Luka 1
MATUMBI
1
1Mundumuko Topili, bandu baingi bakasine andika bu'kana na makowe galu' gagaapangike mminyo gitu. 2Bagaandike kati mwatubakiyi'lwe na balu' babagabweni makowe go kagapaangika bu'ka patumbu, na babayaulyage makowe go. 3Nanenga bu'kana no pekeseni makowe goti bu'ka pagaatumbwile, niibweni nikwandiki wa mundumuko kwa kindonda, 4pala na wenga, wiloli wamwene, kakape ya makowe galu' goyi'ganilwe.
Lilagano lyo belekwa kwa Yoani
5Masu'ba ga Helode, nkulungwa wa Yudea, kwai na mpi'ndo wa lini ywakemelwage Zakalia, ywabile mukipi'nga sa upi'ndo wa lini wa Abiya. Nnyumbowe akemelwage Elisabeti, nembe aabile mukipi'nga sa lukolo lwa Haluna. 6Boti nebi'li' baai apeleteu kwa Nnu'ngu', batamage kwo bi'ngi'ya goti galagi Nnu'ngu' wangali laumilwa. 7Lakini, baabile banapapali mwana, mwanjaa Elisabeti aai ntonga na boti abi'li' baai agoi muno.
8Paliikite lisu'ba lyake lyo panga lyengo lya upi'ndo wa lini palua lwa nyumba ya Nnu'ngu', 9Zakalia aasagulilwe na bandu kati mwagaabile mayobelya go yingya mu Nyumba ya Nnu'ngu' pala auye ubani. 10Kipi'nga sa bandu baamesekine palua kabasali, ku'no Zakalia kauya ubani. 11Amo nyumba, ngampitya malaika ywa Nnu'ngu', ywayi'mi kumalyo wa kibi'ki'lyo so ukiya ubani. 12Paamweni, Zakalia aapatike ndele no yogopa. 13Lakini malaika ywa Nnu'ngu' ngammakia, “Wa Zakalia we, kaneuyogope, mwanjaa gonnu'bite Nnu'ngu' akuyu'wine, nyumbogo Elisabeti alu'a kupapya mwana nnalu'me, na lina lyake wantine Yoani. 14Walu'a napusika sana na bandu baingi baapanga si'li'ku'si'li'ku' mwanjaa belekwa kwake. 15Alu'a panga wa mpu'ku'bi'la nnu'ngi' ya Nnu'ngu', alu'a lobyali wi'mbi' wowoti, alu'a twi'li'yi'lwa Loo Mpeleteu bu'ka mundumbo ya mau' bake. 16Alu'a kwagalambwa bandu baingi ba Isilaili, baamuyangani Nnu'ngu' wabe. 17Alu'a kunnongolya Bwana, ku'no kalongoyelwa na makakala ga Loo Mpeleteu kati nnondoli ywa Nnu'ngu' Elia. Alu'a kwaawana akina tati' na bana babe, na kwigalambwa myoyo ya kimbu'ku'su' babe na malango kati mwabapanga bandu ba Nnu'ngu', bu'kapo ammi'ki wiso Bwana bandu bake.” 18Zakalia ngammakia aywo malaika, “Kikowe saku' sakilu'a nipanga nenga niu'bi'li likowe li'? Nenga na nnyumbo wangu' twaboti tugoime.” 19Malaika ngannyangwa, “Nenga na Gabulieli, na malaika ywaniyi'ma nnu'ngi' ya Nnu'ngu', nitumilwe nikubakie abali inannoga. 20Pi'kania, mwanjaa ukana u'bi'lya makowe ganikubakia ulu'a galambuka panga wa bubu, walongelali mpaka gano ganikubakie gatimi.”
21Apo bandu baakibweni kyukala kwa mwanjaa Zakalia aasi'li'ye pitya palua lwa Nyumba ya Nnu'ngu'. 22Paapiti palua, akombwili longela nabo, yabonekine mpu'la kwabe, Zakalia agabweni makowe gayambi' mu Nyumba ya Nnu'ngu', mwanjaa ywembe alongelage kwo langyalangya na moko.
23Paliyomwike lyengo lyake lyo yi'mi'li'ka mu Nyumba ya Nnu'ngu', aabuyangani kaya. 24Bu'kapo, nnyumbowe Elisabeti ngayi'ma ndumbo, ngayu'ba kasake kwa myei mitano kaabaya, 25“Ago ngagaanipangi Nnu'ngu', anibi'ki kiya na kunibu'ki'ya oni yo kotoka beleka yanaabile nayo, paminyo ga bandu.”
Lilagano lyo belekwa kwa Yesu
26Pawikite mwei wa sita, malaika Gablieli aatumilwe na Nnu'ngu' ayende kukilambo sakikemelwa Nazaleti, akwo ku Galilaya, 27kwa mwi'nja yumo ywangalikuntanga nnalu'me ywakemelwage Malia, aakobekilwe na Yosefu bu'ka mulukolo lwa Daudi. 28Malaika ngannyendelya na kummakia, “Uyumukage wenga wopendilwe na Nnu'ngu', Nnu'ngu' abi pamope na wenga.”
29Malia paayu'wine makowe go, ngaumpata ntenyo, no tumbwa wasa, makowe ga galombolya namani? 30Malaika ngammakia, “Malia, kaneuyogope, nnyino Nnu'ngu' akupendile. 31Ulwayi'ma ndumbo, walu'a papa mwana nnalu'me, na lina lyake wantine Yesu. 32Ywembe alu'a panga mpi'ndo na aakemelwa mwana wa Nnu'ngu' nku'lu'. Nnu'ngu' alu'a kumpeya kiti'gu' sa lenji bu'ka mulukolo lwa nkulungwa Daudi. 33Kwa nyo, alu'a tawala lukolo lwa Yakobi milele na ukulungwa wake wayomokali.”
34Malia ngannyangwa, “Ago kagapitya kwaku', nanenga nantangali nnalu'me?” 35Malaika ngannyangwa, “Alu'a kuulukya Loo Mpeleteu, na uweso wa Nnu'ngu' Nku'lu' walu'a kwisilya kati kiwili. Kwa nyo, mwana ywabelekwa alu'a kemelwa Mpeleteu mwana wa Nnu'ngu'. 36Kai' utange, ata Elisabeti nnongogo, ywabammayage ntonga, ai na ndumbo ya myei sita ya mwana nnalu'me, na ywembe nng'oi. 37Kwa nyo, makowe goti apanga Nnu'ngu'.” 38Malia aabaite, “Nenga namundu wa Nnu'ngu', nipangilwe kati mwobaike.” Wayomwi yangwa nyo, yu'lu' malaika ngaabu'ka.
Malia antyangilya Elisabeti
39Aatamili masu'ba gambone, Malia aayabwi mwanja wa kiyu'ngu'ya mpaka kuunni'ma waubile mwitu'mbi' ya ku Yudea. 40Akwoo, ayi'i kumpanga abali Elisabeti munyumba ya Zakalia. 41Elisabeti payu'wine lilobe lya Malia, mwana nnele mundumbo yake ngau'mbau'mba, nembe Elisabeti ngatwi'li'yi'lwa Loo Mpeleteu. 42Ngaalongela kwa lilobe liku'lu', “Uteyaliwa pi'ta alwawa boti, na ywolu'a kumpapa kwa ndumbo yobilenayo, ayaliwite. 43Mwanjaa namani makowe maku'lu' kati ga kumbitya ne, ata mau' bake Bwana wangu' banisili? 44Paniyu'wine lilobe lyako bai, kaunipanga abali, kaana kakabile nndumbo yangu' kati u'mbau'mba kwo pulaika muno. 45Male wenga wauu'bi'li panga galu' gaakubakie Nnu'ngu' galu'a piitya.”
Mwambo wa Malia kannumba Nnu'ngu'
46Malia ngabaya,
“Mwoyo wangu' unnumba Nnu'ngu',
47Na loo yangu' impulaikya Nnu'ngu', ywanikombwile.
48Kwa mwanjaa aninguli kwa liyo lya kiya, ntumisi wake ywa nnyu'wa.
Kwa nyo, bu'ka nambi'yambi' bandu boti, balu'a nikema na ywayaliwite.
49Kwa mwanjaa, Nnu'ngu' Mwene makakala, anipangi maku'lu',
lina lyake lipeleteu.
50Kwabi'kya kiya balu' bandu babamwisimu,
lama bu'ka libeleko mpaka libeleko.
51Apangite makowe maku'lu' kwa luboko lwake,
Aasengemwaniye bene mpyata mumyoyo yabe.
52Aulwiye bene makakala bu'ka muiti'gu' yabe ya lenji,
na kwa katuya aki'ba.
53Aayukutiye ganannoga bene njala,
na kwabu'ya moko gabule bene mali.
54Annyangatiye ntumisi wake Isilaili,
aku'mbu'ki kiya sake.
55Kati mwaalagi api'ndo bitu,
Bulaimu na lubelekwo lwake mpaka mwiso wa byu'mi.”
56Malia aatami na Elisabeti kwa myei itatu, no buyangania kasake. 57Paikomile ndumbo yake, Elisabeti ngapapa mwana nnalu'me.
Belekwa kwa Yoani Ywabatisage
58Aloongobe na bandu, pabayu'wine makowe go panga Nnu'ngu' ami'kikiya muno, baapulaike pamope nakwe. 59Paliikite lisu'ba lya nane, baateisa pala kumwina mwana liku'mbi' na kuntina lina lya tati' bake Zakalia. 60Mau'bake ngo kaana, ngababaya, “Nyonyo lili, mbala akemelwe Yoani.”
61Ngabammakia, “Mboni ntu'pu' mundu ywakemelwa lina lyo mulukolo lwinu?.” 62Bai, ngabannaluya Zakalia kwo langyalangya bapate tanga panga apala mwana wake akemelwe nyai. 63Nembe aalu'bite kibao so andikya, aandike nnyanya, “Yoani nga lina lyake.” Boti baatisangala. 64Popopo, nkano na lulimi lwa Zakalia ngaiyu'gu'li'lwa, ngalongela na kunnumba Nnu'ngu'. 65Alongobe baayingililwe na bwoga pabagabweni makowe go, gaayu'wanike kila pandu muitu'mbi' ya Yudea. 66Boti babaagayu'wine makowe go, baatiganiya mumyoyo yabe ku'no kababaya, “Mwana yu' alu'a panga mundu gani?” Maana, makakala ga Bwana gabile pamope nakwe.
Mwambo wa Zakalia
67Zakalia tati' bake mwana, ngabatwi'li'yi'lwa na Loo Mpeleteu, ngabapiyite kilondwo si'i',
68“Akwi'yi'lwe Bwana Nnu'ngu' wa Isilaili!
Mwanjaa atekwaisilya na kwakombwa bandu bake.
69Atupei nkomboli ywa kutukombwa,
mmelekwa kwa lukolo lwa Daudi, ntumisi ywa Nnu'ngu'.
70Mu'mu'lu'mu'lu' mwalongei bu'ka kwai'mbu',
kwa ndi'la ya alondoli bake apeleteu,
71panga alu'a kutukombwa mmoko ga andumu bitu,
no bu'ka mumaboko ga boti babatusukwa.
72Aabaite alu'a kwabi'kya kiya api'ndo bitu,
no ku'mbu'kya lilagano lyake lipeleteu.
73Aalapi babu bitu Bulaimu,
panga aalu'a tuyalya twenga.
74Panga aatuyalya' atukosopoli, bu'ka mmoko ga andumu bitu,
tupate tumika wangali yogopa.
75Kanetulemale myoyo na tubonekane twaatimya nnu'ngi' yake,
masu'ba goti ga bwu'mi witu.
76Na wenga wa mwana wangu' walu'a kemelwa wannondoli wa Nnu'ngu' nku'lu',
waalu'a kunnongolya Bwana, kumpetulya ndi'la yake,
77Wabakie bandu bake panga, aalu'a kwakosopolya,
kwo bu'yi'lwa masambi gabe.
78Kwa kiya kiku'lu' sa Nnu'ngu' witu,
Atuumukulya bweya bu'ka kunani.
79Na kwamulikya boti babatama mulubi'ndu' na kiwili sa kiwo,
alongoye nganjo yitu mundi'la ya amani.”
80Mwana aatiku'la, no pata makakala ga mumwoyo. Aatami mulubele mpaka paisi boneka paminyo ga bandu ba Isilaili.