1 Pet̯ero 4
4
Kuishi maisha mapfya
1D̯ubva, kwa dzambo *Kirist̯o mwenye kakuntiswa d̯ina, ḅasi nanywi pia dziwekeni t̯ayari kukunta d̯ina; koro ikiwa kwamba mwaa t̯ayari kukuntiswa d̯ina kwa dzambo ḍya Kirist̯o, ḅasi muhuna kudzit̯anya na nabvise. 2Ndookomu ntamuwezi kuishi maisha ya kunuhwa ni t̯amaa za kibenaad̯amu kawii, ela munaishi maisha ya kuwa na hamu ya kuhenda miro ya Muungu. 3Koro mukaa muḍa muyeya wa kut̯osa, mukihenda mambo ya kilumwengu. Muishi maisha ya uḅari, t̯amaa, kuruma na kuhenda jila za ranga na t̯aḅia nzuka za kuyomba masanamu. 4Na sasa hawa walumwengu wakumakani, wakimuona kwamba ntamukwakugijanani nao na kuhenda haya mambo mazuka mazuka weyonahenda; ndookomu wanjia kumutsezeani. 5Ela idzawamala kudzihehea usoni kwa Muungu eye t̯ayari kuwahukumu weo mojo na wafwiyeo. 6Koro ndiyo maana haya *Maagu Mema yasumwiijwa hat̯a kwa hawaḍe wafwiyeo kae, ili kwamba ingawa mii yao ifwa, ela ruhu zao ziweze kuishi dza vya Muungu evyokuishini.
Yatumiyeni urembo haya mat̯ola mupfegejweyo ni Muungu
7Mwiso wa lumwengu umaawa hafufi. Ndookomu ni had̯i muzigwaze akili zenu na muwe wantu wa kudzimiza ili muweze kukaa na kuyomba. 8Zaid̯i ya vyonse, tsakanani na mojo, koro matsako yanayeha mayatsiyo ya nabvise nyinji. 9Karaḅishanani madzumbani mwenu na myojo misafi, pfasipfo kuḅugumiana.
10Kula mumodza ni had̯i awahumikie wangine na haya mat̯ola ya kiruhu apfegejweyo ni Muungu. Haya haya mat̯ola garagara muyapfokeeyo kwa t̯eiye ni had̯i muyatumie urembo. 11Muntu akiwa na t̯ola ya kunena vyuuwo vya Muungu, ni had̯i akivinena dza vyuuwo viyawiyevyo kwa Muungu. Muntu akiwa na t̯ola ya uhumisi, ni had̯i ahumike na hizi nguvu apfegejwezo ni Muungu. Na kwa hayo yonse, Muungu mwenye nguvu na uwezo, apate kushad̯wa kuchiiya na kwa Yesu Kirist̯o hat̯a pfasipfosia. Amina.
Kukunta d̯ina dza Mukirist̯o
12Wandugu zangu watsakwa, namutsemaka dza kwamba haya mad̯ina mwiyokukuntani mwakuhendekejwani ni dzambo geni. 13Ishinu tsekeani kwamba nanywi mwakuyakuntani haya mad̯ina ya Kirist̯o akuntiyeyo, ili kwamba nanywi mudzae tsekea, ngera adzeyokudza na maremboye. 14Munapata mvoni iyodze, mukitsolwa kwa dzambo ḍya kumuhikiza Kirist̯o, koro Ruhu ya marembo ya Muungu yaa pfamodza nanywi! 15Mukwakukuntiswani d̯ina, ntamu ruhusa ya kukuntiswa d̯ina kwa dzambo ḍya uyaji, wivi, kuvunza sharia, ambu untuntu.
16Na wala muntu akwakukuntiswani d̯ina kwa dzambo ḍya kuwa Mukirist̯o, natseona yutswa. Ishinu namushad̯e Muungu kwa dzambo ḍya kuwa Mukirist̯o. 17Koro ngera ya hukumu imafika, na hawa wantu wa Muungu ndiwo wa kuḍabva kuhukumigwa d̯ura. D̯ubva ikiwa kwamba ijwakuḍabva naswi, au mwiso unawadze kwa hawaḍe wasiohikiza aya Maagu Mema ya Muungu? 18Dza vya matsoro yaneneyevyo yakyamba,
“Ikiwa kwamba wadheru t̯u, wanapfona na mbaa na mojo,
ehe fat̯i wanabvise na wasiomuhila Muungu wanawa ku?”
19D̯ubva ikiwa kwamba Muungu kaona vyema kwamba mukunte d̯ina, ḅasi gijani kuhenda yeyo ya hachi na kumuserefat̯a jeje, koro ndiye amuumbiye, nae ni muhikizika.
હાલમાં પસંદ કરેલ:
1 Pet̯ero 4: pkb
હાઇલાઇટ
નકલ કરો
તુલના કરો
શેર કરો
શું તમે તમારા બધા ઉપકરણો પર તમારા હાઇલાઇટ્સ સાચવવા માંગો છો? સાઇન અપ અથવા સાઇન ઇન કરો
© 2004, Bible Translation and Literacy