ጎዳኮ ጎይፆ ጊኢጊሹዋቴ፥
ሉኡጎ ጎይፆዋ ፒዚሱዋቴ› ጌዒ ጌዒ
ዓሲ ናንጉዋ ዳውሎ''ይዳ ዒላታ ዓሲ ዑኡሲ» ጌዒ
ፆኦሲ ማሊፆ ኬኤዛ ዒሲያሴ ኬኤዜሢ ዬያ ዮሓኒሴ ዛሎ''ኬ። #ዒሲ. 40፥3።
4ዮሓኒሴኮ ማኣዓሢ ጋኣሎ ጋፓኔፓ ኮሾ''ናያኬ፤ ኬርኖይዳ ዒ ቃልሾ ቱካ''ኔ፥ ሙዓ ሃሣ ዒዛኮ ዓቢሢና ዑቶ ዔኤሲ''ናኬ፤ #2ካኣቶ''. ማ 1፥8፤ ዛካ. 13፥4፤ ሌዊ. ዓኬ 11፥22። 5ዬኖ ዎዶ''ና ዪሁዳ ዓጮ'' ዬሩሳላሜ ካታማ''ፓ፥ ዮርዳኖሴ ዎሮ ኮይላ'' ዓኣ ዓጫ''ፓ ዓሳ ቢያ ዮሓኒሴ ኮይላ'' ሙኪ፥ 6ጎሞ ፔኤኮ ቡኡፂ ቡኡፂ ዒዛ ኮይላ'' ዮርዳኖሴ ዎራ ዋኣፆ ማስታኔ።
7ዮሓኒሴ ሚርጌ ፔርሴ ዓሲንታ ሶዶቄ ዓሲንታ ዋኣፆና ማስታኒ ዒዛ ኮራ ሙካሢ ዛጋዖ፦ «ሃይ ዒንሢ ሾኦዣ! ሙካ ፆኦሲኮ ጎሪ''ንቶይዳፓ ዒንሢ ቶላ''ንዳ ጎይፆ ዖኦኒ ዒንሢም ኬኤዜይ? #ማቲ. 12፥34፤ 23፥33። 8ዓካሪ ሃሢ ዒንሢኮ ጎሞ ቡኡፂፆ ዔርዛ ማላታ ማዹዋቴ። 9‹ኑኡኒ ዓብራሃሜ ናኣቶ''ኬ› ጌዒ ጌዒ ሄርሺንቲፖቴ፤ ፆኦሲ ሃያ ሹጮይዳፓ ዓብራሃሜ ናይ ማሃኒ ዳንዳዓኔ ታ ዒንሢም ጋዓኣኬ። #ዮሓ. 8፥33። 10ሃሢ ዓካሪ ሚፆ ፃጳፓ ቲቃኒ ሄርጋ ጊኢጊንቴኔ፤ ቃራ ዓኣፒ ዓኣፑዋ ሚሢ ቢያ ቲቂንቲ ታሚዳ ዓጊንታንዳኔ። #ማቲ. 7፥19። 11ሓሢ ታ ዒንሢ ጎሞ ቡኡፂፆ ዔርዛያ ማሂ ዋኣሢና ማስካኔ፤ ጋዓንቴ ታኣኮ ጊንፆ ሙካሢ ዓያና ጌኤሺና ሃሣ ታሚና ዒንሢ ማስካንዳኔ፤ ዒ ታጊዳፓ ሚርጌና ባሼታሢሮ ታ ዒዛኮ ቶኮ'' ዱርዞታዖ ኬዳኒ ኮይሳ ዓሲቱዋሴ። 12ዒዛኮ ሃኣኮ ሶኦሪ ጌኤሾ ዓንዳ ዓኣሢሮ፥ ጌኤሼሢኮ ጊንፃ ዓኣፖንሢ ኮና ዋሂ ዲኢሮ ባይቁዋ ታሚዳ ሚቻንዳኔ» ዔያቶም ጌዔኔ።
ዬሱሴኮ ዋኣፆና ማስቲፆ
(ማር. 1፥9-11፤ ሉቃ. 3፥21-22)
13ዬኖ ዎዶ''ና ዬሱሴ ዮሓኒሴ ኮራ ዋኣፆ ማስታኒ ጌሊላ ዓጮ''ይዳፓ ዮርዳኖሴ ዎሮ ሙኬኔ። 14ዮሓኒሴ ጋዓንቴ፦ «ዬይ ማዓዓኬ፤ ታ ኔ ኮራ ማስታኒ ኮይሳንቴ፥ ኔ ታ ባንሢ ሙካ?» ጌዒ ላኣጊሢ ዓርቄኔ።
15ዬሱሴ፦ «ፆኦሲ ኮዓ ባኮ ቢያ ሂዲ ኑ ኩንሣንዳያ ኮይሳሢሮ ሃሢ ላኣጊፖ፤ ያዒ ማማዖንጎ» ጌዒ ማሃዛ፥ ዮሓኒሴ ዒ ጌዔሢ ዋይዛዖ ዬሱሴ ዋኣፆና ማስኬኔ። 16ዬሱሴ ዋኣፃፓ ማስቲ ኬኬስካኣና ጫሪንጫ ቡሊ''ንቲ፥ ፆኦሲኮ ዓያና'' ዶኦሌ'' ማሊ ኬዲ'' ዒዛ ዑፃ ዴዓንቴ ዒ ዴንቄኔ። 17ዬማና፦ «ታና ዎዛሳ፥ ታ ዒዛ ናሽካ ናዓሢ ታኣኮ ሃያኬ» ጋዓ ዑኡሲ ጫሪንጫፓ ዋይዚንቴኔ። #ማዢ. ማፃ 22፥2፤ ዓይኑ. 2፥7፤ ዒሲ. 42፥1፤ ማቲ. 12፥18፤ 17፥15፤ ማር. 1፥11፤ ሉቃ. 9፥35።
Maale New Testament © Bible Society of Ethiopia, 2007.