1 Pet̯ero 5
5
Kuut̯ikisa mwona wa Muungu
1D̯ubva nyakumuusiani nywinywi wazee wa matsanganiko, nikimufunda dza muzee mwenzenu, na ninkiwa dza shaahiḍi jwa mad̯ina ya *Kirist̯o akuntiyeyo. Na kawii nyakumuusiani ninkiwa dza mumodza jwa hawaḍe wakupfokea haya marembo ya Ḅwana yadzeyoyanganywa ngera adzeyokudza. 2Wani wat̯ikisa wa hu mwona wa Muungu auyatsiyeo mikononi mwenu. Namutseut̯ikisa dza kwamba mwakusharut̯iswani, ela ut̯ikiseni na hiari yenu, dza vya Muungu evyonatsaka. Hi kazi yenu namutseihenda kwa dzambo ḍya kupata fwedha, ela ihendeni na mojo kindindi wa kutsaka kuhumika. 3Namutsedzihendeza wakuu kwa hawaḍe weo nsii yenu, kenge uyangeni hu mwona mufaano mwema wa maisha ya Kikirist̯o. 4Makisa ngera ya huyu Mut̯ikisa Mukuu adzeyokudza, munapfegwa t̯ubvo ḍya d̯aha ḍisiḍyonangika maishi.
T̯aragianani na muzuka
5Nanywi wayume waḍoḍo ni had̯i muwat̯ii hawa wazee wenu. Na nyonse ni had̯i muwe wampowe, mukihumikiana nywinywi na nywinywi. Koro matsoro yamba,
“Muungu anawafwia t̯ei hawaḍe weo wampowe,
ela wavikodzo anat̯aragiana nao.”
6D̯ubva wani wampowe mukidziweka nsii ya mamulaka ya Muungu, ili kwamba ngeraye ikifika, nae anamukuzya. 7Na mirumiru zenu zonse zimuyatsieni jeje, koro ndiye eyenamumuud̯amia.
8Pfyenuyani matso na muchimize! Koro huyu nyabva jwenu, Shaat̯ani, kakuzingani dza nsimba eyekuvumiizani, akilacha muntu jwa kumuḍya. 9D̯ubva zigijeni faro zenu muno, na mut̯aragiane nae; mukimanya ya kwamba hat̯a hawa wahikiza wenzenu wa lumwengu yuzima, nao wakukuntanani nezihizi d̯ina mwizokukuntani nywinywi. 10Muungu kamufwiya t̯ei kuchiiya na kwa Kirist̯o na kamuhana munjie maremboni mwakwe mudzemokaa maishi. Mukisa kukunta d̯ina kwa kat̯emo kachuchu, kadzamuhwaa na kumumbaka kipfya, kadzamut̯aragisa na kumukomeza faroni, na kumungiza nguvu kawii. 11Muungu ndiye mwenye uwezo wonse, sasa na hat̯a pfasipfosia. Amina.
Mafunda ya mwiso
12Nyakumworeani hi hii ḅaruwa mfufi kwa ugijo wa Sila,#5:12 Sila ni yuyo muntu mumodza eyeakihanigwa Silivano kwa Kiyunani. nimuserefat̯ie dza ndugu. Nyakumworeani kumungiza mojo na nikishuhuḍia kwamba haya ndiyo matsako ya ḍugha ya Muungu. D̯ubva yagijeni na nguvu.
13Pfokeani kedhya kuyawa kwa imbu ḍyenu, tsanganiko ḍya Babeli,#5:13 Babeli pfangine ni sari ḍya kisagidzo ḍya mudzi wa Rumi. ḍitsanijweḍyo ni Muungu dzanywi. Marko eye muurani wangu jwa kiruhu nae pia kamukedhya nto. 14Kedhyanani na matsako ya Kikirist̯o.
Naghea gulufu naiwe kwenu nyonse mumuhikiziyeo Kirist̯o.
હાલમાં પસંદ કરેલ:
1 Pet̯ero 5: pkb
હાઇલાઇટ
નકલ કરો
તુલના કરો
શેર કરો
શું તમે તમારા બધા ઉપકરણો પર તમારા હાઇલાઇટ્સ સાચવવા માંગો છો? સાઇન અપ અથવા સાઇન ઇન કરો
© 2004, Bible Translation and Literacy