Génesis 2
2
1Ascano Diosin nai yafi mai non nantifi ahuamamishti onihuaquin anaitini. 2Ascashon mucu fustiti yafi mucu foshca fustiti oshatan yononi. Iyoconaino yonoqui anaititan tununi. 3Ascatan Diosin nan mucu fustiti yafi mucu foshca rafu oshatan yoiquin isca huani, —“Tunutitianran,” huafain nan shafatari ua shinanonpacocani. Nan shafatamain un yonoqui ahuamamishti onihuaquin anaitishon un tunuyamacufin, —ishon Diosin yoini.
4-5Ascatan nanscacoin huaquin nocon Ifo Diosin nai yafi mai onihuani.
Nocofunun Adán mau ahuun anu Edén ano ini
Ato oni huatiancai nocon Ifo Diosin yonofo onihuatai inima. Ascashon mai anoricai oi fumatai inima. Tsoaricai mau ano yonoatai inima. 6Ascafia Diosin nan maitio mai muranshon unu fomani mai muchana huanon. 7Ascatan nocon Ifo Diosin mai fishon yora huaquin futsashon nocofunu onihuani. Asca huatan ahuun ruchocoqui ashaitanaino nocofunu shacaina cahuani ninon. Ascatan Diosin nocofunu oni huaquin tau huaniquin.
8Asca huashon nocon Ifo Diosin nan fari oaiquiri mau ano fanashon. Nan nocofunu oni huatan mau ano nichini. Ascashon nan mau anuquin, “Edénran,” huani. 9Ascatan nocon Ifo Diosin fana futsa futsatapafo oni huashon fanani. Ahuun fimi piatio sharafo yafi fimi sharamishti futsa cuscarafori fanani. Ascashon nan mau nushmancayacoin ihui nia rafu fanani. Futsa piashu non ipatiro fanafain futsa pishon non ahuara shara yafi chaca onantiro fanani.
10Nan mau Edén anoashu unu afaiton fanafo muchana huani. Nannori unu rafu non rafuri tohuaica ini. 11Ascan nan unu tohuaiqui tauaton ahuun anu Pisón. Nanton Havila maitio tarati huaa. Nannori oro ini. 12Nan mai anori oro sharashtacoin non ihui fupo inin sharacoin non toquiri sharashta ahuun anu onice ini. 13Ascan unu tohuaica futsan ahuun anu Gihón. Nanton Cus maitio tarati huaa ini. 14Nan unu tohuaica futsan ahuun anuri Tigris. Naan mai Asiria fari oai naman afain. Nan unu futsan ahuun anuri Eufrates.
15Ascashon nan mau Edén ano nocon Ifo Diosin Adán nichini mau ano orofain cushusharanon. 16Ascatan Diosin Adán yoiquin isca huani, —Naan na fana nantifi ahuun fimi min pitirosharafo. Naanfo pihuu. 17Ascan nan fana futsan ahuun anu shara yafi chaca nan piyamahuun. Ascan nicayosmacai nan fimi piashuforan nan icocoin min nairan, —ishon yoini.
18Ascashon nocon Ifo Diosin afanan yoini, —Adán arus icacai sharamafinquin. Unfin afu rafua onihashoicai a futan ahuara nan yopai cusca a fu anon, —ishon yoini. 19-20Ascashon maiyashon yoina futsa futsatapafo yafi puiya nai muran noyamisifori oni huani. Naanfo onihuapashon Diosin Adán shinanmaqui ihuuni ato anupacunon. Nantia Adán yoina futsa futsatapafo yafi inafo non puiyafori anupacuni. Asca huatan Diosin oiancai rato yoina futsa nocofunu fu rafutiro inima. 21Ascashon nocon Ifo Diosin Adán oshan muranmacoinshon ahuun pishi shao futsa tsucashon ahuuscama ointsa huani. 22Ascatan nan pishi shaohuunoa ainfo oni huani. Nan ainfo oni huashon Diosin Adán oinmani.
23Ascaiton oinquin Adán yoiquin isca huani, —Diosifin mia uhuun nami yafi uhuun shaohuunoa oni huaquin. Ascacufin un mia ainforan huaicai miafin uhuunoa Diosin oni huaquin, —ishon yoini.
24Nan nocofunun ainfo fiatiancai afanan apa yafi ahua fu itiroma. Apa yafi ahuamaquinoashu pashcatiro ainfo fiiashu. Ascashu nan fusti cuscaran iishquin.
25Ascan Adán yafi ahuin chitoriafiashucai tsoa rafipainifoma.
Actualmente seleccionado:
Génesis 2: mcd
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2008, Wycliffe Bible Translators, Inc. All rights reserved.