Génesis 3
3
Adán futan Evapan Diosi nicacasmaquin
1Nan nocon Ifo Diosin nantifi yoinafo oni huani. Ronofin fasi fuparamitsamisicoin iniquin. Rato yoina a cuscaranma. Nan rono ainfoqui oshon yocani.
—¿Iconmun, “Nantifi fimi mau mamaquinoa man pitiomaran,” ishon Diosin mato yoiamun? —ishon yocaiton.
2Nan ainfoan cumani, —Nonfin nantifi fimi pitiroquin. 3Ascafia, “Nan mau nushmancayan nia futsa piyamafain manricai mutiroma. Nan muashu man natiroran,” ishon Diosin noco yoiaran, —ishon Eva yoini.
4Ascaiton ronon afanan Eva cumani, —Ma. Na fimi piashucaico man natiocufi. Tsoatsi fimi piashu namiscun. 5Diosifin tapiaquin min na fimi pishon ahuamamishti min tapitiro. Ascashu nan Diosi cuscaracoin min itiroquin. Ahuara shara tapifain chacari min tapitiroquin, —ishon ronon yoiaiton.
6Nicaquin foisquin oian fimi sharashtacoin ini. Ascashon ahuun nomuran shinanquin, —Na fimi pishon raca ahuara sharafo onanmisi un itirocati, —ishon shinanni. Ascashon fiitan pishon funu nanno oinaino arifi pimani. 7Asca huatan onanriscatanifo. Nantia shinanriscatanifo chitoriacashon. Ascashon ihui higuera ahuun pui cuonti huashon sahuunifo.
8Nantia nicafo nocon Ifo Diosin mau mamaqui oaino fuu sharafuranaiton nicai aqui rafipaicani ihui cachori onunifo. 9Ascaiton nocon Ifo Diosin cunaquin, —¿Adan, ahuuscai min uqui onupaimun? —huaiton.
10Adán cumani, —Min oaiton nicain un ratui onua ua mian chitoria ointiroran, —ishon cumani.
11Ascaiton nocon Ifo Diosin yocani, —¿Tsoan mia yoiamun min chitoria? ¿Man manmun na fimi pia? Naan piyamaquin un mato huafia, —ishon yoiaiton.
12—Munfin piaquin. Nan na ainfo mian inantofin ua aaquinaqui, —huaiton.
13Ascaiton nocon Ifo Diosin ainfo yoiquin isca huani, —¿Ahuuscaquimun min piaquin? —huaiton.
—Nan ronon ua paraitofin un acaquin, —huani.
14Nantia nocon Ifo Diosin rononhuan yoini,
—Min ato chaca huamahuunoashu nantifi chacai futsucani. Yoina futsafo chaca icai cusca mincaifin fasi chaca finacaia iishquicain.
Natiafin min sinocomucahuancacaimisi. Nantishotapiquin mai mapo muran min sinocomupacunaca.
15Nan un mia yoiai cuscafin ainfo fu min noincasmatananpacunacaquin. Nan chipo oniafo furifin min noincasmatananpacunacaquin. Min ato tau chichoco nasaiton mia mapo coshapacunacaforan,
—ishon yoini.
16Ascashon ainfori yoiqui isca huani,
—Min facu cainquin min isin mui omitsiscanonpacoicain. Nan omitsiscafiaquiri min funu min fuchipainonpacoicain. Min fununri mia yonopacunacaquin, —huani.
17Ascashori Diosin Adán yoini, —Un mia yoia “nan fimi fusti min pitiromaran,” un mia huafia ua nicatamarocon min ahuin min nican.
Ascan mihuunfin nuaquin un natianfin mun mai chacana huaicain. Minfin piishquin curushcain yonoi omitsiscapanacaquin.
18Nan min mau ano moshafo foaicain nahuan faquisifo foaishquin. Min mau ano fanashon min pitiro.
19Min yonoifin niscamanhuancain yonoicain tushu piishquin nan min naitian. Un mia mai oni huani.
Ascan nan min naitian afanan min mai onishquiran, —ishon Diosin yoini.
20Ascashu nan Eva nantifi manifotiton aton shuni. Aton uhua cuscara. Ascacun Adán ahuin anuni “Evaran,” huani. 21Ascano nocon Ifo Diosin Adán yafi ahuin yoina rutushon ahuun fichi ato sahuuti huashon sahuumani. 22Asca huatan nocon Ifo Diosin yoiquin isca huani, —Natian nocofunu man noco cuscara ica. Ahuara shara tapifain ahuara chacari tapian. Ascan nan fimi futsan ahuun anu nan piashu yora nipatiro. Ascacun na mau Edén muranshon non ato nichitiro nan fimi pinonfomaran, —ishon Diosin yoini.
23Ascashon nocon Ifo Diosin Adán yafi Eva nan mau Edén anoshon mai futsa nichini anoshon mau huanon. 24Ascashon Diosin ahuun oinmati nichini nan mau Edén anoashu chi sanacufainon nopu cuscaran. Afanan tsoa Edén muran iquinonma nan fimi piashu nipatiro pinonfoma.
Actualmente seleccionado:
Génesis 3: mcd
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2008, Wycliffe Bible Translators, Inc. All rights reserved.