Suosittuja jakeita Raamatun kirjasta Nikamowina 91

Jaa

kita-kī-itēw, “kiya kā‑nātamawiyan mīna kā‑kanawēyimiyan. kiya nikisē-manitōm kā‑mamisītotātān.”

awiyak ē‑nātāmototawāt kā‑tipēyihcikēyit, awiyak ē‑aspēyimototahk omāwaci-sōhkātisiwiniyiw kisē-manitowa

ispīhk tēpwāsitwāwi nika-naskwēwasihāwak; nika-wīcihāwak māyahkopayitwāwi, nika-pimācihāwak mīna nika-kistēyimāwak.

kisē-manitow kita-itasiwātēw okīsikōma kita-kanawēyimiskik piko itē itohtēyani.

kika-ākōnik tāpiskōc piyēsīs kā‑akwanahwāt ocawāsimisa otahtahkwanihk. kisē-manitow omamisīwātisiwinihk ohci kika-kanawēyimik mīna kika-nātamāk.

hāw, kā‑tipēyihcikēt kiya kinātāmototawāw, ēkwa kita-kitēyimisk kā‑māwaci-ispāhkēyihtākosit, ēkosi namōya maci-kīkway kika-māyi-tōtākon, namōya māyipayiwin kika-otihtikon cīki kīkihk.

kika-kitēyimik ēkāya ka‑tasōsoyan kahkiyaw kīkway ohci kā‑kakwēspanātahk mīna āhkosiwin ohci kā‑misiwanācihiwēhk.

kihci-mitātahtomitanaw kita-kī-nipahisinwak ita ē‑ayāyan, mitātaht kihci-mitātahtomitanaw wāsakām, māka kiya namōya nānitaw kika-māyi-tōtākawin.

namōya kita-kī-kostaman maci-kīkway ē‑tipiskāk, ahpō sisikoc kita-mōskīstākawiyan ē‑kīsikāk, ahpō āhkosiwin kā‑otihtikohk kā‑wanitipiskāk, ahpō maci-kīkway kā‑nipahikohk kā‑mēkwā-kīsikāk.