Suosittuja jakeita Raamatun kirjasta ESAYA 40

Jaa

U nyika la karheleke matimba ya yena, u pfuxa la heleke mbilu.

Ti mbhuri ta karhala, ta hela matimba, ni tinhenha ti lava ku wa; kambe lava tshembaka Yehovha va engeta va kuma matimba lamantshwa. Va ta haha tanihi magama, va ta tsutsuma va nga karhali; va ta famba va nga tsani!

A ku swi tivi xana? A ku swi twanga xana? I Xikwembu lexi nga heriki, yena Yehovha la tumbuluxeke makumu ya misava; a nga karhali, a nga heri matimba, a nga kona la kambeke vutlhari bya yena.

Rito ri huwelela ri ku: “Lunghisani emananga ndlela ya Yehovha, khulelani emananga ndlela ya Xikwembu xa hina!

Byanyi bya oma, xiluva xa vuna, kambe rito ra Xikwembu xa hina ri ta tshama hilaha ku nga heriki.

Ku vonakala ka Yehovha ku ta humelela, kutani nyama yin'wana ni yin'wana yi ta ku vona, hikuva nomu wa Yehovha wu vurisile.”

Nkova wun'wana ni wun'wana wu ta seleteriwa, ntshava yin'wana ni yin'wana ni xitsunga xin'wana ni xin'wana swi ta mbundzumuxiwa. Xitsunga xi ta hundzuka rivala, kutani tintshava ti ta hundzuka mikova.

Tanihi murisi, u ta risa ntlhambi wa yena; u ta rhola swinyimpfana hi mavoko u ta swi vukarha erhumbyini ra yena, u ta fambisa khwatsi leti an'wisaka.

Tlakusani mahlo ya n'wina, mi languta! I mani la tumbuluxeke swilo sweswo, la fambiseke hi ku ri xaxameta vandla ra swona xana? U swi vitana hinkwaswo hi mavito ya swona, hi ntamu lowukulu wa yena, ni matimba lamakulu ya yena, ku hava ni xin'we lexi pfumalekaka.

Hi yena la tshameke empfhukeni, ehenhla ka xirhendzevutana xa misava, kutani vaaki va yona va fana ni tinjiya. U andlala matilo tanihi nguvu leyo vevuka, u ma andlala tanihi tende a ma endla vuako bya yena.

Vulavulani swa mbilu ya Yerusalema, mi n'wi tivisa leswaku vukhumbi bya yena byi herile, ni leswaku ku dyoha ka yena ku rivaleriwile, kambe u rihiwile kambirhi hi voko ra Yehovha swidyoho swa yena hinkwaswo!

Rito ri te: “Huwelela!” Kutani ku hlamuriwa, va ku: “Ndzi ta huwelela yini?” Nyama yin'wana ni yin'wana yi fana ni byanyi, ni ku saseka ka byona ku fana ni xiluva xa nhova. Byanyi bya oma, xiluva xa vuna loko moya wa Yehovha wu hundzile ehenhla ka xona, kunene vanhu va fana ni byanyi.

Vonani, Hosi, Yehovha wa ta hi matimba; wa fuma hi voko ra yena; vonani, wa ta a ri ni ku khensa ka yena, ku hakela ka yena ku n'wi rhangele.

Chavelelani, chavelelani tiko ra mina ku vula Xikwembu xa n'wina.

I mani la pimeke lwandle hi xandla xa yena, la pimeke matilo hi mpimo xana? I mani la pimeke hi xirhundzu ntshuri hinkwawo wa misava, la pimeke tintshava, ni switsunga exikalweni? La pimeke moya wa Yehovha i mani? Mutsundzuxi wa yena a a ri mani? La n'wi dyondziseke xilo i mani? U vutisile mani, u dyondzisiwe hi mani? U kombisiwile hi mani ndlela ya leswo lulama? I mani la n'wi dyondziseke vutivi, ni la n'wi tiviseke ndlela ya vutlhari?