Suosittuja jakeita Raamatun kirjasta Ruka 6

Jaa

E vaꞌai kōrua ki te tētahi, ki vaꞌai takoꞌa atu ai e te ꞌAtua ki a kōrua. Ka haꞌaꞌī atu ena, paꞌi, i te kōrua pūtē ki te ꞌī, ka rū-rū ena ko ꞌī riva-riva ꞌā. Pa he hāito iŋa ena ꞌā o kōrua mo vaꞌai ki te rua, pē ira ka hāito takoꞌa ena e te ꞌAtua mo vaꞌai atu ki a kōrua».

Te taŋata riva-riva he vānaŋa i te meꞌe riva-riva ꞌi te ai māhatu riva-riva tōꞌona, ꞌe te taŋata rake-rake he vānaŋa i te meꞌe rake-rake ꞌi te ai māhatu rake-rake tōꞌona. O te meꞌe e rahi rō ꞌana ꞌi roto i te māhatu te haka vānaŋa i te haha.

»E haŋa kōrua ki te nuꞌu te rāua manaꞌu mau nō he tōtōā atu ꞌe e aŋa takoꞌa te meꞌe riva-riva ki a rāua. ꞌE mo no-noꞌi atu mo haka tārahu, e vaꞌai ꞌe ꞌina kōrua ko tiaki mo haka hoki atu. Pē ira he ai te meꞌe hopeꞌa o te nui-nui o te ꞌAtua mo haka koa i a kōrua, ꞌe hai meꞌe nei ka takeꞌa ena: he ŋā poki mau ꞌā kōrua o te ꞌAtua. A ia, paꞌi, ꞌAtua riva takoꞌa ki te nuꞌu taꞌe ꞌite i te māuru-uru ki a ia ꞌe ki te nuꞌu aŋa i te meꞌe taꞌe tano.

E haka ꞌaroha kōrua i te nuꞌu pa he haka ꞌaroha iŋa ena ꞌā o te ꞌAtua, he Matuꞌa o kōrua.

»ꞌIna ko manaꞌu: i a kōrua te parau mo kī i te tano ꞌe i te taꞌe tano o te meꞌe aŋa e te rua, ꞌo kī takoꞌa atu e te ꞌAtua i te tano ꞌe i te taꞌe tano o te kōrua meꞌe aŋa. ꞌIna ko manaꞌu: te meꞌe tano mo te rua he ūtuꞌa o te ꞌAtua, ꞌo kī rō atu e te ꞌAtua mo kōrua. E haka rehu te hape o te rua ki haka kore ai e te ꞌAtua i te kōrua hape.

»Ki a kōrua ki te nuꞌu haka roŋo mai, ꞌī a au he kī atu: E haŋa ki te nuꞌu te rāua manaꞌu mau nō he tōtōā atu. E aŋa te meꞌe riva-riva ki te nuꞌu maꞌu i te riri mo kōrua. E haꞌamaitai te nuꞌu taro-taro atu, ꞌe e pure mo te nuꞌu vā-vā atu i a kōrua.

E aŋa koe ki te rua i te meꞌe haŋa e koe mo aŋa atu e te rua.

Mo puꞌa atu e tahi kope i tuꞌu pāꞌiŋa ꞌāriŋa, e vaꞌai te rua pāꞌiŋa; ꞌe mo hiko e te kope e tahi i tuꞌu paratoa, e vaꞌai takoꞌa tuꞌu kamita. Mo no-noꞌi atu te nuꞌu e tahi meꞌe, e vaꞌai, ꞌe mo hiko i taꞌa meꞌe, ꞌina ko kī mo haka hoki atu.

»ꞌIna e tahi tumu riva-riva mo hua o te meꞌe rake-rake, ꞌe ꞌina e tahi tumu rake-rake mo hua o te meꞌe riva-riva.

Te huru o te tumu e aŋi-aŋi ena ꞌi tōꞌona hua iŋa: taꞌe mai ruŋa i te miro pū-pū te pika e mo-more ena, ꞌe taꞌe mai ruŋa i te tumu tūava te vino e mo-more ena.