Sáni Juánu 8
8
1Ka Jesusi Olibusï juátarhu niraspti, 2ka pauantekuarhu, ampamantku, tiósïo niántaspti ménteru. Antarherasptiksï, ka ima uaxakaspti ka uénani jurhentpeni.
3Jimak'anksï juramukua jurhentpiricha ka fariseouecha péraspti uarhitini ma enkaksï ísku ampe ma niátani p'iárapka nema jinkuni. Teruk'anksï péraspti, 4ka Jesusinksï arhispti:
–Jurhentpiri, íni uarhitinksï jima p'iárasti enka ísku ampe ma niátani jápka nema jinkuni. 5Ka Moisesiri juramukuarhu arhisïnti eskachi inteni járhati uarhitichani tsakapkuerauaka. ¿T'u na uantasïnki?
6Imaksï ts'ék'unisï kurhamarhepti, eskaksï ísï jámani xékuntapirinka néna jimpo ampe ma arhiparhatani. Ka Jesusi sánteru arhisïrempti munchuk'urhakua jimpo kuiruntskarani. 7Ka jimpokaksï inchats'ïmantani jápka kurhamarheni, jauaraspti ka arhiani:
–Ne enka cha ma isï no k'amanharhintstika, ima urheta k'uanire. 8Ka ménteru uéntaspti ch'úntentani ka karantskarani. 9Isïksï kurharini, mántani arhisptiksï kéntikuni, ka sánteru k'ératichaksï uénaspti jarharent'ani. Enka Jesusi na uarhiti jinkuniterku pakarapkia, 10Jauaraspti ka kurhamarheni:
–Nana, ¿Na úskiksïa anti? ¿Nónemakini k'amanharhirantaski?
11Ka ima uarhiti arhispti:
–Nónema Tata.
Ka ménteru Jesusi arhispti:
–Jít'ukini no k'amanharhirantaxaka; ni kókuani níntani ka ásteru jáma k'amanharhint'ani.
Jesusi parhakpeni anapu eramarhantekuesti
12Tátsekua Jesusi ménteru uéntaspti arhip'eni:
–Parhakpeni anapuecha jinkuni jísïni t'íntskueka, ne enkarini chúxapuska, intsïnhati t'íntskua enka tsípekua íntskuaka, ka nómeni p'áp'akantu jámaati.
13Fariseouechaksï uantaspti:
–T'úri uantakorhexaka: Ka inte isï nómpemesti.
14Jesusi arhiaspti:
–Enkani uantant'a'ni jaka isïsti, náuek'ini uantakorhent'ani jarhani, jimpokani míteska ji nani jutiski, ka nani niraxamki; ka cháts'ï no míteska ji nani jutiski, ka nani niraxamki. 15Cháts'ï parhakpeni anapueni erankuntasïnka ampe. Ji nónemani arhimarhesïnka; 16ka enkani ampe arhinharhipek'a, imanisïni arhip'ek'a enka isïk'a, jimpokani no jantiok'usïni arhip'ek'a, jucheti Táte jinkunisïni arhip'ek'a, ima enkarini axaka. 17Chári juramukuarhu karakata jarhasti eska imasï jukaparharanhaaka enkaksï tsimani méntkueni uantant'a'aka. 18Ka xéchka je, ji máeskia enkani uantakorhent'ani jaka, ka Táte enkarini axaka ima máteru uantantstisti.
19Ka kurhamarhesptiksï:
–¿Anti chéti táte nani jarhaski?
Jesusi arhiaspti:
–Cháts'ïni no míteska, nít'uts'ï jucheti Táteni míte; enkats'ïni mítepirinka jínteni, jucheti Tátenit'uts'ï mítepirinka.
20Ísï ampe uantaspti Jesusi Tióstarhu jurhentpeni jatini, jima enkaksï k'éts'ïtatarakuecha jápka. Ka nónema jámaspti jupikakuekani, jimpoka nótki niaranchasïrempka.
“Cháts'ï no úaka jini nirani enkani ji nirani jámka”
21Jesusi ménteru fariseouechani arhiaspti:
–Ji niraxamka, ka cháts'ïni jirinhantaaka, ka chári k'amanharhintskua jinkuntsï uarhiaka. Cháts'ï no úaka jini nirani enkani ji nirani jámka.
22Judiouechat'uksï támu arhip'eraxapti:
–¿O i uántikukorheni eratsexaki? ¿Ka jimpo ísï uantaxaki eskachi no úaka inte jinkuni nirani?
23Ka Jesusi arhiaspti:
–Cháts'ï ixu kétsekua anapueska, ka ji jini karhakua anapueska; cháts'ï íni parhakpeni anapueska, ka ji no íni parhakpeni anapueska. 24Jimpoksïnisï arhik'a eskats'ï chári k'amanharhitskuechani jinkuni uarhiaka; jimpoka ekats'ï no jakak'uska eskani Jíska, chári k'amanharhitskuechani jinkunits'ï uarhiaka.
25Jimak'anksï arhispti:
–¿T'u néski anti?
Jesusi arhiaspti:
–Sési xént'aparini, nák'ichkaksïni uénanitki aiankia anti. 26Uánekua ampe uantakua ka arhinharhikukuaksïni patsachexaka, ka ima enkarini axaka imani ampe uantasïnti enka ísïka, ka enkani ji parhakpeni anapuechani xáni ampe arhiani jaka, imesti enkani imani kurhach'aka.
27Ka imaksï no kurhankuspti eska Tátjemperisï arhiani jápka. 28Jimposï Jesusi arhiapti:
–Jiák'ani enkats'ï Acha Uáp'ani tarhatatini jauakia, míteakats'ï eskani Jíska, ka eskani nómpema juramukorhesïnka úni; imankusïni uantak'a enkarini Táte jurhentaka. 29Jimpoka ima enkarini axaka, jínteni jinkuni jarhasti; nórini méni jantiok'u jurarkusti, jimpokani ji méntku isï imani ampe úsïnka enka imani sési p'ikuastak'a.
30Uánekuaksï jakak'ukuspti enka ísï uantapka.
K'amanharhintskueri jántspiricha
31Ka tátsekua Jesusi arhiaspti judiouechani enkaksï jakak'ukupkia:
–Eka cha méntkisï kurhantirakuska jucheti uantakuani, sési jimpots'ï jucheti jurhenkorheriuaka; 32míteakats'ï imani ampe enka ísïka, ka jimpokats'ï míteaka imani ampe enka ísïka, nóteru ampemerits'ï jántspiriuaka.
33Imaksï [fariseuecha] mókunt'aspti:
–Jucha Abraniri sïrukueska, ka nónemerichi jántspiriska; ¿Néna jimporisï arhik'ia eskachi nóteru némeri jántspiriuakia?
34Jesusi [fariseuechani] arhiaspti:
–Sésiksïnisï arhini jaka eskats'ï iámentu ima enkaksï k'amanharhint'ak'a, k'amanharhintskueriksï jántspiristi. 35Jántspiri ma no méntku isï ánchetpirio anapuesïnti; ka enka uáp'euaka, ima k'óru méntkisï imao anapuesïnti. 36Ísï jimpo, enkaksïni Uáp'a maiampecheska, cháts'ï sési jimpo nóteru jántspiriuakia. 37Míteska eskats'ï Abraniri sïrukueska; ka k'óruts'ïni uéksïnka atani uántikuni jimpokats'ï jucheti uantakuani no jiókorhesïnka. 38Ji imani ampesïni uantak'a enkarini Táte jucheti exeraka; chát'u méntkueni imani ampe u je enkats'ï chári táteni kurhach'aka.
39Imaksï arhispti:
–¡Abranichkasï juchari táteti!
Ka Jesusi arhiantaspti:
–Enkats'ï sési jimpo Abrani uáp'epirinka, imentsï jámapirinka. 40K'óru, náuek'iksïni aiankunia enkarini Diósï jurhentaka enka ísïka, cháts'ïni uéksïnka atani uántikuni. ¡Abrani nómeni ísï jámasti! 41Cháts'ï mák'ueni ampe úsïnka eska chári táte.
Imaksï arhispti:
–¡Jucha no ísku jánti uáp'eska; Diósïk'usï Táteti!
42Jesusi arhiaspti:
–Enka sési jimpo Diósï chári tátepirinka, cháts'ïni xénhchapirinka, jimpokani ji Diósïri uét'ateska ka imeri jimpo jurhaska, ji no p'itsïkorheska jurhani, Diósïrinisï axati. 43¿Antits'ïnisï no kurhankuchek'i? Jimpokats'ï no úsïnka kurhani jucheti uantakuani. 44Chári táte nóampakitisti; cháts'ï imeriska, ka jánkorhesïnkats'ï imani ampe úni enka ima uék'a. Nóampakiti uénani jámantki uantikpitisti. No méni jurhimpekua jinkunisti, ka méntkisï chkuántirasïnti. Enka chkuántirak'a, imanisï uénhet'i enka jatanheka; jimpoka chkuántireska ka ima sánteru k'éri chkuadirakuesti. 45Ka cháts'ïni no jakak'uchesïnka jimpokani ji imani ampe uantasïnka enka ísïka. 46¿Ne cha ma ísï ua xarhatani eskani ji k'amanharhintstiska? Ka ekani ji imani ampe uantak'a enka ísïka, ¿Antits'ïnisï no jakak'uchek'i? 47Ne emanka Diósïrika, kurhats'ïtasïnti Diósïri uantakuechani; ka jimpokats'ï cha no Diósïriska, nóts'ï uéksïnka kurhani.
Jesusi Abrani jinkuni t'uínisptia
48Judiouechaksï arhispti:
Sési jimpochisï arhik'a eskari Samaria anapueska ka eskari nóampakitini ma incharhekorhetixaka.
49Jesusi arhiaspti:
–Nóma nóampakitini kámaxaka. Jucheti tátenisïni janhanharhik'a ka cháts'ïni no janhanharhisïnka. 50Ji no k'érikua jirinhakorhexamka; jarhasti ma enka jirinhak'a, ka imasï arhinharhikpet'i. 51Sési jimpoksïni arhixaka, ne enka kurhantirakuska jucheti uantakuani, no uarhiati.
52Judiouechaksï ménteru arhispti:
–Iásï k'óruchi sánteru sési jánhaskaskia eskari nóampakitini kámaxaka. Abrani, ka iámentuksï Diósïri uantaricha uarhisti, ka t'úri uantasïnka: “Ne enka kurhantirakuska jucheti uantakuani, no uarhiati” 53¿Anti t'u sánteru ampeski eska juchari táte Abrani? Ima uarhisti, ka Diósïri uantarichat'uksï uarhisti. ¿Antirisï xáni sési xékorhki?
54Jesusi arhiaspti:
–Enkani ji jantiok'u k'éri ukorheaka, jucheti k'érikua nómpemesti. Jucheti Táterinisï k'óru k'éri út'i, ima enka cha uantak'a eskat'u chári Diósïska 55Enka úka, cháts'ï no míteska. Ji míteska; ka ekani no míteni uantapirinka, jít'uni mák'ueni chkuántirapirinka eska cha. Ka sési jimpo ji míteska, ka kurhantirakusïnka imeri uantakuani. 56Abrani, chári táte, tsípespti jimpoka exepirinka jucheti jurhiani; ka exesti, ka iámu tsípesti.
57Judiouechaksï Jesusini arhispti:
–Nótkiri jamperi tsimani ekuatse ka témpeni jatiriska ¿Ka Abraniniri xéni uantasïnki?
58Jesusi arhiaspti:
–Sési jimpoksïni arhixaka eskani ji Abrani jinkuni t'uínispkia.
59Jiák'ani k'óruksï tsakapu k'arhantaspti k'uaniranksï uékani; ka Jesusi jirikorhespti ka tiósïo uéntaspti; teruk'ani isï nitamakuaspti uéntani jámani.
હાલમાં પસંદ કરેલ:
Sáni Juánu 8: DKPJ
Highlight
નકલ કરો
Compare
શેર કરો
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
