Тархал 22
22
Балакица БилгӀам ахӀи
1КватӀичӀого гӀизраилал нахъеги сапаралде рахъана, МогӀавалъул гӀатӀиракьалдехун балагьун, ва Ерихон шагьаралда дандбитӀараб Иордан гӀурул рагӀалда лъалхъана. 2Ципорил вас Балакида рагӀана гӀизраилаз амориязе гьабурабщиналъул хӀакъалъулъ. 3Кутакалда хӀинкъана МогӀавалъул халкъ, гӀизраилазул халкъалъул кӀодолъи бихьун. ГӀизраилазукьа хӀинкъун сородулеб букӀана тӀолабго МогӀав.
4МогӀавияз Мидяналъул кӀудиязда абуна:
«Гьаб халкъалъул руккелалъ нилъеда сверухъ бугебщинаб кваналеб буго, магъилъ бугъица хер гӀадин».
Цинги доб заманалда МогӀавалъул пачалъун вукӀарав Ципорил Балакица 5чапарзаби ритӀана Беорил вас БилгӀамихъе, Ефрат гӀурухъ бугеб Петор шагьаралде, гьадинаб ругьелгун:
«Мисриялдаса бачӀараб халкъалъ цӀезабун буго ракьалъул гьумерго, ва гьеб халкъ рещтӀун буго дида аскӀоб. 6Гьарула дуда, вачӀа, нагӀана рещтӀинабе гьаб халкъалде, щайгурелъул гьабсагӀат гьел дидаса гӀемерго къуватал руго. Цинги дихъа бажаризе бегьула гьел гъуризе ва дир ракьалдаса нахъе рачахъизе. Дида лъалелъул, дуца баракаталъул дугӀа гьабурасде баракат рещтӀунеблъи ва дуца нагӀана кьурав балагьалъукье кколевлъи».
7МогӀавалъулги Мидяналъулги кӀудиял рачӀана БилгӀамихъе, гьесие кьезе гӀарацги цадахъ босун, ва Балакил мурад гьесда бицана.
8«Сордо гьаниб бай, – ин абуна гьезда БилгӀамица, – радал бицина дица нужеда БЕТӀЕРГЬАНАСУЛ жаваб». МогӀавалъул кӀудиял рогьинегӀан гьесухъ чӀана.
9Аллагь загьирлъана БилгӀамие ва гьесда цӀехана:
«Гьал духъ ругел гӀадамал щал?» – ин.
10БилгӀамица Аллагьасе жаваб кьуна: «МогӀавалъул пача Ципорил Балакица ритӀун рачӀун руго гьел дихъе гьадинаб ругьелги босун:
11„Мисриялдаса бачӀараб халкъалъ дунял цӀезабун буго. Гьарула вачӀа, нагӀана кье гьеб халкъалъе, щайгурелъул гьабсагӀат гьел дидаса гӀемерго къуватал руго. Цинги дихъа бажаризе бегьула гьел гъуризе ва дир ракьалдаса нахъе рачахъизе“, – ян».
12Аллагьас БилгӀамида абуна:
«Унге гьелгун. Кьоге нагӀана гьеб халкъалъе, щайгурелъул гьеб буго баракат лъураб халкъ».
13Хадусеб къоялъ БилгӀамица Балакил вакилзабазда абуна:
«ТӀадрусса нужерго ракьалде. БЕТӀЕРГЬАНАС изну кьечӀо дие нужгун ине», – ян.
14МогӀавалъул церехъаби Балакихъе тӀадруссана ва гьесда бицана:
«БилгӀамица инкар гьабуна нижгун вилълъине», – ян.
15Балакица нахъеги вакилзаби ритӀана, цереккун ритӀараздасаги цӀикӀкӀун ва гьездасаги къадруял. 16Гьел рачӀана БилгӀамихъе ва гьез абуна:
«Ципорил вас Балакица гьадин абулеб буго: „Инкар гьабуге дихъе вачӀине. 17КӀудияб хӀурматгун къабул гьавила дица мун ва дуе бокьарабщинабги кьела. ВачӀа гьаб халкъалъе нагӀана кьезе“, – ян».
18Амма БилгӀамица Балакил вакилзабазе гьадинаб жаваб кьуна:
«ГӀарцулги меседалъулги цӀураб жиндирго кӀалгӀа Балакица дие кьуниги, дирго БЕТӀЕРГЬАН Аллагьасул амруялда рекъон кколареб щибниги жо гьабизе кӀоларо дида, я кӀудияб, я гьитӀинаб. 19Амма нужецаги сордо бай гьаниб – дун балагьилин щиб БЕТӀЕРГЬАНАС абулебали».
20Гьеб сордоялъги Аллагь загьирлъана БилгӀамие ва Гьес абуна:
«Мун ахӀизе гьел гӀадамал рачӀун ругелъул, гьезда цадахъ а, амма гӀицӀго Дица дуда малъараб жо гурони гьабуге».
БилгӀамил хӀама
21Нахъисеб къоялъ радал БилгӀамица жиндирго хӀама кьолона ва МогӀавалъул чӀухӀби-хӀакимзабигун цадахъ сапаралде вахъана. 22Ва гьезда цадахъ нухда унев вукӀаго, Аллагьасул квешго ццин бахъана БилгӀамида, ва БЕТӀЕРГЬАНАСУЛ Малаик эхетана гьесда цеве нух бакьулъ. БилгӀам вукӀана хӀамида рекӀун, гьесда цадахъ гьесул кӀиго цеветелги вукӀана. 23ХӀамида вихьана, кодоб лъалиниса бахъараб хвалченгун, нухда чӀарав БЕТӀЕРГЬАНАСУЛ Малаик, гьединлъидал нухдаса гьеб хурибехун сверана. БилгӀамица байбихьана гьеб бухизе ва нухдехун сверизабизе.
24Гьебмехалда БЕТӀЕРГЬАНАСУЛ Малаик чӀана цӀолбол кӀиго ахалда гьоркьоб бугеб къваридаб сухъмахънухда; нухлул кӀиябго рахъалда къадалги рукӀана. 25БЕТӀЕРГЬАНАСУЛ Малаик вихьараб хӀама къададегӀан къана ва БилгӀамил хӀетӀе къадада данде базабуна. Гьесги цӀидасан хӀама бухана.
26Цинги БЕТӀЕРГЬАНАСУЛ Малаик, дагьавги цевегӀанги ун, квараниде яги квегӀиде сверизе рес гьечӀеб, жеги къваридаб бакӀалда чӀана. 27БЕТӀЕРГЬАНАСУЛ Малаик вихьараб хӀама бегана БилгӀамида гъоркь; Цинги БилгӀамил квешго ццин бахъана ва гьес нахъеги тӀилица бухана хӀама. 28Гьебмехалъ БЕТӀЕРГЬАНАС хӀамие кӀалъазе гьунар кьуна ва гьелъ БилгӀамида абуна:
«Щиб квешлъи дица дуе гьабураб, дуца лъабцӀул дун бухизе ккани?» – ян.
29БилгӀамица жаваб кьуна:
«Дун гӀабдал гьавизе лъугьун бугогури мун! Дихъ кодоб хвалчен букӀарабани, гьабсагӀатго чӀвалаан дица мун!»
30Амма хӀамица БилгӀамида абуна:
«Жакъа къоялде щвезегӀанги гӀумруялъго мун ваччараб дур хӀама гурищ дун бугеб? БукӀанищ дир киданиги гьадинаб гӀамал?»
«БукӀинчӀо», – ян жаваб кьуна гьес.
31Цинги БЕТӀЕРГЬАНАС рагьизаруна БилгӀамил берал, ва гьесда вихьана лъалиниса бахъараб хвалченгун нухда чӀарав БЕТӀЕРГЬАНАСУЛ Малаик. БилгӀам кӀалагъоркье ккана ва гӀодоб нодоги цун накабазда чӀана. 32БЕТӀЕРГЬАНАСУЛ Малаикас гьесда абуна:
«Сундухъ дуца лъабцӀул тӀатӀала хӀама бухараб? Дун вачӀун вуго дуда данде, мун чӀезавизе, щайгурелъул дур сапаралъул мурадалдаса рази гьечӀо дун. 33ХӀамида дун вихьана ва лъабго нухалъ гьеб Дидаса сверун ана. Гьеб сверичӀебани, Дица мун чӀвазе вукӀана, хӀама чӀаго тезе букӀана».
34БилгӀамица БЕТӀЕРГЬАНАСУЛ Малаикасда абуна:
«Дида гӀайиб ккана! Дида лъалеб букӀинчӀелъул мун дир нухда цеве чӀун вугевлъи. Амма гьанже, мун рази гьечӀев ватани, дун тӀадвуссина».
35Цинги БЕТӀЕРГЬАНАСУЛ Малаикас БилгӀамида абуна:
«Мун ине бегьула гьел гӀадамазда цадахъ, амма гӀицӀго Дица малъараб гьабе», – ян.
Ва БилгӀам ана Балакил церехъабазда цадахъ. 36БилгӀам вачӀунев вугин рагӀидал, Балак вачӀана гьесда данде Арнон гӀурухъ бугеб могӀавиязул шагьаралде, жиндирго улкаялъул гӀорхъоде щвезегӀан. 37Балакица БилгӀамида абуна:
«Дица церего гурищ ритӀун рукӀарал дуда хадур гӀадамал, гьаб цӀакъ кӀвар бугеб иш бугиланги абун. Щайха мун вачӀунарого вукӀарав? Дуе мустахӀикъаб адаб-хӀурмат гьабун бажаруларев чийищ дун?»
38«Гьале вачӀун вугогури дун духъе, – ян жаваб кьуна БилгӀамица. – Амма кӀолебдай дида диего бокьараб бицине? Дир кӀалдиб БЕТӀЕРГЬАНАС лъураб рагӀи, – гьеле гьеб бицина дица».
39Цинги Балакида цадахъ Кирят-Хуцот шагьаралде ана БилгӀам. 40Гьениб Балакица къурбаналъе боцӀиги гӀиги хъуна, ва гьанал бутӀаби кьуна БилгӀамиеги гьесда цадахъ рукӀарал кӀудиязеги.
41Хадусеб къоялъ радал Балакица БилгӀам вачана БагӀалалъул бищун борхатаб бакӀалде ва гьенисан гьесда бихьана ГӀизраилил халкъ чӀараб бакӀ.
Tällä hetkellä valittuna:
Тархал 22: АварАК
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Институт перевода Библии, 2005-2023