Génesis 4
4
Caín yafi Abel
1Ascano nan nocofunu Adán ahuinin Eva facu nanuqui tau huani. Ascashu furonanfacu cainni. Caíncun anuni, “Caínran,” huani. Ascashon Evapan yoini, —Natian un furonanfacuya. Nocon Ifoan ua inanran, —ishon yoini. 2Ascan afanan chipo facu nanuni. Naan caincuri anuni, Abel. Naan Caín ahuun ushto. Nan Abel pushcohuaitian chashoanfo cushumisi ini. Ascan ahuun ochi Caín mau yonomisi ini.
3Chipori iyoa Caín nan yonofo fana cuscan nocon Ifo Diosi inanni. 4Nantiari Abel ahuun chashoan facu cain taua sharashtacoin nocon Ifo inanni. Ascashon Abel inan cuscan oin nocon Ifo Diosin aqui unimacoinni. 5Ascafia Caín inan cuscan oincai Ifon Diosin aqui unimanima. Ascaino Caín fasi sinaquin ahuun fuso fuchopi huaqui futsani. 6Ascaiton nocon Ifo Diosin yoini, —¿Caín, ahuuscai min sinaimun? Min fuso oinquin un tapitiro min sinai. 7Ascan min shara huano un miqui unima cuana. Min isharayamaino man chaca itishara chacapan mia ifo huashquin. Ascafia min chaca finonmatiro chaca huatamarocon min shara itiroran, —ishon Ifon Diosin yoini.
8Ascano Caín chipo ahuun ushto Abel yoini, —Non mau ano canon, —huani. Ascashu Abel iyoa Caín fu mau ano cacun iyoaton coshaqui futsaquin rutuni. 9Nantia nocon Ifo Diosin Caín yocani, —¿Caín, ranimun ushto? —huaiton. —Utsan. ¿Unmun uhuun ushto cushumisi? —ishon cumani.
10Nocon Ifo Diosin yoini, —¿Ahuuscai min ushto rutuamun? Min ushto mai huafia ahuun imi foaiton un oian. Ahuun imi foaiton min ushto ua yoi cafisca hua, “Uhuun ochin ua rutua. Ascacun uhuunshon uhuun ochi min onaintimatiroran,” ishon ua yoiaquin. 11Ascan natian un mia onaintimai min chaca iiquin. Min afanan nuno na mai ano itiroma. Man min ushto rutua. Unfin nunoshon mia mai futsa ano nichicain. 12Nanno min mau huafia yonofo foaisharashquima. Ascashu min cahuacacaifiaquicai min tunushquimaran, —ishon nocon Ifo Diosin Caín yoini.
13Nannori huaiton nicain Caín nocon Ifo Diosi cumani, —Ohua. Mian fasi onaintimai cuscacai un tunutiroma. 14Na shafatan mian nunoshon potaino un maitio cahuacacainicai un afanan mi fu itiroma. Tsoaran ua fuchishon ua rutushquiran, —ishon yoiaiton.
15Afanan nocon Ifoan cumani, —Ma. Tsoan mia rutua nancaifin un onaintimaquin finacoincain, —ishon nocon Ifo Diosin yoini. Asca huatan nocon Ifoan Caín aqui cunu nutani ahuun onanti huati tsoan fuchifiashon rutunonma. 16Ascashu Caín nocon Ifo anoashu cani. Mai futsa ano noconi ahuun anu Nod. Nan mau Edén fari oaiquiri Nod ini.
Caín funafohuunoa
17Ascashu Caín arifi ahuinyatian ahuinin facu nanuni. Naan facu caiantian anuni Enoc. Ascashon Caín ahuun facufoyashon chipo pushu rasi huaquin tau huani. 18Nan Enoc facuri Irad ini. Irad ahuun facu Mehujael ini. Mehujael ahuun facu Metusael ini. Metusael ahuun facuri Lamec ini. 19Nan Lamec ahuin rafuya ini. Ahuin futsan ahuun anu Adá. Ascan futsan ahuun anuri Zila ini. 20Ada facu nanuashu furonanfacu cainni. Ascacun anuni Jabal. Nan Jabal ahuun funafo pano pushu muran icain moifo yafi chashoanfori pushcopaonifo. 21Ascan nan Jabal ahuun ushton anu Jubal ini. Jubal ahuun funafoanri atirifiton manuti rafu futsan ahuun anu arpa guitarra cuscara futsan shainti tapicoianfo ipaoni. 22Ascashon Zilapan arifi facu nanuni. Nan caincun anuni Tubal-cain. Nanton Tubal-cain arifi nopu yafi rurati ahuun yonotifo onihuapaoni. Nan bronce ahuun cuno curushcoin yafi hierro onihuapaoni. Nanton ahuun chicon anuri Naamá ini.
23Ascano shafan futsa Lamec ahuun ahuin rafu yoini isca huaquin, —Un mato yoiai cusca ua nicasharacahuun. Nocofunun ua rutuqui chaca huacun un copiquiri rutucoian. Ascan pushcopan arifi ua sutucun nanrifi mun rutucoian. 24Nocon shuni Caín futsan rutucun mucu fustiti yafi mucu foshca rafuti huaqui Diosin onaintimatiro. Asca futsan ua chaca huacun unfin ato setenta y siete veces huaquin curushcai copishquiran, —ishon Lamec yoini.
Adán futan Evapan facu chipocun Sethuunoa
25Ascano Adán chipo afanan ahuin Eva futan facu ani. Nan Abel ahuun shocun. Nanrifi caian furonanfacu ini. Ascan Evapan yoini, —Caín uhuun facu Abel man rutuniano uncai natian afanan facu yama. Ascafia natian Diosin ua facu futsa inan. Ascacun un anuquin Set huairan, —ishon yoini.
26Ascano Setpan ahuun ahuin facu nanua nocofunu cainni. Nan caincun anuni Enós. Nan Enós cainnitian yorafoan tau huaquin nocon Ifo Diosi ahuun cufinpaonifo a fu tsainshquin.
Actualmente seleccionado:
Génesis 4: mcd
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2008, Wycliffe Bible Translators, Inc. All rights reserved.