 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

حَا ڢُطَّمْ اَللَّه تَغِ عَسَمَنْجِ عٜ لٜسْدِ؞ لٜسْدِ طٛنّٛ شٛوکْرِ، وَلَانٛ کٛو طُمٜ دٛوْ مَارِ، ࢩِࢡْرٜ سُدِّنٛ عِلَمْجِ لُغُّطِ؞ رُوحُ اَللَّه طٛنّٛ يِيلٛ دٛوْ ندِيَمْجِ؞
ندٜنْ اَللَّه وِعِ‏: «أَلنّٛورَ لَاتٛ؞» کَ لَاتِ؞ اَللَّه يِعِ کَ وٛوطِ؞ ندٜنْ عٛسٜنْدِ حَکُّندٜ أَلنّٛورَ عٜ ࢩِࢡْرٜ؞ عٛعِنْدِ أَلنّٛورَ ࢩَلَوْمَ، ࢩِࢡْرٜ بٛو عٛعِنْدِ طُمْ جٜمَّ؞ حِيرِ، وٜىٰتِ، طُمْ ࢩَلَادٜ عَرَنْدٜىٰرٜ؞
اَللَّه وِعِ‏: «سٜنْدٛودٜ لَاتٛ شَکَ ندِيَمْجِ، نغَمْ سٜنْدُغٛ حَکُّندٜ مَاجِ؞» نٛنْ طُمْ لَاتٛرِ؞ اَللَّه وَطِ سٜنْدٛودٜ مَاجُمْ؞ عٛسٜنْدِرِ ندِيَمْجِ لٜسْ بٜى ندِيَمْجِ دٛوْ؞ اَللَّه عِنْدِ سٜنْدٛودٜ مَاجُمْ عَسَمَ؞ حِيرِ، وٜىٰتِ، طُمْ ࢩَلَادٜ طِطَوْرٜ؞
اَللَّه وِعِ‏: «ندِيَمْ لٜسْ عَسَمَ مٛوࢡٛ نٛکُّورٜ وٛورٜ، حَا جٛورْطُمْ وَنغَ؞» نٛنْ طُمْ لَاتٛرِ؞ اَللَّه عِنْدِ جٛورْطُمْ لٜسْدِ، مٛوࢡٛرْدٜ ندِيَمْجِ بٛو، عٛعِنْدِ طُمْ مبٜىٰلَ؞ اَللَّه لَارِ طُمْ وٛوطِ؞ ندٜنْ عٛوِعِ‏: «لٜسْدِ ڢُطْنَ ڢُطْنغٛوجِ، وَاتٛ حُطٛ مَرْکٛ عَاوْدِ عٜ حَاکٛوجِ مَرْطِ عَاوْدِ، لٜطّٜ دِمٛوجٜ ࢡِࢡّٜ بٜى عَاوْدِ ندٜرْ مُوطُمْعٜنْ دٛوْ لٜسْدِ، کٛو طُمٜ ڢُو ڢٛدّٜ عَسْلِ مُوطُمْ؞» نٛنْ طُمْ لَاتٛرِ؞ لٜسْدِ ڢُطْنِ حُطٛ مَرْکٛ عَاوْدِ عٜ حَاکٛوجِ مَرْطِ عَاوْدِ ڢٛدّٜ عَسْلِ مُوطُمْعٜنْ، نٛنْ بٛو لٜطّٜ دِمٛوجٜ ࢡِࢡّٜ بٜى عَاوْدِ ندٜرْ مُوطُمْعٜنْ، کٛو طٜيٜ ڢُو ڢٛدّٜ عَسْلِ مُوطُمْعٜنْ؞ اَللَّه لَارِ طُمْ وٛوطِ؞ حِيرِ، وٜىٰتِ، طُمْ ࢩَلَادٜ تَتَࢡْرٜ؞
اَللَّه وِعِ‏: «جَيْلِ لَاتٛ حَا عَسَمَ نغَمْ سٜنْدِندِرْغٛ ࢩَلَوْمَ بٜى جٜمَّ؞ طِ لَاتٛ عَلَامَاجِ نغَمْ عَنْدُغٛ وَکَّتِيجِ جُولْطٜ، نٛنْ بٛو ࢩَلْطٜ عٜ دُوࢡِ؞ جَيْلِ طِعِ لَاتٛ حَا عَسَمَ نغَمْ يَيْنَنْغٛ لٜسْدِ؞» نٛنْ طُمْ لَاتٛرِ؞ اَللَّه وَطِ جَيْلِ مَوْطِ طِطِ‏: جَيْنغٛلْ ࢡُرْنغٛلْ مَوْنُغٛ وَاتٛ‏: نَانغٜ، لَامِ ࢩَلَوْمَ، ݠَمَرٛلْ بٛو، وَاتٛ‏: لٜوْرُ، لَامِ جٜمَّ؞ عٛوَطِ بٛو کٛودٜ؞ عٛجٛعِّنِ طِ حَا عَسَمَ نغَمْ يَيْنَنْغٛ لٜسْدِ، نغَمْ لَامَاغٛ ࢩَلَوْمَ عٜ جٜمَّ بٛو نغَمْ سٜنْدِندِرْغٛ أَلنّٛورَ بٜى ࢩِࢡْرٜ؞ اَللَّه لَارِ طُمْ وٛوطِ؞ حِيرِ، وٜىٰتِ، طُمْ ࢩَلَادٜ نَيَࢡْرٜ؞
اَللَّه وِعِ‏: «ندِيَمْ حٜىٰوِرَ کُوجٜ مَرْطٜ يٛنغْکِ، شٛلِّ بٛو ݠِيرَ حَا عَسَمَ، حَا دٛوْ لٜسْدِ» نٛنْ طُمْ لَاتٛرِ؞ اَللَّه تَغِ کُوجٜ مَوْطٜ ندٜرْ ندِيَمْ عٜ عَسْلِ کٛ وُورَتَ عٜ کٛ وَانْشَتَ عٜ کٛ دِمْبٛتٛ ڢُو ندٜرْ ندِيَمْ؞ نٛنْ بٛو شٛلِّ مَرْطِ بِلٜىٰجِ – کٛو طُمٜ ڢُو ڢٛدّٜ عَسْلِ مُمْ؞ اَللَّه لَارِ طُمْ وٛوطِ؞ عٛبَرْکِطِنِ طُمْ، عٛوِعِ‏: «ندِمْندِمْنٜ، طُوطٜ، کٜبِّنٜ ندِيَمْجِ ندٜرْ بٜىٰلِ، شٛلِّ بٛو طُوطَ دٛوْ لٜسْدِ؞» حِيرِ، وٜىٰتِ، طُمْ ࢩَلَادٜ جٛوَࢡْرٜ؞
اَللَّه وِعِ‏: «لٜسْدِ وُرْتِنَ عَسْلِ دَبَّاجِ ڢُو‏: طِ سَارٜ، لَدٛوجِ، دَبَّاجِ طِ لَدّٜ، کٛو طُمٜ ڢُو ڢٛدّٜ عَسْلِ مُوطُمْ؞» نٛنْ طُمْ لَاتٛرِ؞ اَللَّه وَطِ دَبَّاجِ لَدّٜ ڢٛدّٜ عَسْلِ مَاجِ عٜ دَبَّاجِ سَارٜ ڢٛدّٜ عَسْلِ مَاجِ عٜ لَدٛوجِ ڢٛدّٜ عَسْلِ مَاجِ؞ عٛلَارِ طُمْ وٛوطِ؞
اَللَّه وِعِ‏: «عٜنْ مبَطَ نٜطّٛ دٛوْ جَاتِ مٜىٰطٜنْ، دٛوْ نَنْدَلْ مٜىٰطٜنْ؞ عٛلَامَنٛ لِطِّ ندٜرْ مبٜىٰلَ، شٛلِّ عٜ دَبَّاجِ عٜ کُوجٜ لَدّٜ عٜ لَدٛوجِ دٛوْ لٜسْدِ ڢُو؞» اَللَّه تَغِ نٜطّٛ دٛوْ جَاتِ مُوطُمْ، عٛتَغِمٛ دٛوْ نَنْدَلْ مَاکٛ، عٛتَغِ غٛرْکٛ عٜ دٜبّٛ؞ اَللَّه بَرْکِطِنِ ࢡٜ، وِعِ ࢡٜ‏: «ندَࢩٜ، طُوطٜ، کٜبِّنٜ لٜسْدِ، لَامَنٜ ندِ‏! لَامَنٜ لِطِّ ندٜرْ مبٜىٰلَ عٜ شٛلِّ عٜ دَبَّاجِ نغَانْشٛتٛوطِ دٛوْ لٜسْدِ ڢُو‏!» اَللَّه وِعِ‏: «ندَا، مِحٛکِّ عٛنْ ڢُطْنغٛوجِ دِمٛوجِ دٛوْ لٜسْدِ ڢُو، نٛنْ بٛو لٜطّٜ مَرْطٜ ࢡِࢡّٜ بٜى عَاوْدِ ندٜرْ مُوطُمْعٜنْ، طُمْ لَاتٛتٛ ࢩَامْدُ مٛوطٛنْ؞ دَبَّاجِ لٜسْدِ عٜ شٛلِّ عٜ کٛ وَانْشَتَ دٛوْ لٜسْدِ ڢُو، وَاتٛ کٛ مَرِ يٛنغْکِ ڢُو، مِحٛکِّ طُمْ حَاکٛ حٜشّٛ نغَمْ ࢩَامُغٛ؞» نٛنْ طُمْ لَاتٛرِ؞ اَللَّه يِعِ کٛ عٛوَطِ ڢُو، طُمْ بٛوطُّمْ مَسِنْ؞ حِيرِ، وٜىٰتِ، طُمْ ࢩَلَادٜ جٛوٜىٰغٛعٛورٜ؞

Kuuntele لَاتَانٛوجِ 1