Marki 8
8
Jesu dini niba tudanaa
(Mat 15.32-39)
1Laa dana nni, ku niligu n go den taani boncianla, kaa pia ban baa je yaala. Jesu den yini o ŋoadikaaba ki yedi ba: 2«Mi ninñima cuo nni ku naa niligu po, kelima danataa ke bi ye n kani, baa go pia ban baa je yaala. 3N yaa cabi ba leni mi koma ke ban kuni, bi baa gbali u sanu nni, kelima bi tianba ñani hali foagima.» 4O ŋoadikaaba den guani ki yedi o: «O nilo baa fidi ki baa yaa jiema n baa dagidi bine kuli po li naa fuali nni?» 5Jesu den buali ba: «Yi pia dupenbiŋa yo?» Bi den guani ki yedi o: «Bonbilele.»
6Jesu den teni ke ku niligu kali kali tiipo, ki taa bi dupenleleediba ki tuondi U Tienu, ki cabidi cabidi ki teni o ŋoadikaaba ban boagidi ku niligu, ke bi den boagidi. 7Bi go den pia janbimuba moko. Jesu go den tuondi U Tienu mu po, ki teni ban boagidi muni mo. 8Bikuli den dini ki guo. Bi den wodi ban dini ki sieni yaa boncaba ki gbieni baabuodilele. 9Bi den bua ki pundi niba tudanaa (4 000). Jesu n den cabi ba yaa yogunu, 10o den kua ku ñinbiagu nni wani leni o ŋoadikaaba, ki duodi ki gedi Dalimanuta#8.10 Dalimanuta: Baa bani laa tinbuoli n den ye naankani. tinbuoli nni.
Farisieninba mia mi bancianma
(Mat 12.38-42; 16.1-4; Luk 11.29-32)
11 Farisieninba den cua ki nia leni Jesu ki mia o wan tieni yaala n tie sinankeene ke o paalu ñani U Tienu kani. Bi den yedi yeni, ki bua ki dia o ku madiagu. #Mat 12.38; Luk 11.16. 12Jesu den fuo ki jiini ki yedi: «Be n teni ke moala ne niba lingi sinankeene yeni? N yedi yi i moamoani, bi kan tieni moala ne niba po sinankeene.» #Mat 12.39; Luk 11.29. 13Lani, o den fii ki ŋaa ba, ki go kua ku ñinbiagu nni, ki duodi ki gedi napo yaa boanjaali.
Farisieninba leni Herodi kuli bangima
(Mat 16.5-12)
14Bi ŋoadikaaba den sundi kaa taa dupen. Baa den pia jetoama ku ñinbiagu nni, kali dupenyendo bebe. 15Jesu den tundi ba ki yedi: «Fangi mani yi yula bonŋanla leni Farisieninba leni Herodi dabinli.» #Luk 12.1. 16O ŋoadikaaba den bungi ki yedi biyaba: «Li tie ke tin kaa pia dupen yeni yaa po yo.» 17Jesu den bandi la ki yedi ba: «Be yaa po ke yi bungi ki tama ke n maadi yeni, kelima yii pia dupen po? Yi daa kpaagi ki faami hali moala? 18Yi yama baa ki pii yo? Yi pia i nuni ki naa nua yo? Yi pia a tuba ki naa gba yo? Naani yii tiani? #Jer 5.21; Esk 12.2; Mrk 4.12. 19Min den taa bi dupenmuudiba ki cabidi cabidi ki boagidi a nitudimuuda, yi den taani yaa boncaba n sieni baabuodi ŋa?» Bi den guani ki yedi o: «Piiga n bondilie.» 20«Min go den taa bi dupenleleediba ki cabidi ki boagidi a nitudinaada, yi den taani yaa boncaba n sieni baabuodiŋa?» Bi den guani ki yedi o: «Bondilele.» 21O den yedi ba: «Yi daa kpaagi ki bandi hali moala yo?»
Jesu noadi o juamo Betisayida dogu nni
22Jesu leni o ŋoadikaaba n den pundi Betisayida, bi niba den cuani o juamo Jesu kani, ki mia o ke wan sii o. 23O den cuo o juamo nuu ki dadi ki ñani o u dogu nni. O den sii o ñinsandi o juamo nuni nni ki maani o po o nii, ki buali o o yaa nua bonla. 24O den ŋubidi ki noanli ki yedi: «N nua bi niba, ama n nua ba ke bi tie nani i tiidi yeni ki cuoni.» 25Jesu go den maani o nii o nuni po, ke o juamo den nudi ki noanli ki laa li bonla kuli cain. O den paagi. 26Jesu den cabi o wan kuni o denpo, ki maadi o ki yedi: «Da go kua u dogu na niinni.»
Pieli kadi ki waani ke Jesu n tie Kilisiti
(Mat 16.13-20; Luk 9.18-21)
27Jesu leni o ŋoadikaaba den suagi liiga ki caa Filipi yaa Sesare dobila nni. Ban den ye u sanu nni o den buali ba: «Bi niba tua ke n tie ŋme?» 28Bi den guani ki yedi o: «Bi tianba tua ke a tie Jan Batisi, bine ke a tie Eli, bine mo ke a tie bi saawalipuaba siiga nni yendo.» #Mrk 6.14-15; Luk 9.7-8. 29Ama o den buali bani bi ba: «Yimo te, yimo nan yedi ke n tie ŋme yo?» Pieli den guani ki yedi o: «A tie U Tienu n Gandi Yua.» #Jan 6.68-69. 30Jesu den teni ba li ñoamabonli ki yedi ba, ke ban da waani oba wan tie yua.
Jesu pua saawali ke o baa kpe ki go fii
(Mat 16.21-23; Luk 9.22)
31Lanyogunu Jesu den bangi o ŋoadikaaba ke li tie tiladi o Joa Bijua n le fala boncianla, ke a nikpela leni bi kopadicianba yudanba leni li bali maama banda n yie o, ki teni ban kpa o. Ama o kuuma dataali po, o go baa fii bi tinkpiba siiga. 32O den kadi ki waani ba laa bonla. Pieli den piadi o, ki funi leni o. 33Ama Jesu den jigidi ki diidi yaa ŋoadikaaba n sieni, ki funi leni Pieli ki yedi: «Ña n puoli, Sutaani, kelima a yantiana naa tie U Tienu ya, ama bi nisaaliba yaa yantiana.»
O nilo n baa ŋoadi Jesu maama
(Mat 16.24-28; Luk 9.23-27)
34Lani, Jesu den yini ku niligu ke bi nagini o kani ki taani leni o ŋoadikaaba ke o yedi ba: «Yua n bua ki yaa ŋua nni kuli, wan yie o yuli, ki taa o dapoanpoanli ki bugi, ki nan yaa ŋua nni. #Mat 10.38; Luk 14.27. 35Yua n bua ki gaa o miali baa biani li. Ama yua n baa pa o miali n yaa po leni o Laabaaliŋamo po kuli, go baa baa li. #Mat 10.39; Luk 17.33; Jan 12.25. 36O nilo yaa baa ki diedi ŋanduna kuli ke o naano nan bodi, li baa ŋanbi o po be? 37O nilo baa pa be ki lebidi o naano? 38Yua n jie i fe n po leni n maama po bi naa niba, yaaba n tie tuonbiadi danba ki go conbi yeni siiga, o Joa Bijua mo baa jie laa nilo po i fe, o yaa ti cua o Baa kpiagidi nni, ki yegi leni yaa malekinba n gagidi ki ŋani yaa yogunu.»
Currently Selected:
Marki 8: BGP
Tõsta esile
Kopeeri
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.