Matie 23
23
Jesu jaligi mi jaanma yudanba
(Mrk 12.38-39; Luk 11.43,46; 20.45-46)
1Li yaa puoli, Jesu den maadi leni ku niligu leni o ŋoadikaaba ki yedi: 2«Li bali maama banda leni Farisieninba pia li bali ki bangi Musa n den soagini yaa bali maama. 3Lanwani, yin yaa tuodi ki tiendi ban yedi yi yaala kuli. Ama yin da togidi bi bontienkaala, kelima bi maadi ki naa tiendi. 4Bi luo a tugikpiaga ki tungi bi niba, ki naa bua ki sii ba leni bi nubili. 5Bi tiendi bi bontienkaala kuli ke bi niba n le. Yeni yaa po yo ke bi yabindi bi bonyilikaala,#23.5 Jufinba yen dangi Musa bali maama bonjenmu, ki ŋuuni ban jabi ki yili bi ki pili yaala nni. ki go foagidi bi liadicuadi. #Mat 6.1; Coa 15.38; Tia 6.8. 6Bi yaa gedi mi jecianma kani, bi lingi ki kali yaa kaani n gagidi, ki go bua ki yaa kaa i nician-kalikaani, li bali maama bangima diena nni. 7Bi bua bi niba n yaa fuondi ki kpiagidi ba mu daamu nni, ki go yaa yi ba ‹Canbaa.› 8Ama yinba, yin da cedi ban yaa yi yi: ‹Canbaa,› kelima yendo bebe n tie yi Canbaa, yikuli mo tie kpiiba leni yiyaba. 9Yin da yini oba ki tinga nni yi baa, kelima yendo bebe n tie yi Baa, wani yua n ye tanpoli. 10Yin da cedi ban yaa yi yi: ‹Canbaanciamo,› kelima yendo bebe n tie yi Canbaanciamo, lani n tie U Tienu n Gandi Yua. 11Yi siiga nni yua n tugi li yuli baa yaa tie yi naacemo. #Mat 20.26-27; Mrk 9.35; 10.43-44; Luk 22.26. 12Yua n fiini o yuli kuli, U Tienu baa jiini o, yua n jiini o yuli mo kuli, U Tienu baa fiini o. #Luk 14.11; 18.14.
Jesu funi leni li bali maama banda
(Mrk 12.38-40; Luk 11.39-42,44,52; 20.47)
13Fala baa yaa ye leni yi, yinba li bali maama banda leni Farisieninba palalie danba, kelima yi luoni tanpoli diema kuama bi niba po. Yii kua yiba, yaaba n bua ki kua mo, yi kan cedi ban kua.
[14Fala baa yaa ye leni yi, yinba li bali maama banda leni Farisieninba palalie danba, kelima yi fenli a kpepuona diena, ki nan jaandi i jaandifoagi ki kpali ke yi tie jajaandimoana. Li tie lani yaa po, yi yaa buudi cuonu baa yaa bia ki cie.]
15Fala baa yaa ye leni yi, yinba li bali maama banda leni Farisieninba palalie danba, kelima yi duodi mi ñincianma, ki gaandi ki tinga nni kuli ki bua ki baa ba niyendo wan tua yi ŋoadika. Ama o yaa tua yi ŋoadika yeni, yi yen teni wan tua ku fantanbuogu yua, ki yaa ji bia ki cie yi taalimilie.
16Fala baa yaa ye leni yi, a gobidika-juama na, yinba yaaba n yedi: ‹Yua n poli leni U Tienu diegu, li kan cuo o, ama yua n poli leni U Tienu diegu nni yaa wula, li baa cuo o.› 17Bi yanluodanba leni a juama na, lile po n cie liyali, wula yeni bi U Tienu diegu yaagu n gagidi ki ŋanbi laa wula yo? 18Yi go yedi ke o nilo yaa poli leni li padibinbinli, li kan cuo o, ama yua n poli leni yaa padili n ye li padibinbinli po, li baa cuo o. 19Yinba a juama na, lile po n cie liyali, li padili yeni bi li padibinbinli yaali n gagidi ki ŋanbi li padile? 20Yua n poli leni li padibinbinli, poli leni lini leni yaala n maa li po kuli. 21Yua n poli leni U Tienu diegu poli leni kuni leni U Tienu yua n ye ku niinni kuli. 22Yua n poli leni tanpoli, poli leni U Tienu bali kalikaanu leni U Tienu yua n kaa upo kuli. #Esa 66.1; Mat 5.34.
23Fala baa yaa ye leni yinba li bali maama banda leni Farisieninba palalie danba, kelima yi coadi yaa kpinfaadi n yi menti, aneti leni kumini, ki ñandi li diim, ama yi fali li bali maama nni yaala n pia mayuli ki cie. Lani n tie ki yaa tiendi yaala n tiegi, ki yaa gba mi ninñima, ki yaa go tie nidugikaaba mo. Lani n tie yin bi pundi ki yaa tiendi yaala, ki nan da cedi yaala n sieni mo. #Lev 27.30. 24Yinba a gobidika-juama na, yi kaadi ki ñandi ki siiga, ki nan nali ku yuoyuogu.
25Fala baa yaa ye leni yinba li bali maama banda leni Farisieninba palalie danba, kelima yi yen ŋuudi ki tadiñokaaga leni ki taditialiga puoli po, ke mu tugu nni nan gbie leni yin fenli yaala yi bonbuaka-biadila po. 26Fini o Falisieni-juamo, kpa ŋanbi yaala n ye ki tadiñokaaga leni ki taditialiga tugu nni, lanwani mu puoli po moko baa ŋani.
27Fala baa yaa ye leni yinba li bali maama banda leni Farisieninba palalie danba, kelima yi tie nani ban pendi yaa takula ke a ŋani boncianla bi niba nuni po, ama ke a tugu nni nan gbie a tinkpikpaba leni joagindi buoli kuli. #JTT 23.3. 28Yimoko tie yene, bi niba nuni po yi ŋani, ama yi pala nni gbie leni i boandi leni mi biadima.
Jesu tuodi ki waani ke u cuonu ye
(Luk 11.47-51)
29Fala baa yaa ye leni yinba li bali maama banda leni Farisieninba palalie danba, kelima yi maa bi saawalipuaba po yaa takula n ŋani, ki ŋanbidi bi niteginkaaba mo yaa takula, 30ki nan yedi: ‹Ti yaa den ye ti yaajanba n den ye yaa yogunu, ti kan den taani leni ba ki kpa bi saawalipuaba ki wuli bi soama.› 31Yi tiendi yi yula po siedi ke yi tie yaaba n den kpa bi saawalipuaba. 32Lanwani, suagi mani ki dudi yi yaajanba n den cili ki tiendi yaala. 33Yinba, i we, u waalabi-buolu na, yi baa tieni lede ki sani ki faabi leni ku fantanbuogu cuonu? #Mat 3.7; 12.34; Luk 3.7. 34Li tie lani yaa po ke n tuuni yi po bi saawalipuaba, bi yanfuodanba leni U Tienu Laabaaliŋamo bangikaaba. Yi baa kpa bine, ki joani bine a dapoanpoana po, ki pua bine i baliji li bali maama bangima diena nni. Yi baa yaa ŋua ki wangi bine fala ban kua yaa dogu nni kuli, 35ke yaaba n ki den pia tagili soama yaama n den wuli ki tinga nni kuli, ki cili o niteginka Abeli soama, ki pundi hali Berekia bijua Sakari#23.35 Lani n tie o Sakarikpialo. Diidi Bi Badiba Jama Tilieli 24.20-22. yaa soama. Yi den kpa wani Sakari, U Tienu diegu nni u kaangagidiŋamu leni li padibinbinli siiga. Bikuli soama baa jiidi yi yaa yula po. #Cil 4.8; 2Baj 24.20-21. 36N kadi ki waani yi i moamoani ke lani kuli baa jiidi moala niba yula po.
Jesu maadi Jerusalemi po
(Luk 13.34-35)
37Jerusalemi, Jerusalemi, fini yua n kpa bi saawalipuaba, ki lugidi U Tienu n tuuni a kani yaaba a tana ki kpaani ba, taalimiŋa yo ke n den bua ki gobidi ki taani a niba nani o kooñua n yen ŋoagini o koobila o fiabi nni maama, ama a naa den bua. 38Lanwani, bi baa ŋa yi diegu diegbengu. #Jer 22.5. 39N waani yinba Jerusalemi yaaba, yi kan go le nni hali yin baa ti maadi n maama yaa yogunu ki yedi: ‹U Tienu n seligi yua n kpendi wani o Diedo yeli nni!› » #Ps 118.26.
Currently Selected:
Matie 23: BGP
Tõsta esile
Kopeeri
Compare
Share
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.