Nehemia 11
11
De Trigjwaundrunk no Jerusalem un de List von de Enwona
1De väaschte Lied vom Volkj wonden aul en Jerusalem. Oba daut äwaje Volkj deed lossen, wäa von jieda tieende Famielje, no de heilje Staut Jerusalem trakjen sull, om doa to wonen. De aundre näajen Famieljes kunnen en äare Städa un Darpa bliewen. 2Un daut Volkj säajend aule Mana, dee friewellich no Jerusalem trocken.
3Dit sent de väaschte Mana von de Launtschoft Juda, waut en Jerusalem wonen; oba en de Städa von Juda wonden see, een jiedra opp sien Oafgoot: De Israeliten, Priesta, Leviten, Tempeldeena un de Nokomen von Salomo siene Deena.
4En Jerusalem wonden eenje vom Staum Juda un eenje vom Staum Benjamin. Von Juda siene Nokomen: Ataja, Usija sien Sän, Usija wia Secharja sien Sän, Secharja wia Amarja sien Sän, Amarja wia Schefatja sien Sän, Schefatja wia Mahalalel sien Sän, un Mahalalel wia eena von Perez siene Nokomen. 5Un Maaseja, Baruch sien Sän, un Baruch wia Kolhose sien Sän, Kolhose wia Hasaja sien Sän, Hasaja, wia Adaja sien Sän, Adaja wia Jojarib sien Sän, Jojarib wia Secharja sien Sän, un Secharja staumd von Juda sienen Sän Schela auf. 6De Nokomen von Perez, waut en Jerusalem wonden, wieren aules toop 468 kjrichsfäje Mana. 7Vom Staum Benjamin wia: Salu, Meschullam sien Sän, un Meschullam wia Joed sien Sän, Joed wia Pedaja sien Sän, Pedaja wia Kolaja sien Sän, Kolaja wia Maaseja sien Sän, Maaseja wia Itiel sien Sän, un Itiel wia Jeschaja sien Sän. 8Un dan noch siene Breeda Gabai un Salai. Aules toop wieren see 928. 9Un Joel, Sichri sien Sän, wia äa Leida, un Juda, Senua sien Sän, wia aus tweeda äwa de Staut aunjestalt.
10Von de Priesta wieren: Jedaja, Jojarib, Jachin, 11Seraja, Hilkija sien Sän, Meschullam sien Grootsän. Meschullam wia Zadok sien Sän, Zadok wia Merajot sien Sän, un Merajot wia Ahitub sien Sän, de väaschta em Gotteshus, 12un siene Breeda, waut em Tempel deenden wieren 822; Adaja, Jeroham sien Sän, dee Pelalja sien Sän wia, Pelalja wia Amzi sien Sän, Amzi wia Secharja sien Sän, Secharja wia Paschhur sien Sän, un Paschhur wia Malkija sien Sän. 13Un met siene Staumbreeda toop, wieren see 242 Gruppenleida. Un Amaschsai, Asarel sien Sän, un Asarel wia Achsai sien Sän, Achsai wia Meschillemot sien Sän, un Meschillemot wia Immer sien Sän. 14Un met äare Breeda toop, wieren see 128 stoakje Kjrieja; un äa väaschta wia Sabdiel, Hagedolim sien Sän.
15Von de Leviten wia: Schemaja, Haschub sien Sän, un Haschub wia Asrikam sien Sän, Asrikam wia Haschabja sien Sän, un Haschabja wia Bunni sien Sän. 16Un Schabetai un Josabad, de Gruppenleida von de Leviten, wieren veauntwuatlich fa dän butaschten Deenst aum Tempel. 17Un Matanja, Micha sien Sän, dee Sabdi sien Sän wia, un Sabdi wia Asaf sien Sän, dee haud biem Jebäd un biem Dankleeda sinjen auntostemmen. Un de tweeda von siene Breeda en disen Deenst wia Bakbukja, un Abda, Schamua sien Sän un Galal sien Grootsän, een Nokomen von Jedutun. 18Aules toop wonden doa 284 Leviten en de heilje Staut.
19De Puatenwajchta: Akub un Talmon un äare Breeda, waut de Puaten bewoaken deeden, wieren aules toop 172.
20Oba de äwaje Israeliten, de Priesta un Leviten, bleewen en aule Städa von Juda wonen, een jiedra opp sien Oafgoot. 21Un de Tempeldeena wonden aum Ofel en Jerusalem. See oabeiden unja de Oppsecht von Ziha un Gischpa. 22Oba de väaschta von de Leviten en Jerusalem wia Usi, Bani sien Sän, dee Haschabja sien Sän wia, Haschabja wia Matanja sien Sän, un Matanja wia Micha sien Sän, dee een Nokomen von Asaf wia, dee met Musikj un Jesank em Gotteshus jedeent haud. 23Wiels daut jeef eene Aunordnunk vom Kjennich fa an un eene fauste Räajel, aun woonen Dach een jiedra to sinjen haud.
24Petachja, Meschesabel sien Sän, von Serach siene Nokomen, ut däm Staum Juda, stunt däm Kjennich en aulem met Rot bie, wua daut om daut Volkj jinkj.
De List von de Wonstäden buta Jerusalem
25Eenje vom Staum Juda wonden buten en de Wonstäden opp äare Weidstapen en Kirjat Arba un de Darpa waut doatoo jehieeden, en Dimona un de Darpa waut doatoo jehieeden, en Kabzeel met de Wonstäden doatoo, #Jos 20,7 26un en Jeschua, Molada, Bet Pelet, 27Hazar Schual, un Beerscheba met de Darpa toop, 28en Ziklag un Mechona un äare Darpa, #Jos 15,31 29en Enrimmon, Zora, Jarmut, 30Sanoach, Adullam un äare Wonstäden, en Lachisch un äare Stapen, un en Aseka un de Darpa waut doatoo jehieeden. Soo besiedelden see äa Launt von Beerscheba em Sieden bat daut Hinnom Tol em Nuaden.
31De Nokomen von Benjamin oba wonden en Geba, Michmas, Aja, Betel un de Darpa waut doatoo jehieeden, #Jos 18,22 32un en Anatot, Nob, Ananja, 33Hazor, Rama, Gittajim, 34Hadid, Zeboim, Nebalat, 35Lod un Ono un em Tol von de Hauntoabeida.
36Un von de Leviten jeef daut Aufdeelungen en Juda uk en Benjamin.
Actualmente seleccionado:
Nehemia 11: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.
