Mpiin 33
33
Jakob ni Esɔ aah ton tɔb nsan ni pu na aabɔr
1Tɔ, Jakob kan ke Esɔ ni waajab ikui inaa ngbaan choo; nima pu le u chuu yakr waabim ki tii Lea, ni Rachel, ni binaagbiipiib bilee na. 2U nan di binaagbiipiib ngbaan ni baabim le di loln nsan, le Lea ni waabim mu paa, le Rachel ni Josef gbeln kookoo, 3le Jakob loln bi pu nsan. Waah pii ukpel Esɔ chee na, le u gbaan kitiŋ nfum mulole. 4Esɔ ma nan san ni, le ki nan bub chuu u, le ki moor utakpiln,#33.4: …moor utakpiln: Israel yaab nan dooni tɔb kina le ki mɔk ngeehn. le bimɔk bilee nan wii tɔb pu. 5Esɔ aah kan bipiib ni mbim na, le u baa ke, “Binib bee nyan ni la chee?”
Le Jakob bui u ke, “Uwumbɔr aah ŋa tinyoor ŋa m pu ki tii mi bipiib ni mbim bi na le na.” 6Le binaagbiipiib na fuu ni ki nan doon Esɔ, 7le Lea ni waabim mu paan ni ki nan doon u, kookoo yaan le Josef ni una Rachel mu fuu ni ki nan doon u.
8Le Esɔ ki baa ke, “Tiwakor ti m ba puen ton ti na nyan ni la?”
Le Jakob bui ke, “Ipiin i m tii si na le bi na.”
9Le Esɔ bui u ke, “Nna aabo, maah kpa pu na ŋeer a; li joo sin yaan.”
10Le Jakob bui u ke, “Ayii, aa yaa sil di cha pinn mi kan, gaa maapiin ngbaan. Saah gaa mi ki cha m kan aanimbil wɔb na, ni naahn ke maah kan Uwumbɔr aanimbil wɔb le na. 11Pɔɔn aabaa ki gaa ipiin ngbaan. Uwumbɔr ŋa mi tiŋann le ki tii mi tiwan nimɔk m ban na.” Jakob nan gaŋ u le u ti gaa ipiin ngbaan.
12Le Esɔ bui u ke, “Ti li cha, m ni maanib ga loln nsan ki buen la.”
13Le Jakob bui ke, “Dandana wee, mbim ngbaan diŋ pam, kaan ki ŋmaa chuun woween, le tiwakor ni naabim mu diŋ kina. M yaa ban mala mala kan, tiwaatiir na ga kpo la. 14Loln nsan ki li cha, ti ni tiwakor ga li chuun suusuu, taah ga ŋman pu na, ki pii ni si Edom aatiŋ ni.”
15Le Esɔ bui ke, “Kina kan, cha maajab bee ngem bee aan ki cheen ni sin.”
Jakob nan giin bui u ke, “Saah di cha pinn mi pu na, ni ŋeer a, cha saajab ngbaan li cha.” 16Liyaadaal ngbaan le Esɔ nan ki gir buen Edom aatiŋ ni. 17Jakob ma nan buen Sukof aatiŋ ni, ki ti maa lidichal, ki ŋa tiwakor mu aaboo nima. Nima pu le bi yin kitiŋ ngbaan ke Sukof.#33.17: Sukof aatataa le ye ke “ŋiboo.”
18Kina le Jakob nan nyan ni Mesopotamia ki cha le ki ti fuu Sekem aatiŋ, ni laafee; kitiŋ ngbaan nan bi Kanaann aapepel ni la, le u kal nkpaakon mubaa ni, kitiŋ ngbaan chee, 19le ki di tikunabr aamombil nkub daa nkpaakon ngbaan, Hamor u nan ye Sekem aate na, aayaabitiib chee. 20Le Jakob maa libimbiln ki toor kitork ki doon Uwumbɔr nima chee, le ki yin nima ke, El Elohe Israel.#33.20: El Elohe Israel aatataa le ye ke “Uwumbɔr u ye Israel yaab Aawumbɔr na.”
Tällä hetkellä valittuna:
Mpiin 33: xonB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©1998, 2014 Wycliffe Bible Translators, Inc. All rights reserved.