Luka 12
12
Apoapoakiga e Uiga ki te Fakagutugutulua
(Mat 10.26-27)
1I te taimi tēnā, e faitau afe ia tagata kua fakapotopoto mai ma kua tumu lele kua fakatau tūfēke; oi na lea vē muamua atu ai ia Iehu ki ona hoko, “Koutou ke fakaetēte i te mea fakafefete a te kau Falehaio—te fakagutugutulua o kilātou. #Mat 16.6; Mlk 8.15 2E hēai he mea e tatao ke galo ka hē toe kitea, pe mumuni ka hē toe iloa. #Mlk 4.22; Luk 8.17 3Ko te mea ia, heā lava he kupu na lea ai koe i te pōuli, ka lagona i te ao teatea, ma ko te mea e faitala muhumuhu ai koe i loto o he potu e tapuni te faitotoka, ka vākai i loto o te malae.#12.3 vākai i loto o te malae pe vākai mai luga o nā tuāfale
Ko te Tino e tatau ke Mātataku ai
(Mat 10.28-31)
4“Oku uho, e lea atu au kia te koutou, ia koutou nahe mātataku i nā tino e tāmate e kilātou te tino o te tagata, ma gata ai lava i kinā te mea e kilātou mafaia. 5Kae ka fakailoa atu e au kia te koutou te tino e tatau ke mātataku ai koutou: mātataku i te Atua, auā e ia te ia te pule ke togi ai he tino ki Kēna, kāfai e uma te ia tāmatea. Talitonu mai kia te au, ko ia te tatau ke mātataku ai koutou!
6“E hē lima nei ia tamā manulele e mafai ke fakatau atu i ni pene e lua? Kae e hēai he tamā manulele o nā manulele iēnei, e puli i te kikilaga a te Atua. 7Ma e pa foki lava ki nā lāulu i outou ulu, kua uma te faitau. Koutou la nahe mātataku; e hili lele atu te tāua o koutou i lo nā tamā manulele e lahi.
Ko te Talia ma te Teteke kia Iehu.
(Mat 10.32-33; 12.32; 10.19-20)
8“E lea atu au kia te koutou, ko nā tino e folafola e kilātou i mua o tagata ko kilātou e āku, ka vēnā foki oi fai e te Ataliki o te Tagata i mua o nā āgelu a te Atua. 9Kae ko nā tino e teteke mai kia te au i mua o tagata, ka vēnā foki oi teteke kilātou e te Ataliki o te Tagata, i mua o nā āgelu a te Atua.
10“Ko ai lava e faia he kupu e teteke ai ki te Ataliki o te Tagata, e mafai ke fakamāgalo; kae ko ai lava e fāifai ki te Agaga Paia, ka hē fakamāgaloa lele.#Mat 12.32; Mlk 3.29
11“Ma kāfai koutou e kave e kilātou ke fakamahino i loto o nā hūnako, pe ki mua o nā kōvana, pe o nā tupu, koutou nahe popole pe ka tali vēhea ake koutou kia lātou mōliaga, pe ka vēhea ake foki ni kupu ke tautatala ai koutou. #Mat 10.19-20; Mlk 13.11; Luk 21.14-15 12Auā ka fakaako atu koutou e te Agaga Paia, kāfai e pa ki te taimi tēnā, i nā kupu e tatau ke tautatala ai koutou.”
Ko te Talafakatuha o te Tino Maukoloa Valea
13Na lea vē mai he tino i te potopotoga kia Iehu, “Te Faiākoga, lea kō ki toku uho ke vāevae loa kia te kimāua nā tofi kāiga na tuku mai e to mā tamana mo kimāua.”
14Kae na tali atu ia Iehu ki ei, “Na hei faia nei au ma fakamahino, pe ke pule i te vāevaega o nā mea a koulua ma te uho o koe?” 15Oi na lea atu ai ia Iehu ki te kaifenua uma, “Kikila lelei ma ia koutou ke fakaetēte lele i te mānumanu; auā ko te ola o te tagata e hē fua fakatatau ki te lahi o ana koloa.”
16Oi na fai ai e Iehu te talafakatuha tēnei kia te kilātou: “Nae iei he tino maukoloa, na maua mai i tona fenua he helehelega lahi lele. 17Kua vē ifo i tona loto, ‘E hēai he mea e teu ki ei te helehelega. Heā nei ta aku ka fai?’ 18Oi na lea vē ai, ‘Ko tēnei taku mea ka fai; ka tala kehe nā fale haito o oku, oi toe fau ai ni fale haito e lalahi atu, ma i kinā, ka teu ai aku haito ma aku koloa uma lele. 19Ma ka lea vē ifo au kia te au lava; kua lava lele aku mea lelei e teu mo nā tauhaga e lahi. Faifai mālie la; ko te kai lava ma te inu, ma ke fiafia!’ 20Kae na vāgana atu te Atua kia te ia, ‘Te Vale! Ko te pō nei lava ka uma ai te ola o koe; ko nā mea uma la a koe kua hāuni, ko ai te ka kave mā ia?’ ”
21Ma na toe lea atu ai ia Iehu, “E vēnā lava nā tino e kilātou fakaputua nā koloa mo kilātou lava, kae e hē maukoloa i te kikila a te Atua.”
Koutou nahe Popole
(Mat 6.25-34)
22Oi na vāgana atu ai ia Iehu ki ona hoko, “Ko te mea ia e lea atu ai au kia te koutou, ia koutou nahe popole ki nā ola o koutou, pe niā te ka kakai ai koutou; nahe popole foki ki nā tino o koutou, pe niā te ka kokofu ai koutou. 23Auā e hili atu lele te tāua o te ola i lo nā meakai, ma te tino i lo nā kofu. 24Kikila koutou ki nā ōleva: e hē kilātou totōa ni fatu haito pe fakaputu maia te helehelega; e hēai ni o lātou fale haito pe ni potu ke teu ai te haito, kae e fafaga kilātou e te Atua! Kae e hili lele atu te tāua o koutou i lo nā manulele! 25E iei he tino o koutou e ia mafaia oi fakaopōpo he itūlā e fokotahi ki te loa o tona ola,#12.25 fakaopōpo he… tona ola pe fakaopōpo he kūpita e fokotahi ki tona loa. Ko te kūpita e tāli maua te āfa mita te loa i te popole ki ei? 26Kāfai e hē koutou mafaia oi fai he tamā mea vēnei, heā la te popole tauānoa ai koutou ki iētahi mea? 27Kikila ki nā tiale o te vao pe ola vēhea; e hē gālulue pe hui ni o lātou kofu. Kae e lea atu au kia te koutou, e pa lava ki te Tupu ko Holomona ma te lahi o tona tamaokāiga, e hēki ia maua ni kofu mānanaia e vē ko he tiale o nā tiale iēnei. #1 Tup 10.4-7; 2 NT 9.3-6 28Kae kāfai ko te Atua te ia fakakofua te mutia ola vale, tēia e ola i te aho nei, kae tāeao e togi ki loto o te ogāumu ke huhunu, ka hē hili atu nei la ona mautinoa ka ia fakakofua koutou? Kai te taigole ātili lele o te fakatuatua o koutou!
29“Ko te mea ia, koutou nahe popole pe niā te ka kakai ma inu ai koutou. 30(Auā ko nā mea uma iēnei e popole ki ei nā tino fakapaupau o te lalolagi tēnei.) E iloa e te koutou Tamana ko nā mea iēnei e manakomia e koutou. 31Kae hakili atu ki tona Mālō, oi ka foki atu ai e ia kia te koutou nā mea iēnei.
Nā Koloa i te Lagi
(Mat 6.19-21)
32“Koutou nahe mātataku, taku lafumāmoe tokaitīti, auā ko te koutou Tamana, e fiafia ke fōki atu kia te koutou te Mālō. 33Fakatau atu autou meatōtino, ma fōki te tupe mā nā tino mātitiva. Fai ni autou ato teu tupe e hē mafai ke gatu, ma teu nā koloa a koutou i te lagi, te mea e hē fakaitītia lele ai, auā e hēai he tino kaihohoa e mafai ke pa ki ei, pe ni mogamoga ke kilātou fakakinoa. 34Auā ko te mea e iei autou koloa, ka iei ai foki ma outou loto.
Ko nā Kaukauna Nonofo Hāuni
35“Koutou ke nonofo hāuni mo ho he mea e ono tutupu; hulu nā fuhipaku ki outou taugātiti ma fakamumū autou mōlī, #Mat 25.1-13 36e vē ko nā kaukauna e fakatalitali ki to lātou matai ke toe foki mai i te kaiga o he fakaipoipoga. Kāfai e pa mai oi tukituki mai ai, ma tatala vave atu ai e kilātou te faitotoka kia te ia. #Mlk 13.34-36 37Amutia nā kaukauna e maua mai e to lātou matai, e ala ma hāuni ki tona toe foki mai! E lea atu au kia te koutou, ka ui kehe e ia tona kofuloloa ma fakanonofo ki luga nā kaukauna, oi laulau ai e ia he lātou mea ke kai. 38Amutia nā kaukauna kāfai e maua mai e te matai e nonofo hāuni, e tuha lava pe pa mai i te tūlua o te pō, pe i te vaveao. 39Ma e mautinoa lelei lava, moinei ake na iloa e te tino e o ia te fale te taimi e hau ai te tino kaihohoa, e hē ia tukua he avanoa ke kaihohoa ai tona fale. #Mat 24.43-44 40Ma ko koutou foki la, e tatau ke nonofo hāuni, auā ko te Ataliki o te Tagata e hau i he taimi e hē manatu koutou e hau ai.”
Ko te Kaukauna Fakamāoni pe ko te Hē Fakamāoni
(Mat 24.45-51)
41Na lea vē atu ia Petelu, “Te Aliki, ko te talafakatuha tēnei e fakatatau kia te kimātou, pe ki tagata uma?”
42Na tali mai te Aliki, “Ko ai la te kaukauna fakamāoni ma poto? Ko ia tēia ka tōfia e tona matai ke pule i ana kaukauna, ma fakahoa a lātou meakai i te taimi tatau? 43Amutia te kaukauna tēnei kāfai e maua mai e tona matai, koi galue lava i tona tofi na tuku ki ei! 44E takutino atu e au kia te koutou, ka tōfia ia e tona matai ke pule i ana mea uma lele. 45Kae kāfai te kaukauna tēnei e lea vē ifo kia te ia lava, ‘ko toku matai e tuai mai,’ ma kāmata ai oi kini e ia nā kaukauna tagata ma nā kaukauna fafine, ma kai ma inu ma konā, 46oi ka toe foki mai ai tona matai i he aho e hēki manatu te kaukauna e toe foki mai ai, ma i he taimi e hē ia iloa. Ka tuki pala lele ia#12.46 tuki pala lele ia pe ato ia ki fafo e tona matai, oi tuku atu ai ki te mea e iei ai nā tino hē fakamāoni.
47“Ko te kaukauna e ia iloa te mea e fofou tona matai ke ia faia, kae e hē nofo hāuni ke fakatino e ia, ka matuā kini lahi lele. 48Kae ko te kaukauna e hē ia iloa te mea e fofou ki ei tona matai, kae e ia faia he mea e tatau ke kini ai ia, ka kini lava i he kini māmā. Ko nā tino e fōki ki ei ni mea e lahi, e lahi foki nā mea e tatau ke maua mai ia te kilātou. Ma e lahi atu lele foki la nā mea e tatau ke maua mai, i nā tino e lahi atu lele nā mea e fōki ki ei.
Ko Iehu te Māfuaga o Fevaevaeakiga
(Mat 10.34-36)
49“Ko au na hau ke kaumai te afi ke huhunu ai te lalolagi, ma kai au te fofou ko te afi kua uma te fakamumū! 50E iei toku papatihoga o puapuagā#12.50 papatihoga o puapuagā E fakatatau ki nā puapuagā ka pa ia ki ei e tuku e fai, ma ko toku loto e popole pea lava, ke pa ki te taimi e fakatāunuku ai! #Mlk 10.38 51E vēake koutou ko au na hau ke kaumai te fīlēmū ki te lalolagi? Hēai, e hē ko te fīlēmū, kae ko fevaevaeakiga. 52Auā e kāmata atu nei, ka fevaevaeaki te toka lima i loto o he fale; ka teteke te toka tolu ki te toka lua, ma teteke te toka lua ki te toka tolu. 53Ka teteke te tamana ki te ataliki, ma teteke te ataliki ki te tamana; ka teteke te mātua ki te afafine ma teteke te afafine ki te mātua; ka teteke te fai mātua ki te faiāvaga fafine ma teteke te faiāvaga fafine ki tona fai mātua.” #Mik 7.6
Ke Mālamalama i te Taimi
(Mat 16.2-3)
54Na vāgana atu foki ia Iehu ki te kaifenua, kua vē atu, “Kāfai e koutou kitea atu he ao kua tū mai i hihifo, e vave oi lea koutou ka ua—ma e ua lava. 55Ma kāfai e koutou kitea te matagi mai haute kua agi, e lea koutou ka vevela—oi e vevela lava! 56Ko koutou ni tino āmio pepelo! E koutou iloa oi fakamatala te uiga o nā mea e koutou kitea i te lalolagi ma te lagi; heā la te hē koutou iloa ai oi fakamatala te uiga o nā mea e tutupu i te taimi nei?”
Fakalelei ma te Tino e Teteke atu kia te Koe.
(Mat 5.25, 26)
57“Heā te hē fuafua ai lava e koutou te mea e hako ma e tatau ke fai e koutou? 58Kāfai he tino e fai hana tagi ma mōlia koe ki te fakamahinoga, taumafai ke tuku tonu nā fekehekeheakiga i te vā o koulua, ka ko hēki pa koulua ki te fakamahinoga. Auā kāfai e hē faia e koe te mea tēnei, oi ka toho ai koe e ia ki mua o te fakamahino, oi ka tuku atu ai loa koe e te fakamahino ki leoleo, oi togi ai koe e leoleo ki loto o te falepuipui. 59I kinā, e lea atu au kia te koe, ka nofo ai pea koe ke pa lava ki te taimi e uma ai te toe totogi e koe o te pene mulimuli o tau hala.”
Currently Selected:
Luka 12: TOKU
Tõsta esile
Kopeeri
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust