Ehanita Lefahat 15

Ewwaha otto Yerusalem

1 # Ehumak 12:3 Ofuonni nyia omuk aati to Yudea, ette ittiyenio eruhok jiojio, “Ibiaŋata itai iremehina italahuno, elle ibiaŋata itai ibosoti ihuo ojiori efahita Mose.” 2Attati Paulo iko Barnaba itarisa ikosi onno ogol te eram ania. Ania, ojiarik jio ijiara Paulo iko Barnaba buo omuk eruhok to Antiok ofuoi Yerusalem, ikianari eram ana iko lefahat, buo lahou hullomuk.

3Tania, ifak nyia eluluŋ heruhok isi, ette isi iŋutoro totto Fonisia iko Samaria, buo iriramarai, aŋai iruhi Alufajak jio Hollum. Iyaŋunie nyia asayyo hunia namuno onno obolo jio eruhok 'daŋ. 4Ninyia afanyi isi Yerusalem, ifuotu nyia eluluŋ heruhok iko lefahat buo lahou isi, buo Paulo iko Barnaba ette iramana isi erre 'daŋ hunyia ihanio Hollum tesi. 5Ati odiotoi nyia omuk hulo Farisei hulla arai aheruhok, ette jiaran jio, “Oŋida luŋa obosi Alufajak, buo fe iramani isi oŋida oniŋie efahita huno Mose.”

6Attati lefahat arabotie iko lahou ittubanio ikianari eram ania. 7#Ehanita 10:1-43Ninyia attohori isi etafudia 'tek 'tek, ette Petro idioto, ette jiaran, “Illarak iko haniyarak hoŋ, imijana itai many tetteri jio onyimu nyia Hollum nani tehiji hatai, ittittoyere Asayyo Ayijok jio Alufajak, oŋida bati isi itaniŋuni ette iruk. 8#Ehanita 2:4; 10:44Buo Hollum, ollo omijak 'to egigilita waati 'daŋ ababo, ette iruhonia Alufajak, te esiarana honyi jihosi Loholio Olibo, ihuo ninyia isiaraniere inyi jihohoi. 9Jihonyi, obeŋ obo alufaji ihiji hosi ikohoi. Ohohini nyia eyyata hosi te eruk hosi. 10Ihuania, nyioti iwahata itai ikemio Hollum, te etiwwahina hatai eruhok hulia ariŋ onno oddiŋ 'to, ninyia ittallihi hohonyiok hohoi iwwok, buo fe hohoi ettallik iwwok? 11Ati eruk jio, efuo italahuno ihuo isi, ta ayiji taji Yesu Lamonye.”

12Oduahino nyia eluluŋ waati ania 'daŋ 'liŋ 'liŋ hulle itayirie, buo Barnaba iko Paulo iramie jihosi eduariti iko ellillihita 'daŋ hunyia isiarak Hollum isi ihanie ihiji Lufajak. 13Ninyia atuhoni isi ekiana, ette Yakobo jiaran, “Illarak iko haniyarak hoŋ, itayiriete jihoŋ! 14Hetek duo Simone iramana hohoi aŋai itahutak Hollum agottiere honyi Alufajak, ta anyimuna honyi omuk tehiji hosi a hulonyi. 15Orriamari ekenita hunyia ojiori ekianak Hollum iko erre hunia. Ihuo igioroni ibuk Hollum jio,

16 # Amos 9:11-12 ‘Ojio Lamonye, acohuno adi ni moi,

ette ni itadetuna olobuore Dafide, ninyia atturo 'to.

Aduk adi ni amura honyi,

ette ni inyiak itagol inyi.

17Tania, ofuonni adi aati hullomuk 'daŋ jihoŋ,

iko Alufajak 'daŋ hulle eloŋu ni irari a huloŋ.

18Isi hunia, erre hunyia ikiana Lamonye, l

inyia itahutak 'to isi many berien.’

19“Ihuania, te egigilo ottonoŋ, hèlaha ettigemio Alufajak hulla afuonni 'to jio Hollum. 20Ati, hegioronia luŋa jihosi awaraga oŋida isi itaduarai erre 'daŋ hunne iboti 'to, hunne isiori ehumita jio arrijiorita jiohin. Oŋida buo fe isi ihari erre somon, ahonya caŋi hunno obuni ibun, kuyya nooto. 21Nyio, many berien odulori ihianatio efahita Mose ihasik emojiti to oŋitek Sabatto 'daŋ, buo fe ittittoye ekenita honyi jio aborejin gala 'daŋ ababo.”

Awaraga jio Alufajak hulle Iruhi 'to

22Attati lefahat iko lahou, buo eluluŋ heruhok 'daŋ jiaran jio, ijiara onyimuni omuk aati tehiji iluluŋ ania, ette ifahina Antiok iko Paulo buo Barnaba. Onyimuni nyia isi Yuda elle iloŋoi Barsabas iko Silas, aati hulle igonyuni eruhok jio oyiji bebe, 23ette isiarana awaraga ana jihosi:

“Hohoi illarak hatai, lefahat iko lahou, efonya hohoi, illarak hohoi Alufajak 'daŋ, hutto Antiok, Siria, iko Silisia. 24Etaniŋu hohoi jio ittigemi buo fe italoŋoji omuk aati hunyia ofuoi 'to tehiji hohoi itai, te ekenita hosi. Ati, obiaŋara nyia hohoi eramak isi ikianari ihuo nyia. 25Tania, ewwahu hohoi buo fe eruk arabotie 'daŋ inyimuniere omuk leyak sayyo hulle ifahini a jihatai. Ofuonni adi isi iko Barnaba buo Paulo, aati hulle emuno hohoi bebe; 26nyio, arai isi awaati hullo orinyani egiama jio Yesu Kristo, Lamonye hohoi, buo omijani jio iliaha naye diya. 27Ihuania, efahu hohoi jihatai Yuda iko Silas, iramaniere itai te etuhe hosi erre hunne egiorok hohoi hunia. 28Tania, te egigilo ono Loholio Olibo iko ottonohoi, eruk hohoi 'daŋ jio oyyu adi inyi elle ebeŋ hohoi enyiak ifonihina obo ettigemio jihatai. Ati, ijifatiete efahita huna: 29hèŋiyete erre 'daŋ hunne isiori ehumita jio arrijiorita jiohin; hèŋiyete nooto; hèhonyati aciaŋi hunno obuni ibun; ihara erre somon. Oyyu adi inyi bebe jihatai elle ibiaŋata itai ihaniete erre hunia. Humotina bebe.”

30Ifahini nyia leyak sayyo hulia, ette isi ifuatan Antiok, amaji ninyia ottubanierek isi eluluŋ heruhok 'daŋ amaji abotie, ette isiarana awaraga ania jihosi. 31Ninyia iheni eruhok awaraga ania, ette isi imuno bebe nyio, itagol eram otto awaraga ania atajia hosi. 32Attati Yuda iko Silas, hunyia arai 'to ahekianak hiram Hollum, ikiana jihosi fur, itagoliere atajia hosi. 33Buo ninyia itoŋuni isi omuk oŋitek teya, ette eruhok inyiamana isi te nelik tajia, ette isi icaharu jio aati hunyia ifahuni 'to isi. 34[Buo Silas ta ahou honyi ette irasahino diya.]#15:34 Obeŋ ekori ana jio omuk egierita.

35Arasahino nyia Paulo iko Barnaba Antiok. Arabotie iko aati hullomuk arriai, ittiyenie nyia isi buo fe ittittoye ekiana ono Lamonye.

Apiaha Paulo iko Barnaba

36Ihalu omuk oŋitek ojio nyia Paulo jio Barnaba jio, “Waŋ, ecaharu jio aborejin gala 'daŋ ababo hunyia ettittoyere ekiana ono Lamonye. Emimijaru eruhok, irumaniere owoni isi aŋai.” 37Awak nyia Barnaba luŋa iyaru Yoane Marko ikosi, 38#Ehanita 13:13ati igigilo nyia Paulo jio obeŋ obis iyari Yoane Marko nyio, obeŋ nyia inyi odulo awanan ikosi many isidi igiama ninyia ifahinierek isi. Ati acaha nyia inyi ette idiaharu isi Pamfilia. 39Ania, ette isi itagolo 'tek 'tek, ette ipiaha. Iyaru nyia Barnaba Marko ette ifuatan Saipras ta ababur, 40buo Paulo ette inyimuna Silas ette leten. Isiarani nyia eruhok inyi jio Lamonye oŋida omijio inyi. 41Olo nyia inyi totto Siria iko Silisia buo ititagoloro eluluŋi heruhok.

હાલમાં પસંદ કરેલ:

Ehanita Lefahat 15: EA2003

Highlight

નકલ કરો

Compare

શેર કરો