Matie 7
7
Ŋan da ja ti buudi
(Luk 6.37-42)
1Yin da ja ti buudi, ke U Tienu n da ti jia yimo yaa buudi. 2U Tienu baa bu leni yi nani yin bu leni yi nisaalilieba maama. O go baa taa yin biigidi nitoaba po leni yaa bonbiigikaala ki biigi yimo yaa po. #Mrk 4.24. 3Be n teni ke a nua yaa muagu n ye a lielo nunbu nni, ki naa nua yaa dajenli n caa a yaabu nni? 4Li gaa lede ke a baa yedi a kpiilo: ‹Cedi min ñani a po yaa muagu n ye a nunbu nni, ke li dajenli nan caa a yaabu nni?› 5Fini palalie daano, ŋan kpa ñani yaa dajenli n caa a yaa nunbu nni. Lani, a baa fidi ki le bonŋanla ŋan baa ñani ku muagu yeni maama a lielo yaabu nni.
6Da taa mani yaala n gagidi ki ŋani ki teni i sangbanli, ke ban da ti jigidi ki toadi toadi yi. Da taa mani yi laani, yii yaa dunga n pa ki lu i duoli, ke ban da ti ŋmaa ki piini yi.
Yaa miadi mani U Tienu
(Luk 11.9-13)
7Mia mani, bi baa pa yi, lingi mani, yi baa le. Pua mani bu buliñoabu kani, bi baa luodi yi po. 8Yua n mia kuli baa baa, yua n lingi kuli, o baa le, bi baa luodi yua n pua bu buliñoabu kani, ki bua ki kua kuli po.
9Yi siiga, ŋme yaa biga n baa mia o dupen, wan teni o li tanli? 10Bi o baa mia o o jamo, wan teni o o wa? 11Yinba yaaba n bia yaa bani ki pa yi bila li bonŋanla, laa pia kuli tama ke yi Baa yua n ye tanpoli baa pa yaaba n mia o li bonŋanla.
12Lani yaa po, yin bua bi niba n tieni yi po yaala kuli, yimo n tieni la bi po. Lani n tie li bali maama leni bi saawalipuaba kuli bangima. #Luk 6.31.
Yaa buliñoabu n miabi
(Luk 13.24)
13Kua mani yaa buliñoabu n miabi kani, kelima yaa buliñoabu n pia leni yaa sanu n pia kuli caa mi bodima po, yaaba n tagi lankani mo n yabi. 14Ama yaa buliñoabu n miabi leni yaa sanu n miabi kuli caa yaa miali n kan gbeni kani, yaaba n laadi laa sanu mo naa yabi.
Bu tibu leni bu bonluonkaala
(Mat 12.33-37; Luk 6.43-45)
15Fangi mani yi yula leni bi saawalipua-faadanba. Bi kpendi yi kani ki dingi nani i pe yeni, ama moamoani po, bi tie nani yaa fuasangbanbiadi n bua ki bolini yi yeni. 16Yi baa bandi ba bi bontienkaala kane. Naani yi baa sobidi i cabi ku konkongu po? Bi ki sobidi a kankana a kongoaba po? 17Yaa tibu n ŋani kuli baa luoni yaa bonluonkaala n ŋani, yaa tibu n ki ŋani mo baa luoni yaa bonluonkaala n ki ŋani. 18Yaa tibu n ŋani kan fidi ki luoni yaa bonluonkaala n ki ŋani, yaa tibu n ki ŋani mo kan fidi ki luoni yaa bonluonkaala n ŋani. 19Yaa tibu n ki luoni yaa bonluonkaala n ŋani kuli, bi baa pedi bu ki lu u mu nni. #Mat 3.10; Luk 3.9. 20Li tie bi bontienkaala kane ke yi baa bandi ba. #Mat 12.33.
Mii bani yi
(Luk 13.25-27)
21Yaaba n tua nni: ‹O Diedo, o Diedo,› bikuli ka baa kua tanpoli diema nni, se yaaba n tiendi n Baa yua n ye tanpoli yaa yanbuama. 22Li bujiali daali, bi niba boncianla baa yedi nni: ‹O Diedo, o Diedo, tii den wangi U Tienu maama a yeli po ka? Tii den deli mu cicibiadimu a yeli po ka? Tii go den tiendi mi bancianma boncianla a yeli nni ka?› 23Lane n baa kadi ki yedi ba: ‹Kalam, mii bani yi. Fuadi mani n kani, yinba yaaba n tiendi mi biadima.› #Ps 6.9.
A dielieda
(Luk 6.46-49)
24Lani yaa po, yua n gbadi min maadi yaa maama na, ki tiendi man yedi yaala, o baa yaa tie nani yaa yanfuodaano n den maa o dieli ku tangu po. 25Ki taaga den mini, a ñingola den puubi, ku tafaagu mo den figi ki pua laa dieli, ama lii den baa, kelima li den puu ku tangu po. 26Ama yua n gbadi min maadi yaa maama na, ki naa tiendi man yedi yaala, o baa yaa tie nani yaa yanluodaano n maa o dieli mi tanbiima nni. 27Ki taaga den mini, a ñingola den puubi, ku tafaagu den figi ki pua laa dieli, ke li den baa ki mudi mudi.»
Jesu bali
28Jesu n den maadi laa maama kuli ki gbeni, ku niligu den ye leni li pakili kelima o bangima po. #Mrk 1.22; Luk 4.32. 29O den bangi nani yua n pia li bali yeni. Waa den bangi nani li bali maama banda#7.29 Li bali maama banda yeni den ŋua bi nikpiaba bangima. yeni ka.
Currently Selected:
Matie 7: BGP
Tõsta esile
Kopeeri
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.