Números 25
25
Baal-peor diosta Israel runakuna adorayashqan
1Sitimcho taykarmi Israel runakuna moabita warmikunawan kakuyarqan. 2Saynöpis say warmikunami Israel runakunata pushayarqan sacrificiukunata rurar diosninkunata adorayänanpaq. Sayno pushayaptinmi Israel runakunapis moabita runakunapa diosninkunata adorayarqan. Nirkurmi diosninkunapaq churayashqan mikuytapis mikuyarqan. 3Baal-peor diosta#Apoc. 2.14. sayno adorayaptinmi Tayta Dios fiyupa rabyakur 4Moisésta nirqan: <<Israel runakunapa mandaqninkunata prësu sariykur lapan runa rikay nawpächo wanusiy. Saynöparaqmi rabyaynï päsanqa>>.
5Saymi Israel runakunapa juezninkunata Moisés nirqan: <<Trïbuykikunapita mayqanpis Baal-peor diosta adoraq aywaqtaqa wanusiyay>>.
6Sayno niptinmi lapan Israel runakuna Tinkuna Toldu patiucho waqaykäyarqan. Say hörami Moisés y wakin runakunapis rikaykäyaptin juk Israel runa mana penqakuypa madianita warmita toldunman yaykasirqan. 7Sayta rikaykurmi cüra Aarónpa wilkan y Eleazarpa surin Finees fiyupa rabyanarqan. Saymi shuntaraykäyashqanpita lanzanta aptakurkur 8aywarqan madianita warmita pushaykashqanpa qepanta toldun ruriyaq. Yaykurirmi muntanakush kaykaqta pachanpa tuksirirqan. Sayraqmi fiyu qeshyawan Israel runakuna wanuykäyashqanpita chawäyarqan. 9Say fiyu qeshyawanmi ishkay chunka chusku waranqa (24,000) runakuna wanuyarqan.
10Saypitami Moisésta Tayta Dios nirqan: 11<<Cüra Aarónpa wilkan y Eleazarpa surin Fineesmi pasaypa rabyanaynïta päsakäsish. Paypis noqanömi pipis jusalikuptinqa fiyupa rabyan. Jusayuqta wanusishqanpitami Israel runakunata chipyaq wanusishkäsu. 12Kanan Fineesta wilay paywan pactu rurashqäta. 13Pactuta rurarmi kikinta y paypita miraqkunata imayyaqpis cüra kayänanpaq churä. Noqata respitamar say jusayuq runata wanusishqanpitami Israel runakunapa jusankunata perdonashkä>>.#Sal. 106.30-31.
14Wanusishqan Israel runapa jutinmi karqan Zimri. Pay karqan Salupa surin y Simeón trïbupa mandaqninmi. 15Wanusishqan madianita warmipa jutinnami karqan Cozbi. Paymi karqan Zurpa surin. Zurnami karqan madianita runakunapa juk mandaqnin.
16Saypitami Moisésta Tayta Dios nirqan: 17<<Lapan madianita runakunata atacar wanusiyay. 18Paykunami Israel runakunata engañaypa shakyäsiyash Baal-peor diosninta adorayänanpaq. Saynöpis madianita runakunapa mandaqninpa surin Cozbi mana penqakuypami lapanpa nawpancho Zimripa toldunman yaykush paywan kakunanpaq. Say warmitami wanusish Israel runakunata fiyu qeshyawan wanuykäsishqä höra>>.
Actualmente seleccionado:
Números 25: qvhB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
© 2003, Wycliffe Bible Translators, Inc. All rights reserved.
