Tuk 2
2
1Kä cua nhial kɛnɛ piny kɛ buɔ̱m buɔ̱ɔ̱mkiɛn diaal cu thuk inɔ. 2Kä cu Kuoth la̱tdɛ in lätdɛ cu thuk kɛ bäkɛl ni̱ni, kä cuɛ cu lɔ̱ɔ̱ŋ kɛ bärɔw ni̱ni kä lät diaal tëë cɛ la̱t. 3Inɔ cu Kuoth bärɔw ni̱ni poth kä cuɛ lɛy, kɛ ɣöö ɛn cäŋ ɛmɔ cu Kuoth lɔ̱ɔ̱ŋ kä lät diaal tëë cɛ la̱t.
4Mɛmɛ ɛ jɛn tuk nhial kɛnɛ piny mëë kua kɛ cak.
Wut kɛnɛ ciek rɛy kakä E-dɛn
Mëë cak Kuoth Nhial ni Kuoth, nhial kɛnɛ piny, 5kɛ jɛn gua̱a̱th ɛmɔ thilɛ wi̱c muɔ̱ɔ̱n wal kiɛ juaac ti ci ni do̱ny thi̱n, kɛ ɣöö ŋotdɛ /ka̱n nhiaal ni jak kä dɛm wi̱i̱ muɔ̱ɔ̱n, ɛ Kuoth Nhial ni Kuoth kä thilɛ ɣɔw ram mi dëë piny pur. 6Kä nɛ̈nɛ jɛ, cu nyɔc päl piny kä cuɛ piny but kä cu wi̱c muɔ̱ɔ̱n lua̱a̱ny ni kɛɛliwdɛ. 7Ɛn wa̱nɔ cu Kuoth Nhial ni Kuoth raan cu täth kɛ tur piɛny, kä cuɛ wum ran ŋök yiëë te̱e̱kä kä cu raan cua̱ ram mi tëk. 8Kä cu Kuoth Nhial ni Kuoth kak wal pith kä E-dɛn lotdä mɔ wee kä käny ca̱ŋ ɔ. Kä cuɛ ram indaan in cɛ täth ka̱n kä cuɛ jɛ la̱th rɛydɛ. 9Kä cu Kuoth Nhial ni Kuoth jiɛn diaal tin gɔaa nëndiɛn kɛnɛ tin gɔaa mi̱ethdiɛn jak kä pith rɛy kakä. Kä cuɛ jiath te̱e̱kä kɛnɛ jiath mi moc naath ŋäc gɔyni kɛnɛ jiäk jak kä pith ni däär kakä bä.
10Kä cuɛ tekɛ kir mi lo̱ny kä E-dɛn wacɛ kak, kä cɛ rɔ dääk ni kiɛr da̱ŋ ŋuaan nhiam E-dɛn. 11Kä cuɛ ciöt kiɛɛr in nhiam cɔl i̱ Pii-con, rɛɛtdɛ ni rɛy cieŋ mi cɔal i̱ Ä-wi-la, mun dääpä. 12Kä ɛn da̱a̱p rööl ɛ mɔ ɛ da̱a̱p mi lɛy lɛy. Kä tëë kɛ luac mi te ŋuäny mi gɔaa kɛ guiy ti ca̱a̱r ti biɛl biɛɛl. 13Kä ciöt kiɛɛr in rɛwdɛ ɛ Gii-ɣɔn. Ɛ jɛn kir in rɛɛt ni ro̱l mi cɔal i̱ Kuc. 14Kä ciöt kiɛɛr in diɔ̱ɔ̱kdiɛn ɛ Ti-gɛ-rith min lo̱ny pikɛ kui̱ känyä ca̱ŋ rööl A-thi-ri-ya. Kä ciöt kiɛɛr in jɔakdiɛn ɛ Yu-pɛ-ree-tidh.
15Kä cu Kuoth Nhial ni Kuoth raan ka̱n kä cuɛ jɛ la̱th rɛy kakä E-dɛn kɛ ɣöö bɛ jɛ pur kä bɛ jɛ yop. 16Kä cu Kuoth Nhial ni Kuoth jɛ luek ɛ bum ɛlɔ̱ŋ wee i̱, “Mi̱thni rɛy jiɛn kakä diaal ce̱tkɛ min go̱o̱ri, 17kä tit ɛ, /cu mi̱th jiaath in jak raan kä ŋäc mi gɔaa kɛnɛ mi jiäk, kɛ ɣöö mi wi̱i̱ jɛ wä cam, kɛ jɛn cäŋ ɛmɔ bi dhil li̱w.”
18Kä cu Kuoth Nhial ni Kuoth jɛ guic ɛn ɣöö /ci wut ɛmɛ dëë te kärɔaadɛ. Cuɛ wee i̱, “Bä jɛ cu ta̱th luääk mi rɛwdɛ mi lot rɔ kɛ ciaaŋdɛ.” 19Kä kɛ mun piɛny cu Kuoth Nhial ni Kuoth le̱y diaal kɛnɛ diit diaal täth, kä cuɛ kɛ nöŋ wut kɛ ɣöö bɛ ciööt tin ba ben cɔɔl ni kɛ ɛ wut ben liŋ. Ciööt tëë cu wut kɛ cɔɔl nikɛ, cuɛ cua̱ kɛn ciöötkiɛn amäni walɛ. 20Wut cuɛ ɣɔ̱k diaal kɛnɛ diit diaal kɛ le̱y dɔaar diaal ca̱k ciööt ɛ kur wi̱c. Kä ŋotdɛ thilɛ luääk mi mɔ rɛw wutdä mi cua jek mi dëë rɔ lot kɛ ciaaŋdɛ. 21Kä ɛ jɛn, cu Kuoth Nhial ni Kuoth wut kuër ni̱en mi di̱i̱t. Kä mëë tëë ni̱n, cuɛ nyi̱etdɛ kɛl guath puɔ̱ɔ̱nydɛ kä cuɛ gua̱a̱thdɛ diɛl thi̱n kɛ ri̱ŋ. 22Kä cuɛ nyi̱et ɛmɔ tääth ni ciek, kä cuɛ jɛ nöŋ wut. 23Kä cu wut cu wee i̱,
“Kitdɛ, ci mɛmɛ kua̱ ni
cɔa̱a̱ cɔ̱ɔ̱nikä,
kä ɛ ri̱ŋ ri̱eŋdä.
Ba jɛ cɔl i̱ Ciek,
kɛ ɣöö ka̱m kɛ jɛ raar
puɔ̱ɔ̱ny Wutdä.”
24Kɛ kui̱c ɛmɔ, bi wut gua̱n kɛnɛ man ba̱ny piny kä ba jɛ mat kɛnɛ ciekdɛ, kä bi kɛn da̱ŋ rɛw cua̱ puɔ̱ny kɛl. 25Kä kɛn da̱ŋ rɛw tekɛ juutdä, kä thilɛ kɛ pöc.
Tällä hetkellä valittuna:
Tuk 2: nusNHB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Nuer Bible © Bible Society in South Sudan 1998,2012.