Sáni Juánu 9
9
Jesusi pátenharhini éskatarasti
1Enka uéntapka, Jesusi achetini ma exemaspti enka pátenharhi kánkorhenhapka. 2Ka jurhenkorheri jémpechaksï kurhamarhespti:
–Jurhentpiri, ¿Antisï inte acheti ísï kánkorhenha? ¿Tátjempa ka amamperi k'amanharhitskua jimpoeski o interi k'amanharhitskua jimpoeski?
3Jesusi arhiaspti:
–No interi jimpoesti, ka nít'u tátjemperi o amamperi k'amanharhintskue, jimposï ísï jati eska inteni jimpo xarharaaka ampe enka xáni Diósï úk'a uni. 4Enka jurhiakuek'a, jatsiskachi ánchperata úkuni imani enkarini axaka; jimpoka chúrexamka enka nónema úk'a ánchekorheni. 5Enkani jámperi íni parhakpeni jámani jaka, parhakpeni anapu erak'utarakueska.
6Ísï uantaspti ka t'uantskarani, kuechenta jimpo atsïmu sáni úspti ka pátenharhini éskuarhu atanharhikuspti. 7Ka uantaspti:
–Ni jupanharhint'ani itsï jatakua Siloerhu (enka “Axakata” arhikuekak'a).
Pátenharhi niraspti eska na arhinhapka ka jupanharhint'aspti ka exepunkuasptia. 8Jimesï anapuecha ka iámentu ima enkaksï exepka eska tumina kurhak'orheni jarhasïrempka, kurhamarhekorhesïremptiksï:
–¿Anti no intesï uaxantetini jarheni tumina kurhak'orheni?
9Máruksï uantasïrempti:
–Jo intesti.
Máteruksï uantani:
Nompe, no jintesti, jinisï mák'ueni jánharhiti.
Ka ima enka patenharhipka uantakorhesïrempti:
–Jo, jíska.
10Ka kurhamarhesptiksï:
–¿Ka nénari jámani iásï úsïnkia exeni?
11Ka pátenharhi arhiaspti:
–Ima acheti enka Jesusi arhinhak'a, atsimurini atanharhikusti, ka arhistirini: Ni itsï jatakua Siloerhu ka jupanharhintsï. Ji niraska, ka jupanharhint'atini, eskaska.
12Jimak'uksï kurhamarhespti:
–¿Anti nani jámaxaki ima acheti?
Ka ima arhiaspti:
–No míteska.
Jesusi néna éskataraski pátenharhini
13Pátenharhinksï fariseuechani pákuaspti, 14sábadu jurhiatekuespti enka Jesusi atsïmu jimpo eskatarantapka. 15Ka imaksï kurhamarhespti néna jámaspi enka úempkia exenia. Ka ima arhiaspti:
–Eskuarhurini atsïmu atanharhikusti, jupanharhint'aska, ka úsïnkia exeni.
16Máruksï fariseouecha uantasïrempti:
Ne emanka ísï niátaka, no Diósïristi, jimpoka no janhanharhisïnka sábadu jurhiatekuani.
Ka máteruksï untasïrempti:
–¿Nénat'u úpirini inteni járhati milagru xarhataani enka k'amanharhintstika?
Ísïksï arhip'eraparini arhukurhispti, 17ka ménteruksï uéntaspti kurhamarheni imani enka patenharhipka:
–Ka enkakini ísï éskataraka, t'u imeri ampe, ¿Ampe sáni uantasïni?
Ima uantaspti:
–Jucheti jimpo Diósïri uantaristi.
18Ka judiouechaksï no uékaspti jakak'uni eska pátenharhispka ka eska iásï úsïrempkia eskani, ka tátjempani ka nánte jémpanksï p'itak'orheaspti, 19ka kurhamarhesptiksï:
–¿I chári sapiski? ¿Uantant'a'xakits'ï eskats'ï pátenharhi kánkorheska? Ka ¿Néna jimposï iásï úk'ia exeni?
20Tátjempa jémpechaksï untaspti:
–Míaxakachi eska juchariska, ka eskaksï pátanharhini kánkorheska; 21k'óruchi no míteska néna jimposï úk'ia exeni, nót'uksi míteska ne eskatarantaski. Inteni kurhamarhekorhe je; k'éristia, inteksïni úatia aiankukorheni.
22Tátjempechaksï chéta jimpo ísï uantaspti, jimpokaksï judiouecha arhip'eratixapka eskaksï petant'a'pirinka tánkorhentskuarhu néni enka jiókorhepirinka eska Jesusi Krístuespka. 23Jimpoksïsï ísï uantapti tátjempecha: “K'éristia, kurhamarhekorhe je.”
24Judiouechaksï ménteru p'itak'orhespti imani enka pátenharhipka, ka arhisptiksï:
–Sésits'ïni aianku Diósïni japarini. Jimpokani jucha míteska eska ima acheti k'amanharhintstiska.
25Jimak'ani ima arhiaspti:
–Enka ampe k'amanharhintstika, ji no míteska. K'óruni míteska eskani ji no éskasïrempka ka iásï éskasïnkia.
26Ménteruksï kurhamarhespti:
–¿Ampekini úcheski? ¿Nénakini kámaski éskatarantani?
27Ima arhiaspti:
–Arhiskaksïnia, ka cháts'ïni ísku kurhach'asïnka. ¿Antits'ïsï uék'i eskaksïni méntku úntaaka aiankuni? ¿Anti chát'u uékaxaki chúxapani?
28Útakusptiksï enka ima ísï arhiapka, ka arhisptiksï:
–T'úri jinteka imeri jurhenkorherini; jucha Moisesiri jurhenkorheriska. 29Ka mítetixakachi eska Diósï Moisesinisï uantaxekuka, ka intenchi no jamperi míteska nani jutiski.
30Ima enka pátenharhipka arhiaspti:
–¡Nénat'ia isï! Cha no míteni nani jutiski, ka imarini úni jámperi éskatarantani. 31Sésichi mítetixaka eska Diósï no kurhauasïnka k'amanharhintstichani; p'amop'itichanisï kurhach'aat'i ka imechani enkaksï ísï irekak'a eska ima námentu uék'a. 32Nómeni mítekorhexapti eska nema éskatant'a'pirinka máteru nemani enka pátenharhi kánkorhenhaka. 33Eka imani achetini no Diósï axapirinka, nómpema úpirinti úni.
34Ísï jimpoksï arhispti:
–¿Tekaasïnits'ïni juchantsïni t'u xukani? Enkari iámu k'amanharhint'atini kánkorhenhaka. Ka tánkorhentskuarhuksï petant'a'spti.
Jesusi parhakpeni sési pép'entani jurhasti
35Jesusi mítespti eskaksï pátenharhini petant'a'spka; ka enka na kúpka kurhamarhespti:
–¿T'u Acha Uáp'ani mintsikasïnki?
36Ima arhispti:
–Arhirini ima néski, ka ji jakak'uaka.
37Jesusi arhispti:
–Xériskaria: Jíska, jínteni jinkuniri uantaxexaka.
38Acheti tinkuixurhikuspti Jesusini ka arhispti:
–Acha, mintsikasïnkakini.
39Tátsekua Jesusi uantaspti:
Ji parhakpeni sési pép'entanisïni juka, eskaksï pátenharhicha éskaaka ka eskaksï pátenharhiaka ima enkaksï exek'a.
40Máru fariseouecha enkaksï jima jápka, ísïksï kurharini kurhamarhespti:
–¿Arhikuekaxakiri eskani juchat'uni no exesïnka?
41Jesusi arhiaspti:
–Enkats'ï no exepirinka, nóts'ï k'amanharhint'apirinka. Ka enkats'ï uantakorheni jaka eskats'ï exesïnka, k'amanharhintstiskats'ï.
હાલમાં પસંદ કરેલ:
Sáni Juánu 9: DKPJ
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
