प्रेरित 26
26
1हेरोद पावलह कल, “टुँ आपन पक्षम ब्वालसेक्ठो।”
तब पावल हाँठ पसार्क आपन बचाउक लाग ब्वाल लग्ल: 2“हे राजा हेरोद, यहूदीहुँक्र महीह लगाइल सारा दोषक विषयम आज मै हजुरक सामुन्ने आपन बचाउक लाग ब्वाल पैलकम मै अपन्हेह धेर भाग्यमानी सम्झलबाटुँ। 3काकरकि यहूदीन्हक सब चालचलन ओ वादविवाद कर्ना बातक बारेम हजुर धेर जन्लबाटी। आब म्वार बिन्ती बा, म्वार बयान धीरज कैक सुनदी।
4“मै पैल्ह आपन देशम दोस्र यरूशलेमम छोटीहमसे यहूदी समाजम हुर्कलकओर्से, यहूदीहुँक्र म्वार जीवन कसिन रह कैक मजासे जन्ठ। 5मै हमार धर्मक फरिसी कना कट्टर समूहक मनैया रनहुँ। यी बात हिँकन पैल्हहेँसे थाहाँ बाटन ओ यदि हिँक्र चहलसे, यी बात अपन्हे कहसेक्ठ।#प्रे २३:६; फिलि ३:५ 6परमेश्वर हमार पितापुर्खन करल प्रतिज्ञम मै आशा कर्लकओर्से आज म्वार मुद्दा यिहाँ चल्ती बा। 7हे राजा, वास्तवम उह आशम रह्क हमार बाह्र कुल रातदिन जोशले परमेश्वरक आराधना कर्ठ। ओ मै फे उह आशम बाटुँ। मै उह आशा कर्लकओर्से यहूदीहुँक्र महीह दोष लगारख्ल। 8परमेश्वर मुवल मनैन फेदोस्र जियाइसेक्ठ कना बात काजे अप्नहुँक्र विश्वास कर्ना गाह्रो मन्ठी?
9“नासरत सहरक येशूम विश्वास कर्ना सबजन्हक विरोध करपर्ठा कैक महीह फे लागलरह।#प्रे ८:३; २२:४-५ 10मै यरूशलेमम उह विरोध त कर्नु नि। मै मुख्य पूजारीनसे अधिकार पाक धेर भक्त जनहुँकन झ्यालखानम डार लगैनु ओ हुँकन मुवैना कामम फे मै सहमत हुइनु। 11मै हुँकन ‘आबठेसे मै येशूम विश्वास नैकरम’ कैक कह लगाइक लाग धेर फ्यारा ठाउँ-ठाउँक सभाघरम सजाय देह लगैनु। मै हुँकनसे रिसले चूर होक और देशक सहर-सहरम फे जाक हुँकन सतैनु।
12“एक दिन मै मुख्य पूजारीनसे अधिकार ओ आज्ञा पाक यिह कामक लाग दमस्कस जाइटनहुँ। 13हे महाराज, डगरिम जैटी-जैटी दुपहरक समयम दिनसे फे चह्कार ज्योति आकाशमसे मै ओ म्वारसँग रहुइयन्हकम चम्कटह, 14ओ हम्र सबजन भूइँयम गिरगैली। तब मै हिब्रू भाषम महीह असिक कहट् सुन्नु, ‘शाऊल, शाऊल, काजे टुँ महीह सँताइटो? टुँ म्वार इच्छक विरोधम चल्ना त टुँहीन जो बठैठा।’
15“मै कनु, ‘प्रभु, अप्न के हुइटी?’
“प्रभु महीह कल, ‘मै येशू हुइटुँ, जेहीह टुँ सँताइटो। 16आब उठो, मै टुँहीन आपन सेवक ओ साक्षी नियुक्त करक लाग टुँहारठे देखपर्लक हुइटुँ। टुँ आपन द्याखल बात ओ भविष्यम मै टुँहीन देखैना बात मनैन कह परी। 17मै टुँहीन यहूदी ओ गैरयहूदीन्हकठे पठाइक लाग बाटुँ। मै टुँहीन हुँकनसे छुट्कारा देहुइयाबाटुँ। 18टुँ हुँकन्हक आँख खोलदेक हुँकन अन्धारमसे अजरारम ओ शैतानक शक्तिमसे परमेश्वरकठे घुमाइपरी। असिक हुँक्र म्वारम विश्वास कैक आपन-आपन पापक क्षमा पैहीँ ओ परमेश्वरक र्वाजल मनैन्हक बगालिम स्थान पैहीँ।’
19“उहओर्से, हे महाराज हेरोद, मै स्वर्गसे आइल उ दर्शनम प्रभुक देखाइल बातक आज्ञाकारी हुइनु। 20मै पैल्ह दमस्कसम, दोस्र यरूशलेम सहर लगायत सारा यहूदिया देशम, ओ गैरयहूदीन्हकठे फे आपन-आपन पापी मन परिवर्तन करो ओ परमेश्वरकठे घुमो कैक प्रचार कर्नु। ओ असल काम कैक आपन जीवन परिवर्तन हुइलक बात प्रमाणित करो फे कनु।#प्रे ९:२०,२८-२९ 21यिह बात प्रचार कर्लक कारण यहूदीहुँक्र महीह मन्दिरम पक्रल ओ मुवैना कोसिस कर्ल। 22तर आजसम परमेश्वर म्वार सुरक्षा कर्लबाट। उहओर्से मै छोटीबरा सबजहन साक्षी देटी यिहाँ ठह्र्याइल बाटुँ। अवस्य पूरा हुई कैक अगमवक्तन्हक ओ मोशक ब्वालल् वचन बाहेक मै और कुछु नैकलहुइटुँ। 23अर्थात्, ख्रीष्टह दुःख भोग्क मुवपरहीन, ओ मुवलमसे फेदोस्र जिनामध्येम पैल्ह व्यक्ति उहँ हुहीँ। असिक उहाँ यहूदीहुँकन ओ गैरयहूदीहुँकन परमेश्वरक ज्योतिक बारेम सिखैहीँ।”#यशै ४२:६; ४९:६; १ कोर १५:२०
24पावल बोल्टीबोल्टी बीचम फेस्तस बरा सोरले कल, “रै पावल, टैँ आब जातसे बौरागैल्या, ट्वार धेर विद्या टोहीह असिन बनाराखल।”
25पावल कल, “माननीय फेस्तस, मै बौरा नैहुइटुँ, मै सत्य-सत्य बात बट्वाइटुँ। 26राजा हेरोदह यी सब बात थाहाँ बाटन। यी सब घट्नासे उहाँ परिचित हुइलकओर्से मै निर्धक्कसे बोल्टीबाटुँ, काकरकि यी घट्ना गुपचुपम हुइलक नैहो। 27हे महाराज हेरोद, का हजुर अगमवक्तन्हक कहल बात विश्वास कर्ठी? हजुर विश्वास कर्ठी कना बात म्वार लाग थाहाँ बा।”
28हेरोद पावलह कल, “का टुँ महीह ख्रीष्टियन हुइक लाग एक्कघरीम मनाडरम कैक सोँचरख्लो?”
29पावल जवाफ देल, “चाहा एकघरी लाग, चाहा धेर समय लाग, हजुर केल नाहीँ, तर यिहाँ उपस्थित सबजन म्वारअस हुइलसे झन् मजा हुइनेरह कैक मै परमेश्वरसे प्रार्थना कर्ठुं। तर म्वार हाँठम लागल यी हतकडीभर अप्नहुँकन्हकम जिन लाग।”
30तब राजा, शासक, बरनिकी ओ और सबजन जर्याकजुरुक उठ्ल। 31हुँक्र सभाभवनमसे निक्रटी-निक्रटी अप्न-अप्न असिक बट्वाइलग्ल, “यी मनैया मृत्युदण्ड पैना या जेल जैना हिसाबक कुछु अपराध नैकर्लहो।”
32हेरोद फेस्तसह कल, “यदि यी मनैया ‘रोमी शासक कैसर म्वार न्याय कैदेहीँ’ कैक बिन्ती नैकर्लरहट् त, यहीह छोरदेलसे फे हुइनेरह।”
Tällä hetkellä valittuna:
प्रेरित 26: thl
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2020, Wycliffe Bible Translators, Inc. All rights reserved.
