Matie 24
24
Jesu pua saawali ke bi baa bolini U Tienu diegu
(Mrk 13.1-2; Luk 21.5-6)
1Jesu n den ñani U Tienu diegu nni ki cuoni ki caa, o ŋoadikaaba den nagini ki baa waani o U Tienu diegu dieciama. 2Jesu den yedi ba: «Yi nua laa bonla kuli? N waani yi i moamoani, ke baa tanyenli kan sieni ki yaa maa liyali po. Akuli baa baa!»
Yaa fala n baa ti cua mi juodima yogunu
(Mrk 13.3-13; Luk 21.7-19)
3Jesu n den kaa Olivie Tiidi juali po, o ŋoadikaaba den cua bani bi bebe ki yedi o: «Waani ti laa bonla n baa ti cua yaa yogunu leni yaa sinankeene n baa waani ti a cuama leni ŋanduna juodima yogunu.»
4Jesu den guani ki yedi ba: «Fangi mani yi yula, ke niloba n da boandi yi. 5Bi niba boncianla baa ti cua n yeli nni ki yedi: ‹Mini n tie U Tienu n Gandi Yua.› Lani, bi baa boandi bi niba boncianla. 6Yi baa gbadi ke bi maadi bu toabu maama, ki go maadi bu toabu laabaalo maama. Da yagi mani yi yama, kelima laa bonla baa cua tiladi. Ama li da kan tua mi juodima ka. 7U nibuolu baa fii ki tuogi leni nibuoto, mi diema mo baa fii ki tuogi leni dietoama. Mi koncianma leni mi tindigibima baa yaa tiendi i kaantiami. 8Laa bonla kuli da tie nani u maditugukoanu cilima yene.
9Lanyogunu bi baa yaa wangi yi fala, ki go kpaani yi. I nibuoli kuli baa nandi yi kelima n yeli nni. #Mat 10.22. 10Li baa tua li tingbali bonla niba boncianla. Bi baa janbidi biyaba ki nandi biyaba. 11Bi saawalipua-faadanba baa fii boncianla, ki boandi bi niba boncianla. 12Mi biadima n baa pugini maama po, niba boncianla buama baa wadi. 13Ama yaaba n juuni hali mi juodima baa faabi. #Mat 10.22. 14U Tienu diema Laabaaliŋamo na n da baa kpa pundi ŋanduna nni kuli, ki tua siedi i nibuoli kuli po. Lani yaa pendi mi juodima baa cua.
Ti caginbiaditi
(Mrk 13.14-23; Luk 21.20-24)
15Lanwani, yi yaa ti laa ke yaa cagindi n baa wudi bi niba gbani ye u kaangagidiŋamu nni, o saawalipualo Danieli n den maadi yaadi yaa maama, yua n cogi n kpaagi bonŋanla. #Dan 9.27; 11.31; 12.11. 16Lanyogunu yaaba n baa yaa ye Jude nni n sani ki gedi a juana po. 17Yua n ye o doangu yuli po,#24.17 Jude nni bi den maa yaa diena n tie a dietanpoala, ki go yen maa a yuli po goanjenjenga ki gaani. Li po tie ban baa fidi ki kali ki boe, ki je, ki go duani naani. n da jiidi ki kua deeni ki baa taa yaa tiadi n ye lienni. #Luk 17.31. 18Yua n ye u kuanu po mo n da lebidi ki guani o denpo ki baa n taa o tiayiekaadi. 19Fala baa yaa ye leni yaa puoba n punbi leni yaaba n da ŋaandi laa dana nni. 20Mia mani U Tienu ke yi nuama n da tua ku fawaagu yogunu, yaa ka mi fuodima daali. 21Fala baa yabidi lanyogunu hali maama ke o buolu daa tieni ki cili ŋanduna cilima, ki pundi hali moala. O buolu kan go tieni mo. #Dan 12.1; Doa 7.14. 22U Tienu yàá bi wadi laa dana, nisaaloba kuli kan bi faabi. Ama wan gandi yaaba po, o baa wadi laa dana.
23Lanyogunu nilo yaa yedi yi: ‹U Tienu n Gandi Yua n ye ne,› yaa ka: ‹O ye napo,› yin da daani o maama. 24A tuonanda yaaba n yedi ke bi tie U Tienu n gandi yaaba leni bi saawalipua-faadanba baa fii ki yaa tiendi i sinankeenciami leni li bonlidinkaala, hali ke bi yaa bi baa fidi, bi baa boandi ba U Tienu n gandi yaaba moko. 25N tuodi ki waani yi laa bonla. 26Lanwani, bi yaa ti yedi yi: ‹O ye li fuali nni,› yin da gedi. Bi yaa ti yedi yi: ‹O wuo a diena nni,› yin da daani ma. #Luk 17.23-24. 27Nani mi tañigima n yen ña puoli ki yendi ki poandi ki gedi hali nintuali maama, o Joa Bijua cuama baa tua yene. 28Li bonkpienla n ye naani kuli, i kaabi baa taani lankane.#Luk 17.37.
O Joa Bijua cuama
(Mrk 13.24-27; Luk 21.25-28)
29Laa dana fala yaa pendi yaa yogunu, u yienu baa biigi, o ŋmaalo mo kan go yendi, a ŋmabila baa yaa ña tanpoli ki baali, tanpoli paaciami mo baa digibi. #Esa 13.10; 34.4; Esk 32.7; Jl 2.10; 3.4; 4.15; Doa 6.12-13. 30Lani, o Joa Bijua sinankeene baa doagidi tanpoli, ŋanduna nibuoli kuli baa mua. Bi baa le ke o Joa Bijua ye ti tawadi nni, ki kpendi leni u paalu leni ti kpiagiciandi. #Dan 7.13; Sak 12.10-14; Doa 1.7. 31O baa soani o malekinba leni kakaci, ban yaa piebi ki taani U Tienu n gandi yaaba ŋanduna kaannaadi kuli nni, ki cili napo yaa bianu ki yaa caa hali u poyuu.
Bu kankanbu kpanjama
(Mrk 13.28-31; Luk 21.29-33)
32Bandi mani bu kankanbu kpanjama n bangi yaala. Bu beni yaa faadi, ki cili ki bundi, yi bani ke ku siagu nagidi. 33Li go tie yene, yi yaa ti laa laa bonla kuli, yin bandi ke o Joa Bijua cuama nagini, ki ye yi buliñoana kani. 34N waani yi i moamoani, ke mi naa nifiima kuli kan pendi, ke laa bonla kuli ki tieni. 35Tanpoli leni ki tinga kuli baa pendi, ama n maama kan pendi abada.
U Tienu bebe n bani o Joa Bijua cuama yogunu
(Mrk 13.32-37; Luk 17.26-36)
36Oba kuli ki bani laa bonla n baa ti cua yaa daali leni yaa yogunu, ba tanpoli malekinba ki bani, ba Bijua, se Baa bebe. 37Lan den tie maama Nowe yogunu, li go baa yaa tie yene o Joa Bijua cuama yogunu. #Cil 6.5-8. 38Hali ki tabolinkaaga n daa den cua, bi nisaaliba den di ki go ñu, ki taani bi puoba, ki puuni bi bisiaba bi jaba, hali Nowe n den ti kua ku ñinbiaciangu nni yaa daali. 39Baa den faami liba kuli po, hali ki tabolinkaaga n den ti cua ki koadi bikuli. Li baa go yaa tie yene o Joa Bijua cuama yogunu. #Cil 7.6-24. 40Lanyogunu, nibilie baa ye u kuanu nni, bi baa taa yendo ki ŋaa yendo, 41puobilie baa yaa naani li naali nni, bi baa taa yendo ki ŋaa o lielo. 42Lani yaa po, yin yaa guu mani, kelima yii bani yi Diedo n baa cua yaa daali. 43Yin bandi bonŋanla ke o diedaano yaa bi bani o suudo n baa cua ku ñiagu yaa yogunu, o bi baa yaa guu ki kan cedi wan cibi o dieli. #Luk 12.39-40. 44Yeni, yimoko n bogini ki yaa guu, kelima o Joa Bijua baa cua yin ki daani o yaa yogunu.
O naacendugika leni o naacenbiado
(Luk 12.41-48)
45Ŋme n tie yaa naacendugika n pia mi yanfuoma, ke o canbaa guuni o o niba ke wan yaa tendi ba mi jiema li yogunu yaa pundi? 46Li pamanli ye leni laa naacemo, o canbaa yaa kpeni ki sua ke o tiendi yeni. 47N yedi yi i moamoani, o canbaa baa guuni o o piama kuli. 48Ama o yaa tie naacenbiado, ki yedi o pali nni: ‹N canbaa waagi mi kpenma.› 49O yaa cili ki pua o naacenlieba, ki di ki go ñu leni a dañogaada, 50laa naacemo canbaa baa kpeni wan ki daani o yaa daali leni wan ki faami yaa yogunu. 51O baa teni ban pua o hali ki poagili o, ki gedini o, ki ban taani o leni palalie danba, a bubula leni mi ñincegima n baa yaa ye naankani.
Currently Selected:
Matie 24: BGP
Tõsta esile
Kopeeri
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.