Matie 8
8
Jesu cili o tuonli Galile diema nni
8—18
Jesu ŋanbi o gbaado
(Mrk 1.40-45; Luk 5.12-16)
1Jesu n den jiidi li juali po, bi niba boncianla den ŋua o. 2O gbaado den cua ki gbaani o nintuali ki yedi: «N Daano, a yaa bua, a baa fidi ki ŋanbi nni.» 3Jesu den tandi o nuu ki sii o ki yedi: «N bua, ŋanbi.» Lanyogunu o gbaadima den gbeni o po ke o ŋanbi. 4Jesu den yedi o: «Ŋan fangi a yuli ki da yedi niloba liba. Ama, gedi ki ban waani a yuli o kopadiciamo, ki padi Musa n den bili yaa padili, lan tua bi po siedi ke a ŋanbi.» #Lev 14.1-32.
Jesu paagi minteela kobiga yudaano naacemo
(Luk 7.1-10)
5Jesu n den kua Kafarnawum nni, minteela kobiga yudaano den tuogi o 6ki mia o ki yedi: «N Daano, n naacemo dua ke ti yianwabidi cuo o, ki go koani o boncianla.» 7Jesu den yedi o: «N baa cua ki paagi o.» 8Minteela kobiga yudaano yeni den guani ki yedi o: «N Daano, mii pundi ŋan kua n diegu nni, maadi mayenma bebe, n naacemo baa paagi. 9Mini yua ke toaba die nni, nmoko pia min die yaa toatieba. N yen yedi one: ‹Gedi,› wan gedi, ki yedi oyua mo: ‹Cua na,› wan cua. N yen yedi n naacemo: ‹Tieni line,› wan tieni.»
10Jesu n den gbadi laa maama, li den paki o, ke o yedi yaaba n ŋua o: «N waani yi i moamoani, baa yinba Isidayeli yaaba siiga, n daa laa yaa dandancianli n tie ne buolu. 11N waani yi i moamoani ke bi niba boncianla baa ña puoli leni nintuali kuli, ki cua ki taani ki kali leni Abalahama, Isaaka leni Jakob, u saajekaanu kani tanpoli diema nni. #Luk 13.29. 12Ama bi baa lu yaaba n bi baa yaa tie tanpoli diema yaaba yeni, niinpo li biigicianli nni, a bubula leni mi ñincegima n baa ye naankani.» #Mat 22.13; 25.30; Luk 13.28. 13Li yaa puoli, Jesu den yedi minteela kobiga yudaano: «A kuni, lan tua a po nani ŋan daani maama!» Lanyogunu liga o naacemo den paagi.
Jesu paagi a yiama boncianla
(Mrk 1.29-34; Luk 4.38-41)
14Jesu den gedi Pieli deni ki sua ke Pieli cuadinaa dua leni ti gbananbiendi. 15Jesu den sii o nuu ke o gbananbiendi kagidi o po, ke o fii ki gaa o cangu.
16Ku yenjuaboandigu, bi den cuani Jesu kani, cicibiadimu danba boncianla. O den maadi bebe ki deli ki ñani mu cicibiadimu yeni, ki go paagi a yiama kuli. 17O den tieni yeni ke o saawalipualo Esayi n den maadi yaa maama n tieni:
Wani o ba n den taa ti tadingu,
Ki tugi ti yiani. #Esa 53.4.
Yaaba n bua ki ŋoadi Jesu
(Luk 9.57-62)
18Jesu n den laa ke ku niligu lindi o, o den waani o ŋoadikaaba ban duodi ki gedi napo yaa boanjaali. 19Li bali maama banda siiga yendo den cua o kani ki yedi o: «Canbaa, n baa yaa ŋua ŋa ŋan caa naani kuli.» 20Jesu den guani ki yedi o: «I coli pia i fali, ti bonyugiditi mo pia a tiana, ama o Joa Bijua wani naa pia wan baa yaa dua naani.»
21O ŋoadikaaba siiga nitoa den yedi o: «N daano, pa nni u sanu min da kpa gedi ki ban piini n baa no.» 22Jesu den guani ki yedi o: «Yaa ŋua nni, ki cedi bi tinkpiba n piini biyaba.»
Jesu duani ku tafaaciangu
(Mrk 4.35-41; Luk 8.22-25)
23Jesu den kua ku ñinbiagu nni ke o ŋoadikaaba ŋoadi o. 24Ban den ye mi ñincianma nni, ku faabiadigu den fii ke a ñinguona fii ki baa milini ku ñinbiagu. Ama Jesu wani den dua ki goa. 25O ŋoadikaaba den nagini ki fundi o ki yedi: «Ti Daano, fii ki faabi ti, ke ti baa bodi.» 26O den yedi ba: «Be n teni ke yi jie nanda, yinba yaaba yaa dandanli n ki fuu?» Lanwani, o den fii ki sedi ki funi leni ku faagu leni mi ñincianma, ke likuli duani salam. 27Ti jawaandi den cuo o yegininlieba kuli ke bi yieni biyaba: «O tie ŋme yo, ke ba ku faagu leni mi ñincianma kuli tuo ki tieni wan yedi yaala?»
Jesu deli ki ñani mu cicibiadimu nibilie niinni
(Mrk 5.1-20; Luk 8.26-39)
28Jesu n den pundi napo yaa boanjaali, Gadala#8.28 Gadala: ama bi go baa fidi ki yedi Gerasi. yaaba dogu tinbianu nni, mu cicibiadimu danba bonbilie den ñani a takula po ki tuogi o. Bi den bia boncianla hali ke niloba kan den tuo ki tagini lipo sanu. 29Bi den tiani o po: «Be n ye tinba leni fini siiga, U Tienu Bijua? Naani a cua ne ki baa duoli ti ke u yogunu daa pundi yo?» 30Li den sua ke u duokuliciamu nagi likani ki gbi i moajiini. 31Mu cicibiadimu den miadi Jesu ki tua: «A yaa deli ti, ŋan cedi tin gedi ki ban kua u duokulu na niinni.» 32O den yedi mu: «Gedi mani.» Mu den ñani bi jaba yeni niinni ki ban kua i duoli nni. Lani, u duokulu kuli den digi mi joayidima po ki baa mi ñincianma nni ki bodi lienni. 33Yaaba n den kpaa ba den sani ki gedi ki ban waani u dogu po yaala n tieni kuli leni yaala n tieni mu cicibiadimu danba. 34Lane, u dogu nni yaaba kuli den ñani ki baa tuogi Jesu. Ban den laa o, bi den mia o ke wan ña bi tinga nni.
Currently Selected:
Matie 8: BGP
Tõsta esile
Kopeeri
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.