Marki 7
7
Jufinba danbogida
(Mat 15.1-9)
1 Farisieninba leni li bali maama banda bi tianba, yaaba n den ñani Jerusalemi, den taani ki cua Jesu kani. 2Bi den laa ke o ŋoadikaaba bi tianba di leni i nijoagimi#7.2 Nekanba nijoagimi naa tie joaginfandi ka, ama li tie bogidili ke baa den kubi. Diidi Luki 11.38. kaa nidi. 3Li tie ke Farisieninba leni yaa Jufinba n sieni kuli kan je, kali ban kpa nidi bonŋanla, kelima bi ŋua bi maasuagu. 4Bi yaa go ñani ki daaga po ki kpeni, bi kan je kali ban kpa taa mi ñima, ki ŋanbi bi baa ki ñani li kuali. Bi go kubi danbogiditoana boncianla, nani ya n tie ne, mu tadiñokaamu, a cuana leni ti kumoandi tadimu kuli ŋuudima.
5Farisieninba leni li bali maama banda yeni den buali Jesu: «Be n teni ke a ŋoadikaaba ki kubi ti nikpiaba bogida, ki di leni i nijoagimi?» 6Jesu den guani ki yedi ba: «Yinba palalie danba, Esayi n den pua yi po yaa saawalo na tie moamoani. O den yedi:
‹Bi naa niba jigindi nni leni bi ñoacuuna,
Ama bi pala foagi leni nni. #Esa 29.13.
7Bi jaandi nni fanma fanma,
Ki bangi yaa bangima
N tie bi nisaaliba yaa mabilikaama bebe.›
8Yi ŋaa U Tienu bali maama, ki nan ŋua bi nisaaliba jaanma bogida.»
9O go den yedi ba: «Yin luni U Tienu Maama ki ŋua yi bogida yeni, 10Musa den yedi: ‹Jigini a baa leni a naa,› ki go yedi: ‹Yua n soli o baa yaa ka o naa, ban kpa o.› #Ñam 20.12; 21.17; Lev 20.9; Tia 5.16. 11Ama yinba, yi yedi ke o nilo yaa yedi o baa, bi o naa, ke wan den baa todi ba leni yaala tie yaa paabu n gagidi U Tienu po, ban yi yaabu “kolibana.” 12Lani, yi kan go tuo wan todi o baa bi o naa liba kuli. 13Yeni yi luni U Tienu Maama leni yin gaa yaa bogida, ki bangi nitoaba ban yaa tiendi yeni. Yi go kubi bontoala ke li yabi ki naani leni la.»
Yaala n joagindi o nisaalo
(Mat 15.10-20)
14Jesu go den yini ku niligu ke bi nagini o kani ke o yedi ba: «Yikuli n cengi mani nni ki bandi line. 15Laa tie yaala n ki ye o nisaalo nni kuli ka baa kua o niinni ki joagini o. Ama yaala n ye o niinni ki ña yeni, lani n joagini o. 16Yua n pia a tuba ki baa gbadi, wan gbadi.» 17Jesu n den fii ku niligu kani ki kua li dieli nni, o ŋoadikaaba den buali o mi kpanjama yeni bundima. 18O den yedi ba: «Yimoko, yii pia yanfuoma yo? Yii bani ke puu kuli ki ye niinpo ki baa kua o nilo niinni, ki fidi ki joagini o? 19Laa bonla kan kua o pali nni, ama o tugu nni, ki go baa ña.» Jesu n den yedi yeni, o den doagidi ke jiemiba kuli kan joagini o nilo. 20O go den yedi: «Yaala n ye o nisaalo pali nni ki ña, lani n joagini o. 21-22O nisaalo pali nne ke ti yanmaalibiadi ña. Lani n tie: Mi conconma buoli kuli, bu subu, mi kukpama, mi ŋalimanbuama, ku tugutongu, i janbi, ti tuonjoagindi tienma, li nunponbiadili, u nisugidu, ti japaadi leni mi yanpiima kuli. 23Laa bonbiadila kuli ña o nisaalo nni, ki joagindi o.»
Kanana buolu pua dandanli
(Mat 15.21-28)
24Jesu den fii lankani, ki gedi Tiiri tinbuoli nni. O den kua o candeni kaa bua oba kuli n bandi ke o ye likani, ama waa den fidi ke baa bandi. 25Yaa pua ke ki cicibiadiga den ye o bisalo niinni, den gbadi ke bi maadi Jesu maama. O den cua ki gbaani o taana kani. 26Laa pua den tie Gireki, Fenisi yua, Siiri diema yaa tinbuobiga. O den mia Jesu ke wan deli ki ñani ki cicibiadiga o bisalo niinni. 27Jesu den yedi o: «Cedi a bila n kpa je ki guo, kelima laa ŋani o nilo n taa a bila jiema, ki lu a sangbanbila.» 28O pua yeni den guani ki yedi o: «Yeni de! Canbaa, die yaa sangbanbila n laabi u saajekaanu kani, yen di a bila jejoagidi.» 29Jesu den yedi o: «Ŋan maadi yaa maama na po, fii ki kuni, ki cicibiadiga ñani a bisalo niinni.» 30O pua yeni n den ñani ki kuni o denpo, o den ban sua ke ki cicibiadiga ñani o biga niinni, ke o dua u duanu po.
Jesu paagi o womo
31Jesu den fii Tiiri tinga nni ki tagi Sidon, ki go lindi ki tagini Dekapoli diema, ki ñani ki ban caa Galile ñincianma po. 32Bi niba den cuani o kani o womo, ke mi maama pa o po. Bi den mia o ke wan maani o nii o po. 33Jesu den taa o ki piadi ki foagidi leni ku niligu, ki tuuni o nibila o womo tuba nni, ki go taa o ñinsandi ki sii o womo lanbu. 34Lani, o den yaadi ki noanli tanpoli po, ki fuo ki jiini ki yedi: «Efata,» lani tie: “Pigidi.” 35Lanyogunu liga, o womo tuba den pigidi, o lanbu mo n tabidi, wan ji yaa maadi bonŋanla. 36Jesu den yedi ba ke ban da maadi niloba laa bonla, ama wan den tua ban da maadi ki pugidi yo, ke bi mo den kpaani wan tieni yaala ki pugidi. 37Li den paki ba hali boncianla, ke bi tua: «O bontienkaala kuli ŋani. O tendi ba ke a woma gba, ke a muula mo maadi.»
Currently Selected:
Marki 7: BGP
Tõsta esile
Kopeeri
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.