Lûk 5
5
Jisos o/kó Bambwôp Kashú-Bǎmgbán Emen
(Mátyuu 4:18-22; Mâk 1:16-20)
1Nkéré obónge, Jisos o/mû o/bwom ké bukô-baya ḿbé badakó Genézéret. Banet ba-kpet etín ba-fárâng ng ǎ ba-bâ byiraa-Osówo ebajwo. 2Jisos o-ri ékpǐ efee nyí ba/tú ké dyiga. Bankâm ekworê baa/mîng kányí ányi mbe ba-sâ ng boǒsém. 3Jisos o-da-nung ké ókpǐ obónge. Ókpǐ ámu o/mû mú onyinchéng obónge mú odabángê Sámon. Ne o-sét Sámon o/fu, otín kámú o-chînung ké kace kaǎnyín. Jisos o-kyú ányi ké mǔ, ne o-tángê dyizu-banet ándyi byiraa-Osówo.
4Ké nkéré mú oo/tángê kámbé o-mîng, o-raa ne Sámon o/fu, chîtín ókpǐ o-ca kashú ké kyikit ńkyí kyi/ríbî, eringe nyí wo ne bánen badafé boǒsém enen ké kace ba-kám ekworê.
5Sámon o-faa ǎ o/fu, bonchí, kyirim-buchú ḿbú kurún, bii/fé boǒsém ofé ófe. Nang kaǎkworê byi*da/kám*. Nké â wo a/fu, nchîfé, n-fâ. 6Ne ba-fé kâng boǒsém, ba-kám bujê-ekworê! ḿbú boǒsém ebe bu/mû bu/waa kaǎnyín bu-járê. 7Ne ba-me bubwô ba-kó bábe ḿbé ba/mû ké ókpǐ okíri ba/fu, babâ ba-ba-chwáp kámbé. Ḿbé áku ba-bâ. Ne ba-wuri ekworê ányi ba-fé ké ékpǐ ányi efee e-sú, kyi/mû kyi/waa kaǎnyín e-sémê. 8Ké nkéré Sámon-Pyíta o/ri ńkyí kyi/chi éné, o-tím arông kyísí ké bushú-Jisos, o-raa ne nyǐ o/fu, dim a-mîng mě nyín, ǎ Otu Kyítá, ké ebóng, me n-chi i nchi byibî.
9Sámon ne kángkáng banet ḿbé ba/mû ne nyǐ kyi/chi kámbé chwǒm-akat ké bujê-ekworê ámbu ḿbú mbé ba/kám. 10Éné to nké kyi/gaa Jêmsyi ne Jǒn ḿbé bwǎn-Zébédyi, ḿbé ba/mû ne Sámon. Ne Jisos o-raa ne Sámon o/fu, *dachîshî* fím kurún kyi-ca kashú, wo a/chi a-mîng ekworê ekám, a-kûkám banet.
11Ne ba-fung ékpǐ ányi ba-ba-tîm ké dyiga. Ba-mîng kángkáng byěm ebe ányi, ba-dim ne Jisos ké kyikû.
Jisos o/chi Onet-Kyibî-Orwôm o-nyange
(Mátyuu 8:1-4; Mâk 1:40-45)
12Nkéré obónge, Jisos o/mû ké oshê obónge mú onyinchéng obónge o/mû ányi, mú kyibî-orwôm-enyam-byiko kyi/mû kyi/kám ǎ byiko byimúmú. Ké nkéré onyinchéng ámu o/ri Jisos, o-myii ǎ ké byiká. O-tîm ǎ arông o/fu, bonchí, â kyi/nyîn ǒ, a-man n mě echi n-nyange.
13Jisos o-tan bubwô o-ta ǎ. O-raa ne nyǐ o/fu, nkyi kyi-nyîn n mě. Orwôm eyên oman. Ké abe ányi, orwôm mú onyinchéng ámu o-waa ányi o-man. 14Jisos o-kuri ǎ ekó o/fu, *dachi a-sét onet nang obónge chwǒm ńkyín*. Nké ca kyikit-nchi kyifen-Osówo o-jebe ǒ enyam-byiko eyên. Ne a-chi kyifen-Osówo wǎ eringe nyí Músis o/sét o/fu, bachi. Eringe nyí kyidatông nang yeě nang yeě o-nyît o/fu, orwôm eyên oo/man.
15Nké bǎmpém ḿbé mbe ba-pem m kyi-kim ne Jisos ba/bwa ba-káng okáng ba-shwôm. Ne bujê-banet chwóó ba-bâ ba/fu, mbé ba-bâ ng ejwo ńkyí Jisos mu o-sét ng, ne eringe nyí odachi to kámbé erwôm ebe e-man. 16Nké Jisos o/mû mu o-dim m o-da ng ekyú ké byikit ḿbyí banet ba*fí* o-fâ nshwam.
Jisos o/chi Onyinchéng mú o/mû o-rwôm m Kyibok o-nyange
(Mátyuu 9:1-8; Mâk 2:1-12)
17Dyicí dyibónge, ké nkéré Jisos o/mû mu o-tángê e, kyicê-banet-ncibi mú Fárasyî ne bantánge Byije-Músis ḿbé ba/fím ké kángkáng eshê nyí ké Gályílyi ne Judyâ ne ḿbé ba/fím Jerúsélem ba/mû ba/kyú ányi to. Busa ḿbú Otu Kyítá bu/mû ne Jisos, ḿbú odachi banet-byirwóm ba-nyange. 18Banet ba/tû onyinchéng obónge ké karíng, mú o/mû oo/bok, ba-bâ ne nyǐ. Ne ba-kyé bukwóp ḿbú mbé bada ǎ eyip ba-nung ne nyǐ ké kyise, eringe mbé bada ǎ etî ké bushú-Jisos. 19Nké ba*da/ri mpât* mú bada ǎ eyip ba-nung ne nyǐ*. Ké nǎ, banet ba/mû ba/jang ejê. Ne mbé ba-yip ǎ kâng ba-yú kyíbóng-mbwôm ne nyǐ. Ba-rim mbwo kyíbóng-mbwôm, ba-shû ǎ ké karíng emen, o-ribi ké otyém-dyizu-banet ándyi. Ba-tî ǎ ké bushú-Jisos. 20Ké nkéré mú Jisos o/ri eringe nyí obánge ebe ne nyǐ o/jê, o-raa ne onyinchéng ámu o/fu, ocín ejí, byibî eyên baa/pwoo ǒ kámbyí.
21Bantánge Byije-Músis ne banet-Fárasyî ba-kpet eraa ne barî ba/fu, nyín ebóng onyinchéng něen mú mu o-cábê ng Osówo ké dyizong-bukwóp ḿbún. Onet o*fí mú odaman epwoo byibî* kyi-cibi ne Osówo kǎnchí*.
22Jisos o-nyît ńkyí mbe ba-raa ng, ne o-raa ne mbé o/fu, ebóng ben bamu ba-kabe ng azong-byěm ányi. 23Kyirá kyidasóng efu. Ńkyí ndafu, baa/pwoo ǒ byibî eyên aa, aa ńkyí ndafu, bûu nensang a-kpet ecen. 24Me n/chi n-tông běn kâng ba-nyît ba/fu, Wǎn-Onet mu ne busa ké ejíí ḿbú odapwoo byibî. Ne o-raa kâng ne onet-kyibok ámu o/fu, n/sét ǒ n/fu, bûu nensang a-yip karíng eyên a-dim dyijê.
25Ké abe ányi, onyinchéng ámu o-bûu nensang ké bushú ḿbú banet kángkáng. O-yip karíng ńké ba/mû ba/tû ǎ ké nké o-dim dyijê, o-kpee ng Osówo o-câ. 26Kángkáng banet ba-waa ocím ké dyishí fúú, bushî bu-róng kámbé. Ba-kpee Osówo ba/fu, ebóng byěm-akat ḿbyí be bii/ri něen kurún.
Jisos o/kó Onyinchéng Obónge mú odabángê Lyíva
(Mátyuu 9:9-13; Mâk 2:13-17)
27Ké nkéré oo/man ne kyiraa ńkyín, Jisos o/byí o-dim, ne o-ri nkoo akpuga-dyishí obónge mú odabángê Lyíva ké oo/kyú me ké kyikit-bǎmkpóngé emen. Jisos o-raa ne nyǐ o/fu, bâ ne me ké kyikû. 28Lyíva o-bûu nensang, o-mîng kángkáng byěm ányi o-dim ne nyǐ ké kyikû.
29Lyíva o-chi kâng Jisos kiǐtí-dyijî ké kyise emen. Bankoo akpuga-dyishí chwóó ne banet bakíri to ba/mû ba-ryí i byiryíng ké dyijî ándyi ne mbé. 30Kyicê-banet-Fárasyî ne bantánge Byije-Músis ḿbé mbe ké ncibi mú banet-Fárasyî ba-kpet eraa ne bǎmgbán-Jisos ba/fu, ebóng ben bamu ba-ryí i byiryíng, ba-jwáp ng bato kyikit kyibónge ne bankoo akpuga-dyishí ne banchi byibî.
31Jisos o-faa kámbé o/fu, banet ḿbé ba*fí ba-rwôm m* baa*ryuu nchi bakye*. Banet ḿbé mbe ba-rwôm m nké nke nké bada ǎ eryuu. 32Me n*da/bê n/fu, m-bâ ng ekó banet ḿbé mbe ba-fâ kámbé n/fu, byiko byikpú kámbé ba-mîng byibî echi*. Nké m/bê ekó banet ḿbé bamu ba-ri ng kámbé wǎ banchi byibî.
Ḿbím kyi-kim ne Esong ecíp
(Mátyuu 9:14-17; Mâk 2:18-22)
33Kyicê-banet ba-raa ne Jisos ba/fu, bǎmgbán ḿbé Jǒn mbe ba-cíp ng esong kángkáng nkéré, ba-fâ banshwam. Bǎmgbán ḿbé banet-Fárasyî mbe ba-chi i to dyizong dyibónge. Nké bǎmgbán ḿbé eyên mbe ba-ryí i byiryíng, ba-jwáp ng bato.
34Jisos o-faa kámbé o/fu, ben ba/kabe ba/fu, ba-man n echi banet ḿbé mbe ké dyijî-dyibé ba-waa esong ésong, â oyén-dyijî mu ányi ne mbé? Ńkyí nkyí kii*nwa echi*. 35Nké nkéré mu o-bâ mú ba/chi ba-yip oyén-dyijî ba-dim ne nyǐ. Ací ányi kâng nké ba/chi ba-kûwaa esong.
36Jisos o-tím kámbé to dyitím-ekan ńdyín o/fu, onet o*fí mú odaját kyicê-kyídí ké nkyû mú ofyîfî o-tim mbyí mú mu ké okâa-nkyû*. Â o/chi éné, o/chi o-ját nkyû mú ofyîfî. Ne kyicê-kyídí ńkyí kyifyîfî to kii*ba/chi kyi-tyeem ne ńkyí okâa*. 37Onet to nang obónge o*fí mú odakúng bato ḿbé dyicí o-fé ké okâa-kyiféng*. Â o/chi éné, bato ba/chi ba-chi okâa-kyiféng ámu o-ché. Bato ba/chi ba-pwôo, kyiféng to kyi-bên. 38Kyi*fí éné*. Dyicí-bato ba-fâ ké kyiféng ńkyí kyifyîfî. 39Onet to o*fí mú odafu nyǐ o-chî ng ejwáp dyicí-bato* â oo/jwáp akyî-bato*. O-fu ng o/fu, akyî nyi kanong a-shwôm.
હાલમાં પસંદ કરેલ:
Lûk 5: BKY
હાઇલાઇટ
નકલ કરો
તુલના કરો
શેર કરો
શું તમે તમારા બધા ઉપકરણો પર તમારા હાઇલાઇટ્સ સાચવવા માંગો છો? સાઇન અપ અથવા સાઇન ઇન કરો
Published by the Bible Society of Nigeria @ 1985
