Ehanita Lefahat 16

Aleten Timoteyo iko Paulo buo Silas

1Teya, afany nyia buo fe Paulo Derbe iko Listra, ninyia awanari obo olo Kristiani, afure honyi Timoteyo. Ara nyia honyonyi ono Yudei buo fe aheruhoni Kristo, buo monyonyi ara aholo Grik. 2Ikianai nyia eruhok 'daŋ hutto Listra iko Ikoniom onno oyyu bebe to Timoteyo. 3Awak nyia Paulo iyaru inyi ikonyi ania, ette inyi ibos inyi. Ihan nyia inyi ihuo nyia, nyio, omijani nyia Yudei 'daŋ hulla amanyai 'to jio amasik hunia jio, ara nyia monye Timoteyo olo Grik. 4To ninyia ilurorik isi aborejin gala, iriramarai nyia isi, jio eruhok, efahita hunyia ifahuni lefahat iko lahou hutto Yerusalem jio oŋida eruhok ijifatie. 5Ania, ette eruk ono eluluŋi heruhok igigoluno, buo aluaji heruhok ette ibobolororo oŋitek 'daŋ.

Oleyehino obo Ariŋ ihuo Arigia jio Paulo to Trowas

6Oŋutoroi nyia isi totto ŋati fau Frigia iko Galasia nyio, itik nyia Loholio Olibo isi ittittoyere asayyo ifau Asia. 7Ninyia afanyi isi ikori Misia, awahi nyia isi ifuatan ifau Bitania, ati obeŋ nyia Oloholio Yesu aŋatak isi. 8Ania, ette isi iŋutoro totto#16:8 iŋutoro totto : kuyya ifuatan tolia. Misia, ette fuatan Trowas. 9Jio arue nyia, oleyehino nyia obo latulo olo Masedonia jio Paulo ihuo arigia. Owotia nyia latulo alia ihosiere Paulo buo attana inyi jio, “Waŋ Masedonia, waŋ eluak hohoi!” 10Ninyia atuk Paulo egonyuna aleyehino ania, teya teya, ette hohoi ihuhuma ifuari Masedonia nyio, ejio nyia hohoi jio Hollum iloŋo hohoi diya ittittoyere Asayyo Ayijok jio aati.

Eloito Lidia Ibore Gala Filipi

11Ania, ette hohoi ibocoro to Trowas many Samotreis ta ababur, buo jio ebotie holoŋ, ette hohoi iculana Nipolis. 12Ojio teya, ette hohoi irrioro Filipi, abore gala ettetteri#16:12 abore gala ettetteri ŋati Masedonia : igioroni omuk egierita jio, abore gala ŋati Masedonia anna agalik 'to 'daŋ; kuyya abore gala Masedonia onno ottubak 'to 'daŋ. ŋati Masedonia. Ilagalajarik nyia aati Roma abore gala ania. Etoŋo nyia hohoi diya oŋitek arriai. 13Ojio to oloŋ Sabatto, efuo nyia hohoi totua bore gala many ilotifor hari, nyio, egigilo nyia hohoi jio owon adi amaji diya onno omojotierek Yudei. Etoŋo nyia hohoi ifau, ette hohoi ikiana iko aŋoruo hunyia ottubanie 'to diya. 14Lihiji aŋoruo hunyia itayirie 'to jihohoi, owon nyia obo anna anya Lidia, ono ŋarriok Tiatira. Ara nyia inyi a hetinyiaŋani boŋojin hunne erigio hunno ogoli te enyiaŋa, buo fe itahabuyo Hollum. Aŋa nyia Lamonye ahou honyi oŋida itaniŋu ekenita Paulo. 15Ninyia ifuotu inyi iko aati hutto tua haŋ honyi batisimo, ette inyi jiaran jihohoi jio, “Elle iruhoto itai jio, ara ni hode a heruhoni ono Lamonye, ifuanna itoŋoti ihaŋ hoŋ.” Ette inyi ittanaru hohoi ifuari diya.

Efita Ibore Gala Filipi

16To obo oloŋ, ninyia efuari hohoi imaji mojo, eruaŋanio nyia hohoi iko obo noduoti apit, onno owon iko aminiaŋati enne isio 'to jihonyi agolon ono ekilutta hirre hunno ofuoi 'to iduoŋ moi. Opocohitta nyia inyi agurusi arriai jio elettaha honyi te ekila. 17Ijifuno nyia noduoti ania Paulo ikohoi buo iwuwoŋita jiojio, “Arai aati hulo ahegiamak Hollum, Elle Ilomohi 'to 'Daŋ! Iramani isi jihatai, aŋai adi italahuni itai!” 18Ihanatio nyia inyi ihuo nyia oŋitek arriai, many iloŋojitari Paulo, ette iyito, ette jiaran jio aminiaŋati ania, “Ta afure ono Yesu Kristo, eramak ni iyye, ojiŋu addi jihonyi!” Teya teya, ette aminiaŋati ania leten addi jio oduoti ania.

19Buo ninyia amijani hiamonyie hulo oduoti ania jio, attuhonio ekoi onno opocouttarik isi agurusi, ette isi inefuna Paulo iko Silas, ette ipihoro ifuara ihosiere gala; 20ette iyaru isi ihosiere gala Roma, ette jiaran jio, “Aati hulo, hulo Yudei, ati ittigemie isi abore gala hohoi. 21Ittiyenie isi emanyiti hunno obeŋi efahita hohoi Roma aŋatani. Ebeŋ hohoi Roma eruk emanyiti hunia kuyya emanya tesi.” 22Arraŋanio nyia eluluŋ waati, ette itterio abahio Paulo iko Silas.

Attati gala Roma igiguasara addi aboŋojin Paulo iko Silas, ette jiaran ijiara ofodohi isi. 23Ninyia abahi isi Paulo iko Silas onno orroho bebe, ette ittiohina isi ibabus, ette ihum iramana erririani babus hehuma ihianana ekat babus rid rid. 24Ninyia itaniŋu erririani babus eram ana, ette inyi itajiŋana isi jio aaji onno owon 'to attua bebe, ette ifitana eejek hosi hunno ohisak ihiji beler hunno oddiŋi.

25Ojio ninyia ara ihuo attiŋ harue, omojoi nyia bo Paulo iko Silas buo fe idoloi afureta etahabuta Hollum, buo aati babus hullomuk itayirie jihosi. 26Teya teya, odioto nyia olokitik onno orroho bebe many ikikiro etawoji haji babus. Teya teya, ette ekatin 'daŋ iŋa, buo efitita huno aati babus 'daŋ ette iwalahuno addi. 27Ninyia ahenyuno erririani babus, ette igonyuna ekatin babus aŋai, igigilo nyia inyi jio afuhororoi babus ania, ette inyi isutuna ademi erremit, ette jiaran attoŋoro. 28Ati iriŋ nyia Paulo inyi woŋ woŋ jiojio, “Hèttoŋoro obojiai! Hohoi hulo 'daŋ dini!”

29Attati erririani babus alia imojo obo enuohi, ette ijiŋara attua babus, ette irigoŋo ihosiere Paulo iko Silas buo ikikiro. 30Attati itajiŋuno isi illet, ette jiaran, “Lettaha, ijiara ani luŋa ehan anyio oŋida ani etalahuno?”

31Itarraŋi nyia isi jiojio, “Iruho jio Yesu, Lamonye, italahuno adi iyye iko aati hutta haŋ hoi.” 32Attati isi ittittoyo ekiana ono Lamonye jihonyi iko jio aati hutta haŋ honyi. 33Jio asaa ono arue nyia, iyaru nyia lerririani babus alia isi, ette illilla atoŋos hosi. Teya teya, ette inyi iko aati hutta haŋ honyi 'daŋ ifuotuna batisimo. 34Attati inyi itajiŋaru Paulo iko Silas itua haji honyi, ette isiarana jihosi aŋiyo; buo inyi iko aati hutta haŋ honyi 'daŋ omunoi te eruk hosi jio Hollum.

35Nyia motie, ifahini nyia gala Roma ajafiti bolis iramaniere jio: “Ohohina aati hulia.” 36Ania, ette erririani babus iramana Paulo jio, “Ojiori gala Roma ijiara ohohina itai. Ihuania, ifuatta dee.” 37Ati ojio nyia Paulo jio lajafiti bolis hia, “Ofodohi nyia isi hohoi obojiai ihosiere waati, ette ifitana hohoi ibabus, buo hohoi era a hulo Roma. Ihuania, awahi isi ihohina hohoi ollokuai to babus. Obeŋ! Ijiara isi luŋa ofuonni ihohina hohoi ta ahuattek hosi.” 38Iramani nyia ajafiti bolis ekenita huna jio gala Roma. Buo ninyia itaniŋuni isi jio arai bo Paulo iko Silas a hulo Roma, ette abaŋi inef isi. 39Ania, ette isi fuatan isiarana awotto jio Paulo iko Silas, ette ihouna isi addi to babus, ette iramana hefuahi addi jio abore gala ania. 40Ania, ette Paulo iko Silas ifuatan addi to babus, ette ifuatan ihaŋ Lidia. Diya, ikianai nyia isi iko eruhok, ette iramana isi ekenita etagolita tajia, ette ifuatan.

હાલમાં પસંદ કરેલ:

Ehanita Lefahat 16: EA2003

Highlight

નકલ કરો

Compare

શેર કરો