Lûk 6
6
Ḿbím kyi-kim ne Dyicí-Ékwâbashi
(Mátyuu 12:1-8; Mâk 2:23-28)
1Ké dyicí-ékwâbashi, Jisos o/mû mu o-shwôm m ké byifát ḿbyí ba/kwón esang-byichí. Bǎmgbán emen ba-kpet ebóng esang-byichí ányi ba-fîi ng ké etyém-akwâ ba-roo ng biintaa, ba-ryí i esang eyén. 2Kyicê-banet-ncibi mú badakó Fárasyî ba-bí kámbé ba/fu, ebóng ben bamu ba-chi i ńkyí kyije eten kyi/sét kyi/fu, ba*dachi ba-chi ké dyicí-ékwâbashi*.
3Jisos o-faa kámbé o/fu, nâng ben baa/kó ńkyí Otu Dívit o/chi ké nkéré mú esong e/mû nyi e-nwa ng ǎ ne banet emen. 4Nyǐ o/nung ké kafâ-kyise-Osówo, o-yip berêt mú ba/chi kyifen ba-kye Osówo, o-ryí, o-kye to banet emen ba-ryí. Nké kyije eten kyi/sét kyi/fu, onet okíri o*dachi o-ryí berêt mún* kyi-cibi ne banchi kyifen-Osówo nké nke*.
5Jisos o/kúlî bǎmpém emen o/fu, Wǎn-Onet mu Otu mú o/shwôm byije ḿbyí byi/kim ne dyicí-ékwâbashi.
Onyinchéng mú Bubwô Emen bu/nyîim
(Mátyuu 12:9-14; Mâk 3:1-6)
6Ké dyicí-ékwâbashi dyikíri, Jisos o/nung ké kyise-ékwâbashi ńkyí banet-Jûs o-tángê. Onyinchéng obónge o/mû ányi mú bubwô-etyebéng emen bu/mû bu/nyîim. 7Kyicê-bantánge Byije-Músis ne banet-Fárasyî ba/mû mbe ba-kyé ng bukwóp ḿbú badabât Jisos kyiraa ba/fu, o/chi kyibî-chwǒm. Ne mbé ba-kpet ǎ ebám kanong kanong ba/fu, mbé ba-ri ng â Jisos o/chi o-chi onet o-nyange ké dyicí-ékwâbashi. 8Nké Jisos o/nyît ńkyí mbé ba/mû mbe ba-kabe ng, ne o-raa ne onyinchéng ámu mú bubwô bu/mû bu/nyîim ǎ o/fu bûu nensang a-byí a-bâ kwán ké kashú. Mú onyinchéng ámu o-bûu nensang o-bwom ányi. 9Jisos o-raa kâng ne mbé o/fu, me mu m-bí ng běn n/fu, kyije eten kyi/fu, be byichi nǎ ké dyicí-ékwâbashi. Byichwáp ochwábáng aa, aa byibên oběn. Byinyángê dyikpen-onet aa, aa byiju ojǔng. 10Nyǐ o-pín achi o-tún kámbé ashí amúmú ne o-raa ne onyinchéng ámu o/fu, nabe bubwô eyên. Nyǐ o-chi éné, ne bubwô emen bu-chîfiri kanong.
11Nké kafâ ka/kpet esa kámbé, ne ba-kpet etóbê ne barî ńkyí mbé ba/chi ba-chi Jisos.
Jisos o/cá Banet-Kyitwóm Emen Ashí Diǐkpú ne Afee
(Mátyuu 10:1-14; Mâk 3:13-19)
12Ké nkéré ámu, Jisos o/yú kyíbóng-kaku o-dim nshwam efé. O-waa áku kyirim-buchú bumúmú mu o-fâ nshwam o-kyâ Osówo. 13Ké nkéré mú dyicófóróng dii/cé, o/kó bǎmgbán emen ba-kâm ǎ, ne o-cá banet ashí diǐkpú ne afee, ḿbé nyǐ o/kye kámbé dyizîn ńdyí dyidabángê banet-kyitwóm emen. 14Sámon mú nyǐ o/fé ǎ to dyizîn ńdyí dyidabángê Pyíta ne wǎn-boné emen mú odabángê Ánduru ne Jêmsyi ne Jǒn ne Fyílip ne Batólómyi 15ne Mátyuu ne Tómos ne Jêmsyi mú wǎn-Áfus ne Sámon mú ba/mû ba-kó ng ǎ onet mú mu ne kyijé ne oshê 16ne Júdas mú wǎn-Jêmsyi ne Júdas-Esakáryot mú o/chi ba-kám Jisos.
Jisos o/tángê, o-chi Banet Erwôm e-man
(Mátyuu 4:23-25)
17Jisos ne bǎmgbán emen ḿbé ashí diǐkpú ne afee ba/fím kyíbóng-kaku ba-shû kyísí. Jisos o-ba-bwom ké kyikit ńkyí ndege ńdege ne bujê-bǎmgbán emen bakíri. Bujê-banet chwóó ba/mû ányi ḿbé ba/fím Judyâ ne ḿbé ba/fím Jerúsélem ne ḿbé ba/fím ké eshê nyí nyi ké bukô-baya ḿbé baryên, nyí Táya ne Sádon. 18Ba/bê ebajwo ńkyí Jisos o/mû o-sét ng, ne eringe nyí odachi kámbé to byirwóm ebe byi-man. Banet to ḿbé byibî-bací byi/mû byi-kyâ kámbé afaníkong ba/bê to. O-chi kámbé ba-nyange. 19Kángkáng banet ba/mû mbe ba-nwa ng ba/fu, mbé ba-ta ng ǎ, ké ebóng, busa bu/mû mbu bu-fím m ǎ ké byiko bu-chi i kámbé kángkáng ba-nyange e.
Bunyîn-Dyityém ne Bafip
(Mátyuu 5:1-12)
20Jisos o-bírî achi o-tún bǎmgbán emen, o-raa o/fu,
bunyîn-dyityém mbu ne ben ḿbé bamu banet-byikpu,
ké ebóng, banjware ḿbé Butu ḿbú Osówo ba/já běn ben.
21Bunyîn-dyityém mbu ne ben ḿbé esong nyi e-nwa ng běn kántîk,
ké ebóng, ben ba/chi ba-zût.
Bunyîn-dyityém mbu ne ben ḿbé bamu ba-tii ng kántîk,
ké ebóng, ben ba/chi ba-jwó.
22Bunyîn-dyityém mbu ne ben ké nkéré mú ba-kú ba-sa ng barî-banet kafâ, ba-né ng běn, ba-cábê ng běn, ba-raa ng ne ben ba/fu, ben ba-chi i byibî-banet, ké dyishí-Wǎn-Onet. 23Jêe n̂g ké nkéré mú byěm ḿbyín byi-kú byi-chi i, ba-ne ng ane ba-pógê ng, ké ebóng, Osówo oo/tî běn eyáré nyí e/rêe e-shwôm kyíbóng, ké ebóng, banchí ebe ḿbé kpákpá ba/mû ba/chi to bamkpábé ḿbé badasét byiraa-Osówo azong-byěm ányi abónge.
24Nké kyi/chi kyi-bên kanong kanong ne ben
mú bamu banet-esang kántîk,
ké ebóng, ben baa/kyú ké dyikpen ńdyí ba*fí ba-ri ng busông*.
25Kyi/chi kyi-bên kanong kanong ne ben mú baa/zût kántîk,
ké ebóng, esong e/chi e-nwa běn.
Kyi/chi kyi-bên kanong kanong ne ben
mú bamu ba-jwó ng kántîk,
ké ebóng, ben ba/chi ba-kûta dyikán ba-tii ng bukyû.
26Kyi/chi kyi-bên kanong kanong ne ben mú kángkáng banet mbe ba-kpee ng běn, ké ebóng, banchí ebe ḿbé kpákpá ba/mû ba-chi i to azong-byěm ányi abónge ne bamkpábé ḿbé ba/mû ba*fí ba-sét ng ntûntû*.
Kyijé ne Banet-Bushwôn
(Mátyuu 5:38-48; ne ké7:12)
27Nké me mu n-sét ng běn ben ḿbé bamu ba-jwo ng mě n/fu, kyú n̂g ne kyijé ne banet-bushwôn enen. Chi n̂g kanong ba-kyâ banet ḿbé ben bamu ba-sa ng kámbé kafâ. 28Fé n̂g nshwam mú onong ba-kyâ banet ḿbé mbe ba-fâ kyibî-nshwam ba-kyâ běn. Ba-fâ to nshwam ba-kyâ Osówo ké bubwô-banet ḿbé mbe ba-chi i běn byibî. 29Â onet o/díp ǒ dyikwâ ké dyínán, bírî dyínán ńdyí dyibónge to a-chî ǎ etông o-díp. Â onet o/koo kyídí eyên, bwa ne nkyû eyên to a-kye ǎ. 30Nang yeě nké o/rém ǒ chwǒm, kye ǎ kánkyí. Nang nkéré orá to nké â onet o/kúng ǒ chwǒm, mîng ǎ ne nkyí. 31Chi n̂g banet byěm, wǎ eringe nyí ben bamu ba-ryuu ng to ba/fu, mbé bachi běn.
32Â ben bamu ne kyijé ne banet-kyijé enen nké nke, kyi-cen n nǎ ne ben ba-kûkoo ojware. Nang banchi byibî to mbe ba-tông ng kyijé ne banet ḿbé mbe ne kyijé ne mbé. 33Nké â ben bamu ba-tông ng kanong ne banet ḿbé mbe ba-chi i běn kanong nké nke, kyi-cen n nǎ ne ben ba-kûkoo ojware. Nang banchi byibî to mbe ba-chi i dyizong ándyi. 34Â ben bamu ba-pwoo ng banet byěm ḿbé ben ba/kabe ba/fu, ba-bwa ng esim ne mbyí ba-só běn, kyi-cen n nǎ ne ben ba-kûkoo ojware. Nang banchi byibî to mbe ba-pwoo ng bábe-banchi byibî byěm, eringe nyí badabwa esim ne mbyí to kerededet ba-só kámbé. 35Kyi*fí éné*. Kyú n̂g ne kyijé ne banet-bushwôn enen, ba-chi i to kámbé byěm ḿbyí byinong. Pwoo n̂g barî-banet byěm, nké *da n̂g echi ba-kyú ne okabe mú mbé to bada běn esó*. Ben ba/chi ba-koo eyáré nyí e/rêe e-shwôm, ne ba/chi ba-kyú bwǎn ḿbé Osówo mú kyíbóng kyíbóng. Ké ebóng, nyǐ mu o-cángê e dyityém ne banet ḿbé ba*fí ba-kó ng ǎ asǎma* ne ḿbé ba/bên atyém. 36Ri n̂g barî-banet bafip, wǎ eringe nyí Osówo mú Bonchí enen mu o-ri ng běn bafip.
Barî-Banet ebîn
(Mátyuu 7:1-5)
37*Da n̂g echi ba-kûpan barî-banet mpan ké byiko* eringe nyí Osówo to oo*ba/chi o-pan běn mpan*. *Da n̂g echi ba-kûfu barî-banet ba/fu, wo aa*nwa* eringe nyí Osówo to oo*ba/chi o-fu běn éné*. Kû n̂g epwoo barî-banet, eringe nyí Osówo to oda běn epwoo. 38Kû n̂g ekye barî-banet byěm, eringe nyí Osówo to o/chi o-kye běn. Ben ba/chi ba-koo byi-jê byi-shwôm eringe nyí byidasú ké abwô enen pwat. Kyiféng ńkyí ben badakan byěm ké nkyí ba-kye barî-banet, nkyí to nké Osówo odakan ké nkyí o-kye běn.
39Ne Jisos o-tím kámbé dyitím-ekan ńdyín o/fu, nsêe achi oo*man etông óbe-nsêe achi bukwóp*. Â o/chi éné, mbé ashí amúmú ba/chi ba-róng ké owo. 40Wǎn-nwet o*fí nang obónge mú odashwôm onet mú mu o-tángê e ǎ*. Nké wǎn-nwet to nang orá, ké nkéré mú oo/kwâa o-kpí, o-firi ng to wǎ onet mú o/mû mu o-tángê e ǎ.
41Ebóng kyi/chi ne wo amu a-jebe ng kiǐnfwarê ńkyí nkyi ké dyichi ńdyí wǎn-boné eyên, â wo a*fí a-kérê ng kyi-kim ne kiǐchwóm ńkyí nkyi ké dyichi ńdyí eyên*. 42Wo a-cen n nǎ ne a-sét wǎn-boné eyên a/fu, kamgbe, mîng mě n-fîm ǒ kiǐnfwarê ké dyichi, â wo a*fí a-ri ng kiǐchwóm ńkyí nkyi ké dyichi ńdyí eyên*. Ben bannîm banet. Fîm kpá kiǐchwóm ńkyí nkyi ké dyichi ńdyí eyên, ne kyi-fím ányi wo a/chi a-man eri kiǐnfwarê ńkyí nkyi ké dyichi ńdyí wǎn-boné eyên, a-fîm ǎ to.
Kyichí ne Byirim Emen
(Mátyuu 7:16-20; ne ké12:33-35)
43Kyichí ńkyí nkyi kyi-kán n ké bukwóp ḿbú bunong kii*zím byibî-byirim*. Kyichí to ńkyí kyi*fí kyi-kán n ké bukwóp ḿbú bunong* kii*bwa kyi-zím byirim ḿbyí byinong*. 44Kyichí nang kyirá ba-nyît ng kánkyí ké byirim emen ḿbyí nkyi kyi-zím m. Kyika kii*zím émurúkú*. Ako aa*zím osén*. 45Onet mú onong o-raa ng byiraa ḿbyí byinong, ḿbyí byidafím ké dyityém emen ńdyí dyinong. Kyibî-onet to kyi-raa ng byibî-byiraa ḿbyí byida ǎ efím ké kyibî-dyityém. Ké ebóng, onet o-raa ng ńkyí nkyi kyi-fím m ǎ ké dyityém.
Bambi Byise Ashí Afee
(Mátyuu 7:24-27)
46Ebóng ben bamu ba-kó ng mě Otu Kyítá, Otu Kyítá, ńkyí me mu n-sét ng běn ba*fí ba-chi i*. 47Nang yeě nké mu o-bâ o-kâm m mě, o-jwo ng to byiraa ejí, ne o-chi eringe nyí byi/sét, me n/chi n-tông běn eringe nyí onet ámu mu. 48Nyǐ mu wǎ onyinchéng mú o/bi kyise. O-sím kyikû-ekpe kyi-ríbî o-fé kánkyí ké buká. Kace ka-ba-sú ka-díp kyise ánkyi. Nké ka*da/man eninge kánkyí* ké ebóng, ba/man ebi kánkyí. 49Nké onet mú mu o-jwo ng byiraa ejí, ne o*fí o-chi i eringe nyí byi/sét* mu wǎ onyinchéng mú o/bi kyise twóóm ké ecing. O*da/sím kyikû-ekpe o-fé kyísí*. Ké nkéré kace ka/sú, ka/díp kyise ánkyi kyi-myii ké abe ké abe. Obên mú kyise ánkyi kyi/bên oo*nwa eri*.
હાલમાં પસંદ કરેલ:
Lûk 6: BKY
હાઇલાઇટ
નકલ કરો
તુલના કરો
શેર કરો
શું તમે તમારા બધા ઉપકરણો પર તમારા હાઇલાઇટ્સ સાચવવા માંગો છો? સાઇન અપ અથવા સાઇન ઇન કરો
Published by the Bible Society of Nigeria @ 1985
