Къанун 6
6
Кидаго Аллагь вокьа
1Гьале БЕТӀЕРГЬАН Аллагьас нужеда малъеян дида тӀадкъарал, нужерлъун букӀине бугеб ракьалде щведал нужеца тӀуразаризе кколел къануналги амрабиги. 2Гьебмехалъ нужги, нужер лъималги, гьезулги лъималги гӀумруялъго БЕТӀЕРГЬАН Аллагьасукьа хӀинкъила, дица нужеда малъарал Гьесул къануналги амрабиги нужеца тӀуразарила, ва гьелдалъун нужер гӀумруги халалъила. 3ГӀенекке, ГӀизраилил халкъ! ТӀадчӀун тӀубазабе гьаб кинабго! Цинги нужееги лъикӀ букӀина ва, нужер умумуз иман лъурав БЕТӀЕРГЬАН Аллагьас кьураб рагӀуда рекъон, рахьги гьоцӀоги чвахулеб ракьалда нужер халкъги кутакалда гӀемерлъила.
4ГӀенекке, ГӀизраилил халкъ! Нилъер БЕТӀЕРГЬАН Аллагь вуго цохӀого цо вугев БЕТӀЕРГЬАН! 5Дурго БЕТӀЕРГЬАН Аллагь хиралъе ракӀ-ракӀалъ, тӀолабго рухӀалдалъун ва къуват-жаналдалъун. 6Жакъа дица дуе кьурал амраби кидаго рекӀелъ цӀуне, 7тӀадчӀун дурго лъималаздаги малъе. Кидаго такрар гьаре гьел, рокъор гӀодор чӀун рукӀагоги, къватӀир сапаралда рукӀагоги, кьижулеб мехалъги, тӀаде рахъунеб мехалъги. 8РакӀалде щвеялъул гӀаламат хӀисабалда кверда рухье гьел, гьединго надалдаги рухье. 9Дурго рукъалъул нуцӀил рахаздаги шагьаралъул кавабаздаги хъвай гьел.
10Дур БЕТӀЕРГЬАН Аллагьас мун вачина дуе кьелин гьедараб улкаялде. Дур умумузе, ай Ибрагьимиеги, ИсхӀакъиеги, Якъубиеги Гьес гьединаб рагӀи кьун букӀиндал. Гьенир руго дуца гӀуцӀичӀел кӀудиял гьайбатал шагьарал, 11дуца бакӀаричӀеб бечелъиялъул цӀурал рукъзал, дуца рухъичӀел гъуял, дуца чӀечӀел цӀолбол ахалги зайтуналъул авлахъалги. Гьениб дуе гӀорцӀизегӀан квен букӀина. 12Амма, вореха, мунго Мисриялъул лагълъиялдаса нахъе вачарав БЕТӀЕРГЬАН кӀочонге.
13Дурго БЕТӀЕРГЬАН Аллагьасукьа хӀинкъа, цохӀо Гьесие тӀагӀат гьабе, ва гьа гьедулелъул, Гьесул цӀар гурони бахъуге. 14БатӀиял аллагьзабазда нахъ рилълъунге, сверухъ ругел халкъазул аллагьзабаздеги руссунге. 15Щайгурелъул нужгун вугев БЕТӀЕРГЬАН Аллагь вуго хилиплъи хӀехьоларев Аллагь: Гьесул ццин гьалаглъичӀого букӀине, нужги дунялалдасаго тӀагӀинаричӀого рукӀине. 16Массаялда гӀадин, нужерго БЕТӀЕРГЬАН Аллагьасул хӀалал рихьуге. 17БЕТӀЕРГЬАН Аллагьас нужее кьурал къануналги, амрабиги, хӀукмабиги тӀадчӀун тӀуразаре. 18БЕТӀЕРГЬАНАСДА берцин бихьулебщинаб гьабе. Гьебмехалъ нужееги лъикӀ букӀина: БЕТӀЕРГЬАНАС нужее кьелин нужер умумузего гьа бараб гьайбатаб улкаялде щвела нуж ва гьеб мукӀур гьабила. 19Гьес тушбаби нужеда цереса нахъе гъела – БЕТӀЕРГЬАНАС гьедин абун букӀиндал.
20Хадубккун дур наслабазул лъималаз цӀехани: „БЕТӀЕРГЬАН Аллагьас кьурал гьал къануназулги, амрабазулги, ахӀкамазулги магӀна щиб?“ – ин, 21дуца абе: „Ниж рукӀана Мисриялда пиргӀавнасул лагъзаллъун; БЕТӀЕРГЬАНАС Жиндирго къудраталдалъун нахъе рачана ниж гьениса. 22Мисриялдеги, пиргӀавнасдеги, гьесул тӀолабго гӀагарлъиялдеги балагь рещтӀинабурал кӀудиял мугӀжизаталги гӀаламаталги рихьизаруна БЕТӀЕРГЬАНАС нижер берда цере. 23Нижин абуни, Гьес гьениса нахъе рачана, нижер умумузего рагӀи кьун букӀараб гьаб ракь нижее насиб гьабизе гӀоло. 24БЕТӀЕРГЬАНАС нижеде амру гьабуна гьал киналго къанунал тӀуразареян, БЕТӀЕРГЬАН Аллагьасул адаб гьабеян ва Гьесукьа хӀинкъаян, нилъее лъикӀ букӀиналъе ва нилъер гӀумру цӀуниялъе гӀоло. (Жакъаги гьедин буго). 25Аллагь нилъеда рази вукӀина, БЕТӀЕРГЬАНАС абухъе нилъеца гьал киналго амраби тӀуразаруни“.
Tällä hetkellä valittuna:
Къанун 6: АварАК
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Институт перевода Библии, 2005-2023