Matye 24
24
Zyezu n kpɔ̀ʔɔrɔli kpaʔa cáanna kéele joo
(Mar 13:1-2; Luk 21:5-6)
1A Zyezu ga yiri kpɔ̀ʔɔrɔli kpaʔa ni ni syée, a wi pìitamabèle nùuni wi na n baa kpɔ̀ʔɔrɔli kpaʔa kàcoolo tɛ̀ɛn wi na kánmee na pe li faan n sɛ́ɛ lè. 2A wi be pye: «Yele ga yáriri naa myɛ nyaa í? Mii a gi joo yele ma kányɛʔɛ ni, kàdɛnɛgaa faala a kòro kàa na nɛɛ naa í, pe a ba yi myɛ cáan.»
Kagbanyi ní wɔʔɔyi kéele
(Mar 13:3-13; Luk 21:7-19)
3A wi ga sáà tɛ́ɛn Olivye tíiri nyanbelege na, a wi pìitamabèle nùuni wi na, pe yagwɔɔlɔ, n baa jo: «Mi gi joo wolo ma, làlìí ni kérigèle bee a ba pye? Nyàʔá fɛ̀ɛfeleo wi a mɔ lúrubanni ní lǎli naa kwɔ́ɔmɔ tɛ̀ɛn wolo na?»
4A Zyezu be pye: «Yaa yeyɛɛ kɔ̀rɔsíi, yele a kɔ́ syɔɔn faala yaʔa wi yele fáana pùuni í. 5Níì cán syɛ̀ɛnnɛ saʔa a pan bi ba ra mii mɛ́ɛgi nii peyɛɛ na si jo poro be nyɛ Kirisi, si pèle saʔa fáana pùuni. 6Yele si a kɔ́ gi lóʔo kapɛɛngèle n too tátɛɛyaa ni, si wɔ́ɔ kapɛɛngèle tìnmɛ lóʔo. Ki si ga yɛlɛ yele í da fɛ̀ɛgí í, níì cán kérigèle naa myɛ n yɛlɛ ge kpéʔele gbɛnʔɛnɛ. Kàjáa gee bee ban ki a pye gi kwɔ́ɔmi í. 7Syɛɛnfelegaa a ba ra tuun kàa na, fàngaa si wɔ́ɔ ba ra tuun kàa na, kateekpoloyi a wɔ́ɔ ba ra tuun, tári si wɔ́ɔ cúngo tɛɛyaa ni. 8Kérigèle naa myɛ ke a pye wɔʔɔli sélimɛ.
9 #
Mat 10:22
Lǎli bee ni pe a ra yele kaangi paa wɔʔɔ, sáā yele kúu, yele kéeli si syɛɛnfeleyi myɛ bɛɛn mii mɛ́ɛgi kéele na. 10Lǎli bee ni pèle saʔa a lúru kàdoʔo ma, sáā peyɛɛ nii pe nigoobèle kɔ́yɔ ni, si wɔ́ɔ peyɛɛ bara. 11Jànvaafɔɔlɔ saʔa a yìri, pe si a ba pèle saʔa fáana pùuni. 12Kakolobyeri a ba nɛʔɛ bi sɔ̀lɔ, fwɔɔ koro a gi kaan syɛ̀ɛnnɛ saʔa tamaga í ba cɛ́rɛ. 13#Mat 10:22 Kàjáa syɔ́ɔnwee wi ga fɔ̀rɔgi kpàraco lè n baa nan gi kwɔ́ɔmi na, wi a syɔɔ. 14Syɛɛnjóocǎnri naa di nyɛ lè fǎngi wóro, ti a kɔ́ ba joo dulunyanw tɛ́ɛyɛ myɛ ni bi pye syɛɛnfeleyi myɛ ma séera, gi kwɔ́ɔmi si náa ba nan.
Gàlagíw kapeekpɔʔɔ
(Mar 13:14-23; Luk 21:20-24)
15 #
Dan 9:27; 11:31; 12:11 «Lǎli ni yele ga kɔ́ɔ̀ ‹kálagili kapeekpɔʔɔ› nyaa lè, gee syɛ́ɛnrɛ kanyaajoow Danyɛli da joo lè, a gi yére tɛɛcǎngi ni, (wee wi tɛ́ɛgi naa syɛ́ɛnrɛ wéle ni nyuu lè, ki n yɛlɛ wi di kɔ́rɔw cán) 16lǎli bee ni bele be nyɛ lè Zyude tári ni, ki n yɛlɛ be fàn be kári nyanbeleyi ma. 17#Luk 17:31 Wee wi ga pye lè binge ǹjoʔo ni, ki ga yɛlɛ wi tìgi wi jée gi ni bi jo woro a wi yáriri láa í. 18Wee wi ga wɔ́ɔ̀ pye lè seʔe ni, ki ga yɛlɛ wi lúru kári kàʔa ma sa wi búrogi láa í. 19Ki si a tɔ̀nɔ́ gbàn fícarigèle fɔ̀ɔlɔ ma cányi bee ni, n fàra bele na pe a ra pìibēle kaangi paa ŋɔri lè! 20Ki n yɛlɛ yaa nyɛ́ɛri jàngó yele kàfyaali a kɔ́ pye weere làla ni í, wàlá cândɛnɛgɛ canʔa ni í. 21#Dan 12:1; Tɛ̀ɛn 7:14 Níì cán wɔʔɔgbɔʔɔ a ba pye lǎli bee ni, gee félege gi lè ki ga kɔ́ɔ̀ kpéʔele í nlaa yaà dulunyanw sélimɛ na n baa nan níjanʔa na, ki félegi si a ní wɔ́ɔ kpéʔele gee bee kàdoʔo ma í. 22Kapye Kolocɔlɔɔ da gi kɔ̀rirɔ bi kàa yirige cányi bee ni í, syɔɔn faala mǎà dée syɔɔ í, kàjáa wi a kàa yirige yi ni wi syɛɛnnyɛnɛ-wòlobèle kéele na.
23Lǎli bee ni syɔɔnwaa ga yele pye: ‹Kirisi i naa wee,› koro ga jáa: ‹Wi i yaà wee,› ki ga yɛlɛ ye tága gi na í. 24Níì cán kirisi-fáanabéle, ní kanyaajoo-fáanabéle a ba yìri, sáā fɛ̀ɛbēle ní kakpoloyo kpéʔele, jàngó pe fanʔa ga taa poro í Kolocɔlɔɔ syɛɛnnyɛnɛ-wòlobèle fáana pùuni. 25Wéle, a mii gi joo n tɛ̀ɛn yele na wii sáni ki ba kpéʔele lè.
26 #
Luk 17:23-24
Koro na pe ga yele pye: ‹Ye wéle, wi i yaà fìími tára ni,› ki ga yɛlɛ yele í kári yaà í. Koro ga jáa pe ga jo: ‹Ye wéle, wi i yaà kpáagi fúngo ni,› ki ga yɛlɛ ye tága gi na í. 27Níì cán àmɛɛ nyɛ̀ʔɛni gáà nyɛ́ʔɛnɛ lè, li gbɛ̀ɛ́nmi n si yìri canʔafolomɔ ma, bi nan canʔajeemɛ na kánmee na lè, ànbée Syɔɔn-pya lúrubanni a wɔ́ɔ ba pye. 28#Luk 17:37 Yakuugo ga pye tɛ́ɛgee ni lè, nɛɛ bee kàcɔʔɔri a tiyɛɛ gbóʔoro.
Syɔɔn-pya lúrubanni kéele
(Mar 13:24-27; Luk 21:25-28)
29 #
Eza 13:10; 34:4; Ezek 32:7; Zyow 2:10; 3:4; 4:15; Tɛ̀ɛn 6:12-13 «Wɔʔɔli bee canya kàdoʔo ma, cángi a kàri yébilimɛ terire, yégi a ní fílige í, ŋɔripiigèle sáā yìrigí nyɛ̀ʔɛni na bi ba ra tuun tári na, nyɛ̀ʔɛni fàngboloyo a cúngo. 30#Dan 7:13; Zak 12:10-14; Tɛ̀ɛn 1:7 Lǎli bee ni pe a Syɔɔn-pya fɛɛw nyaa nyɛ̀ʔɛni na, tári syɛ̀ɛnnɛ myɛ sáā nyaan bàā peele, si wɔ́ɔ Syɔɔn-pya nyaa waa maa fàfaanyi ni ní séew, ní nìjangbɔɔri ní. 31Lǎli bee ni wi a wi tundunbèle tun ní búruw wìimɛ yákpogbɔɔlɔ ní, pe a sa wi syɛɛnnyɛnɛ-wòlobèle kpóʔoro bi yìri dulunyanw kàbanya myɛ sicɛrɛ na, beè nyɛ̀ʔɛni ní tári tiyɛɛ vàra lè.
Tamana děsyaantiigi kéele na
32«Ye wɔ́ɔ ye děsyaantiigi kéele wéle. Ki ga kɔlɔ, á káganyi ba ni wâburo yirigi lǎli ni lè, yele n gi cán wɔ̀ɔ́gi n nùuni. 33Anbée si gi wɔ́ɔ̄ nyɛ, yele ga kɔ́ɔ̀ kérigèle naa myɛ nyaa, ki n yɛlɛ ye gi cán Syɔɔn-pya n nùuni naa, fwɔɔ n baa nan kpàánweeli na. 34Mii a gi joo yele ma kányɛʔɛ ni, lǎli naa syɛ̀ɛnnɛ a kwɔ́ɔ í bi taa kérigèle bee myɛ í ba kpéʔele. 35Nyɛ̀ʔɛni ní tári a kwɔ́ɔ, kàjáa mii syɛ́ɛnri a tɔ̀nɔ́ kwɔ́ɔ í.
Kolocɔlɔɔ nibin wi làrigwɔɔli cán
(Mar 13:32-37; Luk 17:26-30,34-36)
36«Syɔɔn faala ga cángi bee ní lǎli bee cán í, àlí nyɛ̀ʔɛni tundunbéle yoo, Jaafɔw yoo, kapye Tofɔw nibin ban í. 37#Sél 6:5-8 Amɛɛ ki da pye lè Nowe lǎli ni, ànbée ki a wɔ́ɔ ba pye Syɔɔn-pya laribanni ni. 38Níì cán sáni lòkpɔɔgi í tári tɔ́n lè, syɛ́ɛnbèle maa kòro ni líi ní i gbo, ní i cèpɔriyi kpéʔele, ní wɔ́ɔ i be pìíbèle kaangi nǎnbèle ma, pe maa ni gee bee myɛ kpéʔele n taa n baa nan Nowe cânjeegi na kɔ́rɔkpɔɔgi ni. 39#Sél 7:6-24 A be kòro gi sìnjánmi ni n taa a lòkpɔɔgi baa pe myɛ wáa. Anbée si Syɔɔn-pya lúrubanni a wɔ́ɔ ba pye. 40Nànbēle siin a pye seʔe ni, pe a wàa nibin láa si wàa yaʔa, 41càbala siin a pye da tire tírekpɔʔɔ na, pe a wàa nibin láa si wàa yaʔa. 42Koro na gi yɛlɛ yaa kɔ̀rɔsíi, níì cán cángee na yele Kàfɔw a pan lè, yele ga gi cán í. 43#Luk 12:39-40 Ye gi cán kpáagi fɔ́lɔ ga maa kàyuuw làribanna cán yébiligi ni, wi mǎà dée kòro nyɛ̀nɛ na, wi a dée fɔ̀lɔ kàyuuw í woro kpáagi fùru í. 44Koro na gi yɛlɛ ye wɔ́ɔ yeyɛɛ zámaga ye yaʔa, níì cán Syɔɔn-pya a pan làlaa ni, lee ni lè yele o wi sɔ̀ngí í.
Falipyejǎnw ní falipyepeew kéele
(Luk 12:41-48)
45«Wìí wi nyɛ falipyejǎnw níì cìlige, wee wi Kàfɔw a télege wi narigbaagi syɛ̀ɛnnɛ yɛ́ʔɛ na lè, jàngó waa be lìíli kaangi be ma li làrigaanni ni? 46Falipyew bee kàfɔlɔ ga pan ní baa wi nyaa wi i gi kpéʔele kánmi bee na, wee bee i nyɛ dùba pyà. 47Mii a gi joo yele ma kányɛʔɛ ni, wi a ba wi télege wi pye woro kɔ́lɔ yáriri myɛ kàrigafɔlɔ. 48Kàjáa wi ga pye falipyepeeo, ní i gi sɔ̀ngí wiyɛɛ fúngi ni n jo: ‹Mii kàfɔw a wári pan í,› 49níì fala ni wi falipyenyɛnbèle kpúmɔn ní i pìnɛ́ ni líi ní i gbo ní singbaadinbèle ní. 50Falipyew bee kàfɔlɔ a pan cangaa, cángee gi nyɛ lè wi o gi sɔ̀ngí í, ní lǎlee li nyɛ lè wi ga li cán í. 51Wi si a ba wi wɔʔɔ gbanʔama si wi yaʔa wi wi lɛɛli taa ní syɛɛnjóotɛɛyi siin joofɔɔlɔ ní pe tɛɛkòrogi ni, beè syɛ́ɛnbèle a ra sùpiigèle wáa sáā gǎngèle kúru lè.
Tällä hetkellä valittuna:
Matye 24: CB10
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Kolocɔlɔɔ Syɛ́ɛnri © Bible Society of Côte d'Ivoire, 2008.
Matye 24
24
Zyezu n kpɔ̀ʔɔrɔli kpaʔa cáanna kéele joo
(Mar 13:1-2; Luk 21:5-6)
1A Zyezu ga yiri kpɔ̀ʔɔrɔli kpaʔa ni ni syée, a wi pìitamabèle nùuni wi na n baa kpɔ̀ʔɔrɔli kpaʔa kàcoolo tɛ̀ɛn wi na kánmee na pe li faan n sɛ́ɛ lè. 2A wi be pye: «Yele ga yáriri naa myɛ nyaa í? Mii a gi joo yele ma kányɛʔɛ ni, kàdɛnɛgaa faala a kòro kàa na nɛɛ naa í, pe a ba yi myɛ cáan.»
Kagbanyi ní wɔʔɔyi kéele
(Mar 13:3-13; Luk 21:7-19)
3A wi ga sáà tɛ́ɛn Olivye tíiri nyanbelege na, a wi pìitamabèle nùuni wi na, pe yagwɔɔlɔ, n baa jo: «Mi gi joo wolo ma, làlìí ni kérigèle bee a ba pye? Nyàʔá fɛ̀ɛfeleo wi a mɔ lúrubanni ní lǎli naa kwɔ́ɔmɔ tɛ̀ɛn wolo na?»
4A Zyezu be pye: «Yaa yeyɛɛ kɔ̀rɔsíi, yele a kɔ́ syɔɔn faala yaʔa wi yele fáana pùuni í. 5Níì cán syɛ̀ɛnnɛ saʔa a pan bi ba ra mii mɛ́ɛgi nii peyɛɛ na si jo poro be nyɛ Kirisi, si pèle saʔa fáana pùuni. 6Yele si a kɔ́ gi lóʔo kapɛɛngèle n too tátɛɛyaa ni, si wɔ́ɔ kapɛɛngèle tìnmɛ lóʔo. Ki si ga yɛlɛ yele í da fɛ̀ɛgí í, níì cán kérigèle naa myɛ n yɛlɛ ge kpéʔele gbɛnʔɛnɛ. Kàjáa gee bee ban ki a pye gi kwɔ́ɔmi í. 7Syɛɛnfelegaa a ba ra tuun kàa na, fàngaa si wɔ́ɔ ba ra tuun kàa na, kateekpoloyi a wɔ́ɔ ba ra tuun, tári si wɔ́ɔ cúngo tɛɛyaa ni. 8Kérigèle naa myɛ ke a pye wɔʔɔli sélimɛ.
9 #
Mat 10:22
Lǎli bee ni pe a ra yele kaangi paa wɔʔɔ, sáā yele kúu, yele kéeli si syɛɛnfeleyi myɛ bɛɛn mii mɛ́ɛgi kéele na. 10Lǎli bee ni pèle saʔa a lúru kàdoʔo ma, sáā peyɛɛ nii pe nigoobèle kɔ́yɔ ni, si wɔ́ɔ peyɛɛ bara. 11Jànvaafɔɔlɔ saʔa a yìri, pe si a ba pèle saʔa fáana pùuni. 12Kakolobyeri a ba nɛʔɛ bi sɔ̀lɔ, fwɔɔ koro a gi kaan syɛ̀ɛnnɛ saʔa tamaga í ba cɛ́rɛ. 13#Mat 10:22 Kàjáa syɔ́ɔnwee wi ga fɔ̀rɔgi kpàraco lè n baa nan gi kwɔ́ɔmi na, wi a syɔɔ. 14Syɛɛnjóocǎnri naa di nyɛ lè fǎngi wóro, ti a kɔ́ ba joo dulunyanw tɛ́ɛyɛ myɛ ni bi pye syɛɛnfeleyi myɛ ma séera, gi kwɔ́ɔmi si náa ba nan.
Gàlagíw kapeekpɔʔɔ
(Mar 13:14-23; Luk 21:20-24)
15 #
Dan 9:27; 11:31; 12:11 «Lǎli ni yele ga kɔ́ɔ̀ ‹kálagili kapeekpɔʔɔ› nyaa lè, gee syɛ́ɛnrɛ kanyaajoow Danyɛli da joo lè, a gi yére tɛɛcǎngi ni, (wee wi tɛ́ɛgi naa syɛ́ɛnrɛ wéle ni nyuu lè, ki n yɛlɛ wi di kɔ́rɔw cán) 16lǎli bee ni bele be nyɛ lè Zyude tári ni, ki n yɛlɛ be fàn be kári nyanbeleyi ma. 17#Luk 17:31 Wee wi ga pye lè binge ǹjoʔo ni, ki ga yɛlɛ wi tìgi wi jée gi ni bi jo woro a wi yáriri láa í. 18Wee wi ga wɔ́ɔ̀ pye lè seʔe ni, ki ga yɛlɛ wi lúru kári kàʔa ma sa wi búrogi láa í. 19Ki si a tɔ̀nɔ́ gbàn fícarigèle fɔ̀ɔlɔ ma cányi bee ni, n fàra bele na pe a ra pìibēle kaangi paa ŋɔri lè! 20Ki n yɛlɛ yaa nyɛ́ɛri jàngó yele kàfyaali a kɔ́ pye weere làla ni í, wàlá cândɛnɛgɛ canʔa ni í. 21#Dan 12:1; Tɛ̀ɛn 7:14 Níì cán wɔʔɔgbɔʔɔ a ba pye lǎli bee ni, gee félege gi lè ki ga kɔ́ɔ̀ kpéʔele í nlaa yaà dulunyanw sélimɛ na n baa nan níjanʔa na, ki félegi si a ní wɔ́ɔ kpéʔele gee bee kàdoʔo ma í. 22Kapye Kolocɔlɔɔ da gi kɔ̀rirɔ bi kàa yirige cányi bee ni í, syɔɔn faala mǎà dée syɔɔ í, kàjáa wi a kàa yirige yi ni wi syɛɛnnyɛnɛ-wòlobèle kéele na.
23Lǎli bee ni syɔɔnwaa ga yele pye: ‹Kirisi i naa wee,› koro ga jáa: ‹Wi i yaà wee,› ki ga yɛlɛ ye tága gi na í. 24Níì cán kirisi-fáanabéle, ní kanyaajoo-fáanabéle a ba yìri, sáā fɛ̀ɛbēle ní kakpoloyo kpéʔele, jàngó pe fanʔa ga taa poro í Kolocɔlɔɔ syɛɛnnyɛnɛ-wòlobèle fáana pùuni. 25Wéle, a mii gi joo n tɛ̀ɛn yele na wii sáni ki ba kpéʔele lè.
26 #
Luk 17:23-24
Koro na pe ga yele pye: ‹Ye wéle, wi i yaà fìími tára ni,› ki ga yɛlɛ yele í kári yaà í. Koro ga jáa pe ga jo: ‹Ye wéle, wi i yaà kpáagi fúngo ni,› ki ga yɛlɛ ye tága gi na í. 27Níì cán àmɛɛ nyɛ̀ʔɛni gáà nyɛ́ʔɛnɛ lè, li gbɛ̀ɛ́nmi n si yìri canʔafolomɔ ma, bi nan canʔajeemɛ na kánmee na lè, ànbée Syɔɔn-pya lúrubanni a wɔ́ɔ ba pye. 28#Luk 17:37 Yakuugo ga pye tɛ́ɛgee ni lè, nɛɛ bee kàcɔʔɔri a tiyɛɛ gbóʔoro.
Syɔɔn-pya lúrubanni kéele
(Mar 13:24-27; Luk 21:25-28)
29 #
Eza 13:10; 34:4; Ezek 32:7; Zyow 2:10; 3:4; 4:15; Tɛ̀ɛn 6:12-13 «Wɔʔɔli bee canya kàdoʔo ma, cángi a kàri yébilimɛ terire, yégi a ní fílige í, ŋɔripiigèle sáā yìrigí nyɛ̀ʔɛni na bi ba ra tuun tári na, nyɛ̀ʔɛni fàngboloyo a cúngo. 30#Dan 7:13; Zak 12:10-14; Tɛ̀ɛn 1:7 Lǎli bee ni pe a Syɔɔn-pya fɛɛw nyaa nyɛ̀ʔɛni na, tári syɛ̀ɛnnɛ myɛ sáā nyaan bàā peele, si wɔ́ɔ Syɔɔn-pya nyaa waa maa fàfaanyi ni ní séew, ní nìjangbɔɔri ní. 31Lǎli bee ni wi a wi tundunbèle tun ní búruw wìimɛ yákpogbɔɔlɔ ní, pe a sa wi syɛɛnnyɛnɛ-wòlobèle kpóʔoro bi yìri dulunyanw kàbanya myɛ sicɛrɛ na, beè nyɛ̀ʔɛni ní tári tiyɛɛ vàra lè.
Tamana děsyaantiigi kéele na
32«Ye wɔ́ɔ ye děsyaantiigi kéele wéle. Ki ga kɔlɔ, á káganyi ba ni wâburo yirigi lǎli ni lè, yele n gi cán wɔ̀ɔ́gi n nùuni. 33Anbée si gi wɔ́ɔ̄ nyɛ, yele ga kɔ́ɔ̀ kérigèle naa myɛ nyaa, ki n yɛlɛ ye gi cán Syɔɔn-pya n nùuni naa, fwɔɔ n baa nan kpàánweeli na. 34Mii a gi joo yele ma kányɛʔɛ ni, lǎli naa syɛ̀ɛnnɛ a kwɔ́ɔ í bi taa kérigèle bee myɛ í ba kpéʔele. 35Nyɛ̀ʔɛni ní tári a kwɔ́ɔ, kàjáa mii syɛ́ɛnri a tɔ̀nɔ́ kwɔ́ɔ í.
Kolocɔlɔɔ nibin wi làrigwɔɔli cán
(Mar 13:32-37; Luk 17:26-30,34-36)
36«Syɔɔn faala ga cángi bee ní lǎli bee cán í, àlí nyɛ̀ʔɛni tundunbéle yoo, Jaafɔw yoo, kapye Tofɔw nibin ban í. 37#Sél 6:5-8 Amɛɛ ki da pye lè Nowe lǎli ni, ànbée ki a wɔ́ɔ ba pye Syɔɔn-pya laribanni ni. 38Níì cán sáni lòkpɔɔgi í tári tɔ́n lè, syɛ́ɛnbèle maa kòro ni líi ní i gbo, ní i cèpɔriyi kpéʔele, ní wɔ́ɔ i be pìíbèle kaangi nǎnbèle ma, pe maa ni gee bee myɛ kpéʔele n taa n baa nan Nowe cânjeegi na kɔ́rɔkpɔɔgi ni. 39#Sél 7:6-24 A be kòro gi sìnjánmi ni n taa a lòkpɔɔgi baa pe myɛ wáa. Anbée si Syɔɔn-pya lúrubanni a wɔ́ɔ ba pye. 40Nànbēle siin a pye seʔe ni, pe a wàa nibin láa si wàa yaʔa, 41càbala siin a pye da tire tírekpɔʔɔ na, pe a wàa nibin láa si wàa yaʔa. 42Koro na gi yɛlɛ yaa kɔ̀rɔsíi, níì cán cángee na yele Kàfɔw a pan lè, yele ga gi cán í. 43#Luk 12:39-40 Ye gi cán kpáagi fɔ́lɔ ga maa kàyuuw làribanna cán yébiligi ni, wi mǎà dée kòro nyɛ̀nɛ na, wi a dée fɔ̀lɔ kàyuuw í woro kpáagi fùru í. 44Koro na gi yɛlɛ ye wɔ́ɔ yeyɛɛ zámaga ye yaʔa, níì cán Syɔɔn-pya a pan làlaa ni, lee ni lè yele o wi sɔ̀ngí í.
Falipyejǎnw ní falipyepeew kéele
(Luk 12:41-48)
45«Wìí wi nyɛ falipyejǎnw níì cìlige, wee wi Kàfɔw a télege wi narigbaagi syɛ̀ɛnnɛ yɛ́ʔɛ na lè, jàngó waa be lìíli kaangi be ma li làrigaanni ni? 46Falipyew bee kàfɔlɔ ga pan ní baa wi nyaa wi i gi kpéʔele kánmi bee na, wee bee i nyɛ dùba pyà. 47Mii a gi joo yele ma kányɛʔɛ ni, wi a ba wi télege wi pye woro kɔ́lɔ yáriri myɛ kàrigafɔlɔ. 48Kàjáa wi ga pye falipyepeeo, ní i gi sɔ̀ngí wiyɛɛ fúngi ni n jo: ‹Mii kàfɔw a wári pan í,› 49níì fala ni wi falipyenyɛnbèle kpúmɔn ní i pìnɛ́ ni líi ní i gbo ní singbaadinbèle ní. 50Falipyew bee kàfɔlɔ a pan cangaa, cángee gi nyɛ lè wi o gi sɔ̀ngí í, ní lǎlee li nyɛ lè wi ga li cán í. 51Wi si a ba wi wɔʔɔ gbanʔama si wi yaʔa wi wi lɛɛli taa ní syɛɛnjóotɛɛyi siin joofɔɔlɔ ní pe tɛɛkòrogi ni, beè syɛ́ɛnbèle a ra sùpiigèle wáa sáā gǎngèle kúru lè.
Tällä hetkellä valittuna:
:
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Kolocɔlɔɔ Syɛ́ɛnri © Bible Society of Côte d'Ivoire, 2008.