Suosittuja jakeita Raamatun kirjasta Aŋa o te ꞌĀpōtoro 1

Jaa

Ka turu mai ena ki ruŋa i a kōrua te Vārua Maitai, he ai te kōrua pūai mo eꞌa mo vānaŋa i te parautiꞌa o ruŋa i a au ꞌi Hērutarema, ꞌi te kona taꞌatoꞌa o Hūrea ꞌe o ⌊Tāmāria⌋, ꞌe ꞌātā ki te ŋā kona hopeꞌa ena o te roa.

He pāhono e Ietū: —Taꞌe he meꞌe mo kōrua e ꞌite; i te Matuꞌa nō te parau mo kī i te hora ꞌe i te mahana o rā meꞌe.

ꞌI rā ŋā mahana noho era o Ietū ꞌi muri i tāꞌana ꞌāpōtoro i kī takoꞌa rō ki rā nuꞌu mo taꞌe eꞌa mai Hērutarema. He kī: «Ka noho kōrua ka tiaki ꞌi nei ꞌātā ka tano rō te meꞌe hōrea atu e tōꞌoku Matuꞌa, he meꞌe vānaŋa atu era e au. A ⌊Iovani⌋ hai vai i ⌊papatito⌋ ai; ꞌe, e ko roa te mahana, nā he papatito atu te ꞌAtua i a kōrua hai Vārua Maitai, te auraꞌa, he uŋa i te Vārua Maitai mo noho mau rō ꞌāvai ꞌi roto i a kōrua».

I ora era mai te mate, he haka takeꞌa i a ia ki rā nuꞌu mo aŋi-aŋi e rāua ko ora ꞌā a ia. E maha ꞌahuru mahana i haka takeꞌa i oho ai a Ietū i a ia ꞌe i vānaŋa ai o ruŋa i te ⌊haka tere iŋa ꞌāpī o te ꞌAtua⌋.

I kī era i te meꞌe nei, he iri he oho a Ietū a ruŋa, e uꞌi nō ꞌā e tū nuꞌu era, he viri e te raŋi e tahi ꞌe he ŋaro rō ꞌai.

E uꞌi nō ꞌana tū nuꞌu era a ruŋa pē hē a Ietū i ŋaro ai, i māroa ai ꞌi muri e rua taŋata e uru rō ꞌā i te kahu tea-tea. He kī: «E te taŋata o Karirea ē, ¿he aha rā i no-noho i uꞌi rō ai a te raŋi? A Ietū noho atu era ꞌi muri i a kōrua, iri ena ki te raŋi, ko ia ꞌā nā ka hoki mai ena. Pa he iri iŋa ena ōꞌona takeꞌa ena e kōrua, pē ira ꞌana tōꞌona hoki iŋa mai».