Тархал 36
36
Целофхадил ясазул ракьал
(Тар. 27:1-11)
1Юсупил вас Манасс, Манассил вас Махир, Махирил вас ГилгӀад, – гьеле гьев ГилгӀадил тухумалъул кӀудиял рачӀана Мусахъеги гӀизраилазул къавмазул бутӀрузухъеги. 2Гьез абуна:
«Я бетӀерчӀахъад, БЕТӀЕРГЬАНАС амру гьабуна можороги рехун гӀизраилазда гьоркьоб ракь бикьеян. БЕТӀЕРГЬАНАС дуде, нижер бетӀерчӀахъадиде амру гьабуна нижер вац Целофхадил ракьалъул бутӀа гьесул ясазе кьеян. 3Амма гьел гӀизраилазул батӀиял къавмазул васазе росасе ани, гьезул ракьалъул бутӀа нижер къавмалъул мулкалдаса нахъе ине буго, ва гьезул росазул къавмазул мулкалде тӀаде жубазе буго. Гьебмехалда, можороялда рекъон нижее ирслъун щвараб ракь тӀаса къотӀизе буго. 4Цинги гӀизраилазул Юбилеялъул сон тӀаде щведалги, гьел ясазе кьураб ракьалъул бутӀа жубазе буго гьезулгун ригьин гьабурал къавмазул ракьазде тӀаде, ва гьезул ракьалъул бутӀа нижер умумузул ракьалъул бутӀаялдаса тӀубанго бахъизе буго».
5Гьебмехалъ БЕТӀЕРГЬАНАСУЛ амруялдалъун, Мусаца гӀизраилазда абуна:
«Юсупил къавмалъ битӀараб абулеб буго. 6БЕТӀЕРГЬАНАС гьадинаб амру гьабулеб буго Целофхадил ясазде: „Гьезул ихтияр буго бокьарав чиясе росасе ине, амма гьев вукӀине ккола гьезул къавмалъул тухумазда гьоркьоса чи. 7ГӀизраилил къавмазул ракьал цо къавмалъухъа цогидаб къавмалъухъе кьезе бегьуларо. Щивав гӀизраилас цӀунизе ккола жиндирго умумузул къавмалда жаниб гьесие щвараб ракьалъул бутӀа. 8Нагагь ГӀизраилалъул цониги къавмалъул ясалъе ирсалъе инсул ракьалъул бутӀа щвани, гьей росасе ине ккола жиндирго инсул тухумалдаса чиясе, жиде-жидер умумузул ракьазул бетӀергьабилъун гӀизраилал хутӀиялъул мурадалда. 9КинабгӀаги мулк ине бегьуларо цо къавмалъухъа цогидаб къавмалъухъе. Биччанте гӀизраилазул щибаб къавмалъ жиндихъго кквезе умумуздасан ирсалъе щвараб ракь“».
10Целофхадил ясаз кинабго гьабуна БЕТӀЕРГЬАНАС Мусаде гьабураб амруялда рекъон. 11Целофхадил ясал – Махлаги, Тирзаги, Хоглаги, Милкаги, НогӀаги – жидерго инсул рахъалъан вацгӀалзабазе росасе ана. 12Гьел рукӀана Юсупил вас Манассил къавмалдаса васал, гьединлъидал Целофхадил ясазул ракьалги хутӀана гьезул умумузул къавмалъул мулклъун.
13Гьединал рукӀана, Ерихон шагьаралда дандбитӀун Иордан гӀурул рагӀалда МогӀавалъул гӀатӀиракьалда рукӀаго, БЕТӀЕРГЬАНАС Мусадасан гӀизраилазде гьарурал амрабиги къануналги.
Tällä hetkellä valittuna:
Тархал 36: АварАК
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Институт перевода Библии, 2005-2023