Тархал 17
17
Гьарунил гӀанса тӀегьай
1Цинги БЕТӀЕРГЬАНАС Мусада абуна:
2«ГӀизраилалгун кӀалъай ва гьезухъа анцӀила кӀиго гӀанса босе, щибаб къавмалъухъа цо-цо – гьезул кӀудиязул гӀунсби. Щибаб гӀансаялда тӀад къавмалъул бетӀерасул цӀарги хъвай; 3Левийил гӀансаялда тӀад Гьарунил цӀар хъвай. Щибаб къавмалъул кӀудиясухъа цо-цо гӀанса босизе ккола. 4Гьел гӀунсби лъе ДандчӀваялъул Чадиралда жанир, Дун Мунгун дандчӀвалеб бакӀалда КъотӀиялъул гъамасалда цере. 5Дица тӀасавищарав чиясул гӀансаялда тӀад чӀорал кӀанцӀизе руго, ва гьедин Дица гьоркьоб къотӀизабизе буго гӀизраилазул нужедаса разигьечӀолъиялъул лъугӀел гьечӀеб къулкъуди».
6Мусаца гьеб кинабго гӀизраилазда бицана, ва гьезул кӀудияз анцӀила кӀиго гӀанса гьесухъе кьуна – щибаб къавмалдаса цо-цо гӀанса. 7Цинги Мусаца гьел ДандчӀваялъул Чадиралъур БЕТӀЕРГЬАНАСУЛ КъотӀиялъул гъамасалда цере лъуна.
8Хадусеб къоялъ Муса Чадиралъуве вилълъана ва гьесда бихьана Гьарунил гӀансаялда, ай Левийил къавмалъул гӀансаялда чӀорал кӀанцӀун ругеблъи: гьелда букӀдулги раккун, тӀегьги бан, миндальги барщун батана. 9Мусаца киналго гӀунсби, БЕТӀЕРГЬАНАСДА цереса къватӀиреги росун, гӀизраилазда рихьизаруна. Гьел гьезухъ ралагьана, цинги щивас жинди-жиндир гӀанса нахъе босана.
10Гьебмехалъ БЕТӀЕРГЬАНАС Мусада абуна:
«Гьарунил гӀанса лъе КъотӀиялъул гъансида цебе. Биччанте гьеб букӀине мутӀигӀлъуларезе ракӀалдещвеялъул гӀаламатлъун. Гьедин дуца ахир лъела Дида данде гьезул къулкъудиялъе ва гьелги хвечӀого хутӀила».
11Мусаца БЕТӀЕРГЬАНАС малъухъе гьабуна. 12ГӀизраилаз Мусада абуна:
«Гьале ниж холел руго! Нижер иш лъугӀана, ниж киналго хвезехъин руго! 13БЕТӀЕРГЬАНАСУЛ Мукъадасаб Чадиралда аскӀове къарав щивав чи холев вуго! Унго, ниж киналгойищ хвезе ругел?»
Tällä hetkellä valittuna:
Тархал 17: АварАК
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Институт перевода Библии, 2005-2023