Luka 3
3
Ko te Tālakiga a Ioane te Papatiho
(Mat 3.1-12; Mlk 1.1-8; Ioa 1.19-28)
1I te hefulu lima o tauhaga talu te nofoakiga a Kaihala Tipelia; ko Ponitiō Pilato te kōvana o Iutea, ka ko Helota te tupu o te itūmālō o Kalilaia, ma ko tona uho ko Filipo, ko te tupu o te itūmālō o Itoulaia ma Talakonaito; ko Luhania te tupu o Apilene, 2ka ko Anaha ma Kaiafa nā Ulu Ohitāulaga. Ko te taimi tēnā na pa mai ai te kupu a te Atua kia Ioane te ataliki o Hakalia, i te vao. 3Oi na fano ai ia Ioane ki nā kogāfenua uma nae pili ki te Vaitafe ko te Iolitana, kua folafola vē atu e ia ki tagata, “Liliu kehe mai autou agahala ma papatihogia ke iloa ai ko koutou kua halamō moni, oi fakamāgalo ai e te Atua autou agahala.” 4E vē oi tūhia i te tuhi o nā kupu a te pelofeta ko Ihaia:
“Ko te leo o he tino e taukalaga i te vao;
‘Hāuni te auala o te Aliki;
fakahakohako ona ala! #Iha 40.3-5 (LXX)
5Ko vanu uma ka fakatūtumu,
ko mauga uma ma maugaiti ka fakalaugatahi.
Ko nā mea e takapikopiko ka fakahakohako,
ma nā koga kopikopia ka fakalaulelei;
6ma ko te fakaolataga a te Atua
ka kitea e tagata uma.’ ”
7Kua ōmamai nā kaifenua o tagata e tokalahi ke papatiho kilātou e Ioane, oi na lea vē atu ai ia kia te kilātou, “Koutou fānau a gata! Ko ai te na lea atu e mafai koutou ke hao i te fakahalaga a te Atua kua tāli pa mai? #Mat 12.34; 23.33 8Fai nā mea ke iloa ai ko koutou kua halamō i autou agahala. Ma ia koutou nahe kāmata oi lea kia te koutou lava ko Apelaamo he tupuna e o koutou. E lea atu au kia te koutou, e mafai e te Atua oi fakaliu tino nā fatu iēnei, ke fai ma lāpuna o Apelaamo. #Ioa 8.33 9E pa foki lava ki te taimi nei, ko te toki kua hāuni ke ta ki lalo nā lākau i nā aka; ko nā lākau uma e hē fua mai ai ni fua lelei, e ta ki lalo ma togi ki te afi.” #Mat 7.19
10Oi na lea atu ai te kaifenua kia Ioane, “Heā la te tatau ke fai e kimātou?”
11Na tali mai ia Ioane, “Ko te tino e lua ni ona kofutino, fōki tētahi kofutino mo te tino e hēai hona kofu, ma ko te tino e iei ni ana meakai, e tatau ke fai foki vēnā e ia.”
12Na ōmamai foki nā aolāfoga ke papatiho kilātou, ma na fehili vē mai ai kilātou kia Ioane, “Te faiākoga, heā te tatau ke fai e kimātou?” #Luk 7.29
13Na tali atu ia Ioane, “Nahe hili atu ki luga nā lāfoga e ao e koutou, i lo te mea e fakataga i te tūlāfono.”
14Nae iei foki nā fitafita na fehili vē atu kia te ia, “Ka ko kimātou, heā te tatau ke fai e kimātou?”
Oi na tali atu ai ia Ioane kia te kilātou, “Nahe kave fakamālohia e koutou he tupe a he tino e ala i te fakamataku, pe ko te molimau pepelo, ma e tatau koutou ke mālilie kinā totogi o koutou e maua.”
15Ko nā tino nae i kinā, kua amanaki lele, ma na kāmata ai kua fakafehili ifo i o lātou loto, pe hē ko Ioane nei ko te Mehia. 16Oi na lea atu ai ia Ioane kia te kilātou uma, “E kō papatihoa koutou i te vai, kae e hau he tino e hili atu lele ia i lo au, ma e hē aogā au ke tatala e au ona hēvae. Ka ia papatihoa koutou i te Agaga Paia ma te afi. 17Kua i tona lima tana tui lūhaito ke lūlū kehe ai nā atigi haito, ma fakaputu nā fuāhaito ki loto o tona fale haito; kae ka huhunu e ia nā atigi haito i te afi e hē mafai ke mate.”
18E lahi iētahi auala na tālaki atu ai e Ioane te Tala Lelei ki tagata, ma fakamālohi atu kia te kilātou, ke hui o lātou olaga. 19Na munaia foki e Ioane te tupu ko Helota, ona kua fakaipoipo kia Helotia te āvaga a tona uho, ma te lahi o iētahi ana āmiokino. #Mat 14.3-4; Mlk 6.17-18 20Oi na fai ai e Helota he mea na hili lele te kino, i te kua fakatonu e ia ke togi ia Ioane ki te falepuipui.
Ko te Papatihoga o Iehu
(Mat 3.13-17; Mlk 1.9-11)
21Kua uma te papatiho o nā tino uma lele, oi na papatiho ai foki ia Iehu. Ka koi tatalo ia Iehu, kae kua matala te lagi, 22ma te Agaga Paia kua fanaifo ki ona luga, e vē he tino o he lupe. Ma na fanaifo ai he leo mai te lagi, “Ko koe ko toku Ataliki pele, e fiafia lahi au kia te koe.” #Ken 22.2; Hal 2.7; Iha 42.1; Mat 3.17; Mlk 1.11; Luk 9.35
Ko te Gafa o Iehu
(Mat 1.1-17)
23E tuha kua tolu hefulu ia tauhaga o Iehu, i te kāmataga o tana gāluega. Ko he ataliki (i te manatu o nā tino) e o Iohefa te ataliki o Eli, 24te ataliki o Mateta, te ataliki o Levi, te ataliki o Meleki, te ataliki o Iananai, te ataliki o Iohefa, 25te ataliki o Matatia, te ataliki o Amoha, te ataliki o Nauma, te ataliki o Ehali, te ataliki o Nagai, 26te ataliki o Maata, te ataliki o Matatia, te ataliki o Hemeina, te ataliki o Ioheka, te ataliki o Iota, 27te ataliki o Ioanana, te ataliki o Leha, te ataliki o Helupapelu, te ataliki o Halatielu, te ataliki o Neli, 28te ataliki o Meleki, te ataliki o Ati, te ataliki o Kohama, te ataliki o Elematama, te ataliki o Elu, 29te ataliki o Iohua, te ataliki o Eliehe, te ataliki o Iolimi, te ataliki o Mateta, te ataliki o Levi, 30te ataliki o Himeona, te ataliki o Iuta, te ataliki o Iohefa, te ataliki o Ionama, te ataliki o Eliakima, 31te ataliki o Melea, te ataliki o Mena, te ataliki o Matafa, te ataliki o Natana te ataliki o Tavita, 32te ataliki o Iehe, te ataliki o Opeta, te ataliki o Poaha, te ataliki o Halamona,#3.32 Ko iētahi tuhituhiga tuai e leamai Hala te ataliki o Nahona, 33te ataliki o Aminatapu, te ataliki o Atimina, te ataliki o Ani,#3.33 Ko iētahi tuhituhiga anamua e leamai Aminatapu, te ataliki o Alama ko iētahi e kehekehe lele te ataliki o Hehalona, te ataliki o Faleha, te ataliki o Iuta, 34te ataliki o Iakopo, te ataliki o Ihaako, te ataliki o Apelaamo, te ataliki o Telaha, te ataliki o Nahoa, 35te ataliki o Heluka, te ataliki o Leu, te ataliki o Faleka, te ataliki o Epele, te ataliki o Helaha, 36te ataliki o Kainana, te ataliki o Afahata, te ataliki o Hemu, te ataliki o Noa, te ataliki o Lameka, 37te ataliki o Metuhela, te ataliki o Enoka, te ataliki o Ialeta, te ataliki o Mahalalele, te ataliki o Kenana, 38te ataliki o Enoha, te ataliki o Hetu, te ataliki o Atamu, te ataliki o te Atua.
Currently Selected:
Luka 3: TOKU
Tõsta esile
Kopeeri
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust